Ngaba ‘Uligosa Lobubele Obungasifanelanga BukaThixo’?
“Ngokuphathelele uthando lobuzalwana yibani nomsa omnye komnye. Ekuboniseni imbeko omnye komnye khokelani.”—ROMA 12:10.
1. ILizwi likaThixo lisiqinisekisa ngantoni?
ILIZWI LIKATHIXO lisoloko lisiqinisekisa ukuba uYehova uya kusinceda xa sidimazekile okanye sibuhlungu. Ngokomzekelo, khawuve la mazwi athuthuzelayo: “UYehova uyabaxhasa bonke abawayo, yaye uyabaphakamisa bonke abaqubudileyo.” “Uyabaphilisa abo baphuke intliziyo, uyazibopha iindawo zabo ezibuhlungu.” (INdu. 145:14; 147:3) Ukongezelela koko, uBawo wethu wasezulwini uthi: “Mna, Yehova uThixo wakho, ndibamba isandla sakho sasekunene, ndithi kuwe, ‘Musa ukoyika. Mna ngokwam ndiza kukunceda.’”—Isa. 41:13.
2. UYehova ubaxhasa njani abakhonzi bakhe?
2 Noko ke, uYehova, ohlala kumazulu angabonakaliyo, ‘unokusibamba njani ngesandla’? ‘Usiphakamisa njani xa siqubudile’ ngenxa yentliziyo ebuhlungu? UYehova uThixo usixhasa ngeendlela ezahlukahlukeneyo. Ngokomzekelo, unika abantu bakhe “amandla angaphaya koko kuqhelekileyo” ngomoya wakhe oyingcwele. (2 Kor. 4:7; Yoh. 14:16, 17) Isigidimi esinamandla esikwiLizwi likaThixo eliphefumlelweyo, iBhayibhile, siyabaphakamisa abakhonzi bakaThixo. (Heb. 4:12) Ngaba ikho enye indlela asomeleza ngayo uYehova? Incwadi yokuQala kaPetros iza kusiphendula.
‘Ububele Obungasifanelanga BukaThixo Bubonakaliswa Ngeendlela Ezahlukahlukeneyo’
3. (a) Uthini umpostile uPetros ngezilingo? (b) Ithetha ngantoni inxalenye yokugqibela yencwadi yokuqala kaPetros?
3 Xa ebhalela amaKristu athanjiswe ngomoya, umpostile uPetros uwaxelela ukuba anesizathu esihle sokuvuya ngenxa yokuba aza kufumana umvuzo omkhulu. Wandula ke alek’ umsundulo ngelithi: “Nangona okwethutyana ngoku, ukuba kumele kube njalo, nisiva ubuhlungu ngenxa yezilingo ezahlukahlukeneyo.” (1 Pet. 1:1-6) Phawula igama elithi “ezahlukahlukeneyo.” Libonisa ukuba akazi kujamelana nezilingo ezifanayo. Noko ke, uPetros akapheleli apho, eshiya abazalwana bakhe bengaqinisekanga enoba baya kukwazi kusini na ukujamelana nezo zilingo zahlukahlukeneyo. Kunoko, uPetros uthi amaKristu amele aqiniseke ukuba uYehova uya kuwanceda anyamezele nasiphi na isilingo adibana naso. Eso siqinisekiso sifumaneka kwinxalenye yokugqibela yeleta kaPetros, apho lo mpostile axubusha khona imiba ephathelele “isiphelo sezinto zonke.”—1 Pet. 4:7.
4. Kutheni amazwi akweyoku-1 kaPetros 4:10 esithuthuzela nje?
4 UPetros uthi: “Njengoko ngamnye wenu wasamkelayo isiphiwo, lungiselelanani ngaso njengamagosa amahle obubele obungasifanelanga bukaThixo obubonakaliswa ngeendlela ezahlukahlukeneyo.” (1 Pet. 4:10) UPetros uphinda asebenzise igama elithi “ezahlukahlukeneyo.” Ngamany’ amazwi uthi, ‘Izilingo ziza ngeendlela ezahlukahlukeneyo, kodwa noThixo ububonakalisa ngeendlela ezahlukahlukeneyo ububele bakhe obungasifanelanga.’ Kutheni loo mazwi ethuthuzela nje? Kungenxa yokuba abonisa ukuba enoba sijamelana naziphi na izilingo, uThixo uya kubonisa ububele bakhe obungasifanelanga ngendlela eya kusinceda sizinyamezele. Ngaba kula mazwi kaPetros, uyayibona indlela Yehova abubonisa ngayo ububele bakhe obungasifanelanga kuthi? Usebenzisa amaKristu esikhonza kunye nawo.
‘Ukulungiselelana’
5. (a) Yintoni efanele yenziwe ngumKristu ngamnye? (b) Kuphakama yiphi imibuzo?
5 Xa ethetha nawo onke amalungu ebandla lamaKristu, uPetros uthi: “Ngaphezu kwezinto zonke, yibani nothando olunzulu omnye ngomnye.” Wandula ke aleke ngelithi: “Njengoko ngamnye wenu wasamkelayo isiphiwo, lungiselelanani ngaso.” (1 Pet. 4:8, 10) Kungeso sizathu mntu ngamnye osebandleni emele abe negalelo ekukhuthazeni amanye amaKristu. Siphathiswe into ethile ebalulekileyo kaYehova, yaye sinembopheleleko yokuyidlulisela kwabanye. Ngoko, yintoni le siyiphathisiweyo? UPetros uthi ‘sisiphiwo.’ Sisiphi eso siphiwo? Sisisebenzisa njani ‘ekulungiselelaneni’?
6. Ziziphi ezinye izipho aphathiswe zona amaKristu?
6 ILizwi likaThixo lithi: “Sonke isipho esilungileyo naso sonke isipho esigqibeleleyo sivela phezulu.” (Yak. 1:17) Enyanisweni, zonke izipho uYehova aziphathisa abantu bakhe zibonisa ububele bakhe obungasifanelanga. Esinye isipho esibalaseleyo uYehova asinika sona ngumoya oyingcwele. Eso sipho sisenza sikwazi ukuba neempawu zikaThixo ezinjengothando, ukulunga nobulali. Zezo mpawu ke ezibangela ukuba sibathande ngokusuka entliziyweni abazalwana bethu size sikulungele ukubanceda. Ubulumko nolwazi lokwenyaniso zizipho ezihle esizifumana ngokuncedwa ngumoya oyingcwele. (1 Kor. 2:10-16; Gal. 5:22, 23) Eneneni, onke amandla, ubuchule neziphiwo zethu sifanele sizigqale njengezipho esinokuzisebenzisela ukudumisa nokuzukisa uBawo wethu wasezulwini. Sinembopheleleko esiyinikwe nguThixo yokusebenzisa ubuchule neempawu zethu ukuze sidlulisele ububele obungasifanelanga bukaThixo kwamanye amaKristu.
“Lungiselelanani Ngaso”—Njani?
7. (a) Lithetha ukuthini ibinzana elithi “njengoko”? (b) Yiyiphi imibuzo esifanele sizibuze yona, ibe ngoba?
7 Ngokuphathelele izipho esiye sazifumana, uPetros uphinda athi: “Njengoko ngamnye wenu wasamkelayo isiphiwo, lungiselelanani ngaso.” Ibinzana elithi “njengoko” libonisa ukuba iimpawu nobuchule bunokunganeli nje ukungafani kodwa busenokungalingani. Sekunjalo, ngamnye wethu ubongozwa ukuba ‘alungiselele abanye ngaso’ [oko kukuthi, asebenzise nasiphi na isipho asifumeneyo]. Ngaphezu koko ibinzana elithi “lungiselelanani ngaso njengamagosa amahle” lingumyalelo. Ngenxa yoko, sifanele sizibuze oku: ‘Ngaba ngokwenene ndiyazisebenzisa izipho endiziphathisiweyo ukuze ndomeleze amanye amaKristu?’ (Thelekisa eyoku-1 kuTimoti 5:9, 10.) ‘Okanye ngaba ndisebenzisa iziphiwo endizifumene kuYehova ukuze kungenelwe mna—mhlawumbi ndifumane ubutyebi okanye iwonga ekuhlaleni?’ (1 Kor. 4:7) Ukuba sisebenzisa izipho esinazo ukuze ‘silungiselelane,’ siya kumkholisa uYehova.—IMize. 19:17; Funda amaHebhere 13:16.
8, 9. (a) Ziziphi ezinye iindlela amaKristu abanceda ngazo abazalwana noodade ehlabathini lonke? (b) Abazalwana noodade bancedana njani kwibandla okulo?
8 ILizwi likaThixo lithetha ngeendlela ezahlukahlukeneyo awathi amaKristu enkulungwane yokuqala alungiselelana ngazo. (Funda eyabaseRoma 15:25, 26; neyesi-2 kuTimoti 1:16-18.) Nanamhlanje, umyalelo wokunceda amanye amaKristu ngezipho esinazo uthotyelwa ngokupheleleyo ngamaKristu okwenyaniso. Nazi ezinye iindlela akwenza ngazo oku.
9 Abazalwana abaninzi nyanga nganye bachitha iiyure ezininzi belungiselela iintetho abaza kuzinikela kwiintlanganiso. Xa bedlulisela inkcazelo ebalulekileyo yokomoya abayifumene ngoxa befunda iBhayibhile ngamazwi abo acingisiswe kakuhle, wonke umntu okwezi ntlanganiso uncedwa ukuba anyamezele. (1 Tim. 5:17) Abazalwana noodade abaninzi badume ngokuba nobubele nemfesane kwamanye amaKristu. (Roma 12:15) Abanye batyelela rhoqo abo baxinezelekileyo baze bathandaze kunye nabo. (1 Tes. 5:14) Kanti abanye baye babhalele amaKristu ajamelene nezilingo amazwi okhuthazo acingisiswe kakuhle. Abanye bona baye bancede abo banempilo enkenenkene ukuba babekho kwiintlanganiso zebandla. Amawakawaka amaNgqina ancedisa kumsebenzi wokwakhela amanye amaKristu ahlelwe ziintlekele. Ububele noncedo olunikelwa ngaba bazalwana noodade banenkathalo ‘ziindlela ezahlukahlukeneyo uThixo abubonakalisa ngazo ububele bakhe obungasifanelanga.’—Funda eyoku-1 kaPetros 4:11.
Yiyiphi Eyona Nto Ibalulekileyo?
10. (a) UPawulos wayexhalabele ziphi iinkalo ezimbini zenkonzo yakhe kuThixo? (b) Yiyiphi indlela esimxelisa ngayo uPawulos namhlanje?
10 Abakhonzi bakaThixo abaphathiswanga izipho abanokuzisebenzisela ukunceda amanye amaKristu nje kuphela kodwa baphathiswe nesigidimi abamele basidlulisele kubamelwane babo. Umpostile uPawulos wayeziqonda ezi nkalo zimbini zenkonzo yakhe kuYehova. Wabhalela ibandla lase-Efese “ngobugosa bobubele obungasifanelanga bukaThixo” awabunikwayo ngenjongo yokubanceda. (Efe. 3:2) Sekunjalo, waphinda wathi: ‘UThixo usingqine sikufanelekele ukuphathiswa iindaba ezilungileyo.’ (1 Tes. 2:4) Kanye njengoPawulos, siyaqonda ukuba sinikwe isabelo sokushumayela ngoBukumkani bukaThixo. Xa sishumayela ngokuzimisela, sizama ukuxelisa umzekelo esawumiselwa nguPawulos njengomvakalisi weendaba ezilungileyo ongadinwayo. (IZe. 20:20, 21; 1 Kor. 11:1) Siyazi ukuba ukushumayela ngoBukumkani kunokusindisa ubomi. Noko ke, kwangaxeshanye senza unako nako wokuxelisa uPawulos ngokukhangela naliphi na ithuba ‘lokunika abazalwana noodadewethu isiphiwo esithile sokomoya.’—Funda eyabaseRoma 1:11, 12; 10:13-15.
11. Sifanele sisijonge njani isabelo sokushumayela nesokukhuthaza abazalwana bethu?
11 Kwezi nkalo zimbini zomsebenzi wamaKristu yiyiphi eyona ibalulekileyo? Ukubuza lo mbuzo ngandlel’ ithile kufana nokubuza ngentaka, Liliphi elona phiko layo libalulekileyo kumaphiko ayo amabini? Impendulo izicacele. Kufuneka iwasebenzise omabini amaphiko ayo ukuze ibhabhe kakuhle. Ngokufanayo, kufuneka siziphumeze zombini ezi nkalo zenkonzo yethu kuThixo ukuze sibe ngamaKristu ngokupheleleyo. Ngaloo ndlela, kunokuba sigqale isabelo sethu sokushumayela iindaba ezilungileyo nesokukhuthaza abazalwana noodadewethu njengezinganxulumananga, siya kuzijonga njengompostile uPetros noPawulos—njengeembopheleleko ezihamba kunye. Njani?
12. Sinokuba zizo njani izixhobo ezisetyenziswa nguYehova?
12 Njengabahambisi bevangeli, sisebenzisa nabuphi na ubuchule esinabo ukuze sifikelele iintliziyo zabamelwane bethu ngesigidimi esikhuthazayo soBukumkani bukaThixo. Xa sisenjenjalo, sinethemba lokuba baya kuncedakala baze babe ngabafundi bakaKristu. Noko ke, sinokusebenzisa nabo nabuphi na ubuchule nezipho esinazo ukuze sikhuthaze amanye amaKristu ngamazwi nangezenzo, ndlela ezo uThixo abubonisa ngazo ububele bakhe obungasifanelanga. (IMize. 3:27; 12:25) Ngaloo ndlela, sinethemba lokuba aya kuncedakala aze aqhubeke engabafundi bakaKristu. Kuzo zozibini ezi zabelo—ukushumayela kubamelwane bethu ‘nokulungiselelana’—siba nelungelo elibalaseleyo lokuba zizixhobo ezisetyenziswa nguYehova.—Gal. 6:10.
“Yibani Nomsa Omnye Komnye”
13. Yintoni eya kwenzeka xa ‘singalungiselelani’?
13 UPawulos wawabongoza wathi amanye amaKristu: “Ngokuphathelele uthando lobuzalwana yibani nomsa omnye komnye. Ekuboniseni imbeko omnye komnye khokelani.” (Roma 12:10) Eneneni, ukuba nomsa kubazalwana bethu kusenza sikhonze ngentliziyo yethu yonke njengamagosa obubele obungasifanelanga bukaThixo. Siyaqonda ukuba, ukuba uSathana unokuphumelela ekusithinteleni ukuba ‘silungiselelane,’ uya kusenza singamanyani. (Kol. 3:14) Xa singamanyananga, asisayi kukhuthala kumsebenzi wokushumayela. USathana uyazi kakuhle into yokuba xa enzakalise elinye lamaphiko ethu ngokungathi kunjalo, asinakubhabha.
14. Ngubani ongenelwayo xa ‘silungiselelana’? Yenza umzekelo.
14 ‘Ukulungiselelana’ akuncedi nje kuphela abo bafumana ububele obungasifanelanga bukaThixo kodwa nabo babubonakalisayo. (IMize. 11:25) Ngokomzekelo, cinga nje ngoRyan noRoni isibini esitshatileyo saseIllinois, eUnited States. Bathi bakufumanisa ukuba iNkanyamba uKatrina itshabalalise amakhulukhulu amakhaya amaNgqina, uthando lobuzalwana lwabangela ukuba bayeke imisebenzi yabo yempangelo, bathengise indawo ababehlala kuyo, bathenge ikharavani endala, bayilungise baze bahambe umgama ozikhilomitha ezili-1 400 besiya eLouisiana. Bahlala apho ngaphezu konyaka ngoxa besebenzisa ixesha, amandla nemali yabo ukuze bancede abazalwana. URyan, oneminyaka engama-29 ubudala uthi: “Ukunceda abantu abehlelwe yintlekele kwandisondeza kuThixo. Ndabona indlela uYehova abanyamekela ngayo abantu bakhe.” URyan wongezelela ngelithi: “Ukusebenza nabazalwana abadala kunam kwandifundisa lukhulu ngendlela yokunyamekela abazalwana. Enye into endayifundayo kukuba ininzi into enokwenziwa sithi baselula entlanganweni kaYehova.” URoni, oneminyaka engama-25 ubudala yena uthi: “Ndiyibulela gqitha into yokukwazi ukunceda abanye. Andizange ndonwabe kangaka ebomini bam. Ndiyazi ukuba kwiminyaka ezayo, ndiseza kuqhubeka ndifumana iziqhamo zala mava ayolisayo.”
15. Ziziphi izizathu ezihle esinazo zokuqhubeka sikhonza njengamagosa obubele obungasifanelanga bukaThixo?
15 Eneneni ukuthobela umyalelo kaThixo wokushumayela iindaba ezilungileyo nokukhuthaza abazalwana noodadewethu kuzisa iintsikelelo kuthi sonke. Abantu esibancedayo bayomelela ngokomoya, ngoxa thina sifumana uvuyo olungathethekiyo olubangelwa kukupha kuphela. (IZe. 20:35) Ibandla lithandana ngakumbi njengoko lungu ngalinye libonisa umdla kwelinye. Ukongezelela, uthando nomsa esiwubonisayo sisonke uyenza icace into yokuba singamaKristu okwenyaniso. UYesu wathi: “Ngako oko bonke baya kwazi ukuba ningabafundi bam, ukuba ninothando phakathi kwenu.” (Yoh. 13:35) Ngaphezu kwako konke, uzuko luya kuBawo wethu onothando, uYehova, njengoko umnqweno wakhe wokunceda abo basweleyo ewubonakalisa ngabakhonzi bakhe basemhlabeni. Ngoko ke, sinezizathu ezihle zokusebenzisa izipho esinazo ‘ekulungiselelaneni njengamagosa amahle obubele obungasifanelanga bukaThixo’! Ngaba uya kuqhubeka usenjenjalo?—Funda amaHebhere 6:10.
Ngaba Uyakhumbula?
• Ziziphi iindlela uYehova abomeleza ngazo abakhonzi bakhe?
• Yintoni esiyiphathisiweyo?
• Ziziphi ezinye iindlela esinokubanceda ngazo abazalwana noodadewethu?
• Yintoni eya kusenza siqhubeke sisebenzisa izipho esinazo ‘ekulungiselelaneni’?
[Imifanekiso ekwiphepha 13]
Ngaba ‘iziphiwo’ onazo uzisebenzisela ukukhonza abanye okanye ukuzanelisa?
[Imifanekiso ekwiphepha 15]
Sishumayela iindaba ezilungileyo kwabanye size sixhase namanye amaKristu
[Umfanekiso okwiphepha 16]
Abo banceda abantu abahlelwe yintlekele bafanele banconywe ngomoya wabo wokuzincama