Nceda Abo Baye Babhadula Bawushiya Umhlambi
“Vuyisanani nam, kuba ndiyifumene imvu yam ebilahlekile.”—LUKA 15:6.
1. UYesu ubonise njani ukuba ungumalusi onothando?
UNYANA kaYehova okuphela kwamzeleyo, uYesu Kristu, ubizwa ngokuba ‘ngumalusi omkhulu wezimvu.’ (Heb. 13:20) IZibhalo zakuxela kwangaphambili ukufika kwakhe, zaza zabonisa ukuba wayenguMalusi okhethekileyo owayezimisele ukufumana ‘izimvu ezilahlekileyo’ zakwaSirayeli. (Mat. 2:1-6; 15:24) Ngaphezu koko, njengokuba umalusi wokoqobo enokuxolela ukufa ukuze akhusele izimvu zakhe, uYesu wafela abo banjengezimvu ababeza kuba nokholo kwidini lakhe lentlawulelo.—Yoh. 10:11, 15; 1 Yoh. 2:1, 2.
2. Yintoni ekusenokwenzeka ukuba ingunobangela wokuphola kwamanye amaKristu?
2 Okubuhlungu kukuba, abo babelixabisa idini likaYesu baza bazahlulela kuThixo abaseyonxalenye yebandla lamaKristu. Kusenokwenzeka ukuba, ngenxa yokudimazeka, ukuba nkenenkene kwempilo okanye ezinye nje iingxaki, baye bayeka ukukhuthala njengangaphambili baza baphola. Noko ke, uxolo nolonwabo uDavide athetha ngalo kwiNdumiso 23 banokulufumana kuphela xa beyinxalenye yomhlambi kaThixo. Ngokomzekelo wathi kwingoma yakhe: “UYehova ngumaLusi wam. Andiyi kuswela nto.” (INdu. 23:1) Abo bakumhlambi kaThixo abaswelanga nto ngokomoya, kodwa akunjalo kwabo baye babhadula bawushiya umhlambi. Ngubani ke onokubanceda? Banokuncedwa njani? Eneneni, yintoni enokwenziwa ukubanceda babuyele emhlambini?
Ngubani Onokubanceda?
3. UYesu wakuzekelisa njani oko kufunekayo ukuze kuhlangulwe izimvu ezilahlekileyo zedlelo likaThixo?
3 Kufanele kusetyenzwe ngamandla ukuze kuhlangulwe izimvu ezilahlekileyo zedlelo likaThixo. (INdu. 100:3) UYesu wakuzekelisa oko ngokuthi: “Ukuba umntu unezimvu ezilikhulu ize enye yazo ibhadule, akayi kuzishiya ezintabeni na ezingamashumi asithoba anesithoba aze anduluke aye kufuna leyo ibhadulayo? Ukuba uthe wayifumana, inene, uba nemihlali ngakumbi ngayo kunangezo zingamashumi asithoba anesithoba ezingakhange zibhadule. Kwangokunjalo naye uBawo osezulwini akanqweneli ukuba kutshabalale namnye waba bancinane.” (Mat. 18:12-14) Ngubani ke onokunceda abanjengezimvu abaye babhadula bawushiya umhlambi?
4, 5. Abadala bafanele bawujonge njani umhlambi kaThixo?
4 Ukuze abadala abangamaKristu bancede izimvu eziye zabhadula, bamele bakhumbule ukuba umhlambi kaThixo ulibandla labantu abazahlulele kuYehova—‘umhlambi oxabisekileyo wedlelo lakhe.’ (INdu. 79:13) Ezi zimvu zithandekayo zifuna ukunyanyekelwa ngothando, nto leyo ethetha ukuba abalusi abanothando bamele babe nomdla ngokwenene kuzo. Eyona nto inokuba luncedo kukuba nobuhlobo xa bezityelele ngenjongo yokwalusa. Xa umalusi ebonisa uthando ngoxa ekhuthaza ezi zimvu, lunokomelela ukholo lwazo zize zifune ukwenza umgudu wokubuyela emhlambini.—1 Kor. 8:1.
5 Abalusi bomhlambi kaThixo banembopheleleko yokufuna izimvu eziye zabhadula baze bazame ukuzinceda. Umpostile uPawulos wakhumbuza abadala abangamaKristu base-Efese mandulo phayaa ngembopheleleko abanayo yokwalusa xa wathi: “Zilumkeleni nina nawo wonke umhlambi, ekuthe phakathi kwawo umoya oyingcwele wanimisela nangabaveleli, ukuba nilaluse ibandla likaThixo, elo walithenga ngegazi lowakhe uNyana.” (IZe. 20:28) Umpostile uPetros naye wabongoza amadoda amakhulu athanjisiweyo esithi: “Waluseni umhlambi kaThixo eniwunyamekelayo, kungengakunyanzelwa, kodwa ngokuzithandela; kungekhona ngokuthanda inzuzo yokunganyaniseki, kodwa ngentumekelelo; ningabi ziinkosi phezu kwabo balilifa likaThixo, kodwa yibani yimizekelo emhlambini.”—1 Pet. 5:1-3.
6. Kutheni izimvu zikaThixo zilufuna ngokukhethekileyo uncedo lwabalusi namhlanje?
6 Abalusi abangamaKristu bafanele baxelise ‘umalusi omhle,’ uYesu. (Yoh. 10:11) Wayezixhalabele ngokwenene izimvu zikaThixo ibe wabethelela indlela ekubaluleke ngayo ukuzinyamekela xa waxelela uSimon Petros ukuba ‘aluse amatakane akhe ezimvu.’ (Funda uYohane 21:15-17.) Namhlanje izimvu zikufuna ngokukhethekileyo ukunyanyekelwa ngaloo ndlela, kuba uMtyholi ubhinq’ omfutshane, ezama ukwaphula ingqibelelo yabantu abazahlulele kuThixo. USathana usebenzisa ubuthathaka benyama nehlabathi ukuze akhokelele izimvu zikaYehova esonweni. (1 Yoh. 2:15-17; 5:19) Abo bapholileyo ngabona basesichengeni ibe kufuneka bancedwe ukuze bathobele isibongozo ‘sokuhamba ngokomoya.’ (Gal. 5:16-21, 25) Ukuze abalusi bokomoya bancede ezo zimvu kufuneka bathandazele uncedo lukaThixo, ulwalathiso lomoya wakhe baze babe nobuchule ekusebenziseni iLizwi lakhe.—IMize. 3:5, 6; Luka 11:13; Heb. 4:12.
7. Kubaluleke kangakanani kubadala ukwalusa abo banjengezimvu ababanyamekelayo?
7 Mandulo phayaa kwaSirayeli, umalusi wayesebenzisa umsimelelo omde okanye intonga egoso-goso ukuze aqhube umhlambi wakhe. Zazisithi izimvu xa ziphuma okanye zibuyela esibayeni, ‘zidlule ngaphantsi kwentonga egoso-goso’ njengoko umalusi ezibala. (Lev. 27:32; Mika 2:12; 7:14) Naye umalusi ongumKristu ufanele azi umhlambi kaThixo awunyamekelayo kwakunye neemeko zawo. (Thelekisa IMizekeliso 27:23.) Ngenxa yoko, ukwalusa kuphakathi kwezinto ezibalulekileyo ezixutyushwa ngamaqumrhu abadala. Oku kuquka ukwenza amalungiselelo okunceda abo baye babhadula. UYehova wathi uya kuzifuna izimvu zakhe aze azinyamekele. (Hez. 34:11) Ngoko uThixo uyavuya xa abadala besenza okufanayo ukuzama ukunceda izimvu eziye zabhadula ukuba zibuyele emhlambini.
8. Ziziphi iindlela abadala abanokuzinceda ngayo izimvu?
8 Xa umKristu egula, ukutyelelwa ngumalusi womhlambi kaThixo kunokumvuyisa kuze kumkhuthaze. Kunokuba njalo naxa imvu egula ngokomoya ityelelwa. Abadala banokumfundela izibhalo lowo upholileyo, baxubushe naye inqaku elithile, bathethe ngeengongoma ezibangel’ umdla zeentlanganiso zebandla, bathandaze naye, njalo njalo. Banokumchazela ukuba amalungu ebandla aya kukuvuyela ukuphinda ambone kwiintlanganiso zebandla. (2 Kor. 1:3-7; Yak. 5:13-15) Ukumtyelela, ukumfowunela okanye ukumbhalela ileta kunokumnceda gqitha! Ukunceda imvu eshiye umhlambi kunokumvuyisa umdala ongumKristu onothando.
Sonke Sinokubanceda
9, 10. Kutheni kungeyombopheleleko yabadala kuphela ukuxhalabela imvu ebhadulayo?
9 Ngenxa yokuba siphila kumaxesha kaxakeka nawobunzima, sisenokungaphawuli ukuba umKristu othile uyakhukuliseka ebandleni. (Heb. 2:1) Sekunjalo izimvu zikaYehova zixabisekile kuye. Nganye kuzo ibaluleke kanye njengelungu ngalinye lomzimba womntu. Kungeso sizathu sonke kufuneka sibaxhalabele abazalwana bethu size sinyamekelane. (1 Kor. 12:25) Ngaba nawe ubaxhalabele?
10 Ekubeni abaveleli abangamaKristu bengabona banembopheleleko yokukhangela baze bancede izimvu eziye zabhadula, ayimele ibe ngabo kuphela abaxhalabela amaKristu apholileyo. Aba balusi banokuncediswa nangamanye amaKristu. Sifanele sibakhuthaze size sibomeleze ngokomoya abazalwana noodadewethu abafuna uncedo lokubuyela emhlambini. Banokuncedwa njani?
11, 12. Liliphi ithuba elikhethekileyo onokulifumana xa unceda umKristu opholileyo?
11 Kwezinye iimeko, abadala basenokucela abavakalisi boBukumkani abanamava ukuba babaqhubele isifundo seBhayibhile abo baye baphola nabafuna uncedo. Injongo yoko kukubanceda bavuselele ‘uthando ababenalo kuqala.’ (ISityhi. 2:1, 4) La maKristu anokomelezwa ngokomoya xa kuxutyushwa nawo izinto eziye zawaphosa ngoxa ebengekho ebandleni.
12 Ukuba abadala bacela ukuba uqhubele umKristu ofuna ukuncedwa ngokomoya isifundo, thandazela ukuba uYehova akukhokele aze akusikelele. Eneneni, “qengqela kuYehova imisebenzi yakho yaye amacebo akho aya kumiselwa ngokuqinileyo.” (IMize. 16:3) Cingisisa ngeZibhalo neengongoma ezomelez’ ukholo onokuzisebenzisa xa uxubusha nabo bafuna uncedo lokomoya. Khumbula umzekelo omhle kampostile uPawulos. (Funda eyabaseRoma 1:11, 12.) UPawulos wayekulangazelela ukubona amaKristu aseRoma ukuze awanike isiphiwo esithile sokomoya ukuze aqine. Wayekwalangazelela nokukhuthazana nawo. Ngaba nathi asifanele sibe nomoya onjalo xa sizama ukunceda izimvu eziye zabhadula zawushiya umhlambi kaThixo?
13. Yintoni onokuyixubusha nomKristu opholileyo?
13 Xa uxubusha naye, usenokubuza, “Wayifumana njani inyaniso?” Mncede akhumbule aze abalise ngamaxesha amyoli awayekhe wanawo lo mKristu upholileyo kwiintlanganiso, kumsebenzi wokushumayela nakwiindibano. Nawe balisa ngamaxesha amnandi eniye nanawo ninobabini kwinkonzo kaYehova. Thetha ngendlela okukuvuyisa ngayo ukusondela kuYehova. (Yak. 4:8) Chaza indlela ombulela ngayo uThixo ngendlela asinyamekela ngayo thina njengabantu bakhe—ingakumbi indlela asithuthuzela aze asinike ngayo ithemba xa sibandezelekile.—Roma 15:4; 2 Kor. 1:3, 4.
14, 15. Ziziphi iintsikelelo ezakha zafunyanwa ngabo bapholileyo ekunokuba luncedo ukubakhumbuza ngazo?
14 Kunokuba luncedo ukukhumbuza umKristu opholileyo ngeentsikelelo awayedla ngokuzifumana ngoxa wayeyinxalenye yebandla. Ngokomzekelo, enye yezo ntsikelelo kukuba nolwazi ngeLizwi likaThixo neenjongo zakhe. (IMize. 4:18) Xa ‘wayehamba ngokomoya,’ ngokuqinisekileyo wayezixhathisa lula izilingo. (Gal. 5:22-26) Loo nto yabangela ukuba abe nesazela esicocekileyo aze akwazi ukuthandaza kuYehova ‘enoxolo lukaThixo olungaphaya kokuqonda olulinda iintliziyo zethu namandla ethu engqondo.’ (Fil. 4:6, 7) Cingisisa ngezo ngongoma, yiba nomdla wokwenene, yaye yenza unako nako wokubonisa uthando kulo mzalwana okanye udade njengoko umkhuthaza ngokomoya ukuze abuyele emhlambini.—Funda eyabaseFilipi 2:4.
15 Masithi ungumdala yaye ukutyelelo lokwalusa. Unokukhuthaza isibini esitshatileyo esiye saphola ukuba sikhumbule ixesha esaqala ngalo ukuva ngenyaniso eseLizwini likaThixo. Le nyaniso imele ukuba yayisimangalisa, ibangel’ umdla yaye yasikhulula ngokomoya! (Yoh. 8:32) Simele ukuba sasinombulelo ongazenzisiyo ngokufunda ngoYehova, uthando analo neenjongo zakhe ezimangalisayo! (Thelekisa uLuka 24:32.) Sikhumbuze ngolwalamano lwaso noYehova nelungelo elingathethekiyo lomthandazo elifunyanwa ngamaKristu azahluleleyo. Bakhuthaze abo bapholileyo ukuba baphinde bazixabise ‘iindaba ezilungileyo ezizukileyo zoThixo onoyolo,’ uYehova.—1 Tim. 1:11.
Qhubeka Ubathanda
16. Yenza umzekelo obonisa ukuba ukuzama ukunceda abantu ngokomoya kuyasebenza.
16 Ngaba ngokwenene ayasebenza la macebiso angasentla? Ewe ayasebenza. Ngokomzekelo, omnye umntwana owaba ngumvakalisi woBukumkani xa wayeneminyaka eli-12 ubudala, waphola xa wayeneminyaka eli-15 ubudala. Noko ke, wavuseleleka yaye sele eneminyaka engaphezu kwama-30 ekwinkonzo yexesha elizeleyo. Wavuselelwa ubukhulu becala ngumdala ongumKristu. Ulubulela gqitha olo ncedo lokomoya!
17, 18. Ziziphi iimpawu eziya kukunceda njengoko ubuyisela kumhlambi kaThixo umntu oye wabhadula?
17 Luthando olwenza ukuba amaKristu ancede abo bapholileyo ukuba babuyele ebandleni. UYesu wathi ngabalandeli bakhe: “Ndininika umyalelo omtsha, wokuba nithandane; kanye njengoko ndinithandileyo mna, ukuba nani nithandane. Ngako oko bonke baya kwazi ukuba ningabafundi bam, ukuba ninothando phakathi kwenu.” (Yoh. 13:34, 35) Ngokwenene uthando luphawu olwahlula amaKristu enene. Ngaba olo thando alumele luboniswe kumaKristu abhaptiziweyo ekusenokwenzeka ukuba aye aphola? Ngokuqinisekileyo lumele luboniswe! Kodwa xa siwanceda sifanele sibonise nezinye iimpawu zikaThixo ezingakumbi.
18 Ziziphi iimpawu ekunokufuneka ube nazo xa unceda umntu oye wabhadula wawushiya umhlambi kaThixo? Ukongezelela kuthando, kunokufuneka ube nemfesane, ububele, ubulali, nokuzeka kade umsindo. Kwezinye iimeko, kusenokufuneka uxolele. UPawulos wathi: “Yambathani umsa wemfesane, ububele, ukuthobeka kwengqondo, ubulali, nokuzeka kade umsindo. Qhubekani ninyamezelana yaye nixolelana ngesisa ukuba nabani na unesizathu sokukhalazela omnye. Kanye njengoko uYehova wanixolela ngesisa, yenzani njalo nani. Ke, phezu kwazo zonke ezi zinto, yambathani uthando, kuba lungumxokelelwane ogqibeleleyo womanyano.”—Kol. 3:12-14.
19. Kutheni kungelolize nje ukwenza umgudu wokunceda abanjengezimvu babuyele kumhlambi wamaKristu?
19 Inqaku elilandelayo kweli phephancwadi liza kuxubusha ngezizathu zokuba abanye babhadule bawushiye umhlambi kaThixo. Liza kubonisa nendlela abo babuyela ebandleni abanokulindela ukwamkelwa ngayo. Njengoko ufunda elo nqaku yaye ucinga ngeli, qiniseka ukuba nawuphi na umgudu owenzayo wokuzama ukunceda abanjengezimvu babuyele kumhlambi wamaKristu awulolize. Kule nkqubo yezinto, abantu abaninzi bachitha bonke ubomi babo bezama ubutyebi, kodwa umntu nje omnye ubaluleke ngaphezu kwayo yonke imali esehlabathini. UYesu wakubethelela oku ngokwenza umzekeliso wemvu elahlekileyo. (Mat. 18:12-14) Ngamana ungayikhumbula loo ngongoma njengoko usenza umgudu wokwenene ngokungxamisekileyo wokunceda abanjengezimvu abathandwayo nguYehova nabaye babhadula ukuba babuyele emhlambini.
Ubuya Kuphendula Uthini?
• Abalusi abangamaKristu banayiphi imbopheleleko ngokuphathelele abanjengezimvu abaye babhadula bawushiya umhlambi?
• Unokubanceda njani abo bapholileyo?
• Ziziphi iimpawu ezinokukunceda njengoko ubuyisela emhlambini abo baye babhadula bawushiya?
[Umfanekiso okwiphepha 10]
Abalusi abangamaKristu abanothando benza umgudu wokunceda abo baye babhadula bawushiya umhlambi kaThixo