Ngaba AmaNgqina KaYehova Aqhekeza Imitshato?

“UKUBA elinye iqabane litshintsha unqulo, umtshato uyaqhekeka.” Batsho njalo abantu abaninzi. Maxa wambi, la mazwi athethwa kwiqabane elifuna ukuba liNgqina likaYehova. Kodwa ngaba le yinto esoloko isenzeka?

Kuyaqondakala ukuba xa umntu otshatileyo efuna ukutshintsha unqulo ekudala ekulo, oko kuyothusa. Kusenokulixhalabisa elinye iqabane, kulidanise kuze kulenze libe nenzondo.

Idla ngokuba ngumfazi ofuna ukutshintsha unqulo. Ukuba umfazi wakho ufunda iBhayibhile namaNgqina kaYehova, oko kunokukuchaphazela njani? Ukuba ungumfazi ofundelwa ngamaNgqina kaYehova, yintoni onokuyenza ukuze udambise unxunguphalo analo umyeni wakho?

Imbono Yomyeni

UMark, ohlala eOstreliya, wayesele eneminyaka eli-12 etshatile xa umfazi wakhe waqalisa ukufunda iBhayibhile namaNgqina kaYehova. Uthi: “Ndandonwabile emtshatweni nasemsebenzini. Ndandibunandipha ubomi. Umfazi wam waqalisa ukufunda iBhayibhile namaNgqina kaYehova. Ndavakalelwa kukuba oku kuza kubutshintsha ubomi bam. Ekuqaleni, ndandingayithandi into yokuba umfazi wam afunde iBhayibhile namaNgqina, kodwa xa wandixelela ukuba ugqibe kwelokuba abhaptizwe, ndakhathazeka ngakumbi.”

UMark wazibuza enoba olu nqulo lutsha lomfazi wakhe lwalungazi kuwuphelisa na umtshato wabo. Wacinga ukumyekisa ukufunda iBhayibhile aze angamvumeli ukuba aphinde adibane namaNgqina. Akazange akhawuleze enjenjalo, kodwa wakha wamyeka okwexeshana. Kwenzeka ntoni emtshatweni wakhe?

UMark uthi: “Okuvuyisayo kukuba, ngoku umtshato wethu uqhuba kakuhle kakhulu kunangaphambili. Kwiminyaka eli-15 umfazi wam ebhaptiziwe, umtshato wethu uye waya usomelela.” Yintoni eyanceda lo mtshato waphumelela? UMark uthi: “Ndicinga ukuba kungenxa yokuba umfazi wam wayesebenzisa amacebiso amahle aseBhayibhileni. Ebesoloko endihlonela.”

Icebiso Elivela Kubafazi Abaye Baphumelela

Ukuba ungumfazi ofunda namaNgqina kaYehova, yintoni onokuyenza ukuze uthomalalise inkxalabo anayo umyeni wakho? Khawuve la magqabaza abafazi abakwiindawo ezahlukeneyo zehlabathi.

USakiko waseJapan uthi: “Ndineminyaka engama-31 nditshatile yaye ndinabantwana abathathu. Ndineminyaka engama-22 ndiliNgqina likaYehova. Maxa wambi kunzima ukuhlala nomyeni ongeloNgqina. Kodwa ndizama ukusebenzisa isiluleko seBhayibhile esithi ‘mandikhawuleze ukuva, ndicothe ukuthetha, ndicothe ukuqumba.’ (Yakobi 1:19) Ndizama ukuba nobubele kumyeni wam ndize ndizenze izinto azinqwenelayo xa zingangqubani nemigaqo yeBhayibhile. Oku kuwenze waphumelela umtshato wethu.”

UNadezhda waseRashiya uthi: “Ndineminyaka engama-28 nditshatile yaye ndineminyaka eli-16 ndiliNgqina elibhaptiziweyo. Ngaphambi kokuba ndifunde iBhayibhile, ndandingaqondi ukuba umyeni wam yintloko-ntsapho. Ndandizenzela izigqibo ezininzi. Noko ke, ndaye ndafumanisa ukuba ukusebenzisa imigaqo yeBhayibhile kwenza kubekho uxolo nolonwabo entsatsheni yethu. (1 Korinte 11:3) Kwaya kusiba lula ngam ukumthobela umyeni wam, yaye uye wazibona ezi nguqu.”

UMarli waseBrazil uthi: “Ndinabantwana ababini yaye ndineminyaka engama-21 nditshatile. Kwiminyaka eli-16 eyadlulayo, ndaba liNgqina elibhaptiziweyo. Ndafunda ukuba uYehova uThixo uthanda ukuba izibini ezitshatileyo zihlale kunye, zingohlukani. Ngoko ndazama ukuba ngumfazi olungileyo, othetha nowenza izinto ngendlela ekholisa uYehova nomyeni wam.”

ULarisa waseRashiya: “Ndaba liNgqina likaYehova kwiminyaka eli-19 eyadlulayo, yaye ndafumanisa ukuba eyona nto ibalulekileyo kukutshintsha indlela endiphila ngayo. Umyeni wam wayebona ukuba iBhayibhile indincedile ndaba ngumfazi olungileyo yaye ndiye ndamxabisa kakhulu ngokuba ngumyeni olungileyo. Ekuqaleni, sasingavumelani ngendlela yokukhulisa abantwana, kodwa siye sakulungisa oko kungaboni ngasonye. Umyeni wam uyavuma ukuba ndihambe nabantwana bam xa ndisiya ezintlanganisweni kuba uyaqonda ukuba bafundiswa izinto ezakhayo.”

UValquíria waseBrazil uthi: “Ndinonyana omnye yaye ndineminyaka eli-19 nditshatile. Kwiminyaka eli-13 edluleyo ndaba liNgqina likaYehova. Ekuqaleni, umyeni wam wayengafuni ndiye entsimini. Kodwa ndiye ndafunda ukumphendula ngobulali ndaza ndamnceda wabona ukuba iBhayibhile iyabuphucula ubuntu bam. Ekuhambeni kwexesha umyeni wam waqonda ukuba kubalulekile ukuba ndibe nenxaxheba kumsebenzi wokushumayela. Namhlanje, uyandixhasa kwizinto zokomoya. Xa ndiye kuqhuba izifundo zeBhayibhile kwiilali ezisemagqagaleni, undisa ngemoto aze andilinde ndide ndigqibe.”

Impembelelo Entle

Ukuba iqabane lakho lifunda namaNgqina kaYehova, ungoyiki ukuba umtshato wenu uza kuqhawuka. Amadoda nabafazi abaninzi abasehlabathini baye bafumanisa ukuba iBhayibhile inempembelelo entle emitshatweni yabo.

Omnye umyeni oliNgqina likaYehova uthi: “Ekuqaleni ndandicaphuka xa umfazi wam wayeqalisa ukunxulumana namaNgqina kaYehova, kodwa ngoku ndicinga ukuba wenza into efanelekileyo.” Omnye umyeni uthi xa ethetha ngomfazi wakhe: “Ukuthembeka, ukuzimisela nengqibelelo yomfazi wam ziye zandenza ndawahlonela kakhulu amaNgqina kaYehova. Umtshato wethu uye wancedakala ngenxa yokholo lwakhe. Siye sanyamezelana yaye umtshato wethu siye sawujonga njengoya kuhlala uhleli.”

[Ibhokisi/Umfanekiso okwiphepha 13]

AmaNgqina KaYehova Awujonga Njani Umtshato?

AmaNgqina kaYehova ajonga iBhayibhile njengeLizwi likaThixo eliphefumlelweyo. Akuthabatha nzulu oko ikuthethayo ngomtshato. Phawula indlela iBhayibhile eyiphendula ngayo le mibuzo ilandelayo:

▪ Ngaba amaNgqina kaYehova akhuthaza amalungu awo ukuba ahlukane namaqabane awo angengomaNgqina? Akunjalo. Umpostile uPawulos wathi: “Ukuba nawuphi na umzalwana unomfazi ongakholwayo, ukanti evuma ukuhlala naye, makangamshiyi; nomfazi onendoda engakholwayo, ukanti ivuma uhlala naye, makangayishiyi indoda yakhe.” (1 Korinte 7:12, 13) AmaNgqina kaYehova ayawuthobela lo myalelo.

▪ Ngaba umfazi oliNgqina ukhuthazwa ukuba angayinanzi iminqweno yomyeni wakhe xa engeloNgqina? Nakanye. Umpostile uPawulos wathi: “Nina bafazi, wathobeleni amadoda enu, ukuze kuthi, nokuba kukho kuwo angalithobeliyo ilizwi, azuzeke ngaphandle kwelizwi ngenxa yehambo yabafazi bawo, kuba eye angamangqina okuzibonela ehambo yenu enyulu ndawonye nentlonelo enzulu.”—1 Petros 3:1, 2.

▪ Ngaba amaNgqina kaYehova afundisa ukuba igunya lomyeni alinakuphikiswa? Akunjalo. Umpostile uPawulos wathi: “Ndifuna nazi ukuba intloko yayo yonke indoda nguKristu; intloko yomfazi yindoda; intloko kaKristu nguThixo.” (1 Korinte 11:3) Umfazi ongumKristu uya kumhlonela umyeni wakhe njengentloko-ntsapho. Sekunjalo, igunya lomyeni lisikelw’ umda. Uya kuphendula kuThixo nakuKristu. Ngoko, ukuba umyeni ufuna umfazi wakhe enze into echasene nomthetho kaThixo, umfazi ongumKristu ‘uya kuthobela uThixo njengomlawuli kunabantu.’—IZenzo 5:29.

▪ Ngaba amaNgqina kaYehova afundisa ukuba uqhawulo-mtshato aluvumelekanga? Akunjalo. UYesu Kristu wathi: “Ndithi kuni nabani na oqhawula umtshato nomfazi wakhe, ngaphandle kwangesizathu sohenyuzo [ukuziphatha okubi ngokwesini], aze atshate nomnye uyakrexeza.” (Mateyu 19:9) Ngenxa yoko amaNgqina kaYehova avumelana nembono kaYesu yokuba umtshato unokuqhawulwa xa kukrexeziwe. Kodwa akholelwa ukuba imitshato ayimele iqhawulwe ngaphandle kwezizathu ezivakalayo. Akhuthaza amalungu awo ukuba athobele la mazwi kaYesu: “Ngenxa yesi sizathu indoda iya kumshiya uyise nonina ize inamathele emfazini wayo, baze abo babini babe nyama-nye . . . Ngoko ke, oko uThixo akubophelele ngedyokhwe ndawonye makungahlukaniswa mntu.”—Mateyu 19:5, 6.