Ufuna Ukuba Ngumntu Onjani?

INTLOKO yamapolisa kwenye idolophu yakwiiPhilippines yabuza omnye uvulindlela lo mbuzo, “Niyenze ntoni laa ndoda ukuze itshintshe isimilo sayo?” Ikhomba imfumba yamaphepha awayekwidesika yayo yalek’ umsundulo ngelithi: “Ngaba ubusazi ukuba onke la maphepha anamatyala ewenzileyo? Nisiphumze kwenye yamadoda ebesiqhekez’ intloko kule dolophu.” Le ndoda kuthethwa ngayo yayiyindla-manzi efun’ undikho, eyayihleli nje iqhway’ udushe. Yintoni eyenze yatshintsha kangaka? LiLizwi likaThixo eliphefumlelweyo iBhayibhile.

Abantu abaninzi baye basijonga nzulu isiluleko sompostile uPawulos ‘sokulahla ubuntu obudala obuvisisana nehambo yabo yangaphambili nobonakaliswe yiminqweno yabo ekhohlisayo baze bambathe ubuntu obutsha obadalwa ngokokuthanda kukaThixo.’ (Efe. 4:22-24) Enoba kufuneka senze utshintsho olungakanani na, ukwambatha ubuntu obutsha kuyinxalenye yokuba ngumKristu.

Noko ke, ukutshintsha nokwenza inkqubela esenza sifanelekele ukubhaptizwa, kusisiqalo nje. Xa sizahlulela size sibhaptizwe sifana nomthi okwinqanaba lokuqala lokukrolwa. Ungakwazi ukubona ukuba lo mthi uza kuba yintoni ekugqibeleni, kodwa kusekuninzi okufuneka kwenziwe kuwo. Umkroli kusafuneka esebenzise ubuchule bakhe ukuze awuhombise. Xa sibhaptizwa, siba neempawu ezisisiseko ezifunekayo kumkhonzi kaThixo. Noko ke, ubuntu bethu obutsha busafuna ukuphuculwa. Kusafuneka senjenjalo ngokuqhubeka sisenza uhlengahlengiso.

UPawulos wabona kufanelekile ukuba aphucule. Wathi: “Xa ndinqwenela ukwenza okulungileyo, kusuke kubekho okubi kum.” (Roma 7:21) Ngokuqinisekileyo uPawulos wayezazi kakuhle, esazi noko wayefuna ukuba kuko. Kuthekani ngathi? Nathi kufuneka sizibuze: ‘Yintoni engaphakathi kum? Ndingumntu onjani? Ndifuna ukuba ngumntu onjani?’

Yintoni Engaphakathi Kum?

Xa silungisa indlu endala, akwanelanga ukuyipeyinta ngaphandle ukuba iintsika zayo zibolile. Ukungazilungisi kunokubangela intlekele kamva. Ngokufanayo, ukubonakala ngathi singamalungisa akwanelanga. Sifanele sinikele ingqalelo kuzo zonke iinkalo zobuntu bethu size sibone iingxaki ezifuna ukulungiswa. Kungenjalo ubuntu obudala buza kuphinda buvele. Ngoko kunyanzelekile ukuba sizihlolisise. (2 Kor. 13:5) Kufuneka sikhangele kuthi imikhwa engathandekiyo size siyilungise. UYehova uyasinceda sikwazi ukwenza oko.

UPawulos wathi: “Ilizwi likaThixo liphilile, linamandla yaye libukhali ngaphezu kwalo naliphi na ikrele elintlangothi-mbini, lihlaba lide lahlule umphefumlo nomoya, kwanamalungu nomongo wawo, yaye liyakwazi ukuphicotha iingcamango notyekelo lwentliziyo.” (Heb. 4:12) ILizwi likaThixo elibhaliweyo, iBhayibhile linokuba yimpembelelo enamandla kubomi bethu. Linokuhlaba ligqobhoze kuthi—ngokufuziselayo lide liye kutsho kumongo. Lityhila iingcamango neenjongo zethu, liveza oko sikuko ngokwenene kunento esibonakala siyiyo okanye esicinga ukuba siyiyo. ILizwi likaThixo lisinceda ngendlela engathethekiyo ukuze sizibone izinto eziyingxaki kuthi!

Xa silungisa indlu endala, kusenokunganeli ukutshintsha izinto ezonakeleyo. Ukwazi unobangela womonakalo kunokusinceda sithabathe amanyathelo okuwuthintela ungaphindi wenzeke. Ngendlela efanayo, ukunganeli nje ukubona unobangela wemikhwa yethu engathandekiyo kodwa ukujonga okuye kwanegalelo kuyo kunokusinceda sikwazi ukulawula ubuthathaka esinabo. Zininzi izinto ezibumba ubuntu bethu. Ezinye zazo liwonga esinalo, imali esinayo, indawo esihlala kuyo, indlela esikhuliswe ngayo, abazali bethu, abahlobo bethu nonqulo lwethu. Iinkqubo zikamabonwakude neemovie esizibukelayo nezinye iindlela zokuzonwabisa, zinento eziyenzayo kubuntu bethu. Ukuziqonda izinto ezonakalisa ubuntu bethu kusinceda singazivumeli zisitshintshe.

Emva kokuzihlolisisa, sisenokuthi, ‘Andinakuzinceda ndinje umthetho wam.’ Kuphosakele ukucinga ngolo hlobo. Ethetha ngabo babekwibandla laseKorinte, ngaphambili ababengabahenyuzi, amafanasini, amanxila nabanye, uPawulos wathi: “Abanye kuni babenjalo kanye. Kodwa niye nahlanjwa nahlambuluka . . . ngomoya kaThixo wethu.” (1 Kor. 6:9-11) Umoya kaYehova unokusinceda nathi senze utshintsho olufunekayo.

Cinga nje ngoMarcos,a ohlala kwiiPhilippines. Ethetha ngendlela awakhula ngayo, uMarcos uthi: “Abazali bam babesoloko bexambulisana. Loo nto yenza ukuba ndibavukele ndakuba neminyaka eli-19 ubudala.” UMarcos waduma kakubi ngokungcakaza, ukuba lisela, nokukhuthuza abantu ebaxhomise ngompu. Yena nabahlobo bakhe bakha bazama ukuqweqwedisa inqwelo-moya, kodwa ayizange iphumelele loo nto. Le mikhwa mibi kaMarcos yaqhubeka sele etshatile. Walahlekelwa zizo zonke izinto awayenazo ngenxa yokungcakaza. Akuzange kube kudala, uMarcos wafundelwa iBhayibhile ngamaNgqina kaYehova awayefunda nomfazi wakhe. Ekuqaleni, wayezibona engakufanelekeli ukuba liNgqina. Noko ke, ukusebenzisa oko wayekufunda aze aye kwiintlanganiso kwamnceda uMarcos ukuba aziyeke izinto awayezenza. Ngoku naye ungumKristu obhaptiziweyo osoloko efundisa abanye abantu indlela abanokutshintsha ngayo.

Ufuna Ukuba Yintoni?

Sinokutshintsha njani ukuze siphucule iimpawu ezilindeleke kuthi njengamaKristu? UPawulos uthi xa eluleka amaKristu: “Lahlani konke, ingqumbo, umsindo, ububi, yaye makungaphumi ntetho itshabhisayo, nantetho ingamanyala emlonyeni wenu. Musani ukuxokisana. Buhlubeni ubuntu obudala kunye noqheliselo lwabo.” Lo mpostile uhlabela mgama athi: “Nambathe ubuntu obutsha, obuthi ngolwazi oluchanileyo benziwe bube butsha ngokomfanekiso waLowo wabudalayo.”—Kol. 3:8-10.

Ngoko ke, olona sukelo lwethu kukulahla ubuntu obudala size sambathe obutsha. Ziziphi iimpawu esifanele sibe nazo ukuze sifikelele olo sukelo? UPawulos uthi: “Yambathani umsa wemfesane, ububele, ukuthobeka kwengqondo, ubulali, nokuzeka kade umsindo. Qhubekani ninyamezelana yaye nixolelana ngesisa ukuba nabani na unesizathu sokukhalazela omnye. Kanye njengoko uYehova wanixolela ngesisa, yenzani njalo nani. Ke, phezu kwazo zonke ezi zinto, yambathani uthando, kuba lungumxokelelwane ogqibeleleyo womanyano.” (Kol. 3:12-14) Ukuzama ngamandla ukuba nezi mpawu kuya kusinceda ‘sithandeke ngakumbi kokubini kuYehova nakubantu.’ (1 Sam. 2:26) Xa wayesemhlabeni, uYesu wazibonisa ngendlela ebalaseleyo iimpawu zikaThixo. Ngokufunda ngaye size silandele umzekelo wakhe, sinokufana naye, njengoko ‘sixelisa uThixo.’—Efe. 5:1, 2.

Enye indlela esinokulubona ngayo utshintsho esimele silwenze, kukufunda ngobuntu babantu ekuthethwe ngabo eBhayibhileni, sijonge izinto ezibangela umdla ngabo nezo zingathandekiyo. Ngokomzekelo, cinga nje ngoYosefu, unyana kasolusapho uYakobi. Nakuba wayephethwe ngokungekho sikweni, uYosefu waqhubeka enesimo sengqondo esihle kwakunye neempawu ezithandekayo. (Gen. 45:1-15) Kwelinye icala, unyana kaKumkani uDavide uAbhisalom, wazenza ngathi ubaxhalabele abantu ibe wanconywa ngenxa yokuba yinzwana. Kodwa enyanisweni wayengumngcatshi nombulali. (2 Sam. 13:28, 29; 14:25; 15:1-12) Ukuzenza ngathi ulungile nokuba mhle ngembonakalo, akwenzi umntu athandeke.

Sinako Ukubuphucula Ubuntu Bethu

Ukuze siphucule ubuntu bethu size sibe bahle kuThixo, kufuneka sinikele ingqalelo kumntu ofihlakeleyo. (1 Pet. 3:3, 4) Ukuze sitshintshe ubuntu bethu kufuneka sazi iimpawu zethu ezingathandekiyo noonobangela bazo size ke sizame ukuba nezo zintle. Ngaba sinokuqiniseka ukuba imigudu esiyenzayo iya kuphumelela?

Eneneni, uYehova unokusinceda senze utshintsho olufunekayo. Kanye njengomdumisi sinokuthandaza sithi: “Dala ngaphakathi kum intliziyo esulungekileyo, Thixo, uze ufake ngaphakathi kum umoya omtsha, oqinileyo.” (INdu. 51:10) Sinokucela umoya kaThixo ukuba usebenze kuthi, uze usibangele ukuba sinqwenele ukutshintsha ubomi bethu buvisisane nokuthanda kwakhe. Sinako ukuthandeka kuYehova!

[Umbhalo osemazantsi]

[Umfanekiso okwiphepha 4]

Ngaba kwanele ukupeyinta umphandle wale ndlu ibethwe luqhwithela?

[Umfanekiso okwiphepha 5]

Ngaba ubuntu bakho bufana nobukaKristu?