“Masibethe Nje Ithamo Libe Linye Kwakhona”

UALLEN waqalisa ukuba linxila xa wayeneminyaka eli-11 ubudala.a Wayedla ngokudlala ehlathini nabahlobo bakhe, belinganisa abantu ababebabona kwiimovies. UAllen nabahlobo bakhe babengalinganisi abantu bokwenene, kodwa ke bona utywala ababebusela babubobokwenene.

UTony wayeneminyaka engama-40 ubudala xa waqalisa ukusela iibhiya ezintlanu ukuya kwezintandathu endaweni yenye okanye ezimbini awayeqhele ukuzisela. Ekugqibeleni wayeka ukulibala inani leebhiya awayezisela ngemini.

UAllen wafuna uncedo lokuyeka utywala. UTony walukhaba ngawo omane uncedo lwabahlobo nentsapho. UAllen usadla amazimba nanamhla oku; kodwa ke uTony yena wafa kwingozi yemoto eyenzeka kwiminyaka edluleyo, emva kokuba eye wazinkcinkca ngotywala.

Naxa umntu ezinkcinkca yedwa ngotywala, imiphumo idla ngokuchaphazela nabanye abantu yaye izihlandlo ezininzi iphumela kwintlekele. Ukunxila kudla ngokuba ngunobangela wokuxhatshazwa kwabantu ngamazwi, emzimbeni, ukubethwa, ukubulawa, iingozi zemoto nezasemsebenzini kunye neengxaki ezininzi zempilo. Ukusebenzisa kakubi utywala kudla iibhiliyoni zeerandi nyaka ngamnye, singasathethi ke ngeengxaki okuzibangela abantu, iintsapho kunye nabantwana.

Nakuba kunjalo, iU.S. National Intitutes of Health ithi, “asinguye wonke umntu osela rhoqo onengxaki yokusebenzisa kakubi utywala, yaye abantu abanengxaki yotywala abaseli yonke imihla bonke.” Abantu abaninzi abangengomakhoboka otywala baye baqalisa ukusela kakhulu bengayiqondi loo nto. Abanye basela manqapha-nqapha kodwa ke bathi xa besela, basele iibhiya ezingaphezu kwezintlanu.

Ukuba ukhetha ukusela utywala, bobungakanani obuninzi kakhulu? Unokulazi njani ixesha lokwala ukusela “ithamo nje elinye kwakhona”? (IMizekeliso 23:29, 30, Contemporary English Version) Kula manqaku alandelayo siza kufunda izinto ezibalulekileyo ngalo mbandela.

[Umbhalo osemazantsi]