Madoda, Xelisani Uthando LukaKristu!
NGOBUSUKU bangaphambi kokuba afe, uYesu wathi kubapostile bakhe abathembekileyo: “Ndininika umyalelo omtsha, wokuba nithandane; kanye njengoko ndinithandileyo mna, ukuba nani nithandane. Ngako oko bonke baya kwazi ukuba ningabafundi bam, ukuba ninothando phakathi kwenu.” (Yoh. 13:34, 35) Eneneni, amaKristu okwenyaniso afanele athandane.
Ebhekisa ngokungqalileyo kumadoda angamaKristu, umpostile uPawulos wabhala wathi: “Madoda, qhubekani nibathanda abafazi benu, kanye njengokuba noKristu walithandayo ibandla waza wazinikela ngenxa yalo.” (Efe. 5:25) Indoda engumKristu inokusisebenzisa njani esi siluleko seZibhalo emtshatweni wayo, ingakumbi ukuba umfazi wayo ungumkhonzi kaYehova ozahluleleyo?
UKristu Waliphatha Ngononophelo Ibandla
IBhayibhile ithi: “Amadoda afanele abathande abafazi bawo njengemizimba yawo. Lowo umthandayo umfazi wakhe uyazithanda, kuba akukho mntu wakha wayithiya eyakhe inyama; kodwa uyayondla aze ayiphathe ngononophelo, njengoko noKristu esenjenjalo kulo ibandla.” (Efe. 5:28, 29) UYesu wabathanda abafundi bakhe waza wabaxabisa. Wabaphatha ngononophelo. Nakuba babengafezekanga, wabathantamisa waza wabaphatha ngobubele. Efuna ‘ukuzisa kuye ibandla limbejembeje,’ wagxininisa kwiimpawu ezintle zabafundi bakhe.—Efe. 5:27.
Kanye ngendlela uKristu awalithanda ngayo ibandla, indoda imele ilithande ngolo hlobo iqabane layo lomtshato, oko kubonakala kwindlela ethetha neyenza ngayo izinto. Umfazi osoloko exelelwa indlela athandwa ngayo yindoda yakhe uziva exatyiswa yaye uyonwaba. Kwelinye icala, umfazi onekhaya elinazo zonke izinto azifunayo unokungonwabi ukuba akahoywanga liqabane lakhe lomtshato.
Indoda inokubonisa njani ukuba iyamxabisa umfazi wayo? Ithetha kakuhle ngaye kwabanye ize imncome ngenkxaso yakhe. Ukuba umfazi wayo uye wanegalelo elivakalayo ekuphumeleleni kwentsapho yayo, ayithandabuzi ukuxelela abanye ngaloo nto. Xa bekunye, ufanele angathandabuzi ukuba iyamthanda. Ukumbamba, ukumncumela, ukumgona nokumncoma kusenokubonakala kungenamsebenzi, kodwa ezo zinto zithetha lukhulu emfazini.
‘Wayengenazintloni Ukubabiza Ngokuthi “Bazalwana”’
UKristu Yesu ‘wayengenazintloni ukubiza [abalandeli bakhe abathanjisiweyo] ngokuthi “bazalwana.”’ (Heb. 2:11, 12, 17) Ukuba uyindoda engumKristu, khumbula ukuba umfazi wakho ukwangudadewenu ongumKristu. Ukuzahlulela kwakhe kuYehova kungaphezu kwesifungo somtshato awasenzayo, enoba wabhaptizwa ngaphambi okanye emva kokutshata kwenu. Xa ecela umfazi wakho ukuba agqabaze, umzalwana oqhuba intlanganiso yebandla umbiza ngokuthi “Dade.” Ungudadewenu nawe, kungekuphela nje kwiHolo yoBukumkani kodwa nasekhaya. Kubaluleke ngendlela efanayo ekhaya nakwiHolo yoBukumkani ukumphatha ngobubele nangembeko.
Ukuba unamalungelo angakumbi enkonzo ebandleni, maxa wambi unokukufumanisa kunzima ukulungelelanisa iimbopheleleko zebandla nezentsapho. Ukusebenzisana nabanye abadala nezicaka zolungiselelo nokunika abanye ezinye iimbopheleleko kunokukunceda ube nexesha elingakumbi kunye noyena dade ukufuna ngakumbi—umfazi wakho. Khumbula ukuba baninzi abazalwana abanokwenza imisebenzi yebandla oyabelweyo, kodwa nguwe kuphela umzalwana otshate nomfazi wakho.
Ngaphezu koko, nguwe intloko yomfazi wakho. IBhayibhile ithi: “Intloko yayo yonke indoda nguKristu; intloko yomfazi yindoda.” (1 Kor. 11:3) Unokububonisa njani obu buntloko? Ngothando, kungekhona ngokuyicaphula ngokuphindaphindiweyo le ndinyana, kuba ufuna ukuhlonelwa ngenkani. Undoqo ekuboniseni ubuntloko kukuxelisa uYesu Kristu kwindlela omphatha ngayo umfazi wakho.—1 Pet. 2:21.
“Ningabahlobo Bam”
UYesu wabiza abafundi bakhe ngokuthi ngabahlobo. Wathi kubo: “Andisanibizi ngokuthi ningamakhoboka, ngenxa yokuba ikhoboka alikwazi okwenziwa yinkosi yalo. Kodwa ndinibize ngokuthi ningabahlobo, ngenxa yokuba zonke izinto endizive kuBawo ndinazisile.” (Yoh. 15:14, 15) UYesu nabafundi bakhe babenxibelelana kakuhle. Babesenza izinto kunye. “UYesu nabafundi bakhe” bamenyelwa kwitheko lomtshato eKana. (Yoh. 2:2) Babethanda ukuya kwiindawo ezithile, njengakumyezo waseGetsemane. IBhayibhile ithi: “UYesu izihlandlo ezininzi wayehlanganisana apho nabafundi bakhe.”—Yoh. 18:2.
Ngokuqinisekileyo umfazi uthanda ukuziva engoyena mhlobo usenyongweni wendoda yakhe. Kubaluleke ngokwenene ukuba nina madoda nabafazi nizinandiphe kunye izihlandlo ezimyoli ebomini! Mnquleni kunye uThixo. Kunandipheni ukuyifunda kunye iBhayibhile. Chithani ixesha kunye—nihambe, nithethe nize nitye kunye. Musani ukuphelela nje ekubeni sisibini esitshatileyo; yibani ngabahlobo abasenyongweni.
“Wabathanda De Kwasekupheleni”
UYesu ‘wabathanda de kwasekupheleni abafundi bakhe.’ (Yoh. 13:1) Amanye amadoda aye asilela ukuxelisa uKristu kule nkalo. Asenokude ashiye ‘abafazi bobutsha bawo,’ mhlawumbi aye kubantu abancinane kunabo.—Mal. 2:14, 15.
Amanye amadoda anjengoWilli, ayamxelisa uKristu. Ngenxa yempilo enkenenkene, umfazi kaWilli wayefuna ukunyanyekelwa ngokuqhubekayo kangangeminyaka emininzi. Wavakalelwa njani ngale nto uWilli? Wathi: “Umfazi wam ndisoloko ndimgqala njengesipho esivela kuThixo yaye ndimxabisa gqitha. Ngaphezu koko, kwiminyaka engama-60 eyadlulayo ndathembisa ukumnyamekela ngamaxesha amnandi nanzima. Andisayi kuze ndisilibale eso sithembiso.”
Madoda angamaKristu, xelisani uthando lukaKristu. Mxabise umfazi wakho owoyika uThixo—udadewenu nomhlobo wakho.
[Umfanekiso okwiphepha 20]
Ngaba umfazi wakho ungumhlobo wakho osenyongweni?
[Umfanekiso okwiphepha 20]
‘Qhubeka umthanda umfazi wakho’