Oko Sikufunda KuYesu

“Ngesiphelo”

Kuza kuphela ntoni?

Abafundi bakaYesu bambuza besithi: “Uya kuba yintoni na umqondiso wobukho bakho nowokupheliswa kwenkqubo yezinto?” (Mateyu 24:3) Xa wayephendula loo mbuzo, uYesu akazange athi kwakuza kuphela umhlaba wokoqobo. Ngaphambili wayekhe wathetha ‘ngenkqubo yezinto’ yaye wayesebenzise elo binzana ebhekisela kuyo yonke inkqubo yehlabathi yezopolitiko, eyezorhwebo kunye neyonqulo elawulwa nguSathana. (Mateyu 13:22, 40, 49) Wayecinga ngale nkqubo ke xa wathi: “Kufike ukuphela.”—Mateyu 24:14.

UYesu wasichaza njani isiphelo?

Ukupheliswa kwale nkqubo yezinto ingendawo ‘ziindaba ezimnandi.’ UYesu wathi: “Ezi ndaba zilungileyo zobukumkani ziya kushunyayelwa kuwo wonke umhlaba omiweyo kube bubungqina kuzo zonke iintlanga; kwandule ke kufike ukuphela.” UYesu wakuchaza kanje ukuphela kwale nkqubo yezinto ekhoyo ngoku: “Kuya kubakho imbandezelo enkulu ekungazange kubekho injengayo ukususela ekuqaleni kwehlabathi de kube ngoku, nekungasayi kubakho injengayo kwakhona. Enyanisweni, ngaphandle kokuba loo mihla inqunyulwe, bekungayi kubakho nyama isindayo.”—Mateyu 24:14, 21, 22.

Ngoobani abaza kutshatyalaliswa?

Ngabantu abangamthandiyo nabangamsebenzeliyo uYehova noYesu kuphela abaza kutshatyalaliswa. Abantu abanjalo abamthobeli uThixo. UYesu wathi: “Kanye njengokuba yayinjalo imihla kaNowa, buya kuba njalo ubukho boNyana womntu. Kuba njengokuba babenjalo ngaloo mihla yangaphambi komkhukula, . . . abazange banikele ngqalelo de wafika umkhukula waza wabatshayela bonke.” (Mateyu 24:36-39) UYesu wathi abantu abaninzi bakwindlela eya kwintshabalalo. Noko ke, waphinda wathi kukwakho ‘nendlela emxinwa . . . esa ebomini.’—Mateyu 7:13, 14.

Iza kuphela nini le nkqubo yezinto?

Xa wabuzwa ngomqondiso wobukho bakhe “nowokupheliswa kwenkqubo yezinto,” uYesu wathi: “Uhlanga luya kuvukelana nohlanga nobukumkani buvukelane nobukumkani, yaye kuya kubakho ukunqongophala kokutya neenyikima zomhlaba . . . yaye ngenxa yokwanda kokuchas’ umthetho luya kuphola uthando lwabaninzi.” (Mateyu 24:3-12) Ngoko ke, zonke ezi ndaba zimbi esizivayo namhlanje ziyakhuthaza—kuba zithetha ukuba kungekudala urhulumente obuBukumkani bukaThixo uza kubazisela uxolo abantu abathobelayo. UYesu wathi: “Xa nibona ezi zinto zisenzeka, yazini ukuba ubukumkani bukaThixo bukufuphi.”—Luka 21:31.

Ufanele wenze ntoni?

UYesu wathi uThixo “wanikela ngoNyana wakhe okuphela kwamzeleyo ukuze wonk’ ubani obonisa ukholo kuye angatshabalali kodwa abe nobomi obungunaphakade.” (Yohane 3:16) Ukuze ube nokholo kuThixo nakuNyana wakhe kufuneka ubazi kakuhle. Yiloo nto uYesu wathi: “Oku kuthetha ubomi obungunaphakade, ukungenisa kwabo ulwazi ngawe, wena ukuphela koThixo oyinyaniso, nangalowo umthumileyo, uYesu Kristu.”—Yohane 17:3.

Lumka, amaxhala neengxaki zingakuthinteli ukuba ufunde ukuthanda uThixo. UYesu wathi: “Zilumkeleni ukuba iintliziyo zenu zingaze zisindwe . . . ngamaxhala obomi, ize ngequbuliso loo mini inifikele ngephanyazo. Kuba iya kuza.” Ukuba uyawathobela amazwi kaYesu uya kukwazi ‘ukuphumelela ekubalekeni zonke ezi zinto zimiselwe ukubakho.’—Luka 21:34-36.

Ukuze ufumane inkcazelo engakumbi funda isahluko 9, esithi “Ngaba Siphila ‘Kwimihla Yokugqibela’?,” kwincwadi ethi Yintoni Ngokwenene Efundiswa YiBhayibhile?a

[Umbhalo osemazantsi]