Khangela! Umkhonzi KaYehova Akholisiweyo Nguye

“Khangela! Umkhonzi wam, . . . lowo ukholisiweyo nguye umphefumlo wam.”—ISA. 42:1.

1. Yintoni abantu bakaYehova abakhuthazwa ukuba bayenze, ingakumbi njengoko iSikhumbuzo sisondela, ibe ngoba?

NJENGOKO ixesha lokukhumbula ukufa kukaKristu lisondela, kufuneka abantu bakaThixo bathobele isiluleko sikampostile uPawulos ‘sokukhangela ngenyameko kuMmeli Oyintloko noMgqibelelisi wokholo lwethu, uYesu.’ UPawulos wongezelela esithi: “Eneneni, mqwalaseleni ngokusondeleyo lowo uye wayinyamezela intetho enjalo yokuchasa yaboni ngokunxamnye nezilangazelelo zabo, ukuze ningadinwa nize nityhafe emiphefumlweni yenu.” (Heb. 12:2, 3) Ukuliqwalasela ngokusondeleyo ikhondo likaKristu lokuthembeka, elakhokelela ekuzinikeleni kwakhe njengedini, kuya kunceda amaKristu athanjisiweyo namaqabane awo ezinye izimvu aqhubeke ekhonza uYehova ngokuthembeka aze ‘angatyhafi emiphefumlweni yawo.’—Thelekisa eyabaseGalati 6:9.

2. Sinokufunda ntoni kwiziprofeto zikaIsaya ezibhekisela kuNyana kaThixo?

² UYehova waphefumlela umprofeti uIsaya ukuba abhale uthotho lweziprofeto ezibhekisela ngokuthe ngqo kuNyana wakhe. Ezi ziprofeto ziya kusinceda “sikhangele ngenyameko kuMmeli Oyintloko noMgqibelelisi wokholo lwethu,” uKristu Yesu.a Zisixelela ngobuntu bakhe, iimbandezelo awatyhubela kuzo nokuphakanyiswa kwakhe njengoKumkani noMkhululi wethu. Ziya kusinceda sisiqonde ngakumbi iSikhumbuzo, esiza kuba ngoLwesine, ngoAprili 9, emva kokutshona kwelanga, kulo nyaka.

Ukuchazwa Kwalo Mkhonzi

3, 4. (a) Kwincwadi kaIsaya, igama elithi “umkhonzi” libhekisela kubani? (b) IBhayibhile imchaza njani uMkhonzi ekuthethwa ngaye kuIsaya isahluko 42, 49, 50, 52 nesama-53?

³ Igama elithi “umkhonzi” livela izihlandlo ezininzi kwincwadi kaIsaya. Lidla ngokusetyenziswa xa kuthethwa ngalo mprofeti. (Isa. 20:3; 44:26) Maxa wambi liye libhekisele kulo lonke uhlanga lwakwaSirayeli okanye kuYakobi. (Isa. 41:8, 9; 44:1, 2, 21) Kodwa kuthekani ngezinye iziprofeto ezibalaseleyo ezithetha ngoMkhonzi ezikuIsaya isahluko 42, 49, 50, 52 nesama-53? IZibhalo ZamaKristu ZesiGrike zisicacisela kakuhle ngoMkhonzi kaYehova ekuthethwe ngaye kwezi zahluko. Okubangel’ umdla kukuba, igosa elingumTiyopiya ekuthethwa ngalo kwincwadi yeZenzo lalifunda esinye sezi ziprofeto xa uFilipu ongumvangeli walathiswa ngumoya ukuba aye kuthetha nalo. Emva kokuba lifunde ezi ndinyana zeBhayibhile ngoku ezifumaneka kuIsaya 53:7, 8, eli gosa lathi kuFilipu: “Ndiyakubongoza, Umprofeti ukutsho malunga nabani na oku? Malunga naye okanye malunga namntu wumbi?” Ngoko nangoko uFilipu walichazela ukuba uIsaya wayethetha ngoMesiya, uYesu.—IZe. 8:26-35.

⁴ Ngoxa uYesu wayeselusana, indoda elilungisa uSimeyon, iqhutywa ngumoya oyingcwele yathi lo ‘mntwana uselula uYesu’ uya kuba ‘lukhanyiselo lokushenxisa isigqubuthelo ezintlangeni,’ ngokutsho kwesiprofeto esikuIsaya 42:6 nakwesama-49:6. (Luka 2:25-32) Ukongezelela, ukuhlaziswa kukaYesu ngobusuku bokuxoxwa kwetyala lakhe kwakuchaziwe kwisiprofeto esikuIsaya 50:6-9. (Mat. 26:67; Luka 22:63) Emva kwePentekoste yowama-33 C.E., umpostile uPetros wamchaza ngokucacileyo uYesu ‘njengoMkhonzi’ kaYehova. (Isa. 52:13; 53:11; Funda IZenzo 3:13, 26.) Sinokufunda ntoni kwezi ziprofeto ziphathelele uMesiya?

UYehova Uyamqeqesha UMkhonzi Wakhe

5. UMkhonzi waqeqeshwa njani?

⁵ Esinye seziprofeto zikaIsaya eziphathelele uMkhonzi kaThixo sisicacisela ngolwalamano olusondeleyo phakathi kukaYehova noNyana wakhe olizibulo ngaphambi kokuba lo Nyana aphile emhlabeni. (Funda uIsaya 50:4-9.) Lo Mkhonzi ubonisa ukuba uYehova wayesoloko emqeqesha, xa esithi: “Undivusa ndiphulaphule njengalowo ufundiswayo.” (Isa. 50:4, iBhayibhile yesiXhosa yowe-1996.) Ngalo lonke elo xesha, lo Mkhonzi kaYehova wamphulaphula uYise waza wafunda kuye, esiba ngumfundi othobekileyo. Wayenelungelo elikhetheke ngokupheleleyo lokufundiswa nguMdali wendalo yonke!

6. Lo Mkhonzi wazithoba njani ngokupheleleyo kuYise?

⁶ Kwesi siprofeto, lo Mkhonzi ubhekisela kuYise ‘njengeNkosi enguMongami uYehova.’ Oku kubonisa ukuba ufunde inyaniso esisiseko ephathelele ulongamo lukaYehova kwindalo yonke. Ebonisa ukuba uzithoba ngokupheleleyo kuYise, wathi: “INkosi enguMongami uYehova iyivulile indlebe yam, yaye mna andibanga nemvukelo. Andijikelanga kwicala elahlukileyo.” (Isa. 50:5) ‘Wayesecaleni [kukaYehova] njengomsebénzi onobuchule’ xa kwakudalwa izinto nabantu. Lo ‘msebénzi unobuchule wayechulumanca phambi [kukaYehova] amaxesha onke, echulumanca kwilizwe elinemveliso lomhlaba wakhe, nezinto [uNyana kaThixo] awayezithanda zazikoonyana babantu.’—IMize. 8:22-31.

7. Yintoni ebonisa ukuba lo Mkhonzi wayeqinisekile ukuba uYise uya kumxhasa xa evavanywa?

⁷ Uqeqesho olwafunyanwa ngulo Mkhonzi nokuthanda kwakhe abantu kwamxhobisela ukuphila emhlabeni kwakunye nenkcaso ekrakra awafika wajamelana nayo. Waqhubeka eyoliswa kukwenza ukuthanda kukaYise, kwanaxa wayetshutshiswa ngokuqatha. (INdu. 40:8; Mat. 26:42; Yoh. 6:38) Kwiimvavanyo awayejamelana nazo apha emhlabeni, uYesu wayeqinisekile ukuba uYise uyakholiswa nguye yaye uya kumxhasa. Ngokutsho kwesiprofeto sikaIsaya, uYesu wakwazi ukuthi: “Lowo undivakalisa ndililungisa usondele. Ngubani na onokusukuzana nam? . . . Khangela! INkosi enguMongami uYehova iya kundinceda.” (Isa. 50:8, 9) Ngokuqinisekileyo uYehova wamnceda lo Mkhonzi wakhe uthembekileyo kubo bonke ubulungiseleli bakhe basemhlabeni, njengoko esinye isiprofeto sikaIsaya sibonisa.

Ubulungiseleli Balo Mkhonzi Emhlabeni

8. Yintoni engqina ukuba uYesu ‘wayengonyuliweyo’ kaYehova, njengoko kwaprofetwa kuIsaya 42:1?

⁸ Ingxelo yeBhayibhile isixelela oko kwenzekayo xa uYesu wayebhaptizwa ngowama-29 C.E.: “Kwehla phezu kwakhe umoya oyingcwele . . . kwaphuma nelizwi ezulwini lisithi: ‘UnguNyana wam, oyintanda; ndikholisiwe nguwe.’” (Luka 3:21, 22) UYehova wamchaza ngaloo ndlela “onyuliweyo” wakhe, njengoko ekhankanywe kwisiprofeto sikaIsaya. (Funda uIsaya 42:1-7.) Kubulungiseleli bakhe basemhlabeni, uYesu wazalisekisa esi siprofeto ngendlela ebalaseleyo. Kwingxelo yakhe yeVangeli, uMateyu wacaphula amazwi akuIsaya 42:1-4 waza wawabhekisela kuYesu.—Mat. 12:15-21.

9, 10. (a) UYesu wamzalisekisa njani uIsaya 42:3 kubulungiseleli bakhe? (b) UKristu ‘wakuzisa njani okusesikweni’ ngoxa wayesemhlabeni, ibe uya ‘kukumisa nini okusesikweni emhlabeni’?

⁹ Iinkokeli zonqulo zamaYuda zazibajongela phantsi abantu abaqhelekileyo phakathi kwamaYuda. (Yoh. 7:47-49) Zazibaphatha gadalala aba bantu yaye imeko yabo yayifana ‘neyengcongolo etyumkileyo’ okanye “umsonto weflekisi olozizayo” osele uza kucima. Noko ke, uYesu waba nemfesane ngamahlwempu nababandezelekileyo. (Mat. 9:35, 36) Abo bantu wabamema ngobubele, esithi: “Yizani kum, nonke nina nibulalekayo nenisindwa ngumthwalo, yaye ndiza kunihlaziya.” (Mat. 11:28) Ngaphezu koko, uYesu ‘wazisa okusesikweni’ ngokufundisa abantu ngemilinganiselo kaYehova yokulungileyo nokuphosakeleyo. (Isa. 42:3) Kanti wabonisa nokuba uMthetho kaThixo ufanele usetyenziswe ngendlela esengqiqweni nangenceba. (Mat. 23:23) UYesu wabonisa okusesikweni ngokushumayela ngokungenamkhethe kwizityebi nakumahlwempu.—Mat. 11:5; Luka 18:18-23.

¹⁰ Isiprofeto sikaIsaya sikwabonisa ukuba “onyuliweyo” kaYehova ‘umisa okusesikweni emhlabeni.’ (Isa. 42:4) Oku uya kukwenza xa eya kuthi ngokukhawuleza atshabalalise zonke izikumkani zobupolitika aze amisele ulawulo lwakhe lobulungisa njengoKumkani onguMesiya. Uya kuzisa ihlabathi elitsha, apho kuya ‘kuma ubulungisa.’—2 Pet. 3:13; Dan. 2:44.

‘Ulukhanyiso Nomnqophiso’

11. UYesu ‘wayelukhanyiselo lweentlanga’ ngayiphi ingqiqo ngenkulungwane yokuqala, ibe uselulo njani nanamhlanje?

¹¹ Ezalisekisa uIsaya 42:6, eneneni uYesu wangqineka ‘elukhanyiso lweentlanga.’ Ebudeni bobulungiseleli bakhe emhlabeni, wazisa ukukhanya kokomoya kumaYuda ngokukhethekileyo. (Mat. 15:24; IZe. 3:26) Kodwa uYesu wathi: “Mna ndilukhanyiselo lwehlabathi.” (Yoh. 8:12) Waba lukhanyiselo kumaYuda neentlanga kungekuphela nje ngokubanika ukukhanya kokomoya kodwa nangokunikela ubomi bakhe obufezekileyo njengentlawulelo yabo bonke abantu. (Mat. 20:28) Emva kokuvuswa kwakhe, wathuma abafundi bakhe ukuba babe ngamangqina akhe “kwezona nxalenye zikude zomhlaba.” (IZe. 1:8) Ebudeni bobulungiseleli babo, uPawulos noBharnabhas bacaphula ibinzana elithi “ukhanyiselo lweentlanga” baza balibhekisela kumsebenzi wokushumayela ababewenza kubantu abangengomaYuda. (IZe. 13:46-48; thelekisa uIsaya 42:6.) Loo msebenzi usenziwa nangoku njengoko abazalwana bakaYesu abathanjisiweyo abasesemhlabeni namaqabane abo besasaza ukukhanya kokomoya baze bancede abantu ukuba babe nokholo kuYesu, ‘olukhanyiselo lweentlanga.’

12. UYehova umnikele njani uMkhonzi wakhe ‘njengomnqophiso wabantu’?

¹² Kwakweso siprofeto, uYehova wathi kulo Mkhonzi wakhe unyuliweyo: “Ndiya kukulondoloza ndize ndikwenze umnqophiso wabantu.” (Isa. 42:6) USathana wazingisa kwimigudu yakhe yokubulala uYesu neyokumthintela ekuphumezeni ubulungiseleli bakhe emhlabeni, kodwa uYehova wamkhusela de lafika ixesha elimiselweyo lokufa kwakhe. (Mat. 2:13; Yoh. 7:30) Emva koko uYehova wamvusa uYesu waza wamnikela ‘njengomnqophiso,’ okanye isibhambathiso kubantu abasemhlabeni. Eso sithembiso sibalulekileyo saqinisekisa ukuba uMkhonzi kaThixo othembekileyo uya kuqhubeka ‘elukhanyiselo lweentlanga,’ ekhulula abo basebumnyameni bokomoya.—Funda uIsaya 49:8, 9.b

13. UYesu wabakhulula ngayiphi indlela “abo bahleli ebumnyameni” ngoxa wayekubulungiseleli bakhe emhlabeni, ibe uqhubeka njani ebakhulula?

¹³ Ngokuvisisana nesi sibhambathiso, uMkhonzi kaYehova onyuliweyo wayeza ‘kuvula amehlo amfamekileyo, akhuphe ibanjwa entolongweni,’ aze akhulule “abo bahleli ebumnyameni.” (Isa. 42:7) Kubulungiseleli bakhe basemhlabeni, uYesu wenza oku ngokubhenca iimfundiso zonqulo lobuxoki nangokushumayela iindaba ezilungileyo zoBukumkani. (Mat. 15:3; Luka 8:1) Ngokwenjenjalo wakhulula amaYuda awaba ngabafundi bakhe kunqulo lobuxoki. (Yoh. 8:31, 32) Ngokufanayo, uYesu uye wanceda izigidi zabantu abangengomaYuda ukuba zazi inyaniso. Uye wathuma abalandeli bakhe ukuba ‘baye kubenza abafundi abantu beentlanga zonke,’ ethembisa ukuba uya kuba nabo “de kube sekuphelisweni kwenkqubo yezinto.” (Mat. 28:19, 20) Esezulwini, uKristu Yesu uvelela lo msebenzi wokushumayela wenziwa ehlabathini lonke.

UYehova Wamphakamisa “Umkhonzi” Wakhe

14, 15. Kwakutheni ukuze uYehova aphakamise uMkhonzi wakhe ibe wakwenza njani oko?

¹⁴ Kwesinye isiprofeto esiphathelele uMkhonzi wakhe onguMesiya, uYehova uthi: “Khangela! Umkhonzi wam uya kwenza ngengqiqo. Uya kuba sesikhundleni esiphakamileyo kwaye ngokuqinisekileyo uya kunyuswa aze aphakanyiswe kakhulu.” (Isa. 52:13) Ngenxa yokuzithoba ngokunyaniseka kwalo Nyana wakhe kulongamo lwakhe nokuthembeka kwakhe naphantsi kwezona meko zinzima, uYehova wamphakamisa.

¹⁵ Umpostile uPetros wathi ngoYesu: “Ungasekunene kukaThixo, kuba wemka waya ezulwini; zaza iingelosi namagunya namandla zathotyelwa phantsi kwakhe.” (1 Pet. 3:22) Ngokufanayo, uPawulos wathi: “Wazithoba kwada kwasa ekufeni, ewe, ukufa kwisibonda sentuthumbo. Ngenxa kanye yesi sizathu uThixo wamphakamisela kwisigxina esongamileyo waza ngobubele wamnika igama elingaphezu kwawo onke amanye amagama, ukuze egameni likaYesu agobe onke amadolo abo basezulwini nawabo basemhlabeni nawabo baphantsi komhlaba, zize zonke iilwimi zivume ekuhleni ukuba uYesu Kristu uyiNkosi nto leyo eluzuko kuThixo uYise.”—Fil. 2:8-11.

16. UYesu ‘waphakanyiswa kakhulu’ ngayiphi indlela ngowe-1914, ibe yintoni aye wayiphumeza ukususela ngelo xesha?

¹⁶ Ngowe-1914, uYehova wamphakamisa nangakumbi uYesu. ‘Waphakanyiswa kakhulu,’ xa uYehova wambeka etroneni njengoKumkani onguMesiya. (INdu. 2:6; Dan. 7:13, 14) Ukususela ngoko, uKristu uye waqhubeka ‘esoyisa phakathi kweentshaba zakhe.’ (INdu. 110:2) Waqala ngokoyisa uSathana needemon zakhe, ebaphosa phantsi emhlabeni. (ISityhi. 12:7-12) Emva koko, njengoKoreshi Omkhulu, uKristu wakhulula intsalela yabazalwana bakhe abathanjisiweyo abasemhlabeni kubukhoboka ‘beBhabhiloni Enkulu.’ (ISityhi. 18:2; Isa. 44:28) Uye walathisa umsebenzi wokushumayela owenziwa ehlabathini lonke oye wakhokelela ekuhlanganisweni ‘kwabaseleyo’ kubazalwana bakhe bokomoya nezigidi ngezidi ‘zezinye izimvu,’ ezingamaqabane anyanisekileyo ‘omhlambi omncinane.’—ISityhi. 12:17; Yoh. 10:16; Luka 12:32.

17. Sifunde ntoni ukuza kuthi ga ngoku kwiziprofeto zikaIsaya eziphathelele “umkhonzi”?

¹⁷ Ngokuqinisekileyo ukufunda ngezi ziprofeto zibalaseleyo zikwincwadi kaIsaya kuye kwasenza sanoxabiso ngakumbi ngoKumkani noMkhululi wethu, uKristu Yesu. Ukuzithoba kwakhe njengonyana ebudeni bobulungiseleli bakhe basemhlabeni kwabonisa uqeqesho awalufumana kuYise ngaphambi kokuza emhlabeni. Uye wazingqina ‘elukhanyiselo lweentlanga’ ngobulungiseleli bakhe nangomsebenzi wokushumayela aye wawuvelela ukuza kuthi ga namhlanje. Njengoko siza kubona kwinqaku elilandelayo, esinye isiprofeto esingoMkhonzi onguMesiya sityhila ukuba wayeza kubandezeleka aze ancame ubomi bakhe ngenxa yethu, miba leyo esifanele ‘siyiqwalasele ngokusondeleyo’ njengoko iSikhumbuzo sokufa kwakhe sisondela.—Heb. 12:2, 3.

[Imibhalo esemazantsi]

Impinda

• Ngubani “umkhonzi” ekuprofetwe ngaye kuIsaya, ibe sazi njani?

• UYehova wamqeqesha njani lo Mkhonzi?

• UYesu ululo njani ‘ukhanyiselo lweentlanga’?

• Waphakanyiswa njani lo Mkhonzi?

[Umfanekiso okwiphepha 21]

UFilipu wamchaza ngokucacileyo “umkhonzi” ekuthethwa ngaye kuIsaya njengoYesu, uMesiya

[Umfanekiso okwiphepha 23]

NjengoMkhonzi kaYehova onyuliweyo, uYesu wabonisa imfesane kumahlwempu nakwabo babandezelekileyo

[Umfanekiso okwiphepha 24]

UYesu waphakanyiswa nguYise waza wambeka etroneni njengoKumkani onguMesiya