Funda KwiLizwi LikaThixo

Ngubani UThixo?

Eli nqaku libuza imibuzo ekunokwenzeka ukuba ukhe wazibuza yona lize likubonise iimpendulo zayo eBhayibhileni. AmaNgqina kaYehova aya kukuvuyela ukuthetha nawe ngeempendulo zale mibuzo.

1. Ngubani uThixo?

UThixo wenyaniso nguMdali wezinto zonke. IBhayibhile imbiza ngokuba “nguKumkani kanaphakade,” esi sibizo sithetha ukuba akanasiqalo nasiphelo. (ISityhilelo 15:3) Ekubeni uThixo enguMthombo wobomi, sifanele sinqule yena kuphela.—Funda ISityhilelo 4:11.

2. Unjani uThixo?

Akakho umntu owakhe wambona uThixo kuba unguMoya, loo nto ithetha ukuba wahlukile yaye ungaphezulu kwizidalwa ezisemhlabeni. (Yohane 1:18; 4:24) Ubuntu bukaThixo bubonakala kwindalo yakhe. Ngokomzekelo, xa sicamngca ngeziqhamo neentyatyambo azidalileyo, sibona uthando nobulumko bakhe. Ubukhulu bendalo yakhe busibonisa amandla kaThixo.—Funda amaRoma 1:20.

Sinokufunda okungakumbi ngobuntu bukaThixo eBhayibhileni. Ngomzekelo, isixelela ngezinto azithandayo uThixo nangazithandiyo, indlela aqhubana ngayo nabantu nendlela asabela ngayo kwiimeko ezahlukeneyo.—Funda INdumiso 103:7-10.

3. Ngaba uThixo unalo igama?

UYesu wathi: “Bawo wethu osemazulwini, malingcwaliswe igama lakho.” (Mateyu 6:9) Nangona uThixo enezibizo ezininzi, linye kuphela igama lakhe. Kulwimi ngalunye, libizwa ngendlela eyahlukileyo. NgesiXhosa sithi “Yehova.”—Funda INdumiso 83:18.

Igama likaThixo liye lasuswa kwiiBhayibhile ezininzi laza lathatyathelwa indawo ngamabinzana athi Nkosi okanye Thixo. Kodwa xa yayibhalwa iBhayibhile, igama likaThixo lalivela izihlandlo ezingama-7 000. UYesu walenza laziwa igama likaThixo ngokulisebenzisa xa wayethetha nabantu ngeLizwi likaThixo. Wabanceda abantu bamazi uThixo.—Funda uYohane 17:26.

4. Ngaba uYehova usikhathalele?

UYehova ubonisa ukuba nomdla kuthi ngokuphulaphula imithandazo yethu. (INdumiso 65:2) Ngaba ukubandezeleka okugqugqisileyo kubonisa ukuba uThixo akasikhathalelanga? Abanye abantu bathi uThixo usenza sibandezeleke kuba esivavanya, kodwa asiyonyani loo nto. IBhayibhile ithi: “Makube lee kuThixo oyinyaniso ukwenza ngobungendawo.”—Yobhi 34:10; funda uYakobi 1:13.

UThixo uvave abantu ngelungelo lokuzikhethela. Ngaba asiyixabisi inkululeko yokukwazi ukuzikhethela ukukhonza uThixo? (Yoshuwa 24:15) Abanye baye babandezeleka kuba beye bakhetha ukwenza izinto ezimbi. Uba buhlungu uYehova xa ebona ezo zinto.—Funda iGenesis 6:5, 6.

Kungekudala uYehova uza kusebenzisa uYesu ukuze aphelise ukubandezeleka nabo bakubangelayo. Okwangoku, uYehova unesizathu esihle sokubavumela abantu ukuba babandezeleke okwexeshana. Isifundo sokugqibela kula manqaku siza kuchaza isizathu sokuba uThixo evumele ukubandezeleka.—Funda uIsaya 11:4.

5. Yintoni afuna siyenze uThixo?

UYehova wasidala sakwazi ukufunda ngaye nokumthanda. Ufuna sifunde inyaniso ngaye. (1 Timoti 2:4) Ukuba sifunda iBhayibhile, sinokuba ngabahlobo bakaThixo.—Funda IMizekeliso 2:4, 5.

Ekubeni uYehova esinike ubomi, sifanele simthande kakhulu kunaye nabani na. Sinokumbonisa ukuba siyamthanda ngokuthetha naye emthandazweni nokumthobela. (IMizekeliso 15:8) UYehova ufuna sibaphathe ngothando abanye abantu.—Funda UMarko 12:29, 30; 1 Yohane 5:3.

Ukuze ufumane inkcazelo engakumbi, funda isahluko 1 sencwadi ethi, Yintoni Ngokwenene Efundiswa YiBhayibhile?, ipapashwe ngamaNgqina kaYehova.

[Umfanekiso okwiphepha 17]

Ngaba sikho isizathu esivakalayo sokuvumela ukubandezeleka okwexeshana?