Fundisisa IBhayibhile Ukuze Imithandazo Yakho Ibe Nentsingiselo
“Awu, Yehova, nceda, indlebe yakho mayiwuphulaphule umthandazo womkhonzi wakho.”—NEH. 1:11.
1, 2. Kutheni kunokuba yingenelo ukuhlola eminye yemithandazo eseBhayibhileni?
UKUTHANDAZA nokufunda iBhayibhile yinxalenye ebalulekileyo yonqulo lokwenyaniso. (1 Tes. 5:17; 2 Tim. 3:16, 17) Phofu ke, iBhayibhile asiyoncwadi yemithandazo. Kodwa inemithandazo eliqela, equka leyo ifumaneka kwincwadi yeeNdumiso.
2 Uya kufumanisa ukuba eBhayibhileni, kukho imithandazo ethetha ngemeko okuyo. Eneneni, ukusebenzisa iingcamango ezikule mithandazo iseZibhalweni kunokwenza imithandazo yakho ibe nentsingiselo. Yintoni onokuyifunda kwimithandazo yabo bacela uncedo baza baphendulwa?
Funa Ukhokelo LukaThixo Uze Ululandele
3, 4. Wayethunywe ntoni umkhonzi ka-Abraham, yaye yintoni esinokuyifunda kwindlela uYehova awaphendula ngayo?
3 Xa ufunda iBhayibhile, uye ubone ukuba kububulumko ukuthandazela ukhokelo lukaThixo. Cinga ngento eyenzekayo xa usolusapho uAbraham wathumela oyena mkhonzi wakhe unamava—ekusenokwenzeka ukuba yayinguEliyezere—eMesopotamiya ukuba aye kufunela uIsake umfazi owoyika uThixo. Ebona amabhinqa awayeze kukha amanzi equleni, lo mkhonzi wathandaza: “Yehova . . . , maze kuthi ke ibhinqa eliselula endothi kulo, ‘Nceda uthobe ingqayi yakho, ndisele,’ lize ngenene lithi lona, ‘Sela, neenkamela zakho ndoziseza,’ ibe lilo olabele umkhonzi wakho, uIsake; ndize ngale ndlela ndazi mna ngoko ukuba ubonakalise uthando olunyanisekileyo kwinkosi yam.”—Gen. 24:12-14.
4 Umthandazo womkhonzi ka-Abraham waphendulwa xa uRebheka eseza iinkamela zalo mkhonzi. Wahamba naye xa ephindela kwaKanan waza waba ngumfazi othandekayo kaIsake. Kakade ke, asinakulindela ukuba uThixo asinike umqondiso okhethekileyo. Kodwa ke uya kusikhokela ebomini xa simcela ngomthandazo yaye sizimisele ukuvumela umoya wakhe usalathise.—Gal. 5:18.
Umthandazo Uthomalalisa Amaxhala
5, 6. Yintoni ebangel’ umdla kumthandazo owenziwa nguYakobi xa wayeza kudibana noEsawu?
5 Umthandazo unokuwathomalalisa amaxhala. Esoyika iwele lakhe, uEsawu, uYakobi wathandaza: “Owu Yehova, . . . andifanelwanga bubo bonke obu bubele bothando nakuko konke oku kuthembeka ukubonakalisileyo kumkhonzi wakho . . . Khawuncede undihlangule, esandleni somntakwethu, esandleni sikaEsawu, kuba ndiyamoyika, hleze afike andihlasele ngokuqinisekileyo, abantwana ndawonye nonina. Wawuthe wena, ‘Ngokungathandabuzekiyo ndiya kuqhubana kakuhle nawe ndize ndiyenze imbewu yakho ibe njengentlabathi yolwandle, engenakubalwa ngenxa yobuninzi bayo.’”—Gen. 32:9-12.
6 Nangona uYakobi wenza imigudu yokuphepha ingxabano, umthandazo wakhe waphendulwa xa yena noEsawu bexolelana. (Gen. 33:1-4) Xa uwufunda ngenyameko lo mthandazo, uya kuphawula ukuba uYakobi akazange aphelele nje ekuceleni uncedo. Wabonisa ukholo kwiMbewu ethenjisiweyo nombulelo ngobubele bukaThixo bothando. Ngaba kukho izinto ezikwenza ube ‘noloyiko ngaphakathi’? (2 Kor. 7:5) Ukuba kunjalo, isibongozo sikaYakobi sinokukunceda ubone ukuba umthandazo unako ukuthomalalisa amaxhala. Noko ke, imithandazo yethu ayifanele ibe zizicelo kuphela kodwa ifanele ibonise nokholo esinalo.
Thandazela Ubulumko
7. Kwakutheni ukuze uMoses athandazele ukwazi iindlela zikaYehova?
7 Umnqweno onawo wokukholisa uYehova ufanele ukwenze uthandazele ubulumko. UMoses wathandazela ukuzazi iindlela zikaThixo. Wabongoza esithi: “Uyabona [Yehova], uthi kum, ‘Nyusa esi sizwana [siphume eYiputa]’ . . . Ke kaloku, ukuba ndikholekile emehlweni akho, nceda undazise iindlela zakho, ukuze . . . ndikholeke emehlweni akho.” (Eks. 33:12, 13) UThixo wamphendula uMoses ngokumazisa iindlela zakhe—nto leyo yayiza kumnceda ukuze akwazi ukukhokela abantu bakaYehova.
8. Kunokukunceda njani ukucamngca ngeyoku-1 yooKumkani 3:7-14?
8 NoDavide wathandaza wathi: “Ndazise iindlela zakho, Yehova.” (INdu. 25:4) Unyana kaDavide uSolomon wacela uThixo ukuba amnike ubulumko bokulawula amaSirayeli. UYehova wakholiswa ngumthandazo kaSolomon, kangangokuba akazange amnike oko wayekucelile nje kuphela, kodwa wamnika ubutyebi nozuko. (Funda eyoku-1 yooKumkani 3:7-14.) Ukuba ufumana izabelo ebandleni ezibonakala zinzima, ufanele uthandazele ubulumko uze uthobeke. UThixo uya kukunceda ube nolwazi, akunike nobulumko bokuphumeza iimbopheleleko zakho ngendlela efanelekileyo nebonisa uthando.
Thandaza Ngokusuka Entliziyweni
9, 10. Yintoni oyiphawulayo ngokukhankanya kukaSolomon intliziyo kumthandazo wakhe wokunikezelwa kwetempile?
9 Ukuze imithandazo yethu iphulaphulwe, imele isuke entliziyweni. Kweyoku-1 yooKumkani isahluko 8 kukho umthandazo kaSolomon osuka entliziyweni awawenza phambi kwesihlwele esasihlanganisene eYerusalem xa kwakunikezelwa itempile kaYehova ngowe-1026 B.C.E. Emva kokuba ityeya yomnqophiso ibekwe kweYona Ngcwele nelifu likaYehova lizalise itempile, uSolomon wadumisa uThixo.
10 Funda umthandazo kaSolomon uze uphawule izihlandlo akhankanya ngazo intliziyo. USolomon wayesazi ukuba nguYehova kuphela oyaziyo intliziyo yomntu. (1 Kum. 8:38, 39) Lo mthandazo ukwabonisa ukuba likho ithemba ngomoni ‘obuyela kuThixo ngentliziyo yakhe yonke.’ Ukuba abantu bakaThixo babenokuthinjwa lutshaba, uYehova wayeza kuziva izibongozo zabo ukuba iintliziyo zabo zaziphelele kuye. (1 Kum. 8:48, 58, 61) Ngokuqinisekileyo imithandazo yakho ifanele isuke entliziyweni.
Incwadi YeeNdumiso Inokwenza Imithandazo Yakho Ibe Nentsingiselo
11, 12. Yintoni oyifundileyo kumthandazo womLevi othile owayengakwazi ukuya kwingcwele kaThixo?
11 Ukufunda incwadi yeeNdumiso kunokwenza imithandazo yakho ibe nentsingiselo kuze kukuncede ulindele kuThixo. Khawucinge ngendlela umLevi othile owayesekuthinjweni awabonisa ngayo umonde. Nangona wayengakwazi ukuya kwingcwele kaYehova ngelo xesha, wathi: “Kutheni na uphelelwe lithemba, mphefumlo wam, kutheni na uxokozela ngaphakathi kum? Lindela kuThixo, kuba ndisaya kumbonga njengosindiso oluzukileyo lwam siqu.”—INdu. 42:5, 11; 43:5.
12 Yintoni ke onokuyifunda kulo mLevi? Ukuba uvalelwe entolongweni ngenxa yobulungisa yaye akukwazi ukuhlanganisana namanye amaKristu, linda ngomonde de uThixo akuncede. (INdu. 37:5) Cinga ngezinto ezazikuvuyisa enkonzweni kaThixo, uze uthandazele ukunyamezela ngoxa ‘ulindele kuThixo’ ukuba akudibanise nabantu bakhe.
Thandaza Unokholo
13. Ngokutsho kukaYakobi 1:5-8, kutheni ufanele uthandaze unokholo?
13 Ngalo lonke ixesha thandaza unokholo, enoba ukweyiphi na imeko. Ukuba ingqibelelo yakho iyavavanywa, sebenzisa isiluleko somfundi uYakobi. Thandaza kuYehova, uqinisekile ukuba unokukunika ubulumko obuya kukunceda unyamezele iimvavanyo. (Funda uYakobi 1:5-8.) UThixo uyazazi izinto ezikukhathazayo yaye unokukukhokela aze akuthuthuzele ngomoya wakhe oyingcwele. Phalaza imbilini yakho kuye unokholo ‘ungathandabuzi konke konke,’ uvume ukukhokelwa ngumoya wakhe uze wamkele nesiluleko seLizwi lakhe.
14, 15. Kutheni sinokuthi uHana wathandaza waza wabonisa ukholo?
14 UHana, omnye wabafazi ababini bakaElikana owayengumLevi, wathandaza waza wabonisa ukholo. Ekubeni wayengenabantwana, uHana wayegculelwa nguPenina, owayengomnye umfazi wendoda yakhe nowayenabantwana abaninzi. Emnqubeni, uHana wenza isifungo sokuba, xa enokuzala unyana, uya kumnika uYehova. Kuba imilebe yakhe yayibebezela ngoxa ethandaza, uMbingeleli Omkhulu uEli wacinga ukuba uHana unxilile. Akuba eqondile ukuba akanxilanga, wathi: “Ngamana uThixo kaSirayeli angenza ngokwesibongozo sakho.” Nangona uHana wayengazi ukuba kuza kwenzeka ntoni, wayenokholo lokuba umthandazo wakhe uza kuphendulwa. Ngenxa yoko, ‘ubuso bakhe abuzange bube saba bobuxhalabileyo.’ Wayeka ukuba buhlungu nokudakumba.—1 Sam. 1:9-18.
15 Emva kokuzalwa nokulunyulwa kukaSamuweli, uHana wamsa emnqubeni ukuze anikele inkonzo engcwele kuYehova. (1 Sam. 1:19-28) Ukucamngca ngomthandazo kaHana kunokwenza imithandazo yakho ibe nentsingiselo, kuze kukuncede ubone ukuba xa uthandaza kuYehova unokholo lokuba uya kukuphendula, iya kutshw’ ithi qabu intlungu ebangelwa ziingxaki onazo.—1 Sam. 2:1-10.
16, 17. Yintoni eyenzekayo emva kokuba uNehemiya ethandaze ngokholo?
16 UNehemiya olilungisa owayephila ngenkulungwane yesihlanu ngaphambi kweXesha Eliqhelekileyo wathandaza waza wabonisa ukholo. Wabongoza wathi: “Awu, Yehova, nceda, indlebe yakho mayiwuphulaphule umthandazo womkhonzi wakho nomthandazo wabakhonzi bakho abayoliswayo kukoyika igama lakho; kwaye, nceda, mnike impumelelo umkhonzi wakho namhlanje uze umenze asizeleke phambi kwale ndoda.” Yayingubani ‘le ndoda’? YayinguKumkani uArtashashta wasePersi, yaye uNehemiya wayengumngcamli wakhe.—Neh. 1:11.
17 UNehemiya wathandaza enokholo kangangeentsuku ezininzi emva kokuva ukuba amaYuda awayekhululwe kubukhoboka baseBhabhiloni ‘ayekwishwangusha elikhulu nakungcikivo nokuba udonga lwaseYerusalem ludiliziwe.’ (Neh. 1:3, 4) Imithandazo kaNehemiya yaphendulwa ngendlela awayengayilindelanga kuba uKumkani uArtashashta wamvumela ukuba aye kwakha iindonga zeYerusalem. (Neh. 2:1-8) Iindonga zaseYerusalem zakhiwa ngokukhawuleza. Imithandazo kaNehemiya yaphendulwa kuba wayethandazela unqulo oluyinyaniso yaye ethandaza enokholo. Ngaba neyakho imithandazo injalo?
Musa Ukulibala Ukudumisa Nokubulela UYehova
18, 19. Ziziphi izizathu umkhonzi kaYehova anokumdumisa aze ambulele ngazo?
18 Xa uthandaza musa ukulibala ukudumisa nokubulela uYehova. Zininzi izinto esinokumbulela ngazo! Ngokomzekelo, uDavide wayekuthanda ukudumisa ubukumkani bukaYehova. (Funda iNdumiso 145:10-13.) Ngaba imithandazo yakho iyabonisa ukuba uyalixabisa ilungelo lokuvakalisa uBukumkani bukaYehova? Amazwi omdumisi anokukunceda ukuba ukwazi ukuvakalisa uxabiso onalo kuThixo ngeentlanganiso, iindibano ezincinane nezinkulu zamaKristu.—INdu. 27:4; 122:1.
19 Unokuvakalisa umbulelo onawo ngolwalamano oluxabisekileyo lwakho noThixo ngokwenza umthandazo ofana nalo: “Ndiya kukubonga phakathi kwezizwana, Yehova; ndiya kukuculela uncuthu lwengoma phakathi kwamaqela eentlanga. Kuba ububele bakho bothando bukhulu ukusa emazulwini, nenyaniso yakho ifikelela esibhakabhakeni. Phakanyiswa ngaphezu kwamazulu, Thixo; uzuko lwakho malube ngaphezu komhlaba wonke.” (INdu. 57:9-11) Achukumisa ngokwenene loo mazwi! Ngaba akuvumi ukuba la mazwi achukumisayo eeNdumiso anokwenza imithandazo yakho ibe nentsingiselo?
Mbongoze Ngentlonelo UThixo
20. UMariya wakubonakalisa njani ukuzinikela kuThixo?
20 Simele sibonakalise ukuba siyamhlonela uThixo xa sithandaza. Amazwi entlonelo kaMariya emva kokuba evile ukuba uza kuba ngunina kaMesiya ayafana nalawo kaHana xa wayenikela ngoSamuweli oselula ukuba aye kukhonza emnqubeni. Intlonelo awayenayo uMariya ngoThixo ivakala kula mazwi akhe: “Umphefumlo wam umenza mkhulu uYehova, nomoya wam awunakungavuyi ngokugqithiseleyo ngoThixo uMsindisi wam.” (Luka 1:46, 47) Ngaba unokusebenzisa amazwi anjengala ukuze neyakho imithandazo ibe nentsingiselo? Akumangalisi ukuba uMariya ohlonela uThixo wakhethwa ukuba abe ngunina kaYesu onguMesiya!
21. Imithandazo kaYesu yabonisa njani ukuba wayenentlonelo nokholo kuThixo?
21 UYesu wathandaza ngentlonelo yaye enokholo. Ngokomzekelo, ngaphambi kokuba avuse uLazaro “uYesu wawaphakamisela ezulwini amehlo akhe waza wathi: ‘Bawo, ndiyakubulela ngokuba uye wandiva. Enyanisweni, bendisazi ukuba usoloko undiva.’” (Yoh. 11:41, 42) Ngaba nawe uthandaza ngentlonelo enjalo yaye unokholo? Xa ufunda umthandazo kaYesu ongumzekelo uya kuphawula ukuba eyona nto iphambili kuwo kukungcwaliswa kwegama likaYehova, ukufika koBukumkani bakhe nokwenziwa kokuthanda kwakhe. (Mat. 6:9, 10) Khawucinge ngeyakho imithandazo. Ngaba ibonisa umdla onawo ngoBukumkani bukaYehova, ukwenziwa kokuthanda kwakhe nokungcwaliswa kwegama lakhe elingcwele? Imele ibe njalo.
22. Kutheni unokuqiniseka ukuba uYehova uya kukunika inkalipho ukuze uvakalise iindaba ezilungileyo?
22 Ngenxa yentshutshiso nezinye izilingo, abantu abaninzi badla ngokucela uYehova ukuba abancede bamkhonze ngenkalipho. Xa iSanhedrin yayalela uPetros noYohane ukuba bayeke ‘ukufundisa ngesizinzi segama likaYesu,’ abo bapostile baba nenkalipho baza abavuma. (IZe. 4:18-20) Emva kokukhululwa kwabo, babalisela abanye abazalwana ngoko kwenzekileyo. Bonke abo babekho apho babongoza uThixo becela uncedo lokuba bathethe ilizwi ngenkalipho. Kumele ukuba bavuya kakhulu xa umthandazo wabo waphendulwayo, kuba “bazaliswa ngumoya oyingcwele kwaye babelithetha ngenkalipho ilizwi likaThixo”! (Funda iZenzo 4:24-31.) Ngenxa yoko, baninzi abantu ababa ngabakhonzi bakaYehova. Umthandazo wakho ungakomeleza ukuze uvakalise iindaba ezilungileyo ngenkalipho.
Qhubeka Usenza Imithandazo Yakho Ibe Nentsingiselo
23, 24. (a) Chaza imizekelo ebonisa ukuba ukufunda iBhayibhile kunokwenza imithandazo yakho ibe nentsingiselo. (b) Yintoni oya kuyenza ukuze imithandazo yakho ibe nentsingiselo?
23 Mininzi imizekelo esinokuyicaphula ebonisa ukuba ukufunda iBhayibhile kunokwenza imithandazo yakho ibe nentsingiselo. Ngokomzekelo xa uthandaza, njengoYona unokuvuma ukuba “lolukaYehova usindiso.” (Yona 2:1-10) Ukuba ukhathazekile ngenxa yesono esinzulu osenzileyo yaye ulucelile noncedo kubadala, umthandazo kaDavide unokukunceda xa usazisa uThixo ukuba uguqukile. (INdu. 51:1-12) Ngamanye amaxesha, xa uthandaza unokudumisa uYehova njengoYeremiya. (Yer. 32:16-19) Ukuba ufuna iqabane lomtshato, unokufunda umthandazo okuEzra isahluko 9, uze uthandaze kuThixo yaye oko kuya kukunceda ukuba uhlale umthobela uze ‘utshate kuphela eNkosini.’—1 Kor. 7:39; Ezra 9:6, 10-15.
24 Qhubeka ufunda yaye usenza uphando eBhayibhileni. Funa iingongoma onokuzisebenzisa kwimithandazo yakho. Usenokufumana iingcamango eziseZibhalweni onokuzisebenzisa kwimithandazo yakho yokubongoza, yokubulela neyokudumisa. Ngokuqinisekileyo, uya kusondela ngakumbi kuYehova uThixo njengoko ufunda iBhayibhile ukuze imithandazo yakho ibe nentsingiselo.
Ubuya Kuphendula Uthini?
• Kutheni sifanele sifune ukhokelo lukaThixo size silulandele?
• Kutheni sifanele sithandazele ubulumko?
• Incwadi yeeNdumiso inokuyenza njani imithandazo yethu ibe nentsingiselo?
• Kutheni sifanele sibe nokholo nentlonelo xa sithandaza?
[Umfanekiso okwiphepha 8]
Umkhonzi ka-Abraham wathandazela ukhokelo lukaThixo. Ngaba nawe uyaluthandazela?
[Umfanekiso okwiphepha 10]
Unqulo Lwentsapho lunokwenza imithandazo yakho ibe nentsingiselo