Imibuzo Yabafundi . . .

Ngaba UThixo Unesiqalo?

▪ IBhayibhile ithi uThixo akanasiqalo kodwa ebesoloko ekho. Ewe kona kunzima ukuyiqonda into yokuba kuthiwe uThixo ebesoloko ekho, kodwa ke asifanele siyikhanyele.

Ngaba sifanele silindele ukuba sazi yonke into ngoThixo? Umpostile uPawulos wathi: “Hayi ubunzulu bobutyebi nobobulumko nobolwazi lukaThixo! Hayi indlela engaphengululeki ngayo imigwebo yakhe nendlela ezingalandeki ngayo iindlela zakhe!” (Roma 11:33) Iingqondo zethu azinakubuqonda ngokupheleleyo ubulumko nolwazi lukaThixo kanye njengokuba umntwana engenakuziqonda kakuhle zonke iindlela zomzali. La mazwi aphefumlelweyo kaPawulos, nangona ebhekisela ngokuyintloko kubulumko nenceba kaThixo, abonisa ukuba kukho izinto neendlela zikaYehova uThixo ezinzima kakhulu ukuba ziqondwe ziingqondo zethu. Kuyabonakala ukuba ukungabi nasiqalo kukaThixo yenye yazo. Sekunjalo, sinokuba nentembelo epheleleyo koko kufundiswa yiBhayibhile ngoThixo. Wathi uYesu malunga nemibhalo engcwele: “Ilizwi lakho liyinyaniso.”—Yohane 17:17.

Xa wayethandaza kuYehova uMoses wathi: “Ubusoloko unguThixo wena kwanini-nini ibe uya kuhlala unguye.” (INdumiso 90:2 The Holy Bible, New Century Version) Kule vesi uMoses uthi ubukho bukaYehova buquka iindlela ezimbini. Enye isingise kwixesha elizayo. UYehova “uphila ngonaphakade kanaphakade.” (ISityhilelo 4:10) Ngaloo ndlela uThixo uya kubakho ukusa ngonaphakade. Enye indlela isusela kwixesha elidluleyo. Ngamanye amazwi uThixo akazange adalwe okanye abe nesiqalo. Kunoko ubukho bukaThixo bususela kunaphakade.

Uninzi lwethu lukufumanisa kunzima ukuziqonda izinto ezingabonakaliyo. Kodwa maxa wambi kuye kufuneke siqonde izinto ezinzima njengokusebenza ngamanani. Amanani asenokunyuka okanye ehle ngokungapheliyo. Ngaba lo mzekelo awufani nobomi boMdali?

Kufanelekile ke ngoko ukuba ibe nguThixo kuphela obizwa ngokuba ‘nguKumkani kanaphakade.’ (1 Timoti 1:17) Khawufan’ ucinge nje: UYesu Kristu, izigidi zezithunywa ezisezulwini nabantu abasemhlabeni, bonke banesiqalo kuba badalwa. (Kolose 1:15, 16) Kodwa ke akunjalo ngoThixo. Ukuthi uThixo wadalwa akunangqiqo kuba kunokubangela ingxoxo-mpikiswano engenasicombululo yokufuna ukwazi ukuba wadalwa ngubani uMdali. NguYehova kuphela ‘obekho kwanini-nini.’ (INdumiso 90:2 IBhayibhile yesiXhosa yowe-1996) Loo nto ithetha ukuba uYehova ebekho “ukususela mhla-mnene.”—Yude 25.

Ukhumbule ukuba ukubakho kukaThixo ngonaphakade akuthethi kuthi akanazimvakalelo. Umthandazo kaMoses ubonisa ukuba ukubakho kukaThixo ngonaphakade kuqinisekisa isithembiso sokuba nathi siza kuphila ngonaphakade. Ngokwahlukileyo kubomi esibuphilayo ngoku obungumphunga, uThixo uchazwa ‘njengendawo yethu yokuhlala yokwenene ebudeni bezizukulwana ngezizukulwana.’ NjengoBawo onothando, uYehova ebesoloko ekho, ukho yaye uza kuqhubeka ekho ngenxa yabantu bakhe. Ngamana ungathuthuzelwa yile nyaniso!—INdumiso 90:1.