Ngaba Wakha Waba Neembopheleleko Zokomoya? Ngaba Unokuphinda Ube Nazo?
NGABA wakha waba neembopheleleko kwibandla lamaKristu? Mhlawumbi wawusisicaka solungiselelo okanye umdala. Kusenokwenzeka ukuba wawukwinkonzo yexesha elizeleyo. Alithandabuzeki elokuba wawusivuyela yaye usaneliseka sisabelo sakho, kodwa ngenxa yesizathu esithile kwafuneka uphulukane naso.
Mhlawumbi wasiyekiswa kukuba ufuna ukunyamekela amalungu entsapho. Kwelinye icala, kukwaluphala okanye impilo enkenenkene. Oku akuthethi ukuba woyisakele. (1 Tim. 5:8) Kwinkulungwane yokuqala, uFilipu wayengumvangeli, kodwa kamva waya kuhlala eKesareya ukuze anyamekele intsapho yakhe. (IZe. 21:8, 9) Ngenxa yokwaluphala, uKumkani uDavide wakwaSirayeli wamandulo walungiselela ukuba unyana wakhe uSolomon angene ezihlangwini zakhe. (1 Kum. 1:1, 32-35) Sekunjalo, uFilipu noDavide babesathandwa nguYehova yaye basahlonelwa nanamhlanje.
Noko ke, kusenokwenzeka ukuba wahluthelwa amalungelo. Ngaba kwakungenxa yehambo yakho? Okanye ngaba yayiziingxaki zentsapho? (1 Tim. 3:2, 4, 10, 12) Kusenokwenzeka ukuba wawungasiboni isizathu sokohluthelwa amalungelo, yaye loo nto isakucaphukisa nanamhlanje.
Unokulufikelela Kwakhona
Ngaba ungakwazi ukuphinda ulifumane elo lungelo? Kwiimeko ezininzi ungakwazi. Kodwa ke, ukuze ukwazi ukulufikelela, kufuneka uzibhokoxe. (1 Tim. 3:1) Kodwa kutheni unqwenela oku? Kungenxa yesizathu esifanayo neso sabangela ukuba uzahlulele kuThixo—ukuthanda uYehova nabo bamkhonzayo. Ukuba ufuna ukubonisa olo thando ngokuphinda ufumane elo lungelo, oku kuya kubangela ukuba uYehova asebenzise amava owawunawo ngaphambi nangasemva kokuba uphulukene nalo.
Khumbula into uYehova awawaqinisekisa ngayo amaSirayeli emva kokuba ephulukene namalungelo enkonzo. ILizwi lakhe lithi: “NdinguYehova, anditshintshanga. Yaye nina ningoonyana bakaYakobi; anigqitywanga naphela.” (Mal. 3:6) UYehova wayewathanda amaSirayeli yaye wayefuna ukuwasebenzisa ngakumbi. Unomdla wokukusebenzisa nawe kwixa elizayo. Yintoni onokuyenza ngemeko okuyo ngoku? Amalungelo okomoya akaxhomekekanga kubuchule onabo kodwa kulwalamano lwakho noYehova. Ngenxa yoko, ngoxa ungekabi nazimbopheleleko zingako ebandleni, nikela ingqalelo ekomelezeni ulwalamano lwakho noYehova.
Ukuze ‘uqine’ elukholweni, ‘funa uYehova namandla akhe.’ (1 Kor. 16:13; INdu. 105:4) Enye indlela onokukwenza ngayo oku kukuthandaza ngokusuk’ entliziyweni. Xa uxelela uYehova ngemeko okuyo, zityand’ igila kuye, uze ucele umoya wakhe. Xa usenza oku uya kusondela ngakumbi kuYehova, yaye uya komelela. (INdu. 62:8; Fil. 4:6, 13) Enye indlela yokomeleza ulwalamano lwakho noYehova kukuphucula indlela olifundisisa ngayo iLizwi lakhe. Ngoxa useneembopheleleko ezimbalwa, unokukwazi ukuchitha ixesha elingakumbi kufundisiso lobuqu nesifundo sentsapho, nto leyo bekungelula ukuyenza ngaphambili.
Kakade ke, usengomnye wamaNgqina kaYehova. (Isa. 43:10-12) Elona lungelo lingathethekiyo anokuba nalo nabani na kukuba ‘ngumsebenzi olidlelane kaThixo.’ (1 Kor. 3:9) Ukwandisa ixesha olichitha entsimini yenye indlela yokomeleza ulwalamano lwakho noYehova nabo ushumayela nabo.
Ukulwisana Neemvakalelo Onazo
Ukuphulukana nelungelo lenkonzo kunokukwenza uzive uhlaziyekile okanye uzisole. Usenokuzithethelela. Sekunjalo, kuthekani ukuba abazalwana abaneembopheleleko bayakuphulaphula xa uzithethelela kodwa basavakalelwa kukuba awukakufanelekeli ukuphinda ulifumane elo lungelo? Ingqumbo isenokukubangela ungenzi nkqubela okanye ikwenze ungafundi kwiimpazamo zakho. Makhe siqwalasele indlela amava kaYobhi, uManase, noYosefu anokumnceda ngayo umntu ukuba alwisane nemvakalelo enjalo.
UYobhi wayemela abantu kuYehova ibe waba ngumdala nomgwebi woosolusapho. (Yobhi 1:5; 29:7-17, 21-25) Kanye ngelo xesha, uYobhi waphulukana nobutyebi bakhe, wafelwa ngabantwana nempilo yakhe yankenenkene. Ngenxa yoku, abantu bamjonga ngenye indlela. UYobhi uthi: “Bandihlekile, abo bancinane kum ngemihla.”—Yobhi 30:1.
UYobhi wavakalelwa kukuba akanatyala waza wafuna ukuzithethelela kuThixo. (Yobhi 13:15) Sekunjalo, wayekulungele ukulindela kuYehova yaye oku kwamzisela iintsikelelo. Wafunda ukuba kwakufanelekile ukuba alungiswe ngenxa yendlela awasabela ngayo xa wayevavanywa. (Yobhi 40:6-8; 42:3, 6) Ekugqibeleni, ukuthobeka kwakhe kwabangela ukuba asikelelwe ngakumbi nguThixo.—Yobhi 42:10-13.
Ukuba waphulukana nelungelo ngenxa yokuba wenze okuphosakeleyo, usenokuzibuza enoba uYehova nabazalwana bakho abangamaKristu baya kukuxolela ngokwenene na baze bakulibale oko ubukwenzile. Khawucinge ngemeko kaKumkani uManase wakwaYuda. “Wenza okubi emehlweni kaYehova ngomlinganiselo omkhulu, ukuze amcaphukise.” (2 Kum. 21:6) Sekunjalo, wafa ethembekile, elawula njengokumkani. Kwenzeka njani oku?
Ekugqibeleni uManase walwamkela uqeqesho. Emva kokuba ezityeshele izilumkiso, uYehova wasebenzisa amaSiriya ukuba ambophelele aze amthimbele eBhabhiloni. Apho “wambongoza uYehova uThixo wakhe waqhubeka ezithoba kakhulu ngenxa kaThixo wookhokho bakhe. Yaye waqhubeka ethandaza Kuye.” Ukuguquka ngokusuk’ entliziyweni kwambangela ukuba alungise iziphoso zakhe waza waxolelwa.—2 Kron. 33:12, 13.
Akufane kwenzeke ukuba amalungelo ophulukene nawo abuyiselwe onke ngexesh’ elinye. Kodwa ekuhambeni kwexesha usenokunikwa amalungelo athile. Ukuwamkela uze uwanyamekele ngamandla akho onke kuya kukukhokelela ekubeni ufumane angakumbi. Oku akwenzeki ngokulula. Kusenokubakho izinto ezikudimazayo. Sekunjalo, ukusebenzela ukufumana amalungelo angakumbi nokunyamezela kunokuba nomvuzo.
Nanku umzekelo wonyana kaYakobi uYosefu. Xa wayeneminyaka eli-17 ubudala, abantakwabo bamthengisa ebukhobokeni. (Gen. 37:2, 26-28) Ngokuqinisekileyo akazange acinge ukuba abantakwabo bangenza into enjalo. Sekunjalo, wayekulungele ukuphila phantsi kwezo meko, yaye uYehova wamsikelela waza “wavelela endlwini yenkosi yakhe.” (Gen. 39:2) Kamva uYosefu wavalelwa entolongweni. Kodwa wathembeka ibe uYehova wayenaye, ngoko ekugqibeleni wajizekwa ngelungelo lokuphatha entolongweni.—Gen. 39:21-23.
UYosefu wayengazi ukuba konke oku kwakuza kufeza injongo ethile. Waqhubeka esenza oko kwakusemandleni akhe. Ngaloo ndlela uYehova wakwazi ukumsebenzisa ukuba agcine umnombo weMbewu ethenjisiweyo. (Gen. 3:15; 45:5-8) Ngoxa singenakukwazi sonke ukuba nendima awaba nayo uYosefu, kodwa ingxelo ephefumlelweyo ibonisa ukuba uYehova ubandakanyekile kumalungelo afunyanwa ngabakhonzi bakhe. Vula indlela yokufumana amalungelo ngokuxelisa uYosefu.
Ukufunda Okuthile Kwizinto Ezikwehleleyo
UYobhi, uManase noYosefu bahlelwa zizinto ezibuhlungu. Omathathu la madoda akwamkela oko kwakuvunyelwa nguYehova, yaye ngamnye kuwo wafunda izifundo ezibalulekileyo. Yintoni onokuyifunda kubo?
Khangela into uYehova azama ukukufundisa yona. Ephelelwe lithemba uYobhi wacinga ngesiqu sakhe kuphela akakwazi ukubona eyona mbambano inkulu. Kodwa emva kokuba uYehova emlungise ngothando, avuleka amehlo akhe waza wathi: “Ndithethile, kodwa bendingaziqondi.” (Yobhi 42:3) Ukuba ukhathazwe kukuphulukana namalungelo, ‘ungazicingeli ngaphezu koko umelwe kukuzicingela ngako; kodwa cinga khon’ ukuze ube nengqondo ephilileyo.’ (Roma 12:3) Kusenokwenzeka ukuba uYehova uzama ukukulungisa ngendlela ongayiqondi kakuhle.
Yamkela uqeqesho. Kusenokwenzeka ukuba ekuqaleni uManase wayevakalelwa kukuba wayengamele ohlwaywe ngendlela eqatha awohlwaywa ngayo. Sekunjalo, wasamkela isohlwayo, waguquka waza walishiya ikhondo elibi. Enoba uvakalelwa njani ngoqeqesho olufumanayo, ‘zithobe emehlweni kaYehova, yaye uya kukuphakamisa.’—1 Pet. 5:6; Yak. 4:10.
Yiba nomonde ukulungele ukwenza nantoni na. Izinto ezenzeka kuYosefu zazinokubangela ukuba ahlale enomsindo aze afune ukuziphindezela. Kunoko, waba nengqiqo nenceba. (Gen. 50:15-21) Ukuba uye wadimazeka, yiba nomonde. Kulungele ukuqeqeshwa nguYehova.
Ngaba wakha waba nembopheleleko ethile ebandleni lamaKristu? Vumela uYehova ukuba akujizeke ngamalungelo kwixa elizayo. Yomeleza ulwalamano lwakho naye. Yiba nomonde uze uthobeke. Kulungele ukwamkela naziphi na izabelo ozifumanayo. Qiniseka ukuba “uYehova akayi kubandeza nantoni na elungileyo kwabo bahamba ngokungenamposiso.”—INdu. 84:11.
[Amagama acatshulweyo akwiphepha 30]
Qina elukholweni ngomthandazo osuk’ entliziyweni
[Umfanekiso okwiphepha 31]
Ukwandisa ixesha olichitha entsimini yenye indlela yokomeleza ulwalamano lwakho noYehova
[Umfanekiso okwiphepha 32]
Vumela uYehova ukuba akujizeke ngamalungelo kwixa elizayo