Inkolelo Egqugqisileyo
“Ndandiphupha ndisitsha esihogweni kwidike lomlilo ndize ndothuke ndikhala. Emva koko ndandiye ndenze konke okusemandleni ukuze ndingoni.”—UArline
UYAKHOLELWA na ukuba isihogo yindawo yokuthuthumbisa aboni? Abantu abaninzi bayakukholelwa oko. Ngokomzekelo, ngonyaka wama-2005 umphengululi weYunivesithi yaseSt. Andrews eScotland wafumanisa ukuba isithathu sabefundisi baseScotland sikholelwa ukuba abantu abahlukaniswe noThixo baza “kudandatheka ngonaphakade esihogweni.” Kanti isihlanu sikholelwa ukuba abantu abasesihogweni bathuthunjiswa ngokoqobo.
Kumazwe amaninzi abantu basakholelwa kwisihogo. Ngokomzekelo, eUnited States, kuhlolisiso lukaGallup olwenziwa ngowama-2007 kwafunyaniswa ukuba ama-70 ekhulwini abo babenenxaxheba bayakholelwa kwisihogo. Kwanakumazwe anabantu abangaluthandiyo unqulo, basakholelwa kwimfundiso yesihogo. Kolunye uhlolisiso lukaGalllup lowama-2004, kwafunyaniswa ukuba eKhanada bangama-42 ekhulwini abantu abasakholelwayo kwisihogo. EBritani, abangama-32 ekhulwini babeqinisekile ukuba isihogo sikhona.
Oko Kufundiswa Ngabefundisi
Abefundisi abaninzi abasafundisi ukuba isihogo yindawo yokoqobo ekuthuthunjiswa kuyo abantu. Kunoko, baxhasa inkcazelo efana naleyo ikwiCatechism of the Catholic Church eyapapashwa ngowe-1994. Le mbekiselo ithi, “Esona sohlwayo sesihogo kukwahlukaniswa noThixo ngonaphakade.”
Nakuba kunjalo, abantu basakholelwa ukuba isihogo yindawo ekuthuthunjiswa kuyo abantu ngokwasengqondweni nangokoqobo. Abo bayifundisayo le mfundiso bathi iseBhayibhileni. Umongameli weSouthern Baptist Theological Seminary, uAlbert Mohler, uthi: “Le yimfundiso yeZibhalo.”
Kutheni Ibalulekile Nje Into Oyikholelwayo?
Ukuba isihogo yindawo yentuthumbo, ngokuqinisekileyo umele usoyike. Ukuba le mfundiso ayichananga, iinkokeli zonqulo eziyifundisayo zibangela ukuba abo bakholelwa kuyo badideke baze badandatheke ngokungeyomfuneko. Kwakhona ziyamtshabhisa uThixo.
Lithini lona iLizwi likaThixo iBhayibhile? Amanqaku amathathu alandelayo aza kuphendula le mibuzo mithathu esebenzisa inguqulelo yeBhayibhile yamaKatolika neyamaProtestanti: (1) Kwenzeka ntoni emntwini akufa? (2) UYesu wafundisa ntoni ngesihogo? (3) Kunokukuchaphazela njani ukufunda inyaniso ngesihogo?