UThixo “Ngumenzi Wezinto Ezinkulu”—Indlela Endayazi Ngayo Loo Nto

Kubalisa uMaurice Raj

Intsapho yakowethu kunye namawaka ezinye iimbacu asaba ngexesha leMfazwe Yehlabathi II. Sachitha iintsuku sihamba kumahlathi ashinyeneyo eBurmese, silala ematyholweni ebusuku. Ndandineminyaka eli-9 ubudala. Zonke iimpahla zam ndandizithwele emqolo. Kwakungekabi phi.

YAYINGUNYAKA we-1942. Yayilixesha lemfazwe yaye sasisaba imikhosi yaseJapan. Yayisandul’ ukuhlasela iBurma, eyaziwa ngokuba yiMyanmar namhlanje, kwaye yayisele ithimbe umzi-mveliso weoli waseYenangyaung. Ngaphambi kokuba sifike kumda waseIndiya, amajoni aseJapan asinyanzela ukuba sibuyele emakhaya.

Xa ndandisengumntwana sasihlala eYenangyaung, apho utata wayesebenza kumzi weoli waseBurmah. Emva kokuba iYenangyaung ithinjwe ngamaJapan, amaBritani ayesoloko eyidubula ngeziqhushumbisi. Ngesinye isihlandlo intsapho yakowethu yazimela emngxunyeni iintsuku ezintathu njengoko kwakudubula iziqhushumbisi yonke indawo. Ekugqibeleni sasaba ngephenyane saya eSale, idolophu encinane engakuMlambo iAyeyarwady okanye iIrrawaddy. Sasivuyiswa kukuba sisaphila, ngoko sahlala apho de yaphela imfazwe.

Intlekele Ikhokelela Kwinyaniso

Umninawa wam wazalwa ngowe-1945, unyaka eyaphela ngawo iMfazwe Yehlabathi II. Utata wayevuya kakhulu kuba efumene umntwana ebudaleni bakhe. Kodwa akazange avuye ixesha elide. Emva kweenyanga ezintathu umntakwethu wasweleka. UTata waba buhlungu gqitha yaye akuzange kube kudala emva koko wasweleka.

Abahlobo bazama ukundithuthuzela besithi utata nomntakwethu bathathwe nguThixo ukuze abe nabo ezulwini. Ndandikulangazelela ngokwenene ukuba kunye nabo. Intsapho yakowethu yayihamba icawa yamaKatolika apho ndaqala khona ukufundiswa ngonqulo. Ndandifundiswe ukuba xa abefundisi noonongendi besifa baya ngqo ezulwini ngoxa abanye kufuneka balinde kwindawo yentlambululo miphefumlo apho bangcungcutheka khona belinde ukuhlanjululwa. Ekubeni ndandifuna ukudibana notata nomntakwethu, ndagqiba kwelokuba ndiye kufunda kwisikolo samaKatolika sokuqeqesha abefundisi eMaymyo, ngoku ebizwa ngokuba yiPyin Oo Lwin ekumgama oziikhilomitha ezingama-210 ukusuka kwindawo esasihlala kuyo.

Ukuze ukwazi ukungena kwesi sikolo kwakufuneka upase kakuhle esikolweni. Ekubeni ndandiyimbacu, ndaya esikolweni iminyaka emibini kuphela. Ngexesha lemfazwe zonke izikolo zazivaliwe. Nangona izikolo zaphinda zavulwa, intsapho yakowethu yayingenamali. Umama wayenganyamekeli mna nabantakwethu ababini kuphela, kodwa wayenyamekela nabantwana abathathu bodadewabo owayengasekho. Thina makhwenkwe kwanyanzeleka ukuba siyeke esikolweni.

Umkhuluwa wam wahamba waya kusebenza, kodwa mna ndandineminyaka eli-13 kuphela ubudala yaye ayikho into endandinokuyenza. Umninawa katata uManuel Nathan wayehlala eChauk, idolophu eyayikufutshane neSale. Ndacinga, ‘Ukuba ndiyemka ekhaya, loo nto iya kubaphungulela umthwalo.’ Ngenxa yoko ndaya kuhlala notat’ omncinci eChauk.

Ndandingazi ukuba utat’ omncinci wayesandul’ ukudibana namaNgqina kaYehova yaye wayekulangazelela ukufundisa abanye. Wayendifundisa ngokuthe ngcembe, waqala ngokufundisa intsingiselo kaBawo Wethu osezulwini. Uqala ngamazwi athi: “Bawo wethu osemazulwini, malingcwaliswe igama lakho.”—Mateyu 6:9, 10.

Utat’ omncinci wathi: “UThixo unegama yaye elo gama nguYehova.” Emva koko wandibonisa igama likaThixo eBhayibhileni. Ndandifuna ukufunda okungakumbi. Kodwa ndandingakwazi ukufunda kakuhle nditsho nolwimi lwam isiTamil yaye iBhayibhile katat’ omncinci neencwadi zakhe ezisekelwe eBhayibhileni zazibhalwe ngesiNgesi, ulwimi endandingalwazi kakuhle. Nangona ndandingenamfundo ibhekele phi, ekugqibeleni ndaziqonda iimfundiso zeBhayibhile. (Mateyu 11:25, 26) Ndaqonda ukuba iimfundiso ezininzi endandizifundisiwe zazingasekelwanga kwiBhayibhile. Ekugqibeleni ndathi kutat’ omncinci, “Yinyaniso le!”

Xa ndandineminyaka eli-16 ubudala ndaqalisa ukuchazela abanye izinto endizifundileyo. Ngelo xesha amaNgqina kaYehova eMyanmar ayengama-77 kuphela. Akuzange kube kudala, uRobert Kirk, iNgqina likaYehova elingumthunywa wevangeli watyelela utat’ omncinci eChauk, esuka kwisixeko saseRangoon ngoku ekuthiwa yiYangon. Ndaxelela uRobert ukuba ndizinikele kuYehova. NgoDisemba 24, 1949, ndabhaptizwa kuMlambo iAyeyarwady ndibonakalisa ukuzinikela kwam kuThixo.

Ukoyisa Imiqobo

Ngokukhawuleza emva koko ndafudukela eMandalay ukuze ndifumane umsebenzi ofanelekileyo. Ndandifuna ukuba nguvulindlela, igama abizwa ngalo amaNgqina kaYehova ashumayela ngokusisigxina. Ngenye imini xa ndandibukele umdlalo webhola, ndawa ndaza ndaxhuzula. Ndaqaliswa sisifo sokuxhuzula yaye ngenxa yaso kwanyanzeleka ukuba ndibuyele ekhaya ukuze intsapho yakowethu indinyamekele.

Esi sifo sasimana ukundibamba size siphinde sindiyeke kangangeminyaka esibhozo. Xa ndiye ndachacha ndandikwazi ukusebenza. Nangona uMama wayengandikhuthazi ukuba ndenze lo msebenzi wokushumayela ngenxa yempilo yam, ngenye imini ndathi kuye: “Andisafuni ukuyibekel’ amangomso le nto. Ndifuna ukuba nguvulindlela. UYehova uza kundinyamekela.”

Ngowe-1957, ndafudukela eYangon ndaza ndaba nguvulindlela. Into eyandothusayo kukuba andizange ndiphinde ndixhuzule de kwaba ngowe-2007, emva kweminyaka engama-50. Ngoku ndincedwa ngamayeza. Ngowe-1958, ndamiselwa njengovulindlela okhethekileyo nto leyo eyayithetha ukuba ndimele ndishumayele iiyure ezili-150 ngenyanga.

Ndaqala ndathunyelwa eKyonsha, ilali ekumgama weekhilomitha ezingama-110 emntla mpuma weYangon. Iqela elincinane labantu lalifunde iincwadi zethu yaye lalifuna ukwazi okungakumbi. Ukufika kwam noRobert, kwahlanganisana isihlwele esikhulu sabantu. Saphendula imibuzo emininzi yeBhayibhile saza sabonisa nendlela yokuqhuba inkonzo. Abanye babo bakhawuleza basithelela kumsebenzi wokushumayela. Ndacelwa ukuba ndihlale kuloo lali. Ngeenyanga nje ezingephi, elo qela lincinane laba libandla. Namhlanje, kukho amaNgqina kaYehova angaphezu kwe-150 kuloo ngingqi.

Kamva ndaye ndamiselwa ukuba ndityelele amabandla namaqela akwanti kulo lonke elaseMyanmar. Ndandikhwela ezilorini ndinqumla emahlathini, ndihamba ngamaphenyane yaye ndihamba ezintabeni. Nangona ndandibuthathaka, ndicinga ukuba uYehova wayendinika amandla ukuze ndiqhubeke.—Filipi 4:13.

“UYehova Uya Kukunceda”

Ngowe-1962, ndathunyelwa kwiofisi yesebe yamaNgqina kaYehova eYangon, apho uRobert wayendiqeqesha khona. Kungekudala abasemagunyeni babanik’ uphum’ aphele bonke abathunywa bevangeli eMyanmar yaye emva kweeveki ezimbalwa bahamba. Andizange ndikholelwe xa ndixelelwa ukuba ndongamele isebe.

Ndazibuza, ‘Ndiza kuwenza kanjani lo msebenzi? Andifundanga kwaye andinamava.’ Abazalwana abadala kunam bayibona inkxalabo yam baza bathi kum: “Musa ukukhathazeka, Maurice. UYehova uza kukunceda. Ibe nathi siza kukuncedisa.” Andomeleza kakhulu amazwi abo. Emva kweenyanga ezimbalwa kwakufuneka ndiqulunqe ingxelo yonyaka yomsebenzi wokushumayela eMyanmar kwiNcwadi Yonyaka YamaNgqina kaYehova yowe-1967. Kwiminyaka engama-38 eyalandelayo, bendisoloko ndiqulunqa le ncwadi yonyaka. Iziganeko ezazisenzeka zasibonisa ukuba umsebenzi wethu walathiswa nguYehova.

Ngokomzekelo xa ndafaka isicelo sokuba ngummi waseMyanmar, kodwa ndandingenayo i450 kyatsa eyayifuneka ukuze ndifumane iincwadi zokuba ngummi welo, ndathi makhe ndithi xhaa. Ngenye imini xa ndandidlula kwiofisi yenkampani endandikade ndisebenza kuyo, umphathi wam wandibona. Wandikhwaza wathi: “Raj, yiza kulanda imali yakho. Awuzange uyilande imali yomhlala phantsi ukuyeka kwakho ukusebenza.” Yayilingana ne450 kyats.

Njengoko ndandiphuma eofisini ndacinga ngezinto endandinokuzenza nge450 kyats. Kodwa ekubeni yayiyile mali kanye ndandiyifuna ukuze ndifumane iincwadi zokuba ngummi, ndagqiba ekubeni uYehova ufuna ndiyisebenzisele loo njongo. Eso sigqibo sandinceda. Ekubeni ndandingummi walapha, ndandinokuhlala, ndiye naphi na, ndiodole uncwadi ndize ndisingathe nezinye iimbopheleleko ezibalulekileyo kumsebenzi wokushumayela eMyanmar.

Indibano Yesithili Emntla

Ngowe-1969 umsebenzi wawusanda ngokukhawuleza kwidolophu yaseMyitkyina nasemantla eMyanmar, sagqiba ekubeni indibano yethu yesithili ibe kwesi sixeko. Noko ke, eyona ngxaki inkulu esasinayo, yayikukulungiselela izithuthi ukuze onke amaNgqina angezantsi eze. Sathandaza saza sacela amakhareji amathandathu kubaphathi bakaloliwe eMyanmar. Asizange sikholelwe sisakwamkelwa isicelo sethu.

Yathi ifika indibano yabe yonke into sele ilungile. Ngosuku ezazilindeleke ngalo iindwendwe, saya kwisikhululo sikaloliwe emini emaqanda, silindele ukuba uloliwe afike nge-2:30 emva kwemini. Sathi sisalindile safumana ucingo olwalusithi: “Awasafumaneki amakhareji amathandathu eWatch Tower Society.” Lwalusithi uloliwe akanakukwazi ukutsala amakhareji amathandathu eqhineni.

Sasiza kuthini? Saqala sacinga ngokutshintsha iintsuku zendibano. Kodwa loo nto yayiza kuthetha ukuba kwakuza kufuneka sicele amanye amaphepha mvume nto leyo eyayiza kuthabatha iiveki. Kanye xa sasibongoza uYehova, wagaleleka uloliwe. Asizange sikholelwe onke loo makhareji mathandathu ayenamaNgqina. Ayencumile ewangawangisa izandla. Sathi sakubuza ukuba kwenzeke ntoni elinye lawo lasixelela ukuba, “Akhona amakhareji abawaqhawulileyo kodwa asingawo la ethu.”

Phakathi kowe-1967 nowe-1971, inani lamaNgqina laphindaphindeka kabini eMyanmar amayela nama-600. Kwandula ke ngowe-1978 iofisi yesebe yafuduselwa kwisakhiwo esinemigangatho emibini. Emva kweminyaka engamashumi amabini inani lamaNgqina landa langaphezu kwama-2 500. Zaphinda zandiswa kwakhona izakhiwo zesebe, kwaza ngoJanuwari 22, 2000, uJohn E. Barr, olilungu leQumrhu Elilawulayo lamaNgqina kaYehova, weza evela eUnited States eze kunikela intetho yokunikezela iofisi enemigangatho emithathu nesakhiwo sokuhlala esisisebenzisayo namhlanje.

Ukukhangela Kwiintsikelelo Endiye Ndazifumana

Namhlanje, amatsha-ntliziyo angama-52 asebenza aze ahlale kwisebe laseYangon, yaye kukho amaNgqina amalunga nama-3 500 kumabandla namaqela angama-74 kulo lonke elo. Ndiyavuya kuba ngowe-1969, ngaphambi nje kokuba asweleke umama, waba liNgqina likaYehova.

UDoris Ba Aye, owayenguvulindlela, waba ngumguquleli kwiofisi yesebe phakathi kwiminyaka yee-1960. Ekuqaleni, kowe-1959, waya kwiSikolo seBhayibhile seWatchtower saseGiliyadi sama-32, sokuqeqesha abathunywa bevangeli abangamaNgqina kaYehova. Ekubeni wayemanz’ andonga, eliqharhaqharha kwaye emthanda ngokungazenzisiyo uThixo wandosela. Satshata ngowe-1970. Kude kube namhlanje, sisakhonza uYehova ngokuzibhokoxa yaye sisathandana.

Sele kuyiminyaka engaphezu kwama-60, ndibona isandla sikaThixo kumsebenzi wokushumayela owenziwa kweli lizwe. Eneneni mkhulu yaye ufanele kukudunyiswa. ‘Ngumenzi wezinto ezinkulu,’ njengoko ndiye ndazibonela loo nto.—INdumiso 106:21.

[Umbhalo osemazantsi]

[Umfanekiso okwiphepha 27]

Ndikumsebenzi wokushumayela, eRangoon, eBurma, malunga nowe-1957

[Umfanekiso okwiphepha 28]

Ndisiya kwinkonzo enkulu, eKaleymo, eBurma, ngasekupheleni kweminyaka yee-1970

[Umfanekiso okwiphepha 29]

Izakhiwo zethu ezitsha zesebe, ezandiswa ngowama-2000

[Umfanekiso okwiphepha 29]

Ndikunye noDoris namhla

[Umfanekiso okwiphepha 29]

Sisenza umsebenzi wokushumayela kunye