Imibuzo Yabafundi
Ngaba Umhlaba Uza Kusinda?
Isijikelezi-langa sethu esinguMhlaba asizi kutshatyalaliswa yiyo nayiphi na intlekele. Yintoni esenza siqiniseke? Ngenxa yokuba uThixo uthembisa ukuba umhlaba “awuyi kushukunyiswa ukusa kwixesha elingenammiselo, okanye nangonaphakade.” (INdumiso 104:5) IBhayibhile ithi: Nangona “kumka esinye isizukulwana, kufike esinye isizukulwana; kodwa umhlaba umi ixesha elingenammiselo.”—INtshumayeli 1:4.
Ukuze kubethelelwe isibakala sokuba umhlaba awuyi ndawo kwiNdumiso 104:5 kusetyenziswe amagama amabini esiHebhere santlandlolo—elithiʽoh·lamʹ ukubhekisela “kwixesha elingenammiselo” nelithi ʽadh ukubhekisela “kunaphakade.” Igama elithi ʽoh lamʹ linokuguqulelwa ngokuthi “iminyaka emininzi” okanye ngokuthi “into engenasiphelo.” Ngokutsho kweHarkavy’s Students’ Hebrew and Chaldee Dictionary, igama elithi ʽadh lithetha “ubude bexesha, unaphakade.” La magama mabini esiHebhere ayasiqinisekisa ukuba umhlaba awuyi ndawo. Zikho nezinye izizathu ezithathu ezibangela sikholelwe ukuba umhlaba uya kuhlala ukho ngonaphakade.
Okokuqala, uThixo wawudala umhlaba ukuba umiwe ngabantu—ube nohlaza oluhle, ube yiparadesi, kungekhona indawo engenabantu. UIsaya 45:18 xa ethetha ngoYehova uthi: “UYehova, uMdali wamazulu, uThixo oyinyaniso, uMyili womhlaba noMenzi wawo, owuzinzise ngokuqinileyo, nongawudalelanga ilize, kodwa owawubumba ukuba umiwe.”
Okwesibini, uThixo wathembisa ukuba abantu abamthobelayo baya kuphila ngonaphakade emhlabeni beseluxolweni. UMika 4:4 uyathembisa: “Okunene baya kuhlala, ngamnye phantsi komdiliya wakhe naphantsi komkhiwane wakhe, yaye akuyi kubakho bani ubangcangcazelisayo; kuba wona kanye umlomo kaYehova wemikhosi ukuthethile oko.” Ngokutsho kwesithembiso sikaThixo, umhlaba ufanele uhlale ukho ngonaphakade njengekhaya loluntu okanye ukuba akunjalo isithembiso sakhe siya kuba lilize.—INdumiso 119:90; Isaya 55:11; 1 Yohane 2:17.
Okwesithathu, uThixo unike abantu imbopheleleko yokuba banyamekele umhlaba. ILizwi likaThixo lithi: “Wona ke amazulu, ngamazulu kaYehova, kodwa umhlaba uwunike oonyana babantu.” (INdumiso 115:16) Ngab’ ingenzeka into yokuba ubawo onothando athi sele ephe umntwana wakhe isipho esihle aphinde asehluthe asitshabalalise? Ayinakwenzeka loo nto! Ngendlela efanayo, uYehova akasayi kuyenza loo nto emhlabeni nakubemi bawo, kuba “uThixo uluthando.”—1 Yohane 4:8.
UYesu Kristu uyasiqinisekisa ngokuphathelele into ethethwe nguYise, esithi: “Ilizwi lakho liyinyaniso.” (Yohane 17:17) UThixo ongenakuxoka uthembisa esithi: “Amalungisa aya kuwudla ilifa umhlaba, ahlale kuwo ngonaphakade.”—INdumiso 37:29; Tito 1:2.
[Inkcazelo Ngomfanekiso okwiphepha 31]
Globe: Based on NASA photo