Ngaba Ubusazi?

Zaziyintoni iimbopheleleko zenkulu, kwaye yayifumana waphi amalungelo?

▪ Ukususela kumaxesha oosolusapho, abakhonzi bakaThixo bebezinika amalungelo akhethekileyo iinkulu zabo. Kwakusithi xa kusifa uyise, inkulu ingene ezihlangwini zakhe njengentloko ntsapho. Yayinyamekela intsapho yayo ize ibe negunya phezu kwakhe wonke umntu owayehlala kwelo khaya. Yayiphinda imele intsapho kuThixo. Ngoxa bonke oonyana babesabelwa kwilifa, unyana wokuqala wayefumana eyona nxalenye inkulu. Ilifa lenkulu laliliphinda kabini elabanye oonyana.

Ngemihla yoosolusapho izibulo lalikhe liphulukane namalungelo obuzibulo balo. Ngokomzekelo uEsawu wathengisela umninawa wakhe ubuzibulo. (Genesis 25:30-34) UYakobi wawahlutha amalungelo obuzibulo kaRubhen waza wawanika uYosefu. Kaloku uRubhen akazange akwazi ukuziphatha laza ke lohluthwa eli lungelo. (1 Kronike 5:1) Noko ke, uMthetho kaMoses wawungayivumeli ukuba indoda ithathe amalungelo obuzibulo onyana womnye umfazi wayo iwanike unyana womnye kuba nje imthanda kakhulu. Uyise kwakufuneka awahlonele amalungelo obuzibulo onyana wakhe wokuqala.—Duteronomi 21:15-17.

Kwakutheni ukuze ababhali nabafarisi banxibe “amaqhaga aqulethe izibhalo”?

▪ UYesu wabagxeka ababhali nabafarisi ababemchasa kunqulo ngenxa yokuwenza banzi ‘amaqhaga [aqulethe izibhalo] ababewanxiba njengezikhuselo.’ (Mateyu 23:2, 5) Amalungu eli hlelo ayebophelela amaqhaga amnyama amancinane enziwe ngesikhumba emabunzini awo. Ayephinde awabophelele nasengalweni kufutshane nentliziyo. La maqhaga ayenezicatshulwa zeZibhalo. Lo mkhwa wokufaka la maqhaga wabangelwa kukuwutolika kwabantu ngokungqalileyo umyalelo uThixo awayewunike amaSirayeli esithi: “La mazwi ndikuyalela wona namhlanje amele abe sentliziyweni yakho. . . Uze uwabophe abe ngumqondiso esandleni sakho.” (Duteronomi 6:6-8) Alaziwa elona xesha aqala ngalo amaSirayeli ukunxiba la maqhaga kodwa abaphengululi abaninzi bacingela ukuba aqala ngenkulungwane yesithathu okanye yesibini Ngaphambi Kwexesha Eliqhelekileyo.

UYesu wayigxeka le nto ngenxa yezizathu ezibini. Okokuqala, ababhali nabafarisi babewenza makhulu ngabom la maqhaga ukuze baqhayise ngokholo lwabo kwabanye. Okwesibini, babecinga ukuba la maqhaga ayengamakhubalo okubakhusela. NgesiGrike kwakusithiwa ziiphylakterion, gama elo kwiincwadi ezingenanto yakwenza neBhayibhile laliguqulelwa kuthiwe “inqaba,” okanye “indlela yokuzikhusela.”