Fundisa Abantwana Bakho
Wayethandwa NguThixo Nangabahlobo Bakhe
AKAKHO umntu olaziyo igama lakhe namhlanje. Waziwa kuphela ngegama likayise, uYafete. Makhe sifunde eBhayibhileni ukuba kuthiwani ngaba babini. Siza kubona ukuba intombi kaYafete yayithandwa nguThixo nangabahlobo bayo.
Singafunda ngoYafete nentombi yakhe kwincwadi yeBhayibhile yaBagwebi isahluko 11. Ekubeni uYafete wayengumkhonzi kaThixo othembekileyo, akuthandabuzeki ukuba wayethetha rhoqo nentombi yakhe ngeZibhalo.
UYafete wayephila ngaphambi kokuba abantu bakaThixo, amaSirayeli, bacele ukuba nokumkani ongumntu. UYafete wayeyindoda eyomeleleyo nekwaziyo ukulwa. AmaSirayeli amcela ukuba awakhokele xa ayesilwa nama-Amoni, uhlanga olwalungabamelwane bamaSirayeli olwalusoloko lusilwa nawo.
UYafete wayefuna uncedo lukaThixo ekoyiseni ama-Amoni, wenza isithembiso. UYafete wathi kuYehova ukuba umncedile woyisa, uya kunikela kuye ngaloo mntu uvele kuqala ukuza kumhlangabeza xa ebuyela kwakhe. Loo mntu wayeza kukhonza uThixo emnqubeni ubomi bakhe bonke—indawo awayenqulelwa kuyo uThixo ngezo mini. Ngaba uyazi ukuba ngubani oweza kumkhawulela kuqala?—a
Yayiyintombi kaYafete! UYafete waba buhlungu. Wayenomntwana omnye kuphela. Kodwa isithembiso awayesenze kuYehova kwakufuneka asigcine. Intombi yakhe yathi: “Bawo, ukuba uwuvulile umlomo wakho kuYehova, yenza kum ngokuvumelana noko kuphume emlonyeni wakho.” Yacela ukuba ikhe ibe yodwa iinyanga ezimbini ukuze iye ezintabeni iye kulila. Yintoni eyayiyenza ibe buhlungu? Kuba ngokuthobela isifungo esenziwe nguyise, yayingasoze itshate ibe nabantwana ubomi bayo bonke. Nakuba kunjalo, iminqweno yayo yayingayijongi njengeyona nto ibalulekileyo. Yayifuna ukuthobela uyise ize inyaniseke kuYehova. Ngaba ucinga ukuba yamvuyisa uYehova noyise?—
UYafete wayivumela intombi yakhe iye ezintabeni iinyanga ezimbini namanye amantombazana. Ukubuya kwayo, uyise waphumeza isifungo sakhe ngokuyithumela emnqubeni kaThixo eShilo ubomi bayo bonke. Minyaka le amantombazana akwaSirayeli ayesiya eShilo ukuze akhuthaze intombi kaYafete.
Ngaba bakho abantwana obaziyo abathobela abazali babo nabathanda uYehova?— Kungakuhle ukuba ubazi abo bantwana uze ube ngumhlobo wabo. Xa uxelisa intombi kaYafete uze uthobeke unyaniseke, uya kuba nabahlobo abalungileyo. Abazali bakho baya konwaba aze uYehova akuthande.
Funda EBhayibhileni Yakho
[Umbhalo osemazantsi]
a Ukuba ufunda nomntwana, isikhewu senzelwe ukuba umvumele aphendule.