2 Zuza Ulwazi Oluchanileyo NgoThixo
“Oku kuthetha ubomi obungunaphakade, ukungenisa kwabo ulwazi ngawe, wena ukuphela koThixo oyinyaniso.”—Yohane 17:3.
YINTONI INGXAKI? Abanye bathi akakho uThixo. Bambi bathi uThixo akangomntu wokwenene kodwa ungamandla nje amakhulu akhoyo. Kanti nabo bakholelwayo ukuba ungumntu wokwenene bafundisa izinto ezahlukahlukeneyo mayela nokuba ungubani kunye neempawu zakhe.
UNGAYOYISA NJANI LE NGXAKI? Enye indlela yokuzuza ulwazi ngoThixo kukondela izinto azidalileyo. Umpostile uPawulos wathi: “Iimpawu [zikaThixo] ezingabonakaliyo zibonwa ngokucacileyo ukususela ekudalweni kwehlabathi kuse phambili, ngenxa yokuba ziqondeka ngezinto ezenziweyo, kwanamandla angunaphakade nobuThixo bakhe.” (Roma 1:20) Xa usondela izinto ezidaliweyo, unokufunda lukhulu ngobulumko nangamandla oMdali wethu.—INdumiso 104:24; Isaya 40:26.
Noko ke, ukuze abazi kakuhle ubuntu bukaThixo, mntu ngamnye kufuneka azifundele ngokwakhe iLizwi likaThixo iBhayibhile. Musa ukuvumela abanye abantu bakuxelele into omele uyicinge. Kunoko, landela icebiso leBhayibhile elithi: “Musani ukumilisa okwale nkqubo yezinto, kodwa guqukani ngokutshintsha ingqondo yenu, ukuze nikungqine ngokwenu ukulunga nokwamkeleka nokugqibelela kokuthanda kukaThixo.” (Roma 12:2) Ngokomzekelo, khawucinge nje ngezi zinto zilandelayo ezichazwa yiBhayibhile ngobuntu bukaThixo.
UThixo unegama. Xa kwakubhalwa iBhayibhile igama likaThixo lalivela izihlandlo ezingamawaka. Iinguqulelo ezininzi ziquka INdumiso 83:18, ethi: “Bazi ukuba wena ugama linguYehova, unguwe wedwa Osenyangweni phezu kwehlabathi lonke.”—IBhayibhile yesiXhosa.
UYehova uThixo uyavakalelwa zizinto ezenziwa ngabantu. Emva kokuba uYehova ekhulule abantu bakhe amaSirayeli kubukhoboka baseYiputa, maxa wambi babengasithobeli isiluleko sakhe. Imvukelo yabo yayimenza “azive ebuhlungu.” Izinto ababezenza ‘zazimenza buhlungu Lowo uyiNgcwele kaSirayeli.’—INdumiso 78:40, 41.
UYehova ukhathalele umntu ngamnye kuthi. UYesu wathi kubafundi bakhe: “Ngaba oongqatyana ababini abathengiswa ngengqekembe exabiso lincinane na? Kanti akukho namnye kubo oya kuwela emhlabeni ngaphandle kolwazi lukaYihlo. Nina ke, kwaneenwele ezi zentloko yenu zibaliwe zonke. Ngoko ke musani ukoyika: Nixabiseke ngaphezu koongqatyana abaninzi.”—Mateyu 10:29-31.
Alukho uhlanga okanye inkcubeko ebhetele kunezinye emehlweni kaThixo. Umpostile uPawulos waxelela amaGrike aseAthene ukuba uThixo “wazenza ngokuphuma kumntu omnye zonke iintlanga zabantu, ukuba zihlale phezu komhlaba.” Kwakhona wahlabela mgama wathi ‘uThixo akakude kuye ngamnye wethu.’ (IZenzo 17:26, 27) Umpostile uPetros wathi: “UThixo akakhethi buso, kodwa kwiintlanga zonke umntu omoyikayo aze asebenze ubulungisa wamkelekile kuye.”—IZenzo 10:34, 35.
UYINTONI UMVUZO WOKUTHEMBA IBHAYIBHILE? Abanye abantu “banenzondelelo kuThixo; kodwa kungekhona ngokolwazi oluchanileyo.” (Roma 10:2) Ukuba uyayazi into efundiswa yiBhayibhile ngoThixo, awusoze ulahlekiswe yaye ‘uya kusondela kuThixo.’—Yakobi 4:8.
Ukuze ufumane inkcazelo engakumbi, funda isahluko 1, esinomxholo othi: “Yiyiphi Inyaniso Ngokuphathelele UThixo?,” kwincwadi ethi Yintoni Ngokwenene Efundiswa YiBhayibhile?a
[Umbhalo osemazantsi]
a Epapashwe ngamaNgqina kaYehova.
[Umfanekiso okwiphepha 6]
Enye indlela yokuzuza ulwazi ngoThixo kukondela izinto azidalileyo