‘Hayi Ubunzulu Bobulumko BukaThixo!’
“Hayi ubunzulu bobutyebi nobobulumko nobolwazi lukaThixo! Hayi indlela engaphengululeki ngayo imigwebo yakhe nendlela ezingalandeki ngayo iindlela zakhe!”—ROMA 11:33.
1. Liliphi elona lungelo lakha lalikhulu analo amaKristu abhaptiziweyo?
LILIPHI elona lungelo likhulu owakha wavavwa ngalo? Ekuqaleni usenokucinga ngesabelo osifumene ebandleni okanye ngebhaso oye walifumana esikolweni okanye emsebenzini. Noko ke, kumaKristu abhaptiziweyo, elona lungelo lakha lalikhulu kukuvunyelwa ukuba sibe nolwalamano olusondeleyo nokuphela koThixo wenene, uYehova. Loo nto ibangele ukuba ‘saziwe nguye.’—1 Kor. 8:3; Gal. 4:9.
2. Kutheni ukwazi uYehova nokwaziwa nguye kulilungelo elikhulu kangaka?
2 Kutheni ukwazi uYehova nokwaziwa nguye kulilungelo elikhulu kangaka? Kungenxa yokuba akanelanga nje ukuba ngoyena Mntu mkhulu kwindalo iphela kodwa ukwanguMkhuseli wabo abathandayo. Umprofeti uNahum waphefumlelwa ukuba abhale athi: “UYehova ulungile, uligwiba ngemini yokubandezeleka. Yaye uyabazi abo bafuna kuye indawo yokusabela.” (Nah. 1:7; INdu. 1:6) Enyanisweni, kwaithemba lethu lobomi obungunaphakade lixhomekeke ekwazini kwethu uThixo wenene noNyana wakhe, uYesu Kristu.—Yoh. 17:3.
3. Yintoni ebandakanyekileyo ekwazini uThixo?
3 Ukwazi uYehova akupheleli nje ekwazini igama lakhe. Simele simazi njengoMhlobo, sazi izinto azithandayo nangazithandiyo. Xa siphila ubomi bethu ngokuvisisana nolo lwazi sibonisa ukuba simazi njengomhlobo wethu uThixo. (1 Yoh. 2:4) Kodwa ke kukho enye into efunekayo ukuba ngokwenene sifuna ukumazi uYehova. Kufuneka singapheleli nje ekwazini oko akwenzileyo kodwa sazi indlela nesizathu sokuba akwenze. Okukhona siziqonda iinjongo zikaYehova, kokukhona sinyanzeleka ukuba sibubone ‘ubunzulu bobulumko bukaThixo.’—Roma 11:33.
UYehova UnguThixo Onenjongo
4, 5. (a) Libhekisela entwenini igama elithi ‘injongo’ xa lisetyenziswa eBhayibhileni? (b) Yenza umzekelo wendlela injongo enokufikelelwa ngayo ngeendlela ezahlukeneyo.
4 UYehova nguThixo onenjongo, kwaye iBhayibhile ithetha ‘ngenjongo yakhe kanaphakade.’ (Efe. 3:10, 11) Lithetha ntoni eli binzana? Igama elithi ‘injongo,’ xa lisetyenziswa eBhayibhileni, lithetha usukelo olucacileyo, olunokufikelelwa ngeendlela ezahlukeneyo.
5 Ngokomzekelo: Umntu unokufuna ukuthatha uhambo oluya kwindawo ethile. Ukufika kuloo ndawo kuba lusukelo okanye injongo yakhe. Kusenokufuneka ukuba akhethe ukuba uza kuhamba ngantoni kwaye yiyiphi indlela aza kuhamba ngayo. Njengoko ehamba ngaloo ndlela ayikhethileyo, unokuthi engalindelanga aphazanyiswe yimozulu, ukulityaziswa bubuninzi beemoto endleleni, nokuvalwa kwendlela, kuze kufuneke ukuba asebenzise enye indlela. Ukanti, kungakhathaliseki ukuba luluphi utshintsho ekuye kwafuneka alwenze, uyalufikelela usukelo lwakhe xa efika kwindawo abesiya kuyo.
6. UYehova uye wabhetyebhetye njani ekuzalisekiseni injongo yakhe?
6 UYehova uye wabhetyebhetye ngendlela efanayo xa ephumeza injongo yakhe kanaphakade. Uye wakulungela ukutshintsha indlela yokufikelela injongo yakhe, ngenxa yelungelo lokuzikhethela ezinalo izidalwa zakhe ezikrelekrele. Ngokomzekelo, makhe sixubushe ngendlela uYehova ayiphumeza ngayo injongo yakhe ephathelele iMbewu ethenjisiweyo. Ekuqaleni, uYehova waxelela isibini sokuqala esingabantu oku: “Qhamani, nande, niwuzalise umhlaba nize niwoyise.” (Gen. 1:28) Ngaba loo njongo ayichazileyo yatshitshiswa yimvukelo eyenzeka kumyezo wase-Eden? Ngokuqinisekileyo akunjalo! Zisuka nje uYehova wasebenzisa enye “indlela” ukuze afikelele injongo yakhe. Waprofeta ngokuvela ‘kwembewu’ eyayiya kulungisa umonakalo owawenziwe ngabo bavukeli.—Gen. 3:15; Heb. 2:14-17; 1 Yoh. 3:8.
7. Yintoni esiyifundayo kwindlela uYehova azichaza ngayo kwiEksodus 3:14?
7 Ukukwazi kukaYehova ukuba bhetyebhetye xa ephumeza injongo yakhe kuvisisana nendlela awazichaza ngayo. Xa uMoses wachazela uYehova ngemiqobo yesabelo awayemnike sona, uYehova wamqinisekisa esithi: “‘Ndinguye lowo ndiya kuzingqina ndinguye.’ Waza wongezelela wathi: ‘Uze uthi koonyana bakaSirayeli, “Undinguye undithumile kuni.”’” (Eks. 3:14) Ewe, uYehova uyakwazi ukuba yiloo nto kufuneka abe yiyo ukuze aphumeze injongo yakhe ngokupheleleyo! Le nto icaciswa kakuhle ngumpostile uPawulos kwisahluko se-11 sencwadi yabaseRoma. Kwesi sahluko uthetha ngomnquma womfuziselo. Ukuhlola lo mzekeliso kuya kusenza sibuqonde yaye sibuxabise ngakumbi ubulumko bukaYehova, enoba sinethemba lokuphila ezulwini okanye elokufumana ubomi obungunaphakade apha emhlabeni.
Injongo KaYehova NgeMbewu Ekuprofetwe Ngayo
8, 9. (a) Ziziphi izibakala ezine eziya kusinceda siqonde umzekeliso womnquma? (b) Yimpendulo yawuphi umbuzo esibonisa indlela uYehova abhetyebhetye ngayo xa ezalisekisa injongo yakhe?
8 Ngaphambi kokuba siqonde umzekeliso womnquma, kufuneka sazi izibakala ezine zokuzaliseka kwenjongo kaYehova ephathelele imbewu ekuprofetwe ngayo. Okokuqala, uYehova wathembisa uAbraham ukuba ‘ngokuqinisekileyo zaziya kuzisikelela ngembewu yakhe, okanye ngenzala yakhe, zonke iintlanga zomhlaba.’ (Gen. 22:17, 18) Okwesibini, uhlanga lwakwaSirayeli olwaluvela kuAbraham lwathenjiswa ngokuvelisa “ubukumkani bababingeleli.” (Eks. 19:5, 6, IBhayibhile yesiXhosa.) Okwesithathu, xa inkoliso yamaSirayeli emvelo ingazange imamkele uMesiya, uYehova wathatha amanye amanyathelo ukuze avelise “ubukumkani bababingeleli.” (Mat. 21:43; Roma 9:27-29) Okokugqibela, nangona uYesu eyinxalenye ephambili ‘yembewu’ ka-Abraham, bakho nabanye abanelungelo lokuba yinxalenye ‘yembewu.’—Gal. 3:16, 29.
9 Ukongezelela kwezi zibakala zine, kwincwadi yeSityhilelo sifunda ukuba abantu abali-144 000 baya kulawula noYesu njengookumkani nababingeleli ezulwini. (ISityhi. 14:1-4) Nabo kuthiwa ‘ngoonyana bakaSirayeli.’ (ISityhi. 7:4-8) Kodwa ngaba bonke abali-144 000 bangamaSirayeli okanye amaYuda emvelo? Impendulo yalo mbuzo isibonisa indlela uYehova abhetyebhetye ngayo xa ezalisekisa injongo yakhe. Ngoku masibone indlela incwadi kampostile uPawulos eyayisiya kwabaseRoma esinceda ngayo sifumane impendulo.
“Ubukumkani Bababingeleli”
10. Yintoni eyayithenjiswe uhlanga lwakwaSirayeli kuphela?
10 Njengoko bekuchaziwe ngaphambili, yayiluhlanga lwakwaSirayeli lodwa olwaluthenjiswe ukuba babeya kuvela kulo abantu ababeza kuyila ‘ubukumkani bababingeleli nohlanga olungcwele.’ (Funda eyabaseRoma 9:4, 5.) Kodwa kwakuza kwenzeka ntoni xa kufika iMbewu ethenjisiweyo? Ngaba onke amaSirayeli okomoya ali-144 000 awayeza kuba yinxalenye yesibini yembewu ka-Abraham ayeza kuvela kumaSirayeli emvelo?
11, 12. (a) Kwaqala nini ukukhethwa kwabo babeza kuyila uBukumkani basezulwini, yaye yasabela njani inkoliso yamaYuda awayephila ngelo xesha? (b) UYehova walifikelela njani “inani elipheleleyo” labo babeza kuba yimbewu ka-Abraham?
11 Funda eyabaseRoma 11:7-10. Njengohlanga, amaYuda enkulungwane yokuqala akazange amamkele uYesu. Ngoko ithuba lokuvelisa imbewu ka-Abraham layeka ukuba lelawo odwa. Noko ke, xa kwaqaliswa ukukhetha abo babeza kuyila “ubukumkani bababingeleli” basezulwini ngePentekoste yowama-33 C.E., ayekho amaYuda awayenesimo sengqondo esihle awasamkelayo isimemo. Ekubeni ayengamawaka ambalwa nje, ayefana ‘nentsalela’ xa ethelekiswa nalo lonke uhlanga lwamaYuda.—Roma 11:5.
12 Noko ke, uYehova wayeya kulifikelela njani “inani elipheleleyo” labo babeza kuba yimbewu ka-Abraham? (Roma 11:12, 25) Khawuve le mpendulo ivela kuPawulos: “Noko ke, asikukuba ilizwi likaThixo liye lasilela. Kuba asingabo bonke abaphuma kuSirayeli [wemvelo] ‘abanguSirayeli’ ngokwenene. Ingengabo nabo bonke abangabantwana [inxalenye yembewu ka-Abraham] ngenxa nje yokuba beyimbewu [inzala] ka-Abraham . . . Oko kukuthi, abantwana ngokwasenyameni abangabo ngokwenene abantwana bakaThixo, kodwa abantwana besithembiso babalelwa ekuthini bayimbewu.” (Roma 9:6-8) Ngoko kwakunganyanzelekanga ukuba kubekho inzala ka-Abraham ukuze kuzaliseke injongo kaYehova ngokuphathelele imbewu.
Umnquma Womfuziselo
13. Yintoni efuziselwa (a) ngumnquma, (b) yingcambu yawo, (c) sisiqu sawo (d) namasebe awo?
13 Umpostile uPawulos uthelekisa abo baba yimbewu ka-Abraham namasebe omnquma womfuziselo.a (Roma 11:21) Lo mnquma wasemyezweni ufuzisela ukuzaliseka kwenjongo kaThixo ngokuphathelele umnqophiso ka-Abraham. Ingcambu yalo mthi ingcwele kwaye ifuzisela uYehova njengalowo udala uSirayeli wokomoya. (Isa. 10:20; Roma 11:16) Isiqu sawo sifuzisela uYesu njengenxalenye eyintloko yembewu ka-Abraham. Amasebe ahlukahlukeneyo xa ewonke amela ‘inani elipheleleyo’ labo baqukwe kwinxalenye yesibini yembewu ka-Abraham.
14, 15. Ngoobani ‘abaphulwayo’ kumnquma wasemyezweni, yaye ngoobani abamiliselwa kuwo?
14 Kumzekeliso womnquma, amaYuda emvelo awamchasayo uYesu afaniswa namasebe omnquma ‘awaphulwayo.’ (Roma 11:17) Ngenxa yoko alahlekwa lithuba lokuba yinxalenye yembewu ka-Abraham. Kodwa ngubani owayeza kuthatha indawo yawo? Ngokwembono yamaYuda emvelo, awayezidla ngokuba yinzala ka-Abraham, impendulo yalo mbuzo yayiza kuphuma apho ayengalindelanga khona. Kodwa uYohane uMbhaptizi wayesele ewalumkisile ukuba xa uYehova efuna njalo, wayenokuvelisela uAbraham abantwana kwanakumatye la embala.—Luka 3:8.
15 Wenza ntoni ke uYehova ukuze azalisekise injongo yakhe? UPawulos uyacacisa ukuba amasebe omnquma wasendle amiliselwa phakathi komnquma wasemyezweni ukuze kubuyiselwe lawo ayaphulwe. (Funda eyabaseRoma 11:17, 18.) Ngenxa yoko, amaKristu eentlanga athanjiswe ngomoya, njengalawo ayekwibandla laseRoma, ngokungathi kunjalo amiliselwa kulo mnquma womfuziselo. Ngale ndlela aba yinxalenye yembewu ka-Abraham. Ekuqaleni, ayefana namasebe omnquma wasendle, engenalo ithuba lokuba yinxalenye yalo mnqophiso ukhethekileyo. Kodwa uYehova wawavulela indlela yokuba abe nguSirayeli wokomoya.—Roma 2:28, 29.
16. Umpostile uPetros wakucacisa njani ukuyilwa kolu hlanga lokomoya lutsha?
16 Umpostile uPetros ucacisa le meko ngale ndlela: “[UYesu Kristu] uxabisekile ke kuni [maSirayeli okomoya, kuquka amaKristu eeNtlanga], nina bakholwayo; kodwa kwabo bangakholwayo, ‘lisuke eli litye baligatyayo abakhi laba yintloko yembombo,’ ‘nelitye lesikhubekiso nolwalwa lokubetheka.’ . . . Kodwa nina ‘nisisizwe esinyuliweyo, ububingeleli basebukhosini, uhlanga olungcwele, isizwana esisesakhe ngokukhethekileyo, ukuze nivakalise ngokubanzi iimbalasane’ zalowo wanibizayo ukuba niphume ebumnyameni ningene ekukhanyeni kwakhe okungummangaliso. Kuba nanikhe anabi sisizwana, kodwa ngoku nisisizwana sikaThixo; naningenzelwanga nceba, kodwa ngoku nenzelwe inceba.”—1 Pet. 2:7-10.
17. Okwenziwa nguYehova ‘kwakwahluke njani kwimvelo’?
17 UYehova wenza into abaninzi ababeya kuyijonga njengeyayingalindelekanga kwaphela. UPawulos uchaza okwenzekayo ‘njengokwahlukileyo kwimvelo.’ (Roma 11:24) Njani? Kaloku, kwakuyinto engaqhelekanga, nengeyoyamvelo, ukumilisela isebe lomthi wasendle kumthi wasemyezweni; kodwa ke leyo yinto ababeyenza abanye abalimi ngenkulungwane yokuqala.b Ngendlela efanayo, uYehova wenza into eyayingaqhelekanga. Ngokwembono yamaYuda, abeeNtlanga babengenakukwazi ukuvelisa isiqhamo esamkelekileyo. Noko ke, uYehova wabenza inxalenye ‘yohlanga’ oluvelisa isiqhamo soBukumkani. (Mat. 21:43) Ukususela ekuthanjisweni kukaKorneli—umntu weeNtlanga wokuqala owaguqukayo—ngowama-36 C.E., kwavulelwa abeeNtlanga ithuba lokuba bamiliselwe kulo mnquma womfuziselo.—IZe. 10:44-48.c
18. Liliphi ithuba awayenalo amaYuda emvelo emva kowama-36 C.E.?
18 Ngaba loo nto ithetha ukuba emva kowama-36 C.E., kwakungasekho thuba lokuba amaYuda emvelo abe yinxalenye yembewu ka-Abraham? Akunjalo. UPawulos uyanaba: “Kanjalo nabo [abangamaYuda emvelo], ukuba abahlalanga beswele ukholo, baya kumiliselwa; kuba uThixo uyakwazi ukubamilisela kwakhona. Kuba ukuba waye wagawulwa kumnquma ongowasendle ngemvelo waza ngokwahlukileyo kwimvelo wamiliselwa kumnquma wasemyezweni, kuya kuba kangakanani na ke ngaba bangabemvelo ukumiliselwa kumnquma wabo!”d—Roma 11:23, 24.
“Wonke USirayeli Uya Kusindiswa”
19, 20. Yintoni ephunyezwa nguYehova ecaciswa ngumzekeliso womnquma womfuziselo?
19 Ewe, injongo kaYehova ngokuphathelele “uSirayeli kaThixo” izalisekiswa ngendlela emangalisayo. (Gal. 6:16) “Wonke uSirayeli uya kusindiswa,” kanye njengoko watshoyo uPawulos. (Roma 11:26) Ngexesha elikhethwe nguYehova, “wonke uSirayeli”—ngamany’ amazwi, onke amaSirayeli okomoya—uya kukhonza njengookumkani nababingeleli ezulwini. Ayikho into enokwenza injongo kaYehova ingenzeki!
20 Njengoko kwaprofetwayo, ‘imbewu’ ka-Abraham—uYesu Kristu kunye nabali-144 000—iya kuzisa iintsikelelo “kubantu beentlanga.” (Roma 11:12; Gen. 22:18) Ngale ndlela, bonke abantu bakaThixo bayangenelwa kweli lungiselelo. Ngokwenene, njengoko sixubusha ngokusebenza kwenjongo kaYehova kanaphakade, buyasimangalisa “ubunzulu bobutyebi nobobulumko nobolwazi lukaThixo.”—Roma 11:33.
[Imibhalo esemazantsi]
a Kuyabonakala ukuba umnquma awufuziseli uSirayeli wemvelo. Nangona uSirayeli wemvelo wavelisa ookumkani nababingeleli, olu hlanga aluzange lube bubukumkani bababingeleli. Ookumkani bakwaSirayeli babengavunyelwa ngumthetho ukuba babe ngababingeleli. Ngoko, uSirayeli wemvelo wayengenguwo umnquma womfuziselo. UPawulos ucacisa indlela injongo kaThixo yokuvelisa ‘ubukumkani bababingeleli’ ezalisekiswa ngayo ngokunxibelelene noSirayeli wokomoya. Le nkcazelo ihlaziya leyo ipapashwe kwiMboniselo kaFebruwari 1, 1984, iphepha 12-17.
b Bona ibhokisi ethi “Sasiyintoni Isizathu Sokuba Kumiliselwe Amasebe Omnquma Wasendle?”
c Le nto yenzeka ekupheleni kwethuba leminyaka emithathu enesiqingatha elanikwa amaYuda emvelo ukuze abe yinxalenye yolu hlanga lokomoya lutsha. Isiprofeto esiphathelele iiveki zeminyaka ezingama-70 sasichaza esi siganeko.—Dan. 9:27.
d Isima-phambili sesiGrike esiguqulelwe ngokuthi ‘umyezo’ kweyabaseRoma 11:24 sivela kwigama elithetha into “elungileyo, esemagqabini,” okanye “eyenziwe yafanela injongo yayo.” Lisetyenziswa ngokukhethekileyo kwizinto eziyiphumezayo injongo eziyenzelweyo.
Ngaba Usakhumbula?
• Yintoni esiyifundayo ngoYehova kwindlela ayizalisekisa ngayo injongo yakhe?
• KweyabaseRoma isahluko se-11, yintoni efuziselwa . . .
ngumnquma?
yingcambu yawo?
sisiqu sawo?
ngamasebe awo?
• Kutheni inkqubo yokumilisela ‘yayahlukile kwimvelo’?
[Ibhokisi/Umfanekiso okwiphepha 24]
Sasiyintoni Isizathu Sokuba Kumiliselwe Amasebe Omnquma Wasendle?
▪ ULucius Junius Moderatus Columella wayelijoni nomlimi ongumRoma owayephila ngenkulungwane yokuqala yeXesha lethu Eliqhelekileyo. Eyona nto adume ngayo ziincwadi ezili-12 awazibhalayo ngobomi basemaphandleni nokulima.
Kwincwadi yakhe yesihlanu, ucaphula iqhalo lamandulo elithi: “Olima umyezo weminquma, ufuna uvelise isiqhamo; ogalela umgquba kuwo, uyawucenga ukuba uvelise isiqhamo; owuthenayo, uyawunyanzela ukuba uvelise isiqhamo.”
Emva kokuchaza imithi echumayo kodwa ingathwali siqhamo, uncomela ukuba kulandelwe le nkqubo: “Kulicebo eliphumelelayo ukuvula umngxuma kule mithi ngesixhobo uze kuwo ufake isebe eliluhlaza elithathwe kumnquma wasendle lingene lithi nkqi; umphumo kukuba loo mthi, ekubeni uqhanyiswa yimbewu evelisa isiqhamo, nawo uthwala isiqhamo esingakumbi.”
[Umfanekiso okwiphepha 23]
Ngaba uyawuqonda umzekeliso womnquma womfuziselo?