Ngaba Uyakhumbula?

Ngaba uye wakuvuyela ukufunda iiMboniselo zakutshanje? Khawubone ukuba unokuyiphendula kusina na le mibuzo ilandelayo:

• Yintoni enokukunceda ukuze ukhulise abantwana bakho kakuhle?

‘Bekela umntwana wakho umzekelo’ ukuze aziphathe kakuhle. (Yoh. 13:15) Musa ukulindela okungaphaya kwamandla akhe; njengoko ekhula unokulindela ukuba aphucule kwizinto ezifana nokucoceka, ukugcina ixesha nokwenza umsebenzi wesikolo. Ukuze umntwana wakho akwazi ukwenza imisebenzi yakhe kakuhle, mnike imiyalelo ecacileyo.—5/1, iphepha 19-20.

• Kwakutheni ukuze uThixo angamohlwayi uAron ngokwenza ithole legolide?

UAron wawaphula umthetho kaThixo ophathelele unqulo-zithixo. (Eks. 20:3-5) Kodwa uMoses wenza isikhungo kuThixo ngenxa ka-Aron, yaye saba ‘namandla amakhulu.’ (Yak. 5:16) UAron wayethembekile iminyaka emininzi. Nangona abantu bacenga uAron ukuba abenzele ithole legolide, kamva wazibonakalisa ukuba wayengahambisani nabo, kuba yena nabo bonke oonyana bakaLevi bema baqina ngakwicala likaYehova. (Eks. 32:25-29)—5/15, iphepha 21.

• Yayindawoni iOfire ethi iBhayibhile kwakufumaneka igolide kuyo?

USolomon wakha iinqanawa e-Etsiyon-gebhere, ezaziza kulanda igolide eOfire. (1 Kum. 9:26-28) Eli yayilelona zibuko likhulu kwiGophe laseAqaba elikufuphi ne-Elat neAqaba yanamhlanje, ekuLwandle Olubomvu. Ngoko, kusenokwenzeka ukuba iOfire yayiseArabhiya kufuphi noLwandle Olubomvu okanye kunxweme lwaseAfrika okanye lwaseIndiya.—6/1, iphepha 15.

• ‘Ibhalsam yaseGiliyadi’ ibhekisela entwenini? (Yer. 8:22)

Ioli yebhalsam yayiyioli enuka kamnandi eyayivela kwizityalo ezahlukahlukeneyo, enye yeendawo eyayifumaneka kuzo yiGiliyadi eyayikwimpuma yoMlambo weYordan. Kuba yayiphilisa, yayithanjiswa ezilondeni. Imeko elusizi awayekuyo amaSirayeli yayifanele iwenze afune unyango, kodwa awazange alufune. (Yer. 8:9)—6/1, iphepha 21-22.

• Yintoni enokunceda umKristu xa iqabane lakhe liye lakrexeza?

Ukuba iqabane elimsulwa liphila ngokuvisisana nemigaqo eseBhayibhileni, akukho mfuneko yokuba lizive linetyala ngenxa yeqabane lalo eliye lakrexeza. UThixo uyazi ukuba lifuna intuthuzelo nokhuthazo. Unokusebenzisa amanye amaKristu ukuze alithuthuzele.—6/15, iphepha 30-31.

• Yintoni onokuyenza ukuze uncede umntu ogulayo?

Phulaphula kakuhle. (INtshu. 3:1, 7) Yiba novelwano uze umcingele. (Roma 12:15) Mkhuthaze yaye umncede. (Kol. 4:6; 1 Yoh. 3:18) Hlala usondele kuye. (IMize. 17:17)—7/1, iphepha 10-13.

• Sazi njani ukuba uThixo akazange abe nasiqalo?

Kumthandazo wakhe, uMoses wabonisa ukuba akazange abe nasiqalo. (INdu. 90:2) Ngenxa yoko, uYehova ubizwa ngokuba ‘nguKumkani kanaphakade.’ (1 Tim. 1:17)—7/1, iphepha 28.

• Unokubanceda njani abantwana bakho bathande ukufunda?

Xa ubathanda abantwana bakho uze umisele umzekelo omhle, unokubenza bakuthande ukufunda. Bafunele iincwadi. Funda ngokuvakalayo. Bakhuthaze babe nenxaxheba uze uncokole nabo ngoko ukufundayo. Bakhuthaze ukuba bafunde ngoxa wena uphulaphule uze ubakhuthaze nokuba babuze imibuzo.—7/15, iphepha 26.

• Kwakutheni ukuze uYesu angakhawulezi ukuya kuphilisa uLazaro, umhlobo wakhe owayegula?

Ekufikeni kukaYesu, uLazaro wayesele eneentsuku ezine efile. Oku kwamnceda uYesu ukuba akwazi ukunikela ubungqina ngoYise. Ngenxa yoko, abaninzi baba ngamakholwa. (Yoh. 11:45)—8/1, iphepha 14-15.

• Zaziyintoni ‘iindawo eziphakamileyo’?

Yayiziinduli okanye ezinye iindawo ezazisetyenziselwa unqulo lobuxoki. Maxa wambi, kwakumiswa izibingelelo, iintsika okanye izibonda ezingcwele neminye imihombiso yonqulo kwezi ndawo ukuze kwenziwe izinto ezazicekiswa nguThixo. (Num. 33:52)—8/1, iphepha 23.