Ngaba Ubusazi?

Kwakutheni ukuze uPontiyo Pilato oyike akuva ukuba uYesu ‘wayezenza unyana kaThixo’?—Yohane 19:7.

Emva kokufa kwakhe uJulius Caesar indlu yeengwevu yaseRoma yamenza uthixo. UOctavian owakhuliswa nguJulius Caesar nowangena ezihlangwini zakhe wabizwa ngokuba ngudivi filius “uNyana kaThixo.” Esi sibizo sesiLatin ligama ababizwa ngalo abalawuli baseRoma. Esi sibakala sixhaswa luthotho lwemibhalo yaseRoma esezibingelelweni, ezitempileni, kwimifanekiso eqingqiweyo nakwiingqekembe. Xa amaYuda amangalela uYesu ngokuzenza “unyana kaThixo” ayemtyhola ngokusebenzisa kakubi isibizo esasilingana nokungcatsha.

Ngexesha lokumangalelwa kukaYesu, uTibheriyo wayebizwa ngeli gama. Lo mlawuli wayedume ngokubulala nabani na awayecinga ukuba lutshaba lwakhe. Xa amaYuda athi kuPilato uya kube akanyanisekanga kuKesare ukuba akamgwebi uYesu, irhuluneli yaseRoma “yagubha kukoyika.” Ekugqibeleni yanikezela yaza yayalela ukuba uYesu abulawe.—Yohane 19:8, 12-16.

Kwakutheni ukuze uZekariya aprofete ngokutshatyalaliswa kweTire ekubeni yayisele itshatyalalisiwe ngamaBhabhiloni?

ITire yamandulo yayime kuNxweme lolwandle lweMeditera, isixeko sayo sasineenxalenye ezimbini. Esinye sasisemhlabeni esinye sisesiqithini.

Ngaxa lithile abantu baseTire babenobuhlobo namaSirayeli. Kamva iTire yaba sisityebi yaza yavukela uYehova uThixo kangangokuba yade yeba igolide nesilivere eyayisetempileni yakhe yaza yathengisa nabantu bakhe ebukhobokeni. (Yoweli 3:4-6) Oku kwaphumela ekubeni uYehova ayitshabalalise iTire. Abaprofeti bakaYehova baprofeta ngokuba iTire yayiza kutshatyalaliswa nguKumkani uNebhukadnetsare waseBhabhiloni, owayihlasela emva kokutshabalalisa iYerusalem ngowama-607 B.C.E.—Isaya 23:13, 14; Yeremiya 27:2-7; Hezekile 28:1-19.

Emva kokuba boyisiwe abantu baseTire babaleka nezinto zabo baya esiqithini. AmaBhabhiloni asishiya siyingqushu isixeko esasakhiwe emhlabeni. Emva kweminyaka engama-200, uYehova waphefumlela umprofeti uZekariya ukuba avakalise umgwebo wakhe nxamnye neTire: “Khangela! UYehova uya kuyihlutha, yaye ngokuqinisekileyo umkhosi wayo wamajoni uya kuwuxabela elwandle; yona iya kuqwengwa ngumlilo.”—Zekariya 9:3, 4.

Ngowama-332 B.C.E., isixeko esisesiqithini satshatyalaliswa nguAleksandire Omkhulu ngaloo ndlela ezalisekisa isiprofeto sikaZekariya. Ukuze akwazi ukuhlasela esi sixeko sasisesiqithini uAleksandire wakha indlela ngamatye namaplanga esasixeko sasitshatyalaliswe nguNebhukadnetsare. Naso esi siganeko sasixelwe kwangaphambili nguHezekile.–Hezekile 26:4, 12.

[Umfanekiso okwiphepha 27]

“Ukungqingwa kweTire”

[Inkcazelo]

Drawing by Andre Castaigne (1898-1899)