Thetha Inyaniso Nommelwane Wakho
“Ekubeni nikulahlile ukuxoka, ngamnye kuni makathethe inyaniso nommelwane wakhe, ngenxa yokuba singamalungu omnye elomnye.”—EFE. 4:25.
1, 2. Abantu abaninzi banayiphi imbono ngenyaniso?
KUDALA abantu benezimvo ezibethabethanayo ngenyaniso. Ngenkulungwane yesithandathu ngaphambi kweXesha Eliqhelekileyo, imbongi engumGrike uAlcaeus, yathi: “Iwayini iyikhupha yonke inyaniso.” Oku kubhekisela kumntu oye wazinkcinkca kanobom ngewayini aze mhlawumbi emva koko aqalise ukuthetha yonke into. IRhuluneli yamaRoma yenkulungwane yokuqala, uPontiyo Pilato yazicacisa ukuba inembono egqwethekileyo ngenyaniso xa ngeligculelayo yabuza uYesu yathi: “Yintoni na inyaniso?”—Yoh. 18:38.
2 Nanamhlanje kukho ukubethabethana kwezimvo ngokuphathelele inyaniso. Abantu abaninzi bathi igama elithi “inyaniso” lineentsingiselo ezahlukahlukeneyo ibe alichazwa ngendlela efanayo. Abanye abantu bathetha inyaniso kuphela xa oko kungazukubafaka engxakini okanye befuna kulungelwe bona. Incwadi ethi The Importance of Lying ithi: “Ukunyaniseka kusenokuba yinto entle kodwa akunakukunceda uphumelele ebomini. Ayikho enye indlela—umntu unyanzelekile ukuba axoke ukuze aphumelele ebomini.”
3. Kutheni sinokuthi uYesu ungumzekelo obalaseleyo ekuthetheni inyaniso?
3 Abafundi bakaKristu bahluke ngokupheleleyo! UYesu wayengenambono zigqwethekileyo ngokuphathelele inyaniso. Wayesoloko ethetha inyaniso. Kwaneentshaba zakhe zakuvuma oko, zathi: “Mfundisi, siyazi ukuba unenyaniso kwaye ufundisa indlela kaThixo ngenyaniso.” (Mat. 22:16) Nanamhlanje, amaKristu okwenyaniso axelisa umzekelo kaYesu. Ayayithetha inyaniso. Avumelana nompostile uPawulos owabongoza amanye amaKristu esithi: “Ekubeni nikulahlile ukuxoka, ngamnye kuni makathethe inyaniso nommelwane wakhe, ngenxa yokuba singamalungu omnye elomnye.” (Efe. 4:25) Makhe sihlolisise iingongoma ezintathu kula mazwi kaPawulos. Okokuqala, ngubani ummelwane wakho? Okwesibini, kuthetha ntoni ukuthetha inyaniso? Okwesithathu, sinokukwenza njani oku kubomi bethu bemihla ngemihla?
Ngubani Ummelwane Wakho?
4. Ngokungafaniyo neenkokeli zamaYuda zenkulungwane yokuqala, uYesu wayibonisa njani imbono kaYehova ngommelwane?
4 Ngenkulungwane yokuqala yeXesha Eliqhelekileyo, ezinye iinkokeli zamaYuda zazifundisa ukuba, oyena ‘mmelwane’ ngomnye umYuda okanye umhlobo wakho osondeleyo. Noko ke, uYesu waxelisa uYise ngokupheleleyo ngendlela awayesenza ngayo izinto nangendlela awayecinga ngayo. (Yoh. 14:9) Wabonisa abafundi bakhe ngokucacileyo ukuba, uThixo akakhethi sizwe okanye hlanga luthile. (Yoh. 4:5-26) Ngaphezulu, umpostile uPetros watyhilelwa ngumoya oyingcwele ukuba “uThixo akakhethi buso, kodwa kwiintlanga zonke umntu omoyikayo aze asebenze ubulungisa wamkelekile kuye.” (IZe. 10:28, 34, 35) Ngoko ke, bonke abantu sifanele sibajonge njengabamelwane bethu, kwanabo baziintshaba zethu.—Mat. 5:43-45.
5. Kuthetha ukuthini ukuthetha inyaniso nommelwane?
5 Kanti, uPawulos wayethetha ukuthini xa esithi sifanele sithethe inyaniso nabamelwane bethu? Ukuthetha inyaniso kukungabakhohlisi abanye. AmaKristu okwenyaniso akayigqwethi inyaniso ukuze akhohlise abanye. ‘Ayakwenyanya okungendawo aze anamathele koko kulungileyo.’ (Roma 12:9) Njengoko sixelisa ‘uThixo wenyaniso,’ sifanele sizame ukunyaniseka kuyo yonke into esiyenzayo. (INdu. 15:1, 2; 31:5) Xa sizithetha ngobuchule izinto, kwanezona zinto zibangela iintloni zinokulungiswa ngaphandle kokuxoka.—Funda eyabaseKolose 3:9, 10.
6, 7. (a) Ngaba ukuthetha inyaniso kuthetha ukuchazela wonk’ umntu kwaneenkcukacha zobuqu? Cacisa. (b) Ngoobani esifanele sibaxelele yonke into?
6 Ngaba ukuthetha inyaniso kuthetha ukuba umele uchazele wonk’ umntu yonke into ayibuzayo? Akunjalo. Xa wayelapha emhlabeni, uYesu wabonisa ukuba bakho abantu ekungekho mfuneko yokuba ubaphendule ngokuthe ngqo okanye ubanike inkcazelo ethile. Xa iinkokeli zonqulo ezingabahanahanisi zazimbuza ukuba ngubani omnike igunya lokwenza imimangaliso, uYesu wathi: “Ndiza kunibuza umbuzo omnye. Ze nindiphendule, yaye nam ndiza kunixelela ukuba ndizenza ngaliphi igunya ezi zinto.” Bathi ababhali namadoda amakhulu bakungamphenduli uYesu, wathi: “Nam andinixeleli ukuba ndizenza ngagunya liphi na ezi zinto.” (Marko 11:27-33) Akazange azive enyanzelekile ukuba awuphendule lo mbuzo, kuba ezi nkokeli zazisenza izinto ezitenxileyo yaye zingenalukholo. (Mat. 12:10-13; 23:27, 28) Ngokufanayo namhlanje, abakhonzi bakaYehova bafanele babalumkele abawexuki nabanye abantu abangendawo abakhohlisayo nabenza ubuqhophololo ukuze kungenelwe bona.—Mat. 10:16; Efe. 4:14.
7 Nompostile uPawulos wabonisa ukuba bakho abanye abantu ekungeyomfuneko ukuba ubaphendule ngokuthe ngqo. Wathi abantu ‘abahamba behleba bagxuphuleka kwimicimbi yabanye abantu, bethetha izinto abangafanele bazithethe.’ (1 Tim. 5:13) Kunokuba nzima ukubachazela imicimbi yobuqu abantu abagxuphuleka kwimicimbi yabanye okanye abangenasifuba. Eyona nto ifanelekileyo kukuthobela amazwi aphefumlelweyo kaPawulos athi: ‘Yibani nosukelo lokuhlala ngokuzolileyo, ningagxuphuleki kwimicimbi yabanye.’ (1 Tes. 4:11) Kodwa ke, ngamanye amaxesha kusenokufuneka ukuba abadala bebandla babuze imicimbi yobuqu ukuze bakwazi ukwenza umsebenzi wabo. Xa kunjalo, kufuneka sisebenzisane nabo sibaxelele yonke into.—1 Pet. 5:2.
Thetha Inyaniso Entsatsheni
8. Ukuthetha inyaniso kunokuwanceda njani amalungu entsapho ukuba asondelelane?
8 Ngokuqhelekileyo abona bantu basondeleyo kuthi, ngamalungu eentsapho zethu. Ukuze olo lwalamano luqine, kubalulekile ukuba sithethe inyaniso. Iingxaki ezininzi zinokuphepheka xa sithetha ngokukhululekileyo, ngokunyaniseka nangobubele. Ngokomzekelo, xa senze impazamo, ngaba siyayivuma ngoko nangoko kumaqabane ethu, kubantwana bethu okanye kwamanye amalungu entsapho asondeleyo? Ukucel’ uxolo ngokunyanisekileyo kunokubangela ukuba kubekho uxolo nomanyano entsatsheni.—Funda eyoku-1 kaPetros 3:8-10.
9. Kutheni kunganyanzelekanga ukuba sibe krwada xa sithetha inyaniso?
9 Ukuthetha inyaniso akuthethi ukuba sifanele sibe krwada. Akunyanzelekanga ukuba ube krwada kuba ufuna abantu bakholelwe ukuba uthetha inyaniso. UPawulos wathi: “Mabususwe kuni bonke ubukrakra bolunya nomsindo nengqumbo nokumemeza nokutshabhisa nabo bonke ububi. Kodwa yibani nobubele omnye komnye, nibe nemfesane, nixolelane ngesisa kanye njengokuba noThixo wanixolelayo ngesisa ngaye uKristu.” (Efe. 4:31, 32) Xa sithetha ngobubele nangesidima, abantu banokuphulaphula yaye oko kubonisa ukuba siyabahlonela.—Mat. 23:12.
Thetha Inyaniso Ebandleni
10. Yintoni enokufundwa ngabadala abangamaKristu kumzekelo kaYesu omhle wokuthetha inyaniso?
10 UYesu wayengqala xa ethetha nabafundi bakhe. Wayesoloko ebaluleka ngothando, kodwa wayengayigwegwelezi inyaniso kuba engafuni ukuba abantu athetha nabo bakhubeke. (Yoh. 15:9-12) Ngokomzekelo, xa abapostile bakhe babesoloko bexambulisana ngokuba ngubani omkhulu, uYesu wathetha ngokungqongqo nabo kodwa ebanceda ngomonde ukuba baqonde ukubaluleka kokuthobeka. (Marko 9:33-37; Luka 9:46-48; 22:24-27; Yoh. 13:14) Ngokufanayo, nangona abadala abangamaKristu bebumela ngokungqongqo ubulungisa, abawucinezeli umhlambi kaThixo. (Marko 10:42-44) Baxelisa uKristu ngokuba ‘nobubele nemfesane’ kwabanye.
11. Ukuthanda abazalwana bethu kuya kusenza silusebenzise njani ulwimi lwethu?
11 Sinokukwazi ukuthetha ngokuphandle nabazalwana bethu, sibaxelele indlela esivakalelwa ngayo kodwa singabakhubekisi. Eneneni, asinakuthanda ukuba nolwimi ‘olulolwe njengencakuba,’ senzakalise abanye ngamazwi arhabaxa okanye athob’ isidima. (INdu. 52:2; IMize. 12:18) Kuba sibathanda abazalwana bethu siya ‘kululondoloza ulwimi lwethu kokubi, nemilebe yethu ekuthetheni inkohliso.’ (INdu. 34:13) Xa sisenjenjalo, sibonisa ukuba siyamhlonela uThixo yaye kuya kubakho umanyano ebandleni.
12. Kunini apho umntu oxokileyo kufuneka avele phambi kwekomiti egwebayo? Chaza.
12 Abadala basebenza nzima ukuze bakhusele ibandla kumaxoki ayingozi. (Funda uYakobi 3:14-16.) Umntu othetha ubuxoki obuyingozi uthetha kakubi ngomnye umntu ngenjongo yokumenzakalisa nokumnxunguphalisa. Akathethi nje izinto ezingenamsebenzi ezingeyonyani okanye abaxe izinto. Kakade ke, ukuxoka kuphosakele, kodwa asizizo zonke iimeko ekufuneka zisingathwe yikomiti egwebayo. Ngenxa yoko, abadala kufuneka bazihlolisise kakuhle iimeko, babe nengqiqo bazame ukuqonda enoba loo mntu uthethe into engeyonyani uqhelile kusini na ukuthetha ubuxoki obuyingozi, nto leyo enokwenza kufuneke avele phambi kwekomiti egwebayo. Okanye ngaba isiluleko seZibhalo esingqongqo esinikelwe ngothando siya kwanela?
Thetha Inyaniso Kwimicimbi Yezoshishino
13, 14. (a) Abanye abantu babaqhatha njani abaqeshi babo? (b) Ukunyaniseka nokuthembeka emsebenzini kunokuba nawuphi umphumo?
13 Kuxhaphakile ukunganyaniseki namhlanje, ngenxa yoko, kusenokuba nzima ukuba umntu anyaniseke kumqeshi wakhe. Xa befaka isicelo somsebenzi, abaninzi baxoka ngokuphandle. Ngokomzekelo, xa bebhala iphepha elineenkcukacha zabo, banokuzibaxa izinto xa bechaza ubuchule okanye imfundo abanayo ukuze bafumane umsebenzi ohlawula imali eninzi. Kwelinye icala, abaqeshwa abaninzi baye babe ngathi bayasebenza ngoxa besenza izinto zobuqu, nangona loo nto ingavumelekanga kwiinkampani abasebenza kuzo. Basenokufunda izinto ezingadibananga nomsebenzi abawenzayo, bafowunele abahlobo, bathumele imiyalezo ngekhompyutha okanye bavule i-Internet.
14 AmaKristu okwenyaniso ayazi ukuba amele anyaniseke. (Funda iMizekeliso 6:16-19.) UPawulos wathi: “Sinqwenela ukuziphatha ngokunyaniseka kwizinto zonke.” (Heb. 13:18) Ngenxa yoko, amaKristu azibhokoxa imini yonke emsebenzini ekubeni nawo eza kufumana umvuzo wemini yonke. (Efe. 6:5-8) Ukuzibhokoxa emsebenzini kunokuzukisa uBawo wethu wasezulwini. (1 Pet. 2:12) Ngokomzekelo, umqeshi kaRoberto waseSpeyin wamncoma ngokuba ngumsebenzi onyanisekileyo nonenkathalo. Ngenxa yokunyaniseka kukaRoberto, kwaqeshwa amaNgqina angakumbi kuloo nkampani. Nawo asebenza ngenkuthalo. Ngenxa yoko, uRoberto uye wabangela ukuba kuqeshwe abazalwana ababhaptiziweyo abangama-23 nabantu abasi-8 abasaqhutyelwa izifundo zeBhayibhile!
15. Usomashishini ongumKristu unokubonisa njani ukuba uthetha inyaniso?
15 Ukuba sineshishini, ngaba sinyanisekile kwimicimbi yezoshishino, okanye ngaba maxa wambi siye singathethi nyaniso nabamelwane bethu? Usomashishini ongumKristu akafanele axoke ngento ayithengisayo okanye ngomsebenzi awenzayo kuba nje efuna ukufumana imali ngokukhawuleza; yaye akafanele anyobe okanye avume ukunyotywa. Sifanele siphathe abanye ngendlela esingathanda ukuphathwa ngayo.—IMize. 11:1; Luka 6:31.
Thetha Inyaniso Namagosa Karhulumente
16. Yintoni amaKristu ayinika (a) amagosa karhulumente? (b) uYehova?
16 UYesu wathi: “Ngoko ke, buyiselani izinto zikaKesare kuKesare, kodwa izinto zikaThixo kuThixo.” (Mat. 22:21) Ziziphi “izinto” esifanele sizinike uKesare, oko kukuthi amagosa karhulumente? Xa uYesu wayethetha loo mazwi, kwakuthethwa ngokuhlawulwa kwerhafu. Ngoko ukuze ahlale enesazela esicocekileyo kuThixo nasebantwini, amaKristu athobela imithetho yamazwe ahlala kuwo, kuquka eyokuhlawulwa kwerhafu. (Roma 13:5, 6) Kodwa siyaqonda ukuba uYehova nguMongami Ophakamileyo, okuphela koThixo oyinyaniso, esimthanda ngentliziyo, ngomphefumlo, ngengqondo nangamandla ethu ephela. (Marko 12:30; ISityhi. 4:11) Ngenxa yoko, sizithoba kuYehova uThixo ngokupheleleyo.—Funda iNdumiso 86:11, 12.
17. Abakhonzi bakaYehova balujonga njani uncedo oluvela kurhulumente?
17 Kumazwe amaninzi kukho ilungiselelo lokunceda abantu abasweleyo. Akukho nto iphosakeleyo ngokuba umKristu amkele olo ncedo, ukuba uyafaneleka. Ukuba sithetha inyaniso nabamelwane bethu asiyi kunika amagosa karhulumente inkcazelo engachananga ukuze sixhamle kuncedo lukarhulumente.
Iingenelo Zokuthetha Inyaniso
18-20. Siya kungenelwa njani ngokuthetha inyaniso kubamelwane bethu?
18 Zininzi iingenelo esinokuzifumana xa sinyanisekile. Siba nesazela esicocekileyo nto leyo esenza sibe noxolo lwengqondo size sonwabe. (IMize. 14:30; Fil. 4:6, 7) Ukuba nesazela esicocekileyo yeyona nto ixabisekileyo kuThixo. Kwakhona, ukuba sinyanisekile kwizinto zonke, asiyi kuba naxhala lokubhaqwa ngabanye.—1 Tim. 5:24.
19 Cinga ngenye indlela onokungenelwa ngayo. UPawulos wathi: “Ngandlela zonke siyazincomela njengabalungiseleli bakaThixo, . . . ngentetho eyinyaniso.” (2 Kor. 6:4, 7) Oku kwenzeka kwelinye iNgqina elihlala eBritani. Xa lalithengisela omnye umntu imoto, lamchazela yonke into kuquka iingxaki enazo, kwanezo wayengenakuzibona loo mntu. Emva kokuhambahamba ngaloo moto eyihlola, loo mntu wabuza lo mzalwana ukuba uliNgqina likaYehova na. Kwakutheni ukuze ambuze lo mbuzo? Le ndoda yayibone ukunyaniseka nokucoceka kwakhe. Lo mzalwana wafumana ithuba lokunikela ubungqina kule ndoda.
20 Ngaba nathi siyamzukisa uMdali wethu ngokuhlala sinyanisekile? UPawulos wathi: “Sizilahle izinto ezifihlakeleyo ezibangela iintloni, singahambi ngobuqhokolo.” (2 Kor. 4:2) Ngenxa yoko, masizimisele ukuthetha inyaniso nabamelwane bethu. Ngokwenjenjalo, siya kuzukisa uBawo wethu wasezulwini nabantu bakhe.
Ungaphendula Uthini?
• Ngubani ummelwane wakho?
• Kuthetha ukuthini ukuthetha inyaniso nommelwane wakho?
• Ukuthetha inyaniso kunokumzukisa njani uThixo?
• Ziziphi iingenelo esinokuzifumana xa sinyanisekile?
[Umfanekiso okwiphepha 17]
Ngaba uyazivuma iimpazamo ozenzileyo?
[Umfanekiso okwiphepha 18]
Ngaba uthetha inyaniso xa ufaka isicelo somsebenzi?