Zikhusele Koomoya Abamdaka

UJAMES wakhulela kummandla osemagqagaleni wesiqithi iMalaita, esikwiiSolomon Islands. Wafundiswa ukuhlonipha imimoya ukususela ebuntwaneni. Uthi: “Ndandingayicingi nokuyicinga into yokucela oomoya ukuba benzakalise abanye, kodwa ke ndandingacingi ukuba umntu unokonwaba ebomini ukuba wayengakhuselwa yirarafono [ikhubalo lokuzikhusela].”

Njengokuba kunjalo nakwezinye iindawo zehlabathi, abantu bakwiiSolomon Islands bakholelwa ukuba imimoya ingakunceda okanye ikwenzakalise. Enyanisweni, abantu baseMelanesia abayoyiki imimoya eluncedo kodwa bayayithanda.

Ukukholelwa kwimimoya kuboniswa ngeendlela ezahlukahlukeneyo. Ngokomzekelo, xa uJames wayeselula abafazi babedla ngokubafaka endlwini abantwana nanini na besiva kukhala intaka ebizwa ngokuba yikorokoro. Ngoba? Kwakukho inkolelo yokuba ukukhala kwayo kuxela ishwangusha.

Abanye abantu babexhoma ilitye elimhlophe phezu kweminyango yezindlu zabo. Naye uJames wayeyenza le nto kuba ecinga ukuba elo litye laliza kumkhusela kwimimoya emdaka. Xa uJames egqiba kutya wayeqokelela konke ukutya okuseleyo aze aye kukulahla. Wayenexhala lokuba amagqwirha ayeza kukuthatha aze amthakathe.

Nangona ezi zinto zisenokuba azenziwa kwindawo ohlala kuyo, kusenokwenzeka ukuba nawe, njengoJames, uye wafuna indlela zokuziqinisa ukuze ungathakathwa. Kusenokwenzeka ukuba ukholelwa ukuba kubalulekile ukuziqinisa ukuze ukhuseleke.

Ukuba uyayihlonela iBhayibhile siqinisekile ukuba ungathanda ukuva ukuba iyiphendula njani le mibuzo ilandelayo: (1) Inokukwenzakalisa njani imimoya emdaka? (2) Ngaba ukwenza amasiko athile kunokukuchanaba kwimpembelelo yeedemoni? (3) Unokukhuseleka njani kwimimoya emdaka uze wonwabe?

Indlela Eyenzakalisa Ngayo Imimoya Emdaka

IBhayibhile ibonisa ukuba imimoya emdaka asiyiyo imimoya yabantu abafileyo. ILizwi likaThixo lithi: “Kuba abaphilayo bayazi ukuba baya kufa; kodwa abafileyo, abazi nto konke konke, abasenamvuzo, ngenxa yokuba balityelwe, abasakhunjulwa nganto.” (INtshumayeli 9:5) Eyona nyaniso kukuba imimoya emdaka ziingelosi ezinemvukelo ezincedisana noSathana ukuze zilahlekise abantu.—ISityhilelo 12:9.

IZibhalo zitsho ngokucacileyo ukuba sifanele sifune ukukhuselwa kwimimoya emdaka. Umpostile uPawulos wabhalela amaKristu ase-Efese esithi: ‘Sizamazamana, kungekhona negazi nenyama, kodwa . . . noomoya abangendawo kwezasezulwini iindawo.’ Umpostile uPetros yena wachaza umlawuli woomoya abangendawo uSathana uMtyholi, “njengengonyama egqumayo, efuna ubani engamqwengayo.”—Efese 6:12; 1 Petros 5:8.

USathana wenzakalisa abantu ngokubalahlekisa okanye abalinge ukuba benze izinto eziza kubaxabanisa noThixo. IBhayibhile ithi uSathana “uzimilisa okwengelosi yokukhanya.” (2 Korinte 11:14) Uzenza ngathi uyabakhusela abantu kodwa ke iinjongo zakhe zingendawo. USathana ulahlekisa abantu ukuze bangayazi eyona nyaniso ngaye nangoThixo. (2 Korinte 4:4) Ubalahlekisela ntoni abantu?

USathana ukufuna ngamehlo abomvu ukunqulwa yaye ufuna abantu bamnqule, enoba bayazi okanye abazi ukuba banqula yena. Xa uYesu uNyana kaThixo wayelapha emhlabeni uSathana wayefuna ‘awe phantsi aze amnqule.’ UYesu wathi: “Hamb’ umke, Sathana! Kuba kubhaliwe kwathiwa, ‘NguYehova uThixo wakho omele umnqule.’” (Mateyu 4:9, 10) UYesu wala ukwenza nantoni na eyayiza kumenza anqule uSathana.

UYehova unamandla ngaphezu kwaso nasiphi na isidalwa somoya yaye akanakuze avume ukuba abantu abamthobelayo benzakaliswe. (INdumiso 83:18; Roma 16:20) Kodwa ukuze sikholise uYehova uThixo njengoYesu kufuneka singavumi ukwenza nantoni na eza kusenza silawulwe nguSathana needemon. Loo nto ithetha ukuba kufuneka sizazi izinto ezinokusenza sinqule imimoya emdaka. Unokuyenza njani loo nto?

Wazi Amasiko Angamkholisiyo UThixo

UYehova uThixo walumkisa abantu bakhe bamandulo amaSirayeli ukuba bangawenzi amasiko ayesenziwa ziintlanga ezazihlala kufutshane nawo. Wathi: “Maze kungafunyanwa namnye kuwe . . . ovumisayo, noqhelisela umlingo, nohlaba izihlabo nokhafulayo nobopha ngoomabophe.” IBhayibhile ithi ngabantu ababesenza loo masiko: “UYehova uyamcekisa wonke ubani ozenzayo ezi zinto.”—Duteronomi 18:10-12.

Ngoko ke nantsi imibuzo ofanele uzibuze yona ngamasiko enziwa kwindawo ohlala kuyo: Ngaba eli siko likhuthaza ukuhlaba izihlabo? Ngaba lithi amandla okukhusela avela kumakhubalo? Ngaba liquka ukuthakatha okanye ukuziqinisa ukuze ungathakathwa? Ngaba kuza kufuneka unqule imimoya kunokuba unqule uYehova uze uthobele ummeli wakhe onguYesu?—Roma 14:11; Filipi 2:9, 10.

Kubalulekile ukuba ungawenzi amasiko akukhuthaza ukuba wenze izinto ezinjalo. Ngoba kutheni? Umpostile uPawulos waphefumlelwa ukuba abhale athi: “Aninakuba nenxaxheba ‘etafileni kaYehova’ nasetafileni yeedemon.” Wabatyityimbisela umnwe abo babezama ukukholisa uThixo kodwa babe bekholisa neminye imimoya ukuba ‘babemenza abe nekhwele uYehova.’ (1 Korinte 10:20-22) UYehova uThixo ufuna sinqule yena yedwa yaye loo nto imfanele.—Eksodus 20:4, 5.

Nanku omnye umbuzo: Ngaba eli siko likhuthaza ukuba abantu abafanele baphendule ngezinto abazenzayo? Ngokomzekelo ukukrexeza nokwabelana ngesondo ngaphambi komtshato kuyagxekwa kwiindawo ezininzi yaye iBhayibhile ithi kusisono. (1 Korinte 6:9, 10) Noko ke, kwezinye iindawo zakwiPasifiki kuvumelekile xa intombazana iye “yaphoselwa,”a okuthetha ukuthi kuye kwanyanzeleka ukuba ilale nendoda kuba iyiphosele.

Noko ke, iBhayibhile isifundisa ukuba umntu umele aphendule ngezinto azenzayo. (Roma 14:12; Galati 6:7) Ngokomzekelo, umfazi wokuqala uEva wayevakalelwa ukuba wayeqhathwe nguSathana ukuba avukele uThixo esithi: “Inyoka—indikhohlisile ndaza ndadla.” Noko ke uYehova wambeka ityala uEva ngezenzo zakhe. (Genesis 3:13, 16, 19) Nathi usibeka ityala ngezinto esizenzayo.—Hebhere 4:13.

Ufanele Wenze Ntoni?

Ukuba ufuna ukukholisa uThixo uze uthobele imigaqo yeBhayibhile kufuneka wenze isigqibo sokuzikhusela kuSathana needemon zakhe. Abantu abanentliziyo ezinyanisekileyo base-Efese ngenkulungwane yokuqala bamisela umzekelo omhle kule nkalo. Ukuze bahlukane nemimoya emdaka bazithatha zonke iincwadi ababenazo ezazinento yokwenza nale mimoya emdaka baza “bazitshisa phambi kwakhe wonk’ ubani.”—IZenzo 19:19.

Ngaphambi kokuba bazitshise, aba bantu “babesiza baze baluvume kwaye baluxele ekuhleni uqheliselo lwabo.” (IZenzo 19:18) Amazwi awathethwa nguPawulos ngokuphathelele uKristu abenza bazitshisa iincwadi baza batshintsha neenkolelo zabo.

Kuyinyaniso ukuba akululanga ukulahla amasiko okhuliswe ngawo. UJames ebesimkhankanye ngaphambilana wayenale ngxaki. Waqalisa ukufunda iBhayibhile namaNgqina kaYehova yaye wayezithanda izinto awayezifunda. Noko ke akazange ayeke ukuzikhusela ngamakhubalo. Xa wayezihlola wafumanisa ukuba ewe kona wayezikholelwa izithembiso zikaYehova zekamva kodwa ke wayesavakalelwa kukuba umele azikhusele ngamakhubalo kwimimoya emdaka.

Yintoni eyanceda uJames watshintsha ngokupheleleyo? Uthi: “Ndathandaza kuYehova ndimcela ukuba andikhusele nokuba andincede ndikholose ngaye. Kwangaxeshanye ndawayeka amakhubalo.” Ngaba uye wenzakala? “Hayi,” uphendula atsho uJames. Into eye yenzeka kukuba ndiye ndafunda ukukholosa ngoYehova. Ndiyibonile indlela anokuba ngumhlobo osondele ngayo uYehova.” Enyanisweni, kule minyaka isixhenxe idlulileyo uJames ebesenza umsebenzi wokushumayela ngokusisigxina, enceda abanye bafunde oko kufundiswa yiBhayibhile.

Kutheni ungalandeli umzekelo kaJames? Hlola amasiko enziwa kwindawo yakho uze usebenzise ‘amandla akho engqiqo’ ukuze ubone enoba ayavisisana ‘nokuthanda kukaThixo.’ (Roma 12:1, 2) Emva koko kuza kufuneka ube nesibindi sokwahlukana neenkolelo ezinjalo. Ukuba wenjenjalo unokuba nentembelo yokuba uYehova ‘uya kukwamkela’ aze akukhusele. (2 Korinte 6:16-18) NjengoJames, uya kukubona ukuba yinyaniso kwesithembiso seBhayibhile esithi: “Yinqaba eyomeleleyo igama likaYehova. Ilungisa libalekela kulo lize likhuseleke.”—IMizekeliso 18:10.

[Umbhalo osemazantsi]

[Umfanekiso okwiphepha 19]

“IKorokoro”

[Inkcazelo]

Courtesy of Dr. Bakshi Jehangir

[Umfanekiso okwiphepha 19]

Intombazana iqokelela ukutya okuseleyo ukuze bangathakathwa ngako