Izizathu Ezihlanu Zokoyika uThixo Kunomntu
OMNYE umfana washiyeka emangalisekile, wayengakulindelanga kwaphela oko kwakusandul’ ukwenzeka. Wayefunde lukhulu kwincoko yakhe namaNgqina kaYehova amabini. Kwakusele kuqengqeleke iminyaka efuna ukwazi isizathu sokuba uThixo evumela ukubandezeleka yaye ngaloo mini wayefumene impendulo eyamanelisayo eBhayibhileni. Wayengayazi into yokuba iBhayibhile inenkcazelo exabisekileyo nechwayitisa intliziyo.
Emva kwemizuzu embalwa iindwendwe zakhe zimkile, umastandi wangena evutha ngumsindo waza wambuza: “Ibingoobani abaya?”
Lo mfana akazange akwazi ukuphendula kuba wayemangalisiwe.
Umastandi waphinda wamkhwaza enkqangaza, esithi: “Ndiyabazi, yaye ukuba ukhe waphinda wabangenisa apha, uza kuphum’ uphele!”
Waphuma walumbakraza ucango.
Abalandeli BakaKristu Bayazi Ukuba Baza Kutshutshiswa
Into eyehlela lo mfana iqhelekile. ILizwi likaThixo, iBhayibhile lithi: “Bonke abo banqwenela ukuphila ngozinikelo lobuthixo ngokunxulumene noKristu Yesu, nabo baya kutshutshiswa.” (2 Timoti 3:12) AmaKristu okwenene kudala engathandwa. Ngoba? Umpostile uYohane wathi kwamanye amaKristu: “Siyazi ukuba thina singabakaThixo, kodwa ihlabathi liphela lisemandleni ongendawo.” USathana uMtyholi ukwachazwa “njengengonyama egqumayo efuna ubani engamqwengayo.” (1 Yohane 5:19; 1 Petros 5:8) Ukoyika umntu yenye yeendlela eziphumelelayo ezisetyenziswa nguSathana.
Nkqu noYesu Kristu, owenza izinto ezininzi ezilungileyo nongazange enze sono, waphathwa kakubi waza watshutshiswa. Wathi: “Bandithiya ngaphandle kwesizathu.” (Yohane 15:25) Ngobusuku obandulela ukufa kwakhe, wachazela abafundi bakhe into eyayiza kwenzeka kubo esithi: “Ukuba ihlabathi linithiyile, niyazi ukuba liye lathiya mna ngaphambi kokuba lithiye nina. Likhumbuleni ilizwi endalitsho kuni ndisithi, Ikhoboka alikho likhulu kunenkosi yalo. Ukuba banditshutshisile mna, baya kunitshutshisa nani.”—Yohane 15:18, 20.
Abanye baba mathidala ukulumela unqulo lokwenene xa beva loo mazwi. IBhayibhile ithi ngabanye abantu ababekhangela uYesu: “Kambe ke, akukho bani wayengathetha ngaye esidlangalaleni ngenxa yokoyika amaYuda.” (Yohane 7:13; 12:42) Iinkokeli zonqulo zazibasongela ngokubagxotha abantu ababekholwa kuKristu. Ngoko ke, abanye abazange babe ngamaKristu ngenxa yokoyika abantu.—IZenzo 5:13.
Kamva, xa kwasekwa ibandla lamaKristu, kwabakho “intshutshiso enkulu” kwibandla laseYerusalem. (IZenzo 8:1) Eneneni, kubo bonke uBukhosi baseRoma, amaKristu ayetshutshiswa. Amadoda abalaseleyo aseRoma athi kuPawulos: “Siyazi ukuba eli hlelo lichasiwe kuyo yonk’ indawo.” (IZenzo 28:22) Ewe, ayetshutshiswa kwiindawo ezininzi amaKristu okwenene.
Nanamhlanje, uSathana usa kusebenzisa ukoyika abantu ukuze athintele abantu bangabi ngabalandeli bakaKristu. Abantu abanyanisekileyo abafunda iBhayibhile kunye namaNgqina kaYehova baye batshutshiswa okanye bagculelwa esikolweni, emsebenzini, ekuhlaleni nangabahlobo babo. Basenokoyika ukungahlonelwa, ukushiywa ngabahlobo nokungaxhaswa ngezinto eziphathekayo. Kwiindawo zasemakhaya, abantu badla ngokoyika ukungancediswa xa kuvunwa nokunganakwa kwemfuyo yabo ngabamelwane. Noko ke, izigidi zabantu ziye zathembela kuThixo kwaye ziphila ngokuvisisana neLizwi lakhe ngaloo ndlela zixelisa uYesu Kristu. Abantu abanjalo baye basikelelwa nguYehova.
Isizathu Sokuba Ufanele Woyike UThixo Kunomntu
IBhayibhile isibongoza ukuba soyike uThixo kunokoyika umntu. Ithi: “Ukoyika uYehova kukuqala kobulumko.” (INdumiso 111:10) Oku akuthethi ukuba simele sityhwatyhwe luloyiko kodwa kuthetha ukoyika ukumona uMniki-Bomi. Olu loyiko lunxulumene nothando. Kutheni sifanele soyike uThixo kunokoyika umntu? Makhe sithethe ngezizathu ezihlanu.
1 UYehova uNgoyena uPhakamileyo. UYehova unamandla kunaye nawuphi na omnye umntu. Xa sisoyika uThixo sima ngakwicala likaSomandla, yaye kuye “iintlanga zinjengethontsi e-emeleni.” (Isaya 40:15) Ekubeni uThixo enamandla angenasiphelo, unako ukuphanzisa “nasiphi na isixhobo esiya kuyilwa nxamnye” nabo banyanisekileyo kuye. (Isaya 54:17) Kububulumko ukungavumeli nantoni na isiyekise ukufunda ngaye nokwenza intando yakhe, ngoba nguye oza kwenza isigqibo sokuba ngubani oza kufumana ubomi obungunaphakade.—ISityhilelo 14:6, 7.
2 UThixo uya kusinceda aze asikhusele. IBhayibhile kwincwadi yeMizekeliso 29:25 ithi: “Ukungcangcazela ngumntu kubeka umgibe, kodwa okholosa ngoYehova uya kukhuselwa.” Ukoyika umntu kungumgibe kuba kunokusithintela ekuvakaliseni ukholo lwethu kuThixo. UThixo usiqinisekisa ngamandla akhe okusindisa esithi: “Musa ukoyika, kuba ndinawe. Musa ukubhekabheka, kuba ndinguThixo wakho. Ndiza kukuqinisa. Ndiza kukunceda ngokwenene. Ndiza kukubamba nkqi ngokwenene ngesandla sam sasekunene.”—Isaya 41:10.
3 UThixo uyabathanda abantu abasondela kuye. Umpostile uPawulos wabhala la mazwi achukumisayo: “Ndeyisekile kukuba nakufa nabomi nazingelosi narhulumente nazinto zilapha ngoku nazinto zizayo namandla nakuphakama nabunzulu naso nasiphi na esinye isidalwa aziyi kuba nako ukusahlula eluthandweni lukaThixo olukuye uKristu Yesu iNkosi yethu.” (Roma 8:37-39) Ukuba siyamthemba size simthobele uThixo, uya kusithanda ngokwenene uMongami Wendalo Iphela. Elinjani lona ilungelo!
4 Siyayixabisa yonke into asenzele yona uThixo. UYehova nguMdali, nguye osinike ubomi. Ukongezelela, akasinikanga nje izinto eziyimfuneko ukuze zisigcine siphila kodwa usiphe nezinto ezisenza sonwabe. Ngenene, unguMthombo wazo zonke izipho ezilungileyo. (Yakobi 1:17) UDavide, indoda eyayinokholo neyayibuxabisa ububele bukaThixo, wabhala: “Zininzi izinto ozenzileyo, owu Yehova Thixo wam, kwanemisebenzi yakho emangalisayo neengcamango zakho kuthi. . . zininzi kakhulu kunokuba ndinokubalisa.”—INdumiso 40:5.
5 Abanye abasichasayo basenokutshintsha. Unokubanceda abo bakuchasayo ngokungalalanisi kunoko uqhubeke umoyika kwaye umthanda uThixo. Unokucinga ngezalamane zikaYesu. Kuqala, zazingakholelwa kuye, zisithi: “Ushiywe ziingqondo.” (Marko 3:21; Yohane 7:5) Kodwa emva kokufa nokuvuka kukaYesu, ezininzi kuzo zaba ngamakholwa. Abaninawa bakaYesu, uYakobi noYude bade baba nesabelo ekubhaleni iZibhalo. Kwakukho noSawule owayengumtshutshisi onenzondelelo, waza kamva waba ngumpostile uPawulos. Abanye abasichasayo ngoku basenokubona ukuba sithetha inyaniso esekelwe eBhayibhileni xa sinenkalipho size singalalanisi.—1 Timoti 1:13.
Ngokomzekelo, elinye ibhinqa laseAfrika uAberash, lalithandazela ukufumana inyaniso. Emva kokuqalisa kwalo ukufunda iBhayibhile namaNgqina kaYehova, lanyamezela ukuchaswa yintsapho nazinkokeli zonqulo. Ezinye izalamane zalo ezazisele ziqalisile ukufunda iBhayibhile zanikezela ngenxa yokoyika abantu. Kodwa uAberash wacela uThixo ukuba amnike inkalipho waza wabhaptizwa njengomnye wamaNgqina kaYehova. Waba yintoni umphumo? Izalamane zakhe ezisibhozo nazo zaba nenkalipho zaza zaqalisa ukufundelwa kwakhona yaye ngoku zenza inkqubela entle ngokomoya.
Unokuyeka Ukoyika Abantu
Ukuze ungabi sisisulu sokoyika abantu, yenza konke okusemandleni akho ukomeleza uthando lwakho ngoThixo. Unokukwenza oku ngokufunda iBhayibhile uze ucamngce ngeZibhalo ezifana namaHebhere 13:6 athi: “UYehova ungumncedi wam; andiyi koyika. Angandenza ntoni na umntu?” Ungaze uzilibale ezi zizathu zichazwe ngasentla zokuba kububulumko ukoyika uThixo kunabantu.
Hlala uzikhumbula iingenelo zokusebenzisa oko ukufunda eBhayibhileni. Unokufumana iimpendulo ezanelisayo kwimibuzo ebalulekileyo ephathelele ubomi. Unokufumana ubulumko bokuhlangabezana neengxaki zobomi. Unokuba nethemba elivuyisayo phezu kwazo nje iingxaki zanamhlanje. Yaye unokukwazi ukuthandaza kuThixo ngawo onke amaxesha.
Umpostile uYohane wabhala wathi: “Ihlabathi liyadlula nenkanuko yalo, kodwa lowo wenza ukuthanda kukaThixo uhleli ngonaphakade.” (1 Yohane 2:17) Ngoku lixesha lokuba sime siqine size soyike uThixo. Kunokuba unikezele ngenxa yokoyika abantu, unokusabela kwesi sibongozo sikaThixo esithi: “Yiba nobulumko, nyana wam, uze uyenze ibe nemihlali intliziyo yam, ukuze ndimphendule ondingcikivayo.” (IMizekeliso 27:11) Elinjani lona ilungelo!
Khumbula, akakho umntu onokukunika oko aza kubanika kona uThixo abantu abamoyikayo: “Umphumo wentobeko nokoyika uYehova bubutyebi, uzuko nobomi.”—IMizekeliso 22:4.
[Umfanekiso okwiphepha 14]
Ngenxa yenkalipho ka-Aberash, izalamane zakhe ezisibhozo ziyaqhubeka zifunda iBhayibhile