Imibuzo Yabafundi

Ngaba USathana Ngumntu Wokwenene?

Ewe, iBhayibhile ifundisa ukuba uSathana uMtyholi ngumntu wokwenene. Abagxeki beBhayibhile bathi akukho mntu kuthiwa nguSathana apha. Bathi eyona nto kubhekiselwa kuyo xa kuthethwa ngoSathana bubungendawo nje obungaphakathi ebantwini.

Ngaba ifanele ibe ngumnqa into yokuba abantu bangaqiniseki ngeyona nto ayiyo uSathana? Akumele kube njalo. Singayizekelisa kanje lento: Isaphuli-mthetho siye sigquke umkhondo waso kwindawo esiye samosha kuyo ukuze siqiniseke ukuba asibanjwa. Ngokufanayo ke, noSathana ngungqondongqondo wesaphuli-mthetho esithanda ukwenza izinto zaso ebumnyameni. UYesu wamchaza kakuhle uSathana njengoyena nobangela wobungendawo obuthwaxa uluntu. UYesu wathi uSathana ‘ngumlawuli weli hlabathi.’—Yohane 12:31.

Wayevela phi uMtyholi? USathana wayesisidalwa esifezekileyo ezulwini, kodwa ke wazenza uMtyholi xa wafuna ukuba abantu banqule yena kunokuba banqule uThixo. IBhayibhile isichazela ngencoko kaSathana noYesu apho uMtyholi waziveza khona ukuba wayenamabhongo okuzingca. USathana wazama ukwenza uYesu ukuba ‘awe phantsi amnqule.’—Mateyu 4:8, 9.

Incoko efana naleyo ichazwe kwincwadi kaYobhi nalapho uSathana wayethetha noThixo etyhila iinjongo zakhe. Uzimisele ukwenza nantoni na ukuze atyekise abantu kuThixo.—Yobhi 1:13-19; 2:7, 8.

Khawucinge nje ngoku: USathana wayenokuthetha njani noYehova uThixo kunye noYesu Kristu, ukuba ebengengomntu kodwa ebubungendawo nje obusebantwini? Ayinakwenzeka into yokuba uThixo noNyana wakhe babe nobungendawo! Kuyacaca ke ukuba uSathana ungumntu wokwenene—isidalwa somoya esingendawo esingamhloneli nakancinane uYehova noYesu.

Ukonakala koluntu kuyingqina phandle into yokuba uMtyholi ungumntu wokwenene ophilayo. Oorhulumente behlabathi bayakwazi ukuyeka ukutya kubole ngoxa kukho abantu babo abafa yindlala. Bafumba izixhobo ezinokushiya inyambalala yabantu ithe waca. Bonakalisa umhlaba. Kuyo yonke loo nto abantu abamazi unobangela wokuba bathiyane baze benze izinto eziza kwenzakalisa kwabona. Ibangelwa yintoni loo nto?

IBhayibhile ithi uSathana ‘uzimfamekisile iingqondo zabangakholwayo.’ (2 Korinte 4:4) USathana ukhohlisa abantu esebenzisa intlangano engabonakaliyo emehlweni abo. ‘Ulawula iidemon.’ (Mateyu 12:24) Kanye njengokuba inkokeli yezikrelemnqa inokulawula iqela elikhulu ibe ingaziwa ngawo onke amalungu alo, naye ke uSathana usebenzisa intlangano yakhe ekhohlakeleyo yeengelosi ezingendawo ukulawula izihlwele zabantu ngoxa uninzi lwazo lungaqondi ukuba luphenjelelwa nguye.

Sinombulelo gqitha kuba iBhayibhile imbhenca uMtyholi nentlangano yakhe. Ngoko ke iyasinceda sikwazi ukuxhathisa impembelelo yakhe. IBhayibhile isibongoza isithi: “Zithobeni . . . kuThixo; kodwa mchaseni uMtyholi, wonibaleka.”—Yakobi 4:7.