UYehova ‘UnguMsindisi’ Wethu
“UYehova uya kuwanceda awasindise.”—INDU. 37:40.
1, 2. Yiyiphi inyaniso engenakujikwa ngokuba ngumthombo wentuthuzelo namandla kukaYehova?
ISITHUNZI selanga asimi ndawonye. Njengokuba umhlaba uhamba, naso siyahamba yaye siyatshintsha. Kodwa, yena uMdali womhlaba nelanga akatshintshi. (Mal. 3:6) IBhayibhile ithi: “Yena akaguquguquki njengesithunzi.” (Yak. 1:17) Le nyaniso ingenakujikwa ngoYehova isikhuthaza ngokwenene, ngakumbi xa sijamelene nezilingo neemvavanyo ezinzima. Ngoba?
2 Njengokuba siye sabona kwinqaku elandulela eli, uYehova wangqineka ‘enguMsindisi’ kumaxesha okubhalwa kweBhayibhile. (INdu. 70:5) Akatshintshi yaye uhlala ebambelela kwilizwi lakhe; ngoko abanquli bakhe namhlanje banokuba nentembelo yokuba uya ‘kubanceda abasindise.’ (INdu. 37:40) UYehova uye wabasindisa njani abakhonzi bakhe namhlanje? Angasisindisa njani thina ngabanye?
Ukuhlangulwa Kwiintshaba
3. Kutheni siqinisekile ukuba iintshaba azinakuze zithintele abantu bakaYehova bayeke ukushumayela iindaba ezilungileyo?
3 Ayikho inkcaso kaSathana eya kuze ithintele amaNgqina kaYehova ekunquleni uYehova kuphela, nto leyo imfaneleyo. ILizwi likaThixo lisiqinisekisa lisithi: “Nasiphi na isixhobo esiya kuyilwa nxamnye nawe asiyi kuphumelela, nalo naluphi na ulwimi oluya kuphakama nxamnye nawe ekugwetyweni uya kulugwebela isohlwayo.” (Isa. 54:17) Iintshaba ziye zazama kodwa zawa phantsi ekuthinteleni abantu bakaThixo bayeke uthumo lwabo lokushumayela. Cinga nje ngale mizekelo mibini.
4, 5. Ngowe-1918 abantu bakaYehova bafumana yiphi inkcaso, ibe yaba njani imiphumo?
4 Ngowe-1918, abefundisi baphembelela ukuba kutshutshiswe abantu bakaYehova ngenjongo yokuba bayeke ukushumayela. NgoMeyi 7, urhulumente wayalela ukuba kubanjwe kuvalelwe uJ. F. Rutherford, owayesongamela umsebenzi wokushumayela ehlabathini lonke ngelo xesha, kunye neqela labanye ababekwikomkhulu lehlabathi. Kwiinyanga nje ezimbini, uMzalwan’ uRutherford nezinxulumani zakhe bagwetywa ngokungafanelekanga bebekwa ityala lokungcatsha baza banikwa isigwebo eside entolongweni. Ngaba abachasi babephumelele ngokusebenzisa iinkundla ukuba ziqhwalelise umsebenzi wokushumayela? Nakanye!
5 Khumbula esi sithembiso sikaYehova: ‘Nasiphi na isixhobo esiyilwe nxamnye nawe asiyi kuphumelela.’ Kungalindelwanga izinto zaguquka, ngoMatshi 26, 1919—iinyanga ezisithoba emva kokuba uMzalwan’ uRutherford nezinxulumani zakhe begwetyiwe—bakhululwa ngebheyile entolongweni. Kunyaka olandelayo, ngoMeyi 5, 1920 zarhoxiswa zonke izityholo ababetyatyekwa zona. Aba bazalwana basebenzisa loo nkululeko ukuze batyhalele phambili nomsebenzi woBukumkani. Yaba yintoni imiphumo yoko? Kaloku kuye kwakho ulwando olungathethekiyo ukususela ngoko! Umntu omele azukiswe ngako konke oku ngulowo ‘unguMsindisi.’—1 Kor. 3:7.
6, 7. (a) Liliphi iphulo elaba nxamnye namaNgqina kaYehova kwiJamani yamaNazi, ibe yaba njani imiphumo yalo? (b) Yintoni eboniswa yimbali yanamhlanje yabantu bakaYehova?
6 Nanku umzekelo wesibini. Ngowe-1934, uHitler wafunga esithi uza kuwatshayela nya amaNgqina kaYehova eJamani. Wayengadlali xa esitsho. Emva koko abanjwa aza avalelwa kulo lonke elo lizwe. Amawaka amaNgqina atshutshiswa; amakhulu abulawa kwiinkampu zoxinaniso. Ngaba uHitler waphumelela kwelo phulo lakhe? Ngaba wakuphelisa ukushunyayelwa kweendaba ezilungileyo eJamani? Nakanye! Ebudeni baloo ntshutshiso, abazalwana baqhubeka beshumayela ngokufihlakeleyo. Emva kokubhanga kolawulo lwamaNazi, basebenzisa inkululeko yabo baqhubeka beshumayela. Namhlanje, kukho abavakalisi boBukumkani abangaphezu kwe-165 000 eJamani. Nalapha, “uMsindisi” uye wenza ngokwesithembiso sakhe: ‘Nasiphi na isixhobo esiyilwe nxamnye nawe asiyi kuphumelela.’
7 Imbali yanamhlanje yamaNgqina kaYehova ibonisa ukuba uYehova akaze avumele ukupheliswa kwabantu bakhe njengeqela. (INdu. 116:15) Noko ke, kuthekani ngathi ngabanye? UYehova usisindisa njani ngabanye?
Kuthekani Ngokukhuselwa Emzimbeni?
8, 9. (a) Sazi njani ukuba akukho siqinisekiso sokuba siya kuhlala sikhuselwa singenzakaliswa emzimbeni? (b) Yintoni esimele siyamkele?
8 Siyazi ukuba okwangoku uYehova akathembisanga ukuba uya kuhlala ekhusela ngamnye wethu angenzakaliswa emzimbeni. Izinto sizijonga ngokufanayo namaHebhere amathathu athembekileyo angazange aguqe kumfanekiso wegolide kaKumkani uNebhukadenetsare. Abo bafana bahlonela uThixo zange bacinge ukuba babeya kukhuselwa ngendlela engummangaliso bangenzakali emzimbeni. (Funda uDaniyeli 3:17, 18.) Noko ke, uYehova wabahlangula kwiziko elivutha umlilo. (Dan. 3:21-27) Nkqu nakumaxesha okubhalwa kweBhayibhile, yayingafane yenzeke into yokuhlangulwa kwabantu ngommangaliso. Abakhonzi bakaYehova abaninzi abathembekileyo babulawa ziintshaba zabo.—Heb. 11:35-37.
9 Kuthekani namhlanje? ‘NjengoMsindisi,’ uYehova unokubahlangula nakanjani na abantu kwiimeko ezinzima. Ngaba sinokubetha ngenqindi phantsi sisithi uYehova ungenelele okanye akangenelelanga kwiimeko ezithile? Asikwazi. Ukanti, umntu oye wasinda kwingozi ethile unokuvakalelwa kukuba uhlangulwe nguYehova. Besiya kuba sigabadele xa sinokumphikisa koko. Kwangaxeshanye, simele siyamkele into yokuba amaKristu amaninzi aye afa ngenxa yentshutshiso, njengaxa kwakulawula amaNazi. Amanye aye afela kwiintlekele. (INtshu. 9:11) Sisenokuzibuza oku, ‘Ngaba uYehova usilele ukuba “nguMsindisi” wabo bathembekileyo baye babulawa?’ Akunakwenzeka oko.
10, 11. Kutheni umntu engenanto anokuyenza ngokufa, kodwa kuthekani ngoYehova?
10 Cinga nje ngoku: Umntu akananto anokuyenza ngokufa, kuba akakho umntu ‘onokuwusindisa umphefumlo wakhe esandleni seShiyol,’ okanye seHadesi, ingcwaba loluntu. (INdu. 89:48) Kodwa kuthekani ngoYehova? Udade owasinda kwintlekele yamaNazi ukhumbula amazwi kanina owayeliNgqina emthuthuzela xa wayefelwe zizalamane zakhe kwiinkampu zoxinaniso esithi: “Ukuba abantu bebengayi kuvuka ekufeni, oko bekuya kuthetha ukuba ukufa kungaphezu kwamandla kaThixo, andibi?” Kodwa ukufa akuyonto kuLowo unamandla onke uMthombo wobomi! (INdu. 36:9) Bonke abo baseShiyol okanye eHadesi, bakwinkumbulo kaYehova, ibe uya kubasindisa ngokuvusa ngamnye kubo.—Luka 20:37, 38; ISityhi. 20:11-14.
11 Okwangoku, uYehova ubandakanyeke ngokungqalileyo kubomi babanquli bakhe abathembekileyo namhlanje. Makhe sihlole iindlela ezintathu ‘anguMsindisi’ wethu ngazo.
Uyasikhusela Ngokomoya
12, 13. Kutheni ukhuseleko lokomoya luyeyona nto ibalulekileyo nje, ibe uYehova usikhusela njani ngalo?
12 UYehova usikhusela ngokomoya, olona khuseleko lubalulekileyo. Ekubeni singamaKristu okwenyaniso, siyazi ukuba kukho okubaluleke ngakumbi kunobu bomi sibuphilayo ngoku. Eyona nto ixabiseke gqitha sinayo, lulwalamano esinalo noYehova. (INdu. 25:14; 63:3) Ngaphandle kolo lwalamano, ubomi bethu bebungayi kuba nanjongo nekamva lethu beliya kuba mfiliba.
13 Okuvuyisayo kukuba, uYehova usinika lonke uncedo esilufunayo ukuze silondoloze ulwalamano lwethu naye. Sincedwa liLizwi lakhe, ngumoya oyingcwele nebandla elisehlabathini lonke. Singenza njani ukuze singenelwe kangangoko kula malungiselelo? Xa silifundisisa rhoqo ngenkuthalo iLizwi lakhe, ukholo lwethu luya komelela, likhanye ngakumbi nethemba esinalo. (Roma 15:4) Xa siwuthandazela ngokunyanisekileyo umoya wakhe, uya kusinceda siphephe izinto eziya konakalisa ulwalamano lwethu naye. (Luka 11:13) Ngokuhlala sisenza ngokuvisisana nolwalathiso esilufumana kudidi lwekhoboka ngeempapasho ezisekelwe eBhayibhile nakwiintlanganiso, iindibano ezinkulu nezincinane, siya kondliwa ngokomoya ‘ngokutya okufika ngexesha elifanelekileyo.’ (Mat. 24:45) La malungiselelo ayasikhusela ngokomoya asincede sisondele kuThixo.—Yak. 4:8.
14. Chaza amava abalaselisa ukhuseleko lokomoya.
14 Ukwenza umzekelo wokhuseleko lokomoya, khumbula abazali ekuthethwe ngabo ekuqaleni kwenqaku elandulela eli. Kwiintsuku ezimbalwa emva kweendaba zokulahleka kwentombi yabo, uTheresa, bafumana iindaba ezimbi ngakumbi zokuba, ibulewe.a Uyise uthi: “Ndandithandaze kuYehova ndicela ukuba amkhusele. Ndimele ndivume ukuba, xa wafunyanwa efile, ekuqaleni ndandizibuza isizathu sokuba imithandazo yam ingaphendulwa. Kakade ke, ndiyazi ukuba uYehova akasithembisanga ukuba uya kukhusela abantu bakhe ngabanye ngendlela engummangaliso. Ndaqhubeka ndithandazela ukuyamkela loo meko. Ndathuthuzelwa kukwazi ukuba uYehova uyabakhusela abantu bakhe ngokomoya—into ethetha ukuba usilungiselela oko kufunekayo ukuze silondoloze ulwalamano lwethu naye. Olo ukhuseleko lolona lubalulekileyo, kuba luchaphazela ikamva lethu likanaphakade. Oko kuthetha ukuba, uYehova wamkhusela uTheresa; kuba wafa emkhonza ngokuthembeka. Ndiye ndathuthuzelwa kukwazi ukuba ithemba lokufumana kwakhe ubomi kwikamva lisezandleni zikaYehova.”
Ukunyanyekelwa Ekuguleni
15. Ziziphi indlela anokusinceda ngazo uYehova xa sigula ngamandla?
15 UYehova unokusomeleza “emandlalweni wokugula,” njengokuba wenzayo kuDavide. (INdu. 41:3) Nakuba namhlanje uYehova engasiphilisi ngommangaliso, uyakwazi ukusinceda. Njani? Imigaqo efumaneka kwiLizwi lakhe isinceda senze izigqibo zobulumko ngokuphathelele iindlela zonyango neminye imibandela. (IMize. 2:6) Sinokufumana inkcazelo namacebiso aluncedo kumanqaku apapashwe kwiMboniselo noVukani! axubusha ngesigulo esithile esinaso. Esebenzisa umoya wakhe, uYehova unokusipha “amandla angaphaya koko kuqhelekileyo” ukuze sikwazi ukujamelana nemeko esikuyo size silondoloze ingqibelelo kungakhathaliseki ukuba kwenzeka ntoni na. (2 Kor. 4:7) Ngenxa yolo ncedo, singakuphepha ukonganyelwa kukugula de singanikeli ngqalelo kulwalamano lwethu noYehova.
16. Yintoni eyanceda omnye umzalwana wanyamezela ukugula?
16 Cinga ngomzalwana oselula ekuthethwe ngaye ekuqaleni kwenqaku elandulela eli. Ngowe-1998, kwafunyaniswa ukuba unesifo iamyotrophic lateral sclerosis, okanye iALS, esamkhubaza ngokupheleleyo.b Uye wakwazi njani ukujamelana nesi sifo? Uthi: “Kubakho izihlandlo zeentlungu nokuxinezeleka xa ndicinga ukuba kukufa kuphela okunokundikhulula kwesi sifo. Ndithi ndakucinezeleka, ndithandaze kuYehova ndicela andiphe izinto ezintathu: ukuzola, umonde nonyamezelo. Ndivakalelwa kukuba uYehova uyiphendule loo mithandazo. Ukuzola kundinceda ndicinge ngezinto ezakhayo, njengendlela obuya kuba myoli ngayo ubomi kwihlabathi elitsha xa sele ndikwazi ukuhamba kwakhona, ukunandipha ukutya nokuncokola nentsapho yam. Umonde undinceda ndinyamezele iimeko ezibuhlungu zokukhubazeka. Ukunyamezela kundinceda ndihlale ndithembekile yaye ndingaphulukani nolwalamano oluhle noYehova. Ndivakalelwa njengomdumisi uDavide, kuba nam uYehova uye wandixhasa emandlalweni wokugula.”—Isa. 35:5, 6.
Usilungiselela Izinto Eziphathekayo
17. Yintoni asithembise yona uYehova, ibe sitheth’ ukuthini esi sithembiso?
17 UYehova uthembisa ukusinyamekela ngezinto eziphathekayo. (Funda uMateyu 6:33, 34 neyamaHebhere 13:5, 6.) Oko akuthethi kuthi simele silindele ukufumana izinto eziphathekayo ngendlela engummangaliso okanye singafuni ukusebenza. (2 Tes. 3:10) Eyona nto ithethwa sesi sithembiso yile: Xa sifuna uBukumkani bukaThixo kuqala kubomi bethu yaye sizimisele ukusebenza ukuze sifumane izinto zokuphila, sinokuthembela ekubeni uYehova uya kusinceda sizifumane. (1 Tes. 4:11, 12; 1 Tim. 5:8) Unokusilungiselela ezo zinto ngeendlela esingazilindelanga, mhlawumbi esebenzisa omnye umnquli ukuba asincede ngazo okanye asifumanele umsebenzi.
18. Chaza amava abonisa ukuba sinokuziphiwa izinto esizisweleyo ngamaxesha anzima.
18 Khumbula umama ongenaqabane okhankanywe ekuqaleni kwenqaku elandulelayo. Xa yena nentombi yakhe eselula bafudukela komnye ummandla, kwaba nzima ukufumana umsebenzi. Uthi: “Ekuseni ndandisiya entsimini, ndize emva kwemini ndiye kufuna umsebenzi. Ndikhumbula ngenye imini ndisiya kuthenga ubisi evenkileni. Ndema ndijonge imifuno, kodwa ndingenamali yayo. Zange khe ndixinezeleke ngolo hlobo ebomini bam. Ukufika kwam ekhaya, ndafika phambi komnyango wam kukho iibhegi ezithe mome zizo zonke iintlobo zemifuno. Kwakukho ukutya okwanele iinyanga. Ndakhala, ndibulela uYehova.” Lo dade weva ukuba ezo bhegi zokutya uziphiwe ngomnye umzalwana osebandleni olima imifuno kwisitiya sakhe. Kamva wambhalela wathi: “Nakuba ndakubulela gqitha ngaloo mini, ndambulela noYehova osebenzise ububele bakho ukuze andikhumbuze ngothando lwakhe.”—IMize. 19:17.
19. Yiyiphi intembelo abaya kuba nayo abakhonzi bakaYehova xa kufika imbandezelo enkulu, ibe yintoni esimele sizimisele ukuyenza okwangoku?
19 Ngenxa yoko kwenziwe nguYehova kumaxesha okubhalwa kweBhayibhile nanamhlanje, simele sibe nentembelo yokuba unguMncedi wethu. Kungekudala, xa kufika imbandezelo enkulu kweli hlabathi likaSathana, siya kulufuna ngakumbi uncedo lukaYehova kunanini na. Kodwa abakhonzi bakaYehova baya kulindela kuye benentembelo epheleleyo. Baya kuphakamisa iintloko zabo benemihlali, besazi ukuba intlangulo yabo isondele. (Luka 21:28) Enoba zinjani na izilingo esijamelana nazo, okwangoku simele sizimisele ukuthembela kuYehova, siqiniseke ngokupheleleyo ukuba ngokwenene, uThixo wethu ongatshintshiyo, ‘unguMsindisi’ wethu.
[Imibhalo esemazantsi]
a Funda inqaku elithi “Coping With an Unspeakable Tragedy,” kuVukani! wesiNgesi kaJulayi 22, 2001, iphepha 19-23.
b Funda inqaku elithi “Ukholo Endinalo Lwandomeleza Njengoko Ndinesifo I-ALS,” kuVukani! kaJanuwari 2006, iphepha 25-29.
Uyakhumbula Na?
• UYehova unokubasindisa njani abo baye babulawa?
• Kutheni ukhuseleko lokomoya lulolona lubalulekileyo?
• Sitheth’ ukuthini isithembiso sikaYehova sokuba uya kusinyamekela ngezinto eziphathekayo?
[Umfanekiso okwiphepha 8]
UMzalwan’ uRutherford nezinxulumani zakhe babanjwa bavalelwa ngowe-1918 baza kamva bakhululwa, zachithwa zonke nezityholo ababetyatyekwa zona
[Umfanekiso okwiphepha 10]
UYehova unokusixhasa “emandlalweni wokugula”