Oko Sikufunda KuYesu

Ngobomi Bentsapho

Intsapho zonwaba xa zinayiphi imbono ngomtshato?

Umtshato ungcwele. Xa wayebuzwa ukuba kuvumelekile na ukuqhawula umtshato, uYesu wathi: “Anizange nifunde na ukuba lowo wabadalayo ukususela ekuqaleni wabenza baba yindoda nebhinqa waza wathi, ‘Ngenxa yesi sizathu indoda iya kumshiya uyise nonina ize inamathele emfazini wayo, baze abo babini babe nyama-nye’? Ngako oko abasebabini, kodwa banyama-nye. Ngoko ke, oko uThixo akubophelele ngedyokhwe ndawonye makungahlukaniswa mntu. . . . Nabani na oqhawula umtshato nomfazi wakhe, ngaphandle kwangesizathu sohenyuzo, aze atshate nomnye uyakrexeza.” (Mateyu 19:4-6, 9) Xa indoda nomfazi bethobela isiluleko sikaYesu yaye bethembekile emtshatweni wabo, intsapho iziva ikhuselekile yaye iyonwaba.

Kutheni zisonwaba nje iintsapho ezimthandayo uThixo?

UYesu wathi: “‘Uze umthande uYehova uThixo wakho ngentliziyo yakho iphela nangomphefumlo wakho uphela nangengqondo yakho iphela.’ Lo ngowona myalelo mkhulu nowokuqala.” Nguwuphi owesibini ngobukhulu? UYesu wathi: “Uze umthande ummelwane wakho njengawe siqu.” (Mateyu 22:37-39) Ngoko ke undoqo ukuze intsapho yonwabe kukuba nolwalamano oluhle noThixo kuba ukumthanda kusenza sithandane.

Abayeni nabafazi babo banokonwabisana njani?

Amadoda abenza bonwabe abafazi bawo xa elandela umzekelo kaYesu. Wayeziphosa nejacu xa enceda ibandla, umfazi wakhe wokomfuziselo. (Efese 5:25) UYesu wathi: “Kanye njengokuba uNyana womntu weza, kungekhona ukuze alungiselelwe, kodwa ukuze alungiselele.” (Mateyu 20:28) UYesu wayengabaphathi ngqwabalala okanye abe nguzwilakhe kubantu ababengaphantsi kwakhe, kodwa wayebahlaziya. (Mateyu 11:28) Ngoko ke, nabayeni bafanele balisebenzise kakuhle igunya labo.

Nabafazi banokufunda kumzekelo kaYesu. IBhayibhile ithi: “Intloko kaKristu nguThixo.” Kodwa ke iphinda ithi: “Intloko yomfazi yindoda.” (1 Korinte 11:3) UYesu akazange acinge ukuba kuyamthoba ukuba ngaphantsi kukaThixo. Wayemhlonipha kakhulu uYise. UYesu wathi: “Ndisoloko ndisenza izinto ezikholekileyo kuye.” (Yohane 8:29) Umfazi obuthobelayo ubuntloko bendoda yakhe kuba emthanda uThixo yaye emhlonipha, uyenza yonwabe intsapho yakhe.

Yintoni abanokuyifunda abazali kwindlela uYesu awayebajonga ngayo abantwana?

UYesu wayehlala nabantwana yaye wayenomdla kwizinto ababezicinga, neemvakalelo zabo. IBhayibhile ithi: “UYesu wazibizela kuye ezo ntsana, esithi: ‘Bayekeni abantwana abaselula beze kum.’” (Luka 18:15, 16) Ngenye imini abantu bakhalimela abantwana ababenokholo kuYesu. Kodwa ke, uYesu wawancoma loo makhwenkwe, waza wathi kubantu ababewagxeka: “Anizange nikufunde na oku, ‘Emlonyeni weentsana nabanyayo ulungiselele indumiso’?”—Mateyu 21:15, 16.

Yintoni abanokuyifunda abantwana kuYesu?

UYesu wabamisela umzekelo wokuthanda izinto zobuthixo. Xa wayeneminyaka eli-12 wafunyanwa “etempileni ehleli phakathi kwabafundisi, ebaphulaphule yaye ebabuza.” Waba yintoni umphumo? “Bonke abo babemphulaphule bahlala bethe manga kukuqonda kwakhe naziimpendulo zakhe.” (Luka 2:42, 46, 47) Kodwa ke, ulwazi lukaYesu aluzange lumenze akhukhumale. Kunoko, lwamenza wabahlonipha abazali bakhe. IBhayibhile ithi: “Waqhubeka ezithobile kubo.”—Luka 2:51.

Ukuze ufumane ulwazi olungakumbi funda isahluko 14 sencwadi ethi Yintoni Ngokwenene Efundiswa YiBhayibhile?a

[Umbhalo osemazantsi]