Ukuphila Ngezinto Onazo—Ungakwazi Njani?

MASITHI unengxowa egqobhokileyo, yaye ufanele uyigcine inomoya. Ungayigcina njani? Ungakwazi kuphela xa ukwazi ukuyitha umoya olingana nalowo uphuma entunjeni.

Kuthetha loo nto ukuphila ngezinto onazo. Umvuzo wakho unokufaniswa nomoya owuvuthela kuloo ngxowa. Iindleko zakho zifana nomoya ophumayo. Kufuneka uqiniseke ukuba iindleko zakho azikho ngaphezu komvuzo owamkelayo.

Nangona ivakala ilula le nto, akululanga ukuyenza. Abantu bebenokuziphepha iingxaki ezininzi zemali ukuba bebelandela eli cebiso. Unokuyenza njani loo nto? Sinokuwafumana phi amacebiso aluncedo? IBhayibhile inokusinceda kule nkalo kuba inamacebiso amahle. Makhe sihl’ amahlongwane amanye awo.

Imigaqo YeBhayibhile Eluncedo

IBhayibhile inemigaqo enokukunceda uyiphathe kakuhle imali yakho. Siza kuthetha ngeminye yayo. Khawujonge ukuba ayizukunceda na le migaqo yokuphila ngezinto onazo.

Yiqingqe imali yakho.

Ukuze uyiphathe kakuhle imali kufuneka wazi ukuba wenza malini nokuba uyisebenzisa entwenini. IBhayibhile ithi: “Amacebo okhutheleyo ngokuqinisekileyo ayingenelo, kodwa wonk’ ubani ongxamayo ngokuqinisekileyo usingisa ekusweleni.” (IMizekeliso 21:5) Abanye basebenzisa imvulophu. Imvulophu nganye imela iindleko ezithile “njengoKutya,” “iRente,” okanye “Iimpahla.” Enokuba usebenzisa le ndlela okanye nayiphi na enye, into ebalulekileyo kukuba uyazazi iindleko zakho, qala ngezinto ezibalulekileyo kungekhona ubunewunewu.

Musa ukuba nomona.

Abantu abakumazwe asakhasayo banqwenela ukuphila njengabantu abakumazwe afumileyo. Abantu bafuna izinto abanazo abamelwane babo. Oku kunokuba ngumgibe. Mhlawumbi nommelwane untyumpantyumpeka ematyaleni. Kutheni uxelisa ubudenge bomnye umntu uze ekugqibeleni ungene engxakini? IBhayibhile ilumkisa isithi: “Umntu onyolukileyo, usukela ubutyebi, engazi ukuba uya kuswela.”—IMizekeliso 28:22, IThe Jerusalem Bible.

Phila ubomi obulula.

UYesu wacebisa abalandeli bakhe ukuba bagcine iliso labo ‘lingenakumbi.’ (Mateyu 6:22) Ukufuna izibiliboco ungenamali yazo kunokukufaka ematyaleni. Ngokutsho kwengxelo yeBhanka yaseAsiya Yophuhliso, phantse abantu abasisithathu kwiPhilippines ze abangaphezu kwesiqingatha eIndiya baphila ngemali engaphantsi kwe-R9.80 ngosuku mali leyo ekulindeleke ukuba umntu ngamnye abenayo ukuze aphile. Xa abantu bephila ngaloo mali kuhle ukuba bayichithe kwizinto ezibalulekileyo. Noko ke, lo mgaqo unokunceda nabantu abakumazwe athath’ entweni bangangeni ematyaleni.

Yaneliseka zizinto ezifuneka ngokwenene.

Lo mgaqo uyavisisana nesiluleko sokuphila ubomi obulula. IBhayibhile inikela eli cebiso kweyoku-1 kuTimoti 6:8: “Ukuba sinesixhaso nesambatho, masaneliswe zezo zinto.” Abanye babona bantu bonwabileyo ehlabathini abanamali ingako; sekunjalo banelisekile zizinto abanazo, aziquki izinto eziphathekayo kuphela kodwa ukuthandwa yintsapho nangabahlobo.—IMizekeliso 15:17.

Waphephe amatyala angeyomfuneko.

Anyanise ngokwenene amazwi eBhayibhile athi: “Isityebi siyabalawula abo basweleyo, yaye obolekayo ngumkhonzi kumntu obolekisayo.” (IMizekeliso 22:7) Nangona kukho iimeko ezikunyanzelayo ukuba ungene ematyaleni, abo benza amatyala kuba befuna ukuthenga izinto abazifunayo badla ngokutshona zwabha kuwo. Lento idla ngokwenzeka xa kuthengwa ngamakhadi. Iphephancwadi iTime lathi: “Xa umntu enekhadi uyathsafaza.” UEric ohlala kwiiPhilippines, uthi: “Xa ndithenga ngekhadi ndithenga izinto ezininzi ngaphezu kwaxa ndithenga ngemali. Iphazamisa uqingqo mali lwam xa kufuneka ndihlawule ityala lekhadi.” Kububulumko ngokwenene ukuphapha xa usebenzisa ikhadi.—2 Kumkani 4:1; Mateyu 18:25.

Yonga imali ngaphambi kokuba uthenge.

Nangona isenokubonakala isemva, into yokonga imali ngaphambi kokuba uthenge sesinye sezona zigqibo zobulumko ezinokukunceda ungangeni matyaleni. Ukwenjenjalo kuye kwanceda abaninzi abangena ematyaleni, anjengenzala kwimali ebangela ukuba lenyuke ixabiso laloo nto ithengwayo. IBhayibhile ithi imbovane “ilumkile” kuba ibutha “ukutya kwayo ngexesha lokuvuna” isenzela ingomso.—IMizekeliso 6:6-8; 30:24, 25.

Ukufunda Kwabanye

Onke la macebiso eBhayibhile esiye sathetha ngawo asenokuvakala emahle ngaba ngokwenene ayabanceda abantu bakwazi ukuphila ngezinto abanazo? Makhe sive amava abo baye bawathobela la macebiso baza bajamelana kakuhle neengxaki zemali.

UDiosdado, utata onabantwana abane, uyavuma ukuba ingxaki yezoqoqosho ebigqugqise ehlabathini iye yenza kwabanzima ukunyamekela intsapho yakhe. Nakuba kunjalo, wakuqonda ukubaluleka kokuqingqa imali. Uthi: “Ndiyicakaca kakuhle yonke imali yam. Ndinoludwe lwezinto endiza kuyisebenzisa kuzo imali yam.” NoDanilo wenza ngaloo ndlela naye. Ishishini labo nomfazi wakhe liye latshona. Kodwa sekunjalo bayakwazi ukuphila ngalo mali banayo. Uthi: “Siyazi ukuba yimalini engenayo nokuba yimalini esiyichithayo nyanga nganye. Ngokusekelwe kulo nkcazelo senza isigqibo sokuba sichithe malini.”

Abanye baye bafumanisa ukuba ukuze imali yabo ikwazi ukubenela kuye kwafuneka bazincame ezinye izinto. UMyrna, umhlolokazi okhulisa abantwana abathathu uthi: “Kunokuba sikhwele izithuthi zikawonke wonke xa sisiya kwiintlanganiso zamaKristu, ngoku siye sihambe ngeenyawo.” UMyrna wenze umgudu wokufundisa abantwana bakhe ukuphila ubomi obulula. Uthi: “Ndiye ndazama ukumisela umzekelo omhle ngokusebenzisa umgaqo okweyoku-1 kuTimoti 6:8-10, obonisa ukubaluleka kokwanela zizinto onazo.”

UGerald, utata wabantwana ababini, naye uye wenza ngaloo ndlela. Uthi: “Xa siqhuba isifundo sentsapho seBhayibhile, siye sincokole ngamaKristu ajolisa amehlo phambili kwizinto ezibaluleke ngokwenene, izinto zokomoya. Imiphumo yekhuthaza kakhulu kuba abantwana bethu abathanga phithi zizinto ezingabalulekanga.”

UJanet akatshatanga ungumshumayeli wexesha elizeleyo weBhayibhile kwiiPhilippines. Usandula ukuphelelwa ngumsebenzi kodwa ke uphila ngezinto anazo. Uthi: “Ndiyazeyisa kwaye ndiyisebenzisa kakuhle imali yam. Kunokuba ndiye kwiivenkile ezinamaxabiso aphezulu ndiya kwezo zingabizi kakhulu. Kutheni ndimele ndihlawule imali eninzi xa loo nto ndinokuyifumana ngexabiso eliphantsi? Kwakhona andithengi yonke into endiyibonayo.” UJanet uyakuqonda ukubaluleka kokuqokelela imali ngaphambi kokuba athenge. Uthi: “Ukuba ndinemali engakumbi nokuba incinane kangakanani, ndiyayigcina ukuze ndiyisebenzise ngexesha likaxakeka.”

Mayela nokuthenga ngamakhadi, uEric ebesimcaphule ekuqaleni uthi: “Andisawasebenzisi amakhadi ngaphandle kokuba kunyanzelekile.” UDiosdado naye uyavumelana naye: “Ukuze ndingathsafazi ndilishiya emsebenzini ikhadi lam.”

Unokuphila Ngezinto Onazo

Abantu abaninzi bafumanisa ukuba nangona iBhayibhile iyincwadi ethetha ngezinto zokomoya, inawo namacebiso amahle esinokuphila ngawo. (IMizekeliso 2:6; Mateyu 6:25-34) Xa usebenzisa imigaqo yeBhayibhile ekuthethwa ngayo kweli nqaku uze ufunde kwabanye abaye bancedwa yiyo nawe unokuphila ngezo zinto unazo. Xa usenjenjalo unokubhungca kwiinkxwaleko ezithwaxa izigidi zabantu namhlanje.