Imibuzo Yabafundi
Ukuba UAdam Wayefezekile, Kwakutheni Ukuze One?
UAdam wayenokona kuba uThixo wamdala wanenkululeko yokuzikhethela. Loo nto ayingqubani kwaphela nesibakala sokuba uAdam wayefezekile. Inyaniso kukuba, nguThixo ofezeke ngokugqibeleleyo. (Duteronomi 32:3, 4; INdumiso 18:30; Marko 10:18) Abantu nezinye izinto zifezeke ukusa kumlinganiselo othile. Ngokomzekelo, ibhozo linokuyinqunqa kakuhle inyama, kodwa ngaba unokutya ngalo isuphu? Into nganye ifeza injongo yayo.
Kwakutheni ukuze uThixo adale uAdam? Wayefuna kubekho abantu abakrelekrele nabanenkululeko yokuzikhethela. Abo bafuna ukuhlakulela ukuthanda uThixo neendlela zakhe babeza kubonisa oku ngokukhetha nokuthobela imithetho yakhe. Umntu wayengazukuthobela nje ngokuzenzekelayo, kodwa wayeza kuthobela ngokuzithandela. (Duteronomi 10:12, 13; 30:19, 20) Ngaloo ndlela, ukuba uAdam wayengakwazi ukungathobeli, loo nto yayiza kuthetha ukuba akaphelelanga—akafezekanga. Ichaza indlela awakhetha ukuyisebenzisa ngayo inkululeko yakhe yokuzikhethela, iBhayibhile ithi walandela umfazi wakhe ekuvukeleni umthetho kaThixo ophathelele “umthi wokwazi okulungileyo nokubi.”—Genesis 2:17; 3:1-6.
Ngaba uThixo wadala uAdam ngendlela yokuba angakwazi ukuzikhethela okulungileyo nokubi, nto leyo eyamenza akakwazi ukwenza izigqibo ezifanelekileyo okanye ukumelana nezilingo? Ngaphambi kokuba uAdam one, uYehova uThixo wahlola yonke indalo yakhe yasemhlabeni, kuquka isibini sokuqala, waza wathi, “ilunge gqitha.” (Genesis 1:31) Ngoko ukona kuka-Adam kwakungathethi ukuba uMdali wakhe wenza impazamo xa wayemdala, kodwa ityala lalikuAdam. (Genesis 3:17-19) UAdam akazange avumele ukuthanda uThixo nobulungisa kumenze athobele uThixo ngaphezu kwayo yonke enye into.
Ungalibali ukuba noYesu ngoxa wayesemhlabeni wayefezeke njengoAdam. Kodwa yena, nakubeni wakhawulwa ngomoya oyingcwele, wayengekho buthathaka xa elingwa. (Luka 1:30, 31; 2:21; 3:23, 38) UYesu wakhetha ukunyaniseka kuYise nangona wayecinezelekile. Ngoxa uAdam wayesebenzisa inkululeko yokuzikhethela, wasilela ukuthobela umyalelo kaYehova.
Kwakutheni ukuze uAdam akhethe ukungamthobeli uThixo? Ngaba wayecinga ukuba wayenokuyiphucula imeko yakhe? Akunjalo, kuba umpostile uPawulos wathi “akukhohliswanga Adam.” (1 Timoti 2:14) Noko ke, uAdam wakhetha ukwanelisa umkakhe, owayesele ekhethe ukutya kumthi owalelweyo. Wafuna ukukholisa umkakhe kunokuthobela uMdali wakhe. Xa wayenikwa isiqhamo somthi owalelweyo, uAdam wayemele acinge ngoko kwakuza kwenzeka kulwalamano lwakhe noThixo. Ekubeni wayengenalo uthando olunzulu ngoThixo, uAdam wachanabeka kwingcinezelo, kuquka naleyo yomkakhe.
UAdam wona engekabi nabantwana, ngoko yonke inzala yakhe ayifezekanga. Sekunjalo, njengoAdam, sinenkululeko yokuzikhethela. Ngamana singacamngca ngokulunga kukaYehova size simthande ngokwenene, kuba nguye esifanele simthobele size simnqule.—INdumiso 63:6; Mateyu 22:36, 37.