Ngaba UThixo Uyatshintsha?

IBHAYIBHILE ithi ngoThixo: “Yena akaguquguquki njengesithunzi.” Yaye uThixo ngokwakhe uphinda asiqinisekise esithi: “NdinguYehova, anditshintshanga.” (Yakobi 1:17; Malaki 3:6) UYehova uThixo wahluke ngokwenene kubantu ekunzima ukubakholisa nabangenakuthenjwa kuba belala neli bavuke neliya!

Abanye abafundi beBhayibhile bayazibuza ukuba uThixo akatshintshanga kusini na. Ngokomzekelo, ngaxa lithile uYehova uThixo wanika amaKristu amandla okwenza imimangaliso, kodwa ngoku akawaniki loo mandla. Kumaxesha amandulo uThixo wasivumela isithembu, kodwa ngoku akasasivumeli. Ngaphantsi koMthetho kaMoses, uYehova wayefuna kugcinwe iSabatha, kodwa namhlanje akunjalo. Ngaba le mizekelo ibubungqina bokuba uThixo utshintshile?

Okokuqala, sinokuqiniseka ukuba uThixo akasoze ayitshintshe imilinganiselo yakhe yothando nokusesikweni. Kwakhona, ‘injongo yakhe kanaphakade’ yokusikelela uluntu ngoBukumkani bakhe ayizange itshintshe. (Efese 3:11) Kodwa ke, kanye njengokuba nawe usenokuyitshintsha indlela omjonga ngayo umntu osoloko ekuphoxa, noYehova uyatshintsha xa iimeko zitshintsha.

UThixo uyayitshintsha imiyalelo yakhe kubantu ngokweemeko neemfuno zabo. Le nto ayifanele isimangalise. Khawucinge ngento eyenziwa ngumntu okhokele iqela labantu abakhenkethayo xa ebona ingozi. Uyalixelela iqela lakhe ukuba lihambe ngenye indlela engeyongozi. Noko ke, loo nto ayithethi ukuthi utshintshe ingqondo akasafuni kuyiwe kwindawo ebekusiyiwa kuyo? Makhe sehle amahlongwane imizekelo emithathu ebesiyikhankanye ekuqaleni, ebaphazamisayo abanye abantu.

Kutheni Ingasekho Imimangaliso?

Kwakutheni ukuze uThixo anike amanye amaKristu enkulungwane yokuqala amandla okuphilisa ngokungummangaliso? Kusenokwenzeka ukuba uyazi ukuba xa uSirayeli wayeluhlanga lukaThixo olukhethiweyo, uThixo wayedla ngokwenza imimangaliso ukubonisa ukuba wayenawo. NgoMoses uThixo wasebenzisa amandla akhe amakhulu ukuze akhulule amaSirayeli eYiputa ewakhokela nasentlango ukuya kwiLizwe leSithembiso. Okubuhlungu kukuba izihlandlo ezininzi amaSirayeli ayengabonakalisi ukholo. Xa uYehova walulahlayo uhlanga lwakwaSirayeli waza wamisela ibandla lamaKristu, wanika abapostile nabanye amandla okwenza imimangaliso. Ngokomzekelo, umpostile uPetros noYohane baphilisa indoda eyayizelwe isisiqhwala yaye uPawulos wavusa enye indoda ekufeni. (IZenzo 3:2-8; 20:9-11) Imimangaliso ababeyenza yanceda abantu kumazwe amaninzi baba nokholo kubuKristu. Kwakutheni ukuze iphele imimangaliso?

Umpostile uPawulos wachaza isizathu esebenzisa umzekeliso: “Xa ndandilusana, ndandifudula ndithetha ngokosana, ndicinga ngokosana, ndiqiqa ngokosana; kodwa ekubeni ngoku ndiyindoda, ndizibhangisile iimpawu zobusana.” (1 Korinte 13:11) Njengokuba abazali bemphatha ngendlela eyahlukileyo unyana wabo xa sele ekhulile, noYehova wayitshintsha indlela awayeliphatha ngayo ibandla lamaKristu xa lalingaselulo “usana.” Umpostile uPawulos wachaza ukuba iziphiwo ezinjengokuthetha iilwimi okanye ukuprofeta ‘zaziza kuphela.’—1 Korinte 13:8.

Kwakutheni Ukuze UThixo Avumele Isithembu?

UYesu wachaza ukuba uThixo wabeka umgaqo womtshato xa wathi kwisibini sokuqala: “Indoda iya kumshiya uyise nonina ize inamathele emfazini wayo, baze abo babini babe nyama-nye.” (Mateyu 19:5) Umtshato wawufanele ube lumanyano olungapheliyo lwabantu ababini. Noko ke, sasisele sixhaphakile isithembu xa uThixo wahlanganisa uhlanga lwakwaSirayeli waza walunika uMthetho. Ngaloo ndlela, nangona uThixo engazange ayile isithembu okanye asikhuthaze, wabeka umthetho owawuza kusilawula. Xa kwakusekwa ibandla lamaKristu, iLizwi likaThixo lasalela ngokucacileyo isithembu.—1 Timoti 3:2.

UYehova uThixo uyazinyamezela ezinye izinto kude kufike ixesha lokuba azilungise. (Roma 9:22-24) UYesu wathi uYehova ‘wasivumela’ isithembu ngenxa yokuba ‘lukhuni kweentliziyo’ zikaSirayeli.—Mateyu 19:8; IMizekeliso 4:18.

Kwakutheni Ukuze Ukugcinwa KweSabatha Kube Yinto Yokwexeshana?

UThixo wayalela amaSirayeli ukuba agcine iSabatha qho ngeveki emva kokuba ewakhulule eYiputa. Kamva wayenza yaba yinxalenye yoMthetho wawo. (Eksodus 16:22-30; 20:8-10) Umpostile uPawulos wachaza ukuba uYesu wazinikela njengedini waza ‘wawubhangisa . . . uMthetho nemiyalelo nemimiselo yawo’ waza “walucima uxwebhu olubhalwe ngesandla.” (Efese 2:15; Kolose 2:14) Nawo umthetho weSabatha ‘wabhangiswa’ waza ‘wacinywa’ kuba iBhayibhile ihlabela mgama isithi: “Ngoko ke makungabikho mntu unigwebayo ngento eniyityayo neniyiselayo okanye ngokuphathelele umthendeleko nokugcinwa kwenyanga ethwasileyo nesabatha.” (Kolose 2:16) Kwakutheni ukuze uThixo anike uSirayeli uMthetho kuquka nomthetho weSabatha?

Umpostile uPawulos wathi: “UMthetho uye waba ngumkhapheli wethu osikhokelela kuKristu.” Woleka umsundulo esithi: “Kodwa ngoku ekubeni ukholo lufikile, asisekho phantsi komkhapheli.” (Galati 3:24, 25) Kunokuba atshintshe, uThixo wasebenzisa iSabatha ukuze afundise abantu ukubekela ecaleni ixesha elithile ukuze bacamngce ngezinto zokomoya. Nangona umthetho weSabatha wawungowexeshana, wawukhomba phambili kwixesha laxa zonke izinto ezikhathaza abantu enyameni nangokomoya ziya kuphela.—Hebhere 4:10; ISityhilelo 21:1-4.

UThixo Othembekileyo Nonothando

Le mizekelo yeBhayibhile esithethe ngayo ngasentla ibonisa ukuba uYehova wanikela ulwalathiso nemiyalelo eyahlukeneyo ngamaxesha ahlukeneyo. Kodwa loo nto ayithethi ukuba uye watshintsha. Kunoko wenza izinto ukuze zilungele iimfuno zabantu ngelo xesha phantsi kweemeko ezahlukeneyo ukuze kulungelwe bona. Kusenjalo ke nanamhlanje.

Ekubeni uYehova engayitshintshi imilinganiselo yakhe sihlala siyazi into esifanele siyenze ukuze simkholise. Ukongezelela koko, sinokuqiniseka ukuba yonke into ayithembisileyo uThixo iya kwenzeka. UYehova uthi: “Yonk’ into endiyoliswa yiyo ndiya kuyenza . . . Ndikuyilile, yaye ndiya kukwenza.”—Isaya 46:10, 11.

[Amagama acatshulweyo akwiphepha 21]

UThixo akayitshintshi imilinganiselo yakhe yothando nokusesikweni

[Amagama acatshulweyo akwiphepha 22]

UPawulos wachaza ukuba ekuhambeni kwexesha iziphiwo zemimangaliso “zaziza kubhangiswa”

[Amagama acatshulweyo akwiphepha 23]

Umtshato wawuza kuba lumanyano olungapheliyo phakathi kwabantu ababini