Hlala Uphaphile, NjengoYeremiya
“[Mna Yehova] ndihleli ndiliphaphele ilizwi lam ukuze ndiliphumeze.”—YER. 1:12.
1, 2. Kutheni isibakala sokuba uYehova ‘ehlala ephaphile’ sinxibelelaniswa nomthi wom-amangile?
KWIINDULI zaseLebhanon nezakwaSirayeli, omnye wemithi yokuqala ukutyatyamba ngumthi wom-amangile. Iintyantyambo zawo ezintle ezipinki okanye ezimhlophe zibonakala ekupheleni kukaJanuwari okanye ekuqaleni kukaFebruwari. Igama lawo lesiHebhere lithetha “lowo uphaphileyo.”
2 Xa uYehova wamisela uYeremiya njengomprofeti wakhe, olu phawu lomthi wom-amangile lwasetyenziswa ngokufanelekileyo ukuze kucaciswe inkalo ebalulekileyo. Ekuqaleni kobulungiseleli bakhe, embonweni lo mprofeti waboniswa igatya lalo mthi. Lalithetha ntoni? UYehova wachaza esithi: “Ndihleli ndiliphaphele ilizwi lam ukuze ndiliphumeze.” (Yer. 1:11, 12) Kanye njengokuba umthi wom-amangile wawukhawuleza ‘uphaphe,’ noYehova ‘wayevuka ekuseni’ ngokomfuziselo ukuze athumele abaprofeti bakhe ukuba baye kulumkisa abantu bakhe ngemiphumo yokungamthobeli. (Yer. 7:25) Ibe wayengaphumli—‘ehlala ephaphile’—de isiprofeto sakhe sizaliseke. Ngowama-607 B.C.E., kanye ngexesha awayelimisele, umgwebo kaYehova walufikela uhlanga olwaluwexukile lwakwaYuda.
3. Yintoni esinokuqiniseka ngayo ngokuphathelele uYehova?
3 Nanamhlanje ke, uYehova uphaphile, ingqalelo yakhe isekwenzeni ukuthanda kwakhe. Akunakwenzeka ukuba angalizalisekisi ilizwi lakhe. Ingqalelo enikelwa nguYehova ikuchaphazela njani wena? Ngaba uyakholelwa ukuba ngalo nyaka wama-2011, uYehova ‘ukuphaphele’ ukuzaliseka kwezithembiso zakhe? Ukuba sinawo nawaphi na amathandabuzo ngezithembiso eziqinisekileyo zikaYehova, ngoku lixesha lokuba sivuke kubuthongo bokomoya. (Roma 13:11) Njengomprofeti kaYehova, uYeremiya wazigcina ephaphile. Ukuhlola indlela nesizathu sokuba uYeremiya ahlale ephaphile kwisabelo awayesinikwe nguThixo kuya kusinceda sibone indlela esinokuwukhuthalela ngayo umsebenzi esiwunikwe nguYehova.
Isigidimi Esingxamisekileyo
4. Luluphi ucelomngeni awajongana nalo uYeremiya xa wayedlulisela isigidimi sakhe, ibe yintoni eyasenza sangxamiseka?
4 Kusenokwenzeka ukuba uYeremiya wayeneminyaka engama-25 ubudala xa wathunywa nguYehova ukuba abe ngumlindi. (Yer. 1:1, 2) Kodwa wayezibona eyinkwenkwe nje, engakufanelekeli nokuthetha namadoda amakhulu olo hlanga, amadoda awayemadala ngeminyaka nawayenegunya. (Yer. 1:6) Kwakufuneka athethe amazwi ahlabayo kwaye avakalise imigwebo eyoyikekayo, ngokukodwa kubabingeleli, abaprofeti bobuxoki, nabalawuli, kunye nabo babehamba “kwikhondo elithandwayo” baza ‘bahlala bengathembekanga.’ (Yer. 6:13; 8:5, 6) Itempile ezukileyo kaKumkani uSolomon, eyayeyona ndawo ibalulekileyo kunqulo lwenene kangangeenkulungwane ezine, yayiza kutshatyalaliswa. IYerusalem nelakwaYuda zaziya kuphanziswa, baze abemi bazo bathinjwe. Kucacile ukuba isigidimi awayesithunyiwe uYeremiya sasingxamisekile!
5, 6. (a) UYehova ulusebenzisa njani udidi lukaYeremiya namhlanje? (b) Eli nqaku liza kunikela ingqalelo kwintoni?
5 Kule mihla, ngothando uYehova unike uluntu iqela lamaKristu athanjisiweyo ukuba libe ngumlindi womfuziselo ukuze lilumkise ngomgwebo wakhe kweli hlabathi. Kangangamashumi eminyaka, olu didi lukaYeremiya belubongoza abantu ukuba banikele ingqalelo kwixesha abaphila kulo. (Yer. 6:17) IBhayibhile igxininisa ukuba uYehova, uMgcini-xesha Ozukileyo, akazwabuluki xa esenza izinto. Imini yakhe iza kufika ngexesha, ngelixa abantu abangalilindelanga.—Zef. 3:8; Marko 13:33; 2 Pet. 3:9, 10.
6 Khumbula ukuba uYehova uphaphile kwaye uza kuzisa ihlabathi lakhe elitsha ngexesha elililo. Ukwazi oko kufanele kubakhuthaze abodidi lukaYeremiya kuze kuncede namahlakani abo azinikeleyo ukuba ahlale ekuphaphele ukungxamiseka kwesigidimi sawo. Ikuchaphazela njani loo nto? UYesu wabonisa ukuba wonke umntu kufuneka abumele uBukumkani bukaThixo. Makhe sixubushe iimpawu ezintathu ezanceda uYeremiya ukuba ahlale eluphaphele uthumo lwakhe neziya kusinceda nathi ukuba senjenjalo.
Ukuthanda Abantu
7. Chaza indlela uthando olwashukumisa ngayo uYeremiya ukuba ashumayele nangona wayejongene nobunzima.
7 Yintoni eyashukumisa uYeremiya ukuba ashumayele nangona kwakukho iingxaki? Wayebathanda abantu. UYeremiya wayesazi ukuba inkoliso yeengxaki ababenazo abantu zazibangelwa ngabalusi bobuxoki. (Yer. 23:1, 2) Ukwazi oko kwamnceda wenza umsebenzi wakhe ngothando nangemfesane. Wayefuna abantu bakowabo beve oko kuthethwa nguThixo baze baphile. Wayexhalabe kangangokuba walila xa wayecinga ngentlekele eyayiza kubahlela. (Funda uYeremiya 8:21; 9:1.) Incwadi yeZililo ilubonisa kakuhle uthando nenkxalabo enzulu awayenayo uYeremiya ngegama nangabantu bakaYehova. (IZili. 4:6, 9) Xa namhlanje ubona abantu ‘behlinzekile yaye belahliwe njengezimvu ezingenamalusi,’ ngaba akunqweneli kubaphathela iindaba ezithuthuzelayo zoBukumkani bukaThixo?—Mat. 9:36.
8. Yintoni ebonisa ukuba ukuphathwa kakubi kukaYeremiya akuzange kumenze abe krakra?
8 UYeremiya waphathwa kakubi kwangabo bantu wayenqwenela ukubanceda, kodwa akazange abuyis’ izitya okanye abe krakra. Wayezeka kade umsindo kwaye enobubele, kwanakuKumkani uZedekiya owayonakele! Emva kokuba uZedekiya emnikele ukuba abulawe, uYeremiya waqhubeka embongoza ukuba athobele iLizwi likaYehova. (Yer. 38:4, 5, 19, 20) Ngaba abantu sibathanda ngokunyanisekileyo njengoYeremiya?
Inkalipho Awayeyinikwe NguThixo
9. Sazi njani ukuba inkalipho uYeremiya awayenayo wayeyinikwe nguThixo?
9 Xa uYehova wathetha naye okokuqala, uYeremiya wazingxengxezela. Loo nto isifundisa ukuba inkalipho awayenayo yayingaphumi kuye. Kunoko, inkalipho ebalaseleyo eyaboniswa nguYeremiya ngoxa wayengumprofeti yayibangelwa kukuthembela kwakhe ngoThixo ngokupheleleyo. Eneneni, uYehova wayekunye nalo mprofeti “njengalowo unamandla ngokunkwantyisayo” kuba wamxhasa uYeremiya waza wamnika amandla okuphumeza isabelo sakhe. (Yer. 20:11) Ukwaziwa kukaYeremiya njengomntu onenkalipho kwabangela ukuba ebudeni bobulungiseleli bukaYesu basemhlabeni, bambi bacinge ukuba uYesu unguYeremiya ovusiweyo!—Mat. 16:13, 14.
10. Kutheni kunokuthiwa intsalela yabathanjiswa ‘iphezu kweentlanga naphezu kwezikumkani’?
10 ‘NjengoKumkani weentlanga,’ uYehova wathuma uYeremiya ukuba aye kuvakalisa isigidimi somgwebo kwiintlanga nakwizikumkani. (Yer. 10:6, 7) Kodwa intsalela yabathanjiswa ‘iphezu kweentlanga naphezu kwezikumkani’ ngayiphi ingqiqo? (Yer. 1:10) Njengalo mprofeti wamandulo, udidi lukaYeremiya lunikwe isabelo nguMongami wendalo iphela. Ngenxa yoko, abakhonzi bakaThixo abathanjisiweyo bagunyazisiwe ukuba bavakalise imigwebo nxamnye neentlanga nezikumkani. Ngegunya elilinikwe ngOyena Thixo Uphakamileyo, udidi lukaYeremiya luvakalisa ngolwimi olucacileyo lweLizwi lakhe eliphefumlelweyo ukuba iintlanga nezikumkani zanamhlanje ziya kuncothulwa zize zitshatyalaliswe ngexesha elifanelekileyo nangendlela ekhethwe nguye. (Yer. 18:7-10; ISityhi. 11:18) Udidi lukaYeremiya luzimisele ukuba lungaluyeki uthumo olulunikwe nguThixo lokuvakalisa imigwebo yakhe emhlabeni wonke.
11. Yintoni eya kusinceda siqhubeke sishumayela xa sijongene nobunzima?
11 Kuyinto eqhelekileyo ukudimazeka ngamaxesha athile xa sichaswa, abantu bengenamdla okanye kukho ubunzima obuthile. (2 Kor. 1:8) Kodwa masiqhubeke sisiya phambili njengoYeremiya. Masingatyhafi. Ngamana ngamnye wethu angaqhubeka ebongoza uThixo, esayama ngaye, yaye siqweba isibindi njengoko silindele ukuba asincede. (1 Tes. 2:2) Njengabanquli benene, simele siqhubeke siziphaphela iimbopheleleko esizinikwe nguThixo. Kufuneka sizimisele ukuqhubeka sishumayela ngokutshatyalaliswa kweNgqobhoko, okwafuziselwa kukutshatyalaliswa kweYerusalem. Udidi lukaYeremiya aluyi kwanela ukuvakalisa “unyaka wenkoliseko kaYehova” kuphela kodwa “nomhla wempindezelo kaThixo wethu.”—Isa. 61:1, 2; 2 Kor. 6:2.
Uvuyo Olusuka Entliziyweni
12. Kutheni sinokugqiba kwelokuba uYeremiya waqhubeka evuya, yaye yintoni esenza sitsho?
12 UYeremiya wayevuyiswa ngumsebenzi wakhe. Wathi kuYehova: “Amazwi akho afunyanwa, ndaza ndawadla; nelizwi lakho kum liba kukugcoba nemihlali yentliziyo yam; kuba ndibizwe ngegama lakho, Yehova.” (Yer. 15:16) Yayililungelo kuYeremiya ukumela uThixo wenene nokushumayela ilizwi lakhe. Okubangel’ umdla kukuba xa uYeremiya wanikel’ ingqalelo kugculelo lwabantu, wayeka ukuvuya. Wathi akujonga ubuhle nokubaluleka kwesigidimi sakhe, waphinda wavuya kwakhona.—Yer. 20:8, 9.
13. Kutheni ukuzondla ngeenyaniso ezinzulu zokomoya kubalulekile ukuze sihlale sivuya?
13 Ukuze sihlale sivuya kumsebenzi wokushumayela kule mihla, kufuneka sizondle ‘ngokutya okuqinileyo,’ iinyaniso ezinzulu zeLizwi likaThixo. (Heb. 5:14) Ufundisiso olunzulu lwakha ukholo. (Kol. 2:6, 7) Lwenza icace kuthi indlela izenzo zethu eziyichukumisa ngayo intliziyo kaYehova. Ukuba kunzima kuthi ukufumana ixesha lokufunda iBhayibhile, sifanele sihlole ucwangciso lwethu. Kwanemizuzu embalwa nje yokufunda nokucamngca suku ngalunye inokusenza sisondele ngakumbi kuYehova ize ibe negalelo ‘ekugcobeni nakwimihlali yentliziyo,’ njengakwimeko kaYeremiya.
14, 15. (a) Sisiphi isiqhamo esavela xa uYeremiya waqhubeka nothumo lwakhe ngokuthembeka? (b) Yintoni exatyiswa ngabantu bakaThixo namhlanje ngomsebenzi wokushumayela?
14 UYeremiya waqhubeka ezivakalisa izilumkiso nemigwebo kaYehova, kodwa entliziyweni yakhe wayecinga ngothumo awayelunikiwe lokuba ‘akhe nokuze atyale.’ (Yer. 1:10) Umsebenzi wakhe wokwakha nokutyala wavelisa iziqhamo. AmaYuda athile kunye nabanye ababengengomaSirayeli basinda xa kwakutshatyalaliswa iYerusalem ngowe-607 B.C.E. NjengamaRekabhi, uEbhedi-meleki noBharuki. (Yer. 35:19; 39:15-18; 43:5-7) Aba bahlobo bakaYeremiya banyanisekileyo nababemoyika uThixo bababonisa kakuhle abo banethemba lokuphila emhlabeni namhlanje ababa ngabahlobo bodidi lukaYeremiya. Udidi lukaYeremiya lukuvuyela kakhulu ukwakha esi “sihlwele esikhulu” ngokomoya. (ISityhi. 7:9) Ngendlela efanayo ke, la mahlakani anyanisekileyo abathanjiswa afumana ulwaneliseko olungathethekiyo ngokunceda abantu abanyanisekileyo ukuba bazi inyaniso.
15 Abantu bakaThixo bayaqonda ukuba ukushumayela iindaba ezilungileyo akuyonkonzo enikelwa kwabo bazivayo kuphela kodwa kukwasisenzo sokunqula uThixo wethu. Enoba siyaphulaphulwa okanye akunjalo, ukunikela inkonzo engcwele kuYehova ngokushumayela kusivuyisa kakhulu.—INdu. 71:23; funda eyabaseRoma 1:9.
‘Siphaphele’ Isabelo Sakho
16, 17. ISityhilelo 17:10 noHabhakuki 2:3 zibonisa njani ukuba ixesha lifinyele?
16 Isiprofeto esiphefumlelweyo esikwiSityhilelo 17:10 sibethelela ukuba ixesha esiphila kulo lifinyele. Ukumkani wesixhenxe, iGunya Lehlabathi LamaNgesi NamaMerika, ubekho kumhla wethu. Sifunda oku ngaye: ‘Xa igunya lehlabathi lesixhenxe lithe lafika limele lihlale ithuba elifutshane.’ Kodwa ke ngoku elo “thuba elifutshane” limele ukuba liya ngasekupheleni. Umprofeti uHabhakuki usiqinisekisa ngale nto xa ethetha ngesiphelo sale nkqubo yezinto: “Umbono usengowexesha elimisiweyo . . . Hlala uwulindile; kuba uya kuba yinyaniso nakanjani na. Awuyi kufika emva kwexesha.”—Hab. 2:3.
17 Zibuze: ‘Ngaba indlela endiphila ngayo ibonisa ukuba ixesha lifinyele? Ngaba indlela endiphila ngayo ibonisa ukuba ndilindele ukuba isiphelo sifike kungekudala? Okanye ngaba izigqibo endizenzayo nezinto eziza kuqala kum zibonisa ukuba andikasilindeli kwangoku isiphelo okanye andiqinisekanga nokuba siya kude sifike?’
18, 19. Kutheni eli ingeloxesha lakuzwabuluka?
18 Umsebenzi wodidi lomlindi awukapheli. (Funda uYeremiya 1:17-19.) Ivuyisa ngenene into yokuba intsalela yabathanjiswa ime ngxi, ‘njengentsika yentsimbi’ ‘nanjengesixeko esinqatyisiweyo’! ‘Ibhinqe inyaniso ezinqeni zayo’ kuba ivumela iLizwi likaThixo ukuba liyomeleze de ilufeze uthumo lwayo. (Efe. 6:14) Abesihlwele esikhulu bazimisele ngendlela efanayo ukuxhasa udidi lukaYeremiya ekwenzeni isabelo salo olusinikwe nguThixo.
19 Eli asiloxesha lakuzwabuluka kumsebenzi woBukumkani kodwa lelokuhlola ukubaluleka kukaYeremiya 12:5. (Mfunde.) Sonke sijongana nezilingo ekufuneka sizinyamezele. Ezi mvavanyo zokholo zinokufaniswa “namadoda ahamba ngeenyawo” esimele sibaleke nawo. Kodwa ke, njengoko “imbandezelo enkulu” isondela, sinokulindela ukuba ubunzima buye busanda. (Mat. 24:21) Ukujijisana neengxaki ezinkudlwana eziphambi kwethu kunokufaniswa nokubaleka “ugqatso namahashe.” Kufuna unyamezelo olungakumbi ukuze umntu abaleke namahashe agqabadulayo. Ngoko kuya kusinceda ukunyamezela izilingo esijongana nazo ngoku, ukuze zisiqeqeshele izinto eziseza kuza.
20. Yintoni ozimisele ukuyenza?
20 Sonke sinokumxelisa uYeremiya size sisiphumeze isabelo sethu sokushumayela! Iimpawu ezinjengothando, inkalipho novuyo zenza uYeremiya wabuphumeza ngokuthembeka ubulungiseleli bakhe obathatha iminyaka engama-67. Intyatyambo entle yom-amangile isikhumbuza ukuba uYehova uya ‘kuhlala eliphaphele’ ilizwi lakhe ukuze alizalisekise. Nathi ke sinesizathu esihle sokwenjenjalo. UYeremiya ‘wahlala ephaphile,’ ibe nathi sinokwenjenjalo.
Ngaba Usakhumbula?
• Uthando lwamnceda njani uYeremiya ukuba ‘ahlale eluphaphele’ uthumo lwakhe?
• Kutheni siyifuna inkalipho evela kuThixo?
• Yintoni eyanceda uYeremiya wahlala evuya?
• Kutheni ufuna ‘ukuhlala uphaphile’?
[Imifanekiso ekwiphepha 31]
Ngaba uza kuqhubeka ushumayela kwanokuba uyachaswa?