IBhayibhile Iyabutshintsha Ubomi Babantu

KWAKUTHENI ukuze ibhinqa elingaphaya kwama-60 ubudala liyeke ukunqula izithixo? Kwakutheni ukuze umfundisi wamaShinto aluyeke ubizo lwakhe aze abe ngumshumayeli ongumKristu? Lakwazi njani ibhinqa elalikhuliswe ngabanye abazali ukujamelana nokuziva lilahliwe? Khawuve ukuba bathini.

“Andiselokhoboka Lezithixo.”—UABA DANSOU

UNYAKA WOKUZALWA: 1938

ILIZWE: BENIN

UBOMI BANGAPHAMBILI: WAYENQULA IZITHIXO

INDLELA ENDANDIKADE NDIPHILA NGAYO: Ndakhulela eSo-Tchahoué, ilali esemgxobhozweni kufutshane nechibi. Abantu balapha baphila ngokuloba nokufuya izilwanyana ezinjengeenkomo, iibhokhwe, iigusha, iihagu neenkuku. Azikho izithuthi kule lali, abantu basebenzisa izikhephe. Ngokuqhelekileyo izindlu bazakha ngezinti baze bazifulele ngengca, kodwa bakhona abasebenzisa izitena. Inkoliso yabantu balapha ngamahlwempu. Nakuba kunjalo, ulwaphulo mthetho aluqatselanga njengasezixekweni.

Xa ndandisengumntwana, utata wathumela mna nodadewethu egqirheni ukuze sibe ngabakhwetha balo. Ndathi ndisakuba mdala, ndanqula uDudua (uOduduwa) uthixo wamaYoruba. Ndamakhela indlu ndaza ndamenzela amadini ngeyam, ioli yesundu, iinkumba, iinkuku, amahobe nezinye izilwanyana. La madini ayebiza imali eninzi, ayedla ngokuyiqongqotha yonke imali yam.

INDLELA EBUTSHINTSHE NGAYO UBOMI BAM IBHAYIBHILE: Ukuqalisa kwam ukufunda iBhayibhile, ndafunda ukuba nguYehova kuphela uThixo oyinyaniso. Ndafunda nokuba akalufuni unqulo zithixo. (Eksodus 20:4, 5; 1 Korinte 10:14) Ndandiyazi into endandifuna ukuyenza. Yonke imifanekiso yam eqingqiweyo ndayilahla nazo zonke izinto ezinokuthanani nonqulo zithixo. Ndayeka ukuya emagqirheni, ndayeka nokwenza amasiko anxibelelene needemon.

Kwakungelulanga ukwenza ezi nguqu—ndandisele ndiyigabhule iminyaka engama-60. Abahlobo, izalamane nabamelwane babendichasa bendenza intlekisa. Kodwa ndathandaza kuYehova ndicela andomeleze ndenze izinto ezilungileyo. Ndathuthuzelwa ngamazwi akwiMizekeliso 18:10, athi: “Yinqaba eyomeleleyo igama likaYehova. Ilungisa libalekela kulo lize likhuseleke.”

Enye into eyandincedayo kukuya kwiintlanganiso zamaNgqina kaYehova. Kwezo ntlanganiso kulapho ndabona uthando lobuKristu, ndachukunyiswa kukubona aba bantu bezama ukuphila ngemilinganiselo ephakamileyo yeBhayibhile. Into endayibonayo yandenza ndaqiniseka ukuba amaNgqina kaYehova lunqulo lokwenyaniso.

INDLELA ENDINGENELWE NGAYO: Ukuphila ngemigaqo yeBhayibhile kuye kwandinceda ndaphucula ulwalamano lwam nabantwana bam. Kwakhona ndivakalelwa kukuba ndothulwe umthwalo. Imali yam yayiphelela kwizithixo ezazingandincedi nganto. Ngoku ndinqula uYehova, osinika isicombululo sazo zonke iingxaki zethu. (ISityhilelo 21:3, 4) Ndiyavuya kuba ndingaselilo ikhoboka lezithixo, kodwa ndilikhoboka likaYehova! Nguye ondenze ndaziva ndikhuseleke ngokwenene.

“Bendisoloko Ndifuna UThixo Ukususela Ebuntwaneni.”—USHINJI SATO

UNYAKA WOKUZALWA: 1951

ILIZWE: IJAPAN

UBOMI BANGAPHAMBILI: WAYENGUMFUNDISI WOBUSHINTO

INDLELA ENDANDIKADE NDIPHILA NGAYO: Ndakhulela kwidolophu esemaphandleni yaseFukuoka Prefecture. Abazali bam babeluthanda egazini unqulo; kwasebuntwaneni bandifundisa ukuhlonela oothixo bamaShinto. Kwandiseyinkwenkwana, ndandidla ngokucinga ngokusindiswa kwam ndinomnqweno wokunceda abantu. Ndikhumbula ndisekumabanga aphantsi utitshala wasibuza ukuba sifuna ukuba zintoni xa sele sibadala. Abanye abantwana babefuna ukuba zizinto ezahlukahlukeneyo, njengokuba yinzululwazi. Ndathi umnqweno wam kukukhonza uThixo. Bonke bandiwa ngentsini.

Emva kokuba ndigqibe esikolweni, ndaya kufundela ukuba ngumfundisi. Ebudeni bokufunda kwam, ndadibana nomfundisi wobuShinto owayethanda ukufunda incwadi eneqweqwe elimnyama. Ngenye imini wandibuza, “Ngaba uyayazi le ncwadi Sato?” Ndandilibonile iqweqwe layo, ndaphendula ndathi, “YiBhayibhile.” Wathi, “Wonke umntu ofuna ukuba ngumfundisi wobuShinto umele ayifunde le ncwadi.”

Ngoko nangoko ndaya kuzithengela iBhayibhile. Ndayibeka ekuhleni kwithala lam leencwadi ndaza ndaqiniseka ukuba ndiyigcina kakuhle. Ndandingenalo ixesha lokuyifunda kuba ndandisoloko ndixakeke ngumsebenzi wesikolo. Ukugqiba kwam isikolo ndaba ngumfundisi kwityalike yamaShinto. Iphupha lam lobuntwana lazaliseka.

Noko ke, ndakhawuleza ndabona ukuba, ukuba ngumfundisi wobuShinto kwakungeyiyo le nto ndandiyilindele. Abefundisi abaninzi babengenaluthando yaye bengabakhathalele abanye abantu. Abaninzi babo babengenalukholo. Omnye wabaphathi bam wada wathi kum: “Ukuba ufuna ukuphumelela apha, umele uthethe ngentanda bulumko kuphela. Ungakh’ ulinge uthethe ngokholo.”

Amagqabaza alolo hlobo andenza ndaluthandabuza unqulo lwamaShinto. Nangona ndaqhubeka ndingumfundisi, ndandiphanda nezinye iicawa. Sekunjalo, akukho nokuba ibe nye kuzo eyayahlukile. Njengoko ndandiphanda ngakumbi ngezi cawa, ndandidimazeka ngakumbi. Ndagqiba kwelokuba akukho kwacawa inenyaniso.

INDLELA EBUTSHINTSHE NGAYO UBOMI BAM IBHAYIBHILE: Ngowe-1988 ndadibana nomBhuda owandikhuthaza ukuba ndifunde iBhayibhile. Ndacinga ngalaa mfundisi wobuShinto owayekhe wandikhuthaza kwiminyaka engaphambili. Ndagqiba ekubeni ndilisebenzise elo cebiso. Njengoko ndandiqalise ukufunda iBhayibhile, yandithimba. Maxa wambi ndandifunda ubusuku bonke kude kuse.

Izinto endazifundayo zandenza ndafuna ukuthandaza kuThixo weBhayibhile. Ndaqala ngomthandazo ongumzekelo okuMateyu 6:9-13. Lo mthandazo ndandidla ngokuwuphinda rhoqo emva kweeyure ezimbini—naxa ndisenza umsebenzi wobuShinto etyalikeni.

Ndandinemibuzo emininzi ngezinto endandizifunda. Ngoku ndandisele nditshatile, kwaye ndandisazi ukuba amaNgqina kaYehova afundisa iBhayibhile kuba ayetyelele umfazi wam ngaphambili. Ndawafuna amaNgqina ndaza ndakulifumana ndalibuza uthotho lwemibuzo. Ndachukumiseka gqitha lisakuyiphendula ngeBhayibhile yonke loo mibuzo. Lenza amalungiselelo okuba ndifundelwe iBhayibhile.

Akuzange kube kudala emva koko, ndaqalisa ukuya kwiintlanganiso zamaNgqina kaYehova. Nangona ndingazange ndiyiqonde ngelo xesha, amanye amaNgqina ayelapho ndandikhe ndathetha krwada nawo. Nakuba kunjalo, andibulisa ngobubele andenza ndaziva ndamkelekile.

Kwezo ntlanganiso ndafunda ukuba uThixo ulindele ukuba amadoda azithande aze azihlonele iintsapho zawo. Ngelo xesha, ndandithe phithi ngumsebenzi wam wokuba ngumfundisi kangangokuba ndandingamhoyanga umfazi nabantwana bethu ababini. Ndaqonda ukuba bendisoloko ndiphulaphula abantu abeze etyalikeni, kodwa ndandingazange ndimphulaphule umfazi wam.

Njengokuba izifundo zam zaziqhubeka, ndafunda izinto ezininzi ngoYehova ezandisondeza kuye. Ndandichukunyiswa kakhulu ziivesi ezinjengamaRoma 10:13, athi: “Wonk’ ubani obiza egameni likaYehova uya kusindiswa.” Ndandikhangela uThixo ukususela oko ndingumntwana yaye ngoku ndandimfumene!

Ndandingasonwabanga ngoku etyalikeni. Ekuqaleni ndandixhalatyiswa kukuba abantu baza kuthini xa ndibuyeka ubuShinto. Kodwa ndandisoloko ndizixelela ukuba ndiza kumka ukuba ndifumana uThixo wokwenyaniso kwenye indawo. Ngentwasahlobo yowe-1989 ndagqiba ekubeni ndilandele isazela sam. Ndayishiya ityalike yamaShinto ndaza ndathembela kuYehova.

Kwakungelulanga ukwahlukana nobuShinto. Abaphathi bam bandikhalimela bazama nokundinyanzela ukuba ndingemki. Kodwa eyona nto yayinzima yayikukuxelela abazali bam. Xa ndandisiya kubachazela ndandisoyika kakhulu. Ndahamba ndisima izihlandlo ngezihlandlo ndithandazela ukuba uYehova andomeleze.

Ukufika kwam ekhaya ndandisoyika ukuxelela abazali bam. Kwadlula iiyure. Emva kokuthandaza ndamchazela yonke into utata. Ndamxelela ukuba ndimfumene uThixo wenyaniso yaye ngenxa yoko ndiza kubushiya ubuShinto ukuze ndikhonze Yena. Utata akazange akholelwe. Ezinye izalamane zeza ekhaya ukuze zindicenge. Ndandingafuni ukukhathaza abantu bakuthi, kodwa kwangaxeshanye ndandisazi ukuba ndimele ndikhonze uYehova. Ekuhambeni kwexesha intsapho yakowethu yasihlonela isigqibo sam.

Ukushiya ityalike kwakungenzima kangako; eyona nto yayinzima yayikukuyikhupha engqondweni. Ubufundisi babendele kum. Ndazama ukuyikhupha engqondweni, kodwa phantse kuyo yonke indawo endihamba kuyo kwakusoloko kukho izinto ezindikhumbuza ubomi bam bangaphambili.

Zimbini izinto ezandincedayo ndahlukana nezi ngcinga. Okokuqala ndakhangela yonke into endandiyisebenzisa kubuShinto. Ndazitshisa zonke, iincwadi, imifanekiso nayo nantoni eyayindikhumbuza unqulo lwam lwangaphambili. Okwesibini ndazama ukunxulumana namaNgqina kangangoko ndinako. Ubuhlobo nenkxaso yawo yandinceda kakhulu. Ngokuthe ngcembe indlela endandiphila ngayo yaya icima engqondweni.

INDLELA ENDINGENELWE NGAYO: Ndandikade ndingenalo ixesha lomfazi nelabantwana bam loo nto yayibenza bazive bengamalolo. Kodwa ndathi ndakuqalisa ukuchitha ixesha nabo, njengoko iBhayibhile ifundisa ukuba abayeni benjenjalo, sasondelelana ngakumbi. Ekuhambeni kwexesha umfazi wam wandithelela ekukhonzeni uYehova. Sonke ngoku simanyene kunqulo lokwenyaniso thina nonyana, intombi yethu nomyeni wayo.

Xa ndikhangela emva kumnqweno endandinawo wokukhonza uThixo nokunceda abantu, ndiyaqonda ukuba ndiyifumene yonke into ebendiyifuna nangaphezulu. Andinawo amazwi okuchaza indlela endimbulela ngayo uYehova.

“Ndandisazi Ukuba Ikho Into Engahambi Kakuhle.”—ULYNETTE HOUGHTING

UNYAKA WOKUZALWA: 1958

ILIZWE: EMZANTSI AFRIKA

UBOMI BANGAPHAMBILI: WAYEZIVA ELAHLIWE

INDLELA ENDANDIKADE NDIPHILA NGAYO: Ndazalelwa eGermiston, idolophu enemigodi engenalwaphulo mthetho kangako. Abazali bam babecinga ukuba abanakuze bakwazi ukundikhulisa baza bagqiba ekubeni baphise ngam. Xa ndandineentsuku ezili-14 ubudala, ndathathwa sesinye isibini esaba ngabazali bam abatsha. Sekunjalo emva kokuba ndixelelwe ngemvelaphi yam, ndaziva ndilahliwe. Ndandivakalelwa kukuba andinguye umntwana wabazali bam besibini ngenxa yoko ndandicinga ukuba abandiqondi.

Xa ndandineminyaka eli-16 ubudala, ndaqalisa ukuya kwiindawo zeembutho, apho mna nabahlobo bam sasidla ngokujuxuza siphulaphule nomculo ongxolayo. Xa ndandineminyaka eli-17 ubudala ndaqalisa ukutshaya. Ndandifuna ukuba nomzimba omncinane njengalowo wamanenekazi endandiwabona kwimifanekiso yentengiso yecuba. Xa ndandineminyaka eli-19 ubudala ndaqalisa ukusebenza eGoli, apho ndadibana nabahlobo ababi. Akuzange kube kudala ndaqalisa ukuthuka, ndayingedle yecuba ngeempela veki ndinxila.

Nakuba kunjalo ndandizilolonga. Ndandisenza umthambo rhoqo ndidlala nebhola ekhatywayo. Ndandikhuthele nasemsebenzini wam ndiyincutshe kwiikhompyutha. Ngenxa yoko imali yayisithi tata kum abantu abaninzi besithi ndiphumelele ebomini. Sekunjalo ndandingonwabanga. Ndandisazi ukuba ikho into engahambi kakuhle.

INDLELA EBUTSHINTSHE NGAYO UBOMI BAM IBHAYIBHILE: Ukuqalisa kwam ukufunda iBhayibhile ndafumanisa ukuba uYehova nguThixo onothando. Kwakhona ndafunda nokuba usibonise indlela asithanda ngayo ngokusinika iLizwi lakhe iBhayibhile. Ingathi usibhalele ileta yokusikhokela. (Isaya 48:17, 18) Ndaqonda ukuba, ukuba ndifuna ukwalathiswa nguYehova, kwakuza kufuneka ndenze utshintsho ebomini bam.

Enye yezinto ekwakufuneka ndizitshintshe yayingabahlobo bam. Ndacamngca ngamazwi eMizekeliso 13:20, athi: “Ohamba nezilumko uya kuba sisilumko naye, kodwa osebenzisana neziyatha uya kuhlelwa bububi.” Loo mgaqo wandinceda ndabashiya abahlobo bam abadala ndaze ndazenzela abahlobo abatsha phakathi kwamaNgqina kaYehova.

Eyona ngxaki yayikukuyeka ukutshaya; ndandiyingedle. Njengoko ndandisilwa nalo mkhwa, kwavela enye ingxaki. Ukuyeka ukutshaya kwandenza ndatyeba. Kwandenza ndaziva ndingento yanto, kwandithatha phantse iminyaka elishumi ukwehlisa umzimba. Nakuba kunjalo ndandisazi ukuba ukuyeka ukutshaya yayiyinto efanelekileyo. Ndandithandaza kuYehova kwaye wayendinika amandla.

INDLELA ENDINGENELWE NGAYO: Ngoku ndisempilweni. Ndanelisekile—andisakhangeli ulonwabo kwimisebenzi yehlabathi, amawonga nobutyebi. Kunoko, ndivuyiswa kukuxelela abanye inyaniso yeBhayibhile. Ngenxa yoko, abantu abathathu endandikade ndisebenza nabo bakhonza uYehova ngoku kunye nam nomyeni wam. Ngaphambi kokuba ngamnye wabazali bam abandikhulisayo abhubhe, ndakwazi ukubaxelela isithembiso seBhayibhile sokuvuselwa kumhlaba oyiparadesi.

Ukusondela kuYehova kuye kwandinceda kwiimvakalelo zokuziva ndilahliwe. Undenze ndayinxalenye yentsapho esehlabathini lonke. Kuyo ndinoomama, ootata, abantakwethu noodadewethu abaninzi.—Marko 10:29, 30.

[Umfanekiso okwiphepha 12]

Phakathi kwamaNgqina kaYehova ndiye ndabona uthando lobuKristu

[Umfanekiso okwiphepha 13]

Ityalike yamaShinto endandikade ndinqula kuyo