Ukwandisa Ulwazi Oluchanileyo ‘Ngentumekelelo Yengqondo’

BONKE abakhonzi bakaYehova bafuna ukumkholisa. Ngenxa yokulangazelela le nkoliseko, sizimisele ukuphucula ukholo lwethu nokumkhonza ngendlela engcwele nangenzondelelo. Noko ke, umpostile uPawulos utsalela ingqalelo yethu kwenye ingozi enokusehlela, leyo yagqiba amaYuda omhla wakhe: ‘Ayenenzondelelo kuThixo; kodwa kungekhona ngokolwazi oluchanileyo.’ (Roma 10:2) Kucacile ukuba ukholo nendlela esimnqula ngayo uYehova azimele zisekelwe nje kwiimvakalelo. Kufuneka sibe nolwazi oluchanileyo ngoMdali nangokuthanda kwakhe.

Kwenye yeencwadi zakhe, uPawulos udibanisa ihambo eyamkelekileyo kuThixo nokulangazelela kwethu ulwazi. Wathandazela ukuba abalandeli bakaKristu ‘bazaliswe ngolwazi oluchanileyo lokuthanda kukaThixo ukuze bahambe ngokumfaneleyo uYehova baze bamkholise ngokupheleleyo njengoko beqhubeka bevelisa isiqhamo kuwo wonke umsebenzi olungileyo lusanda nolwazi lwabo oluchanileyo ngoThixo.’ (Kol. 1:9, 10) Kutheni kubaluleke kangaka nje ukuba sifumane ‘ulwazi oluchanileyo’? Khona, kutheni simele sikhule kolo lwazi?

Undoqo Elukholweni

Ulwazi oluchanileyo ngoThixo nokuthanda kwakhe njengoko kutyhilwe eBhayibhileni ngundoqo kukholo lwethu. Ngaphandle kolo lwazi luthembekileyo, ukholo lwethu kuYehova beluya kufana nendlu eyakhiwe ngeendiza esuka iphaphatheke xa kufika umoya. UPawulos ukhuthaza ukuba sinikele inkonzo engcwele kuThixo ‘ngokwamandla ethu engqiqo nangokutshintsha ingqondo yethu.’ (Roma 12:1, 2) Ukufundisisa rhoqo iBhayibhile kunokusinceda gqitha kule nkalo.

UEwa, uvulindlela othe ngxi wasePoland, uthi: “Ndandithi ndakungalifundisisi rhoqo iLizwi likaThixo, ndime ndawonye kulwazi oluchanileyo ngoYehova. Izinto zazikhawuleza zingahambi kakuhle ngokomoya, nokholo lwam lube buthathaka—oku kwakundihlutha ulwalamano endinalo noThixo.” Ngamana kungangaze kube njalo nakuthi! Cinga nje ngomzekelo wendoda eyakhulisa ulwazi lwayo oluchanileyo ngoYehova yaza yafumana inkoliseko yakhe.

“Hayi Indlela Endiwuthanda Ngayo Umthetho Wakho!”

Umbongo okwiNdumiso 119 kwiiBhayibhile zethu uchaza indlela awayevakalelwa ngayo umdumisi ngemithetho, izikhumbuzo, imiyalelo nezigwebo zikaYehova. Lo mdumisi wathi: “Ndiya kubonisa ukuyithanda imimiselo yakho. . . . Ndiyazithanda izikhumbuzo zakho.” Waphinda wathi: “Hayi indlela endiwuthanda ngayo umthetho wakho! Imini le yonke ndiwuxhalabele.”—INdu. 119:16, 24, 47, 48, 77, 97.

Enyanisweni, igama elithi “ukuyithanda” nelithi “ndiwuxhalabele” abonisa ukucamngca ngeLizwi likaThixo, ukuvuyiswa koko kucamngca. La magama ayibonisa kakuhle indlela umdumisi awayewuthanda ngayo umthetho kaThixo. Olo yayingelothando nje luqhutywa ziimvakalelo. Kodwa wayenomnqweno onyanisekileyo ‘wokuzixhalabisa’ ngomthetho, ukuze aqonde amazwi kaYehova. Kwisimo sakhe sengqondo siyakwazi ukubona ukuba wayefuna ukumazi ngokuchane kangangoko kunokwenzeka uThixo nokuthanda kwakhe.

Kucacile ukuba umdumisi wayelithanda ngokusuk’ entliziyweni iLizwi likaThixo. Sinokuzibuza oku: ‘Ngaba nam ndilithanda ngolo hlobo? Ngaba ndiyavuyiswa kukufunda nokucamngca ngenxalenye ethile yeBhayibhile mihla le? Ngaba ndikukhuthalele ukufunda iLizwi likaThixo nokuthandaza ngaphambi koko?’ Okukhona siphendula ngoewe kule mibuzo, kokukhona ‘luya kwanda ulwazi lwethu oluchanileyo ngoThixo.’

UEwa uthi: “Ndisoloko ndizama ukuphucula umgangatho wesifundo sam sobuqu. Ukususela oko safumana incwadana enemifanekiso ethi “Bona Ilizwe Elihle,” ndiyisebenzisa phantse lonk’ ixesha ndifundisisa. Ndihlala ndizama ukukhangela izinto kwintyilalwazi i-Insight on the Scriptures nakwezinye iimbekiselo xa kuyimfuneko.”

Omnye umzekelo ngokaWojciech noMałgorzata, isibini esitshatileyo esineembopheleleko ezininzi zentsapho. Benza njani ukuze bakwazi ukuba nesifundo seBhayibhile sobuqu? “Ngamnye uzipha ithuba lokufundisisa iLizwi likaThixo kangangoko anako. Sithi ke xa siqhuba isifundo sentsapho naxa sincokola izinto zemihla ngemihla, siveze ezo ngongoma zibangela umdla okanye zikhuthazayo.” Olu fundisiso lubenza bahlale bevuya yaye lubanceda ‘bandise ulwazi lwabo oluchanileyo.’

Fundisisa Ngengqondo Evulekileyo

NjengamaKristu, sikholelwa ukuba kukuthanda kukaThixo ukuba “zonke iintlobo zabantu zisindiswe zize zifikelele elwazini oluchanileyo lwenyaniso.” (1 Tim. 2:3, 4) Esi sibakala sibethelela ukuxabiseka kokufunda iBhayibhile nokuzabalazela ‘ukuyiqonda.’ (Mat. 15:10) Enye into enokusinceda siyiqonde kukuyifundisisa ngengqondo evulekileyo. Esi sisimo sengqondo ababenaso abantu baseBhereya mandulo xa uPawulos washumayela kubo iindaba ezilungileyo: “Balamkela ilizwi ngeyona ntumekelelo inkulu yengqondo, bezincina ngenyameko iZibhalo mihla le mayela nokuba zinjalo kusini na ezo zinto.”—IZe. 17:11.

Ngaba uxelisa lo mzekelo wamaBhereya wokuba nentumekelelo yengqondo nokugcina ingqondo yakho ingaphazanyiswa zizinto ezingeyomfuneko xa ufundisisa iBhayibhile? UmKristu unokuwaxelisa amaBhereya, kwanokuba ebekade engakuthandi ukufundisisa. Eny’ into, njengoko iminyaka ihamba, abanye baye bayekelel’ umxakatho ekufundisiseni, kodwa akumele kube njalo kumaKristu okwenyaniso. Nokuba sele umdala kangakanani, unako ukuziphepha iziphazamiso. Njengoko ufunda, unokukhangela inkcazelo oza kwabelana ngayo nabanye. Ngokomzekelo, ngaba akunakuzama ukwabelana neqabane lakho okanye umhlobo ongumKristu ngezinto ozifumene kufundisiso lwakho? Oko kunokukunceda umilisele ingqondo nentliziyo yakho kwezo zinto ngoxa zinceda nabanye.

Malunga nezihlandlo ofundisisa ngazo, xelisa uEzra, umkhonzi wamandulo kaThixo ‘owayilungisayo intliziyo yakhe ukuba ahlole umthetho kaYehova.’ (Ezra 7:10) Ungakwenza njani oko? Lungiselela imeko eza kwenza kube lula ukufundisisa. Emva koko, hlala phantsi uthandazele uncedo nobulumko kuYehova. (Yak. 1:5) Zibuze oku, ‘Yintoni endilindele ukuyifunda apha?’ Njengoko ufunda, zama ukubona iingongoma eziziintloko. Phawula iingongoma ofuna ukuhlala uzikhumbula. Cinga ngendlela onokuwusebenzisa ngayo loo mbandela xa ushumayela, xa usenza izigqibo, okanye xa ukhuthaza abazalwana bakho. Xa sele uza kugqiba, zikhumbuze ngokufutshane ngoko uye wakufunda. Oko kuya kukunceda ukukhumbule oko ukufundileyo.

UEwa uchaza indlela akwenza ngayo oku: “Njengoko ndifunda iBhayibhile, ndijonga iimbekiselo ezikuyo, iWatch Tower Publications Index, neWatchtower Library on CD-ROM. Ndiye ndiphawule iindawo ezithile ngenjongo yokuzisebenzisa xa ndishumayela.”

Abanye esele kukudala befundisisa, baye bafunda lukhulu ngoThixo. (IMize. 2:1-5) Sekunjalo, baneembopheleleko ezininzi yaye kunzima ukuba bafumane ixesha lokuthi vu bafundisise. Ukuba kunjalo nakuwe, luluphi uhlengahlengiso onokulwenza kucwangciso lwakho?

Ndinokulifumana Njani Ixesha?

Mhlawumbi uyavuma ukuba kulula ukuzibekela ixesha lokwenza izinto ozithandayo. Abaninzi bafumanise ukuba ukuze usithande isifundo sobuqu umele ube nosukelo, njengokufunda iBhayibhile yonke. Kuyavunywa ukuba, kunokuba nzima ukufunda iminombo yokuzalwa emide, iinkcukacha zetempile yamandulo, okanye iziprofeto ezinzima ezibonakala zingenanto yakwenza nobomi bemihla ngemihla. Zama ukwenza izinto eziya kukunceda ufikelele usukelo lwakho. Ngokomzekelo, ngaphambi kokuba uhlolisise inxalenye ethile yeBhayibhile ebonakala inzima, usenokuqala ngokufunda ngembali elapho okanye indlela eluncedo ngayo. Loo nkcazelo inokufumaneka kwincwadi ethi “Sonke ISibhalo Siphefumlelwe NguThixo Kwaye Siyingenelo,” efumaneka phantse ngeelwimi ezingama-50.

Kukhuthaza gqitha ukuba nomfanekiso-ngqondweni wento ofunda ngayo eBhayibhileni. Oku kunokukunceda ube ngathi uyababona abantu ekuthethwa ngabo neziganeko ezilapho. Ukuzama la macebiso ambalwa kuya kwenza ukunandiphe yaye ungenelwe ngakumbi kufundisiso lwakho. Oko kuya kwenza ukhangele phambili kwizihlandlo zofundisiso. Kuya kutsho kube lula ukufundisisa iBhayibhile yonk’ imihla.

Nakuba la macebiso enokunceda abantu ngabanye, inokuncedakala njani yona intsapho exakekileyo? Kutheni ningahlali phantsi nixubushe ngeengenelo zesifundo sentsapho? Anokuvela kuloo ngxubusho amacebiso, njengokuvuka ngaphambi kwexesha eniqhele ukuvuka ngalo yonk’ imihla, okanye ngeentsuku ezithile ukuze niqwalasele inxalenye ethile yeBhayibhile. Loo ngxubusho inokuveza imfuneko yokuhlengahlengisa ucwangciso lwentsapho. Ngokomzekelo, ezinye iintsapho ziye zakufumanisa kuluncedo ukuxubusha itekisi yosuku okanye ukufunda inxalenye ethile yeBhayibhile xa zigqiba kutya. Ngaphambi kokuba nabani na ashiye itafile okanye aye kwenza enye into, iintsapho zichitha imizuzu eli-10 okanye eli-15 zixubusha iZibhalo okanye zifunda iBhayibhile. Ekuqaleni, oku kusenokubonakala kunzima, kodwa akuyi kuba kudala kuqheleke ize intsapho ikunandiphe.

UWojciech noMałgorzata bathi xa bechaza oko kwanceda intsapho yabo: “Ngaphambili, sasikade sichitha ixesha kwizinto ezingabalulekanga. Senza isigqibo sokunciphisa ixesha esilichitha sibhalela abanye ngekhompyutha. Siye sacutha nexesha lokuzonwabisa sabekela bucala umhla nexesha lokufundisisa.” Le ntsapho ayizisoli ngokwenza olo hlengahlengiso, ibe kunokuba njalo nakweyakho.

Kubalulekile Ukwandisa Ulwazi Oluchanileyo!

Ukuzika ekufundisiseni iLizwi likaThixo kunokuvelisa “isiqhamo kuwo wonke umsebenzi olungileyo.” (Kol. 1:10) Njengokuba oko kusenzeka kuwe, ukuhambela phambili kwakho kuya kubonakala kubo bonke. Uya kuba ngumntu wokomoya oyiqonda kakuhle inyaniso yeBhayibhile. Uya kwenza izigqibo ezilungelelene ngakumbi uze ukwazi ukunceda abanye, ungagabadeli nto leyo edla ngokwenziwa ngabantu abangenalwazi. Ngaphezulu, uya kusondela ngakumbi kuYehova. Uya kuzixabisa ngakumbi iimpawu zakhe, ibe oku kuya kubonakala njengoko uxelela abanye ngaye.—1 Tim. 4:15; Yak. 4:8.

Enoba umdala kangakanani, yenza umgudu wokuhlala uvuyiswa liLizwi likaThixo uze uzike kulo ngengqondo evulekileyo. Unokuqiniseka ukuba uYehova akayi kuyilibala imigudu yakho. (Heb. 6:10) Uya kukusikelela gqitha.

[Ibhokisi ekwiphepha 13]

XA ‘LUSANDA ULWAZI LWETHU OLUCHANILEYO’. . .

Someleza ukholo lwethu kuThixo size sihambe ngokumfaneleyo uYehova.—Kol. 1:9, 10

Sizuza ukuqonda, sibe nobulumko bokwenza izigqibo ezifanelekileyo.—INdu. 119:99

Siyavuyiswa kukunceda abanye basondele kuYehova.—Mat. 28:19, 20

[Imifanekiso ekwiphepha 14]

Kusenokuba nzima ukufumana indawo efanelekileyo yokufundisisa, kodwa umele uzame ukuyifumana

[Umfanekiso okwiphepha 15]

Ezinye iintsapho zifunda inxalenye yeBhayibhile emva kwesidlo