Amacebiso Asixhenxe Okukunceda Uqonde IBhayibhile

“IBhayibhile asiyoncwadi nje eye yathengwa ngaphezu kwazo zonke ezinye kodwa iseyeyona ncwadi ithengwa kakhulu nyaka ngamnye.”—IPHEPHANCWADI ITIME.

“Ndikhe ndiyifunde iBhayibhile kodwa ke iyandikruqula.”—UKEITH, IMVUMI YASENGILANI EDUMILEYO.

KUYAMANGALISA ukubona ukuba abantu abaninzi baneBhayibhile nangona kubonakala ukuba abazuzi kangako xa beyifunda. Kodwa ke abanye bayazixabisa izinto abazifunda eBhayibhileni. Ngokomzekelo, elinye ibhinqa ekuthiwa nguNancy lithi: “Ekubeni ndiye ndiqale ngokufunda iBhayibhile ndize ndicamngce ngayo ntsasa nganye, ndiziva ndinokukwazi ukumelana nayo nantoni na. Ukufunda iBhayibhile kuye kwandinceda kakhulu kuxinezeleko ebendinalo, ukudlula nayo nantoni na enye endiye ndayizama kule minyaka ingama-35 idluleyo.”

Kwanokuba akuzange ukhe uyifunde iBhayibhile, ngaba iyakumangalisa into yokuba iye yabanceda abanye? Ukuba uyayifunda iBhayibhile, ngaba ufuna ikuncede? Ukuba kunjalo, zama la macebiso asixhenxe akweli nqaku.

Icebiso 1—Funda Ngenjongo Efanelekileyo

◼ Unokusuka uyifunde iBhayibhile njengencwadi nje enamabali amnandi, kuba uziva unyanzelekile okanye kuba ucinga ukuba iza kukunceda kweli hlabathi lineengxaki. Kodwa ke, uya kungenelwa kukhulu ukuba uyifunda kuba ufuna ukwazi inyaniso ngoThixo. Ukongezelela koko, uya kuzuza lukhulu ukuba uyifunda kuba ufuna ukubona indlela enokukunceda ngayo iBhayibhile ebomini bakho.

IZibhalo zifanisa ukubaluleka kokufunda iBhayibhile ngentsusa efanelekileyo nokuzijonga esipilini: “Kuba lowo ulivayo ilizwi, aze angalenzi, unjengomntu okhangela ubuso bakhe bemvelo esipilini. Kuba uyazikhangela, aze akumka, alibale ngoko nangoko ukuba unjani na. Kodwa umntu oqondela kumthetho ogqibeleleyo wenkululeko, nalowo uzingisayo kuwo, yena lowo, ngenxa yokuba uye, akaba ngovayo aze alibale, kodwa waba ngumenzi womsebenzi, uya kuba noyolo ekuwenzeni kwakhe.”—Yakobi 1:23-25.

Indoda ekuthethwa ngayo kulo mzekelo yakhangela ubuso bayo esipilini yaza yangazilungisi. Mhlawumbi yazikrwaqula nje okanye yayingafuni kuzilungisa. Nathi asiyi kuzuza kangako kwiBhayibhile ukuba siyifunda manqapha-nqapha yaye asizenzi izinto esifundayo. Ngokwahlukileyo koko, sinokufumana ulonwabo lokwenene ukuba sifunda iBhayibhile ngenjongo yokuba ‘ngabenzi’ sivumele indlela uThixo acinga ngayo ilawule iingcinga nezenzo zethu.

Icebiso 2—Khetha Inguqulelo Ethembekileyo

◼ Kusenokuba kukho iinguqulelo zeBhayibhile ezininzi ngolwimi lwakho. Nangona zinokukunceda zonke iinguqulelo zeLizwi likaThixo, ezinye zisebenzisa amagama akudala okanye ulwimi lwezifundiswa osenokungaluqondi lula. (IZenzo 4:13) Ezinye iinguqulelo zeBhayibhile zide sitshintshe isigidimi seBhayibhile ngokuquka izithethe. Ngokomzekelo, njengoko siye sabona kumanqaku agabula izigcawu kweli phephancwadi, ezinye iinguqulelo ziye zalisusa igama likaThixo zaza endaweni yalo zasebenzisa izibizo ezifana nesithi “Thixo” okanye “Nkosi.” Xa ukhetha iBhayibhile oza kuyifunda khetha iBhayibhile eguqulelwe ngendlela echanileyo, ekulula ukuyiqonda nefundeka lula.

Izigidi zabantu ehlabathini jikelele ziye zafumanisa ukuba INguqulelo Yehlabathi Elitsha yenza kanye loo nto.a Khawuve amava ale ngwevu yaseBulgaria. Yaya enkonzweni yamaNgqina kaYehova yaza yanikwa INguqulelo Yehlabathi Elitsha. Emva koko yathi: “Ndiyifunde iminyaka emininzi iBhayibhile, kodwa andizange ndifunde inguqulelo eqondakala lula nefikelela intliziyo njengale.”

Icebiso 3—Thandaza

◼ Unokuyiqonda ngakumbi iBhayibhile ngokucela uncedo kuMbhali wayo, njengomdumisi owathi: “Vula amehlo am, ukuze ndikhangele kwizinto ezimangalisayo ezisemthethweni wakho.” (INdumiso 119:18) Thandaza kuThixo rhoqo ufunda iZibhalo, umcele ukuba akuncede uqonde iLizwi lakhe. Unokumbulela ngokuba eye wenza iBhayibhile kuba ukuba ibingekho besingenakuze simazi uThixo.—INdumiso 119:62.

Ngaba uThixo uyayiva imithandazo elolo hlobo? Khawucinge ngale nto yenzeka kula mantombazana mabini akwishumi elivisayo aseUruguay. Amangaliswa koko kuthethwa yiBhayibhile kuDaniyeli 2:44 baza bacela uThixo ukuba athumele umntu oza kubanceda baqonde loo vesi. Athi engekayivali iBhayibhile, kwafika amaNgqina amabini aza afunda kanye loo vesi awayecele ukuncedwa kuyo loo mantombazana, aza awachazela ukuba oorhulumente babantu baza kushenxiswa buBukumkani bukaThixo.b Aqiniseka ukuba uThixo wayewuphendule umthandazo wawo.

Icebiso 4—Yifunde Yonke Imihla

◼ Enye inkampani epapasha iincwadi ithi “kwantinga ukuthengwa kweBhayibhile emva kokuhlaselwa kweUnited States ngabagrogrisi ngoSeptemba 11, 2001. Abantu abaninzi babhenela kwiLizwi likaThixo kuphela ngamaxesha okubandezeleka. Kodwa ke iBhayibhile isikhuthaza ukuba siyifunde yonke imihla, kuba ithi: “Le ncwadi yomthetho ayifanele isuke emlonyeni wakho, yaye umele uyifunde ngesandi esiphantsi imini nobusuku, ukuze wenze ngenyameko ngokuvumelana nako konke oko kubhalwe kuyo; kuba ke ngoko uya kuyenza iphumelele indlela yakho wandule ke wenze ngobulumko.”—Yoshuwa 1:8.

Ukubaluleka kokuyifunda rhoqo iBhayibhile kunokufaniswa nomntu oye wahlaselwa yintliziyo waza waqonda ukuba kuza kufuneka atye ukutya okunesondlo. Ngaba olo hlobo lokutya bekuya kumnceda ukuba ukutya kuphela xa eziva egula? Akunjalo. Kufuneka asoloko esitya ukutya okunesondlo ukuze ahlale esempilweni. Ngendlela efanayo, ukufunda iBhayibhile rhoqo kuza kukunceda ‘uphumelele kwindlela yakho.’

Icebiso 5—Funda Ngeendlela Ezahlukeneyo

◼ Ukufunda iBhayibhile ukusuka kwiGenesis ukuya kwiSityhilelo kunokuba kuhle kodwa usenokufumanisa ezinye indlela zihlaziya. Nazi indlela ezimbalwa onokuzisebenzisa.

Funda ngomntu othile. Funda zonke izahluko okanye iincwadi zeBhayibhile ezithetha ngaloo mntu njengezi zilandelayo:

• UYosefu: Genesis 37-50.

• URute: Rute 1-3.

• UYesu: Mateyu 1-28; Marko 1-16; Luka 1-24; Yohane 1-21.c

Funda ngomxholo othile. Funda izibhalo ezinxibelelene nawo. Ngokomzekelo, phanda ngomthandazo uze emva koko ufunde iivesi zeBhayibhile ezithetha ngendlela esifanele sithandaze ngayo kunye neminye imithandazo eseBhayibhileni.d

Funda ngokuvakalayo. Unokuzuza lukhulu ngokuyifunda ngokuvakalayo iBhayibhile. (ISityhilelo 1:3) Nise nokuyifunda ngokuvakalayo njengentsapho, nise nokwabelana ngeevesi eniza kuzifunda okanye ngabalinganiswa. Abanye bayakuthanda ukuphulaphula iBhayibhile ngeteyiphu. Enye inkosikazi yathi: “Kwakunzima ukufunda iBhayibhile ngoko ndaqala ngokuyiphulaphula kwiteyiphu. Kodwa ngoku ndifumanisa ukuba iBhayibhile ibangela umdla kakhulu kuneencwadi zamabali.”

Icebiso 6—Camngca

◼ Ubomi bezi mini benza kungabi lula ukucamngca. Noko ke, kanye njengokuba kufuneka sikuhlafune ukutya ukuze sifumane izondlo, kufuneka sicamngce ngoko sikufunda eBhayibhileni ukuze isincede. Oku sikwenza ngokwenza impinda yaloo nto siyifundileyo engqondweni nangokuba sizibuze imibuzo enjengethi: ‘Ndifunde ntoni ngoYehova uThixo? Isebenza njani kum? Ndinokuyisebenzisa njani ukuze ndincede abanye?’

Ukucamngca ngezinto esizifunda eBhayibhileni kuzenza zisifikelele intliziyo kuze kwandise uvuyo esilufumanayo ngokufunda iLizwi likaThixo. INdumiso 119:97 ithi: “Hayi indlela endiwuthanda ngayo umthetho wakho! Imini le yonke ndiwuxhalabele.” Ukucamgca kwenza umdumisi wakwazi ukuxhalabela iZibhalo imini yonke. Kwamnceda wakuthanda oko wayekufunda.

Icebiso 7—Fumana Uncedo Lokuqonda IBhayibhile

◼ UThixo akalindelanga ukuba siyiqonde ngokwethu iBhayibhile. NeBhayibhile iyavuma ukuba ‘inezinto ezithile ekunzima ukuziqonda.’ (2 Petros 3:16) Incwadi yeZenzo ithetha ngegosa lomTiyopiya elalingayiqondi indawo elaliyifunda. UThixo wathumela omnye wabakhonzi bakhe ukuze ancede loo mTiyopiya yaye oko kwaphumela ekubeni le ndoda ‘ihambe inemihlali.’—IZenzo 8:26-39.

Nawe unokuzuza ngakumbi xa ufunda iBhayibhile ngokufuna uncedo lokuqonda oko ukufundayo. Cela amaNgqina kaYehova akulo ndawo uhlala kuyo okanye ubhalele kwidilesi ekwiphepha 4 yeli phephancwadi ukuze uqhutyelwe isifundo seBhayibhile sasimahla.

[Imibhalo esemazantsi]