Ngaba Umhlaba Uza Kuphela?

“UKUPHELA kwehlabathi kusoloko kuboniswa kwiifilimu.” Watsho njalo umbhali wemihlathi uJohn Scalzi. Kutheni abantu benomdla kwiifilimu ezithetha ngesiphelo sehlabathi? UScalzi wathi: “Kungenxa yokuba zithetha ngento esiyoyikayo.” Ngaba nawe ucinga njalo? Ngaba sinazo izizathu ezibambekayo zokoyika indlela nexesha umhlaba—nezinto eziphila kuwo—eziza kupheliswa ngayo?

Phantse umhla nezolo, siva ngeentlekele zemvelo ezintlitha umhlaba. Le mifanekiso isoloko ivezwa kumabonwakude nakwi-Internet. Xa sibona imifanekiso yabantu neendawo ezitshatyalalisiweyo, kulula ukubona isiphelo sehlabathi njengento eza kwenzeka ngokwenene, kungekhona nje into eboniswa kwiifilimu.

Neenzululwazi ziphinda zigalele iparafini kulo mlilo ngokuthetha ngendlela onokuphela ngayo umhlaba. Ezinye zide zithelekelele nexesha oza kuphela ngalo. NgoMatshi 2008, iphephancwadi ekuthiwa yiMonthly Notices of the Royal Astronomical Society lathi izazi ngeenkwenkwezi ezibini ziqikelela ukuba kwiminyaka enokuba yi-7.59 bhiliyoni ezayo, ilanga liza kuwutshisa ube ngumphunga umhlaba.

Ngaba umhlaba uza kutshabalala ngenye imini?

Ngaba Lo Mhlaba Umiselwe Usuku Oza Kuphela Ngalo?

IBhayibhile isiqinisekisa isithi: “Izizukulwana ziyafika, izizukulwana ziyemka, kodwa lona ihlabathi limi ngonaphakade.” (INtshumayeli 1:4 iBhayibhile yesiXhosa yowe-1996) UYehova uThixo ‘wawuseka umhlaba phezu kweendawo omiswe kuzo’ yaye wawenza ngendlela yokuba ukwazi ukuhlala “ukusa kwixesha elingenammiselo, okanye nangonaphakade.” (INdumiso 104:5) Ngaba la mazwi kaThixo aphefumlelweyo avakala eyinto engenakwenzeka? Kutheni sifanele sikholelwe ukuba umhlaba wethu awuyi ndawo nakuba iinzululwazi zisithi uza kutshabalala?

Khawucinge ngezinto ezithengiswa evenkileni. Ezinye zezo zinto zidla ngokubhalwa usuku eziza konakala ngalo. Kodwa ke lumiselwa ngubani olo suku? Ngaba ngumnini venkile? Akunjalo? Olo suku lubekwa ngumenzi wazo. Siyaluthemba olo suku kuba umenzi wazo ngoyena uzaziyo izinto azenzileyo. Ngaba ke asimele simthembe nangakumbi uMenzi womhlaba? ILizwi lakhe litsho ngokucacileyo ukuba ‘uwuzinzise ngokuqinileyo umhlaba’ ukuze uqhubeke umi ngonaphakade. Awunalo usuku oza konakala ngalo—futhi awusoze ube nalo!—INdumiso 119:90.

Ngaba abantu abangakhathaliyo banokuwonakalisa umhlaba ukusa kwinqanaba lokuba kungabikho nto iphilayo kuwo? Unotshe! Ngokungafaniyo nabantu, uYehova “uyakwazi ukuzenza zonke izinto.” (Yobhi 42:2) Kungenxa yoko lento akwaziyo ukulikhupha litsole elokuba: ‘Ilizwi lam eliphuma emlonyeni wam liya. . . kuphumelela ngokuqinisekileyo.’ (Isaya 55:11) Sinokuqiniseka ukuba “uMenzi wethu” akayi kuvumela nantoni na ephazamisa injongo yakhe ngomhlaba. (INdumiso 95:6) Iyintoni loo njongo kwaye uza kuyizalisekisa njani uThixo?

UBukumkani BukaThixo Buza Kuphumeza Injongo Yakhe

Ukongezelela ekuqinisekiseni ukuba umhlaba awusayi kuze utshabalale, iLizwi likaThixo likwasixelela ukuba “wawubumba ukuba umiwe.” (Isaya 45:18) Injongo kaThixo ngomhlaba ayikazaliseki nangona abantu bebephila kuwo amawaka eminyaka.

UYehova ‘nguThixo onoyolo’ ‘nomthandi wokusesikweni.’ (1 Timoti 1:11; INdumiso 37:28) Ngoko ufuna ukuba bonke abantu bonwabe kuze kubekho okusesikweni. Ukuze aphumeze injongo yakhe ngabo, uThixo waxela kwangaphambili ukuba wayeza kumisela uBukumkani ezulwini obuza kulawula wonke umhlaba. (Daniyeli 2:44) UYesu wayesoloko ethetha ngorhulumente woBukumkani bukaThixo xa wayelapha emhlabeni. Wakhuthaza abafundi bakhe ukuba babuthandazele kuba wayezazi iintsikelelo ezaziza kuziswa buBukumkani emhlabeni. (Mateyu 6:9, 10; 24:14) Ziziphi ezinye zezo ntsikelelo?

▪ Kuya kubakho uxolo nonqabiseko kuba uThixo uthembisa ukuziphelisa zonke iimfazwe.—INdumiso 46:9.

▪ Kuza kubakho intabalala yokutya.—INdumiso 72:16.

▪ Unyango alusayi kuba yingxaki kuba “akukho mmi wakhona oya kuthi: ‘Ndiyagula.’”—Isaya 33:24.

▪ Akukho mntu uya kukhala kuba ‘akusayi kubakho kufa.’—ISityhilelo 21:4.

▪ UThixo uthembisa ukuba abantu bakhe baya kuzakhela izindlu zabo, bahlale ngonqabiseko baze ‘bonwabe ngonaphakade.’—Isaya 65:17-24.

Ngokuqinisekileyo uyakufuna ukuphila kwiimeko ezinje ngezi zichazwe ngasentla. UYehova uza kuzenza zonke izinto azithembisileyo. (Isaya 9:6, 7) Kodwa usenokuba uyabuza: ‘Sele kudlule amawaka eminyaka zabhalwayo ezi zithembiso zikaThixo eBhayibhileni. Kutheni zingekazaliseki nangoku?’

Umonde KaThixo Usikhokelela Kusindiso

Qiniseka ukuba “uYehova akacothi ngokuphathelele isithembiso sakhe.” IBhayibhile ithi uThixo ebeqhubana nathi ngomonde. Ngenxa yoko, sikhuthazwa ukuba ‘siwugqale umonde weNkosi yethu njengosindiso.’ (2 Petros 3:9, 15) Kutheni kufuneka uThixo abe nomonde ukuze sisindiswe?

Okokuqala, uThixo uyazi ukuba ngaphambi kokuba anike abantu abalungileyo ikhaya elinqabisekileyo, kuza kufuneka ‘onakalise abo bawonakalisayo umhlaba.’ (ISityhilelo 11:18) Noko ke, uYehova “akanqweneli ukuba kutshabalale nabani na” kuba uyabathanda abantu. Ngenxa yoko ubawo wethu wasezulwini ebezama ngomonde ‘ukulumkisa ongendawo endleleni yakhe engendawo.’ Loo nto uyenza ngokushunyayelwa kwesigidimi soBukumkani emhlabeni wonke.a (Hezekile 3:17, 18) Bonke abantu abaphulaphulayo xa uThixo ebalumkisa baze baphile ngemigaqo yakhe yobulungisa baya kusindiswa baze baphile ngonaphakade emhlabeni.

Guquka Ukhonze UThixo Ukuze Usindiswe

Ngokuqinisekileyo, iBhayibhile “ineendaba ezilungileyo.” (Mateyu 24:14) Ilizwi likaThixo elingasayi kuze lisilele liyasiqinisekisa ukuba umhlaba awusayi kuze uphele! Ukongezelela koko iziprofeto zeBhayibhile zisenza sibe nokholo lokuba “kusele ithutyana, angabikho ongendawo.” Kungekudala, ngabangamalungisa emehlweni kaThixo kuphela, abaya “kuwudla ilifa umhlaba, baziyolise ngokugqibeleleyo ngobuninzi boxolo.” (INdumiso 37:9-11, 29; Mateyu 5:5; ISityhilelo 21:3, 4) Kude kube lelo xesha, uThixo uza kuqhubeka ngomonde esithi: “Phethukelani kum nize nisindiswe, nonke nina baseziphelweni zomhlaba.” (Isaya 45:22) Wena uza kusabela njani?

Kutheni ungabuyeli kuThixo? INdumiso 37:34 isibongoza isithi: “Thembela ngoYehova ugcine indlela yakhe, uya kukuphakamisa uwudle ilifa umhlaba.” AmaNgqina kaYehova aya kukuvuyela ukukunceda ufunde okungakumbi ngenjongo kaThixo kanaphakade ngomhlaba nendlela ongakwazi ngayo ukuphila ude ubone loo njongo izaliseka.

[Umbhalo osemazantsi]

[Inkcazelo Ngomfanekiso okwiphepha 22]

NASA photo