Sondela KuThixo
Yintoni UYehova Ayifunayo Kuthi?
ISIGQIBO sokuthobela nesokungathobeli asisoloko silula. Umphathi ongqwabalala okanye ofuna izinto ngenkani basenokumthobela bekrikriza abantu abaphetheyo. Kodwa uYehova uThixo bamthobela ngokuzithandela abanquli bakhe. Ibangelwa yintoni loo nto? Ukuze siphendule lo mbuzo, makhe sithethe ngamazwi kaMoses akwiDuteronomi 10:12, 13.a
Xa wayechaza into efunwa nguThixo kuthi, uMoses wabuza lo mbuzo uxhokonx’ ingcinga: “Yintoni na uYehova uThixo wakho ayifunayo kuwe?” (Indinyana 12) UThixo unelungelo lokufuna nantoni na kuthi. Kaloku uyiNkosi enguMongami, uMthombo noMlondolozi wobomi. (INdumiso 36:9; Isaya 33:22) UYehova unelungelo lokufuna ukuthotyelwa sithi. Sekunjalo, akasinyanzeli ukuba senjenjalo. Yintoni ke ayifunayo kuthi? Kukuba ‘simthobele ngokusuka entliziyweni.’—Roma 6:17.
Yintoni enokusenza sikuthande ukuthobela uThixo? UMoses usichazela esinye isizathu, uthi: ‘Moyike uYehova uThixo wakho.’b (Indinyana 12) Olu hlobo lokoyika aluthethi ukugubha kukoyika kodwa luthetha ukuhlonela uThixo nemithetho yakhe. Ukuba siyamhlonela uThixo, siya kukuphepha ukwenza izinto ezingamkholisiyo.
Sisiphi ke esona sizathu esimele sisenze sifune ukumthobela uThixo? UMoses uthi: “Mthande yaye umkhonze uYehova uThixo wakho ngentliziyo yakho yonke nangomphefumlo wakho wonke.” (Indinyana 12) Ukuthanda uThixo akupheleli nje kwiimvakalelo. Enye incwadi ithi: “Maxa wambi izenzi zegama lesiHebhere elithi iimvakalelo zikwabhekisela kwizenzo ezibangelwa yiloo ndlela sivakalelwa ngayo.” Kwale ncwadi iphinda ithi ukuthanda uThixo kuthetha “ukwenza izinto ezibonisa ukuba siyamthanda.” Ngamanye amazwi ukuba simthanda ngokwenene uThixo siya kwenza izinto esaziyo ukuba ziyamkholisa.—IMizekeliso 27:11.
Simele simthobele ukusa kuwuphi umkhamo uThixo? UMoses uthi: ‘Sihambe ngeendlela zakhe zonke [uThixo].’ (Indinyana 12) UYehova ufuna ukuba senze yonke into ayifunayo kuthi. Ngaba ukumthobela ngokupheleleyo kunokusenzakalisa? Kungangenkankulu.
Usisikelela gqitha xa simthobela ngokuzithandela. UMoses uthi: ‘Gcina imiyalelo endikuyalela ngayo namhlanje, ukuze kulunge kuwe.’ (Indinyana 13) Ewe, yonke imiyalelo kaYehova—yonke into ayifunayo kuthi—inceda kwathina. Kakade ke ibinokusenzakalisa njani? IBhayibhile ithi: “UThixo uluthando.” (1 Yohane 4:8) Ekuphela kwemiyalelo asinika yona yileyo iza kusinceda. (Isaya 48:17) Ukuthobela zonke izinto ezifunwa nguYehova kuthi kuya kusisindisa kwiinkxwaleko ezininzi size sifumane iintsikelelo ezingapheliyo xa kulawula uBukumkani bakhe.c
Kumbandela womkuthobela nokungamthobeli uYehova, ekuphela kwento ebubulumko kukumthobela ngokupheleleyo nangokusuka entliziyweni. Ukuthembeka okunjalo kuyasisondeza kuYehova, uThixo onothando osoloko efuna siphumelele.
[Imibhalo esemazantsi]
a Nangona amazwi kaMoses ayesebenza kuSirayeli wamandulo, umgaqo okuwo usasebenza kubo bonke abo bafuna ukukholisa uThixo namhlanje.—Roma 15:4.
b Kuyo yonke incwadi yeDuteronomi uMoses ubethelela ukuba ukoyika uThixo kumele kube yeyona nto iphambili kubakhonzi bakhe.—Duteronomi 4:10; 6:13, 24; 8:6; 13:4; 31:12, 13.
c Ukuze ufumane inkcazelo engakumbi funda isahluko 3 esinomxholo othi, “Yintoni Injongo KaThixo Ngomhlaba?”, kwincwadi ethi, Yintoni Ngokwenene Efundiswa YiBhayibhile? epapashwe ngamaNgqina kaYehova.