Ngubani Ngokwenene Olawula Ihlabathi?

KUSENOKWENZEKA ukuba akuzange ukhe udibane neenkokeli zezikrelemnqa. Ngaba loo nto ithetha ukuba azikho? Iinkokeli zezaphuli mthetho ziyakwazi ukuzifihla okanye ziqhubeke nolwaphulo mthetho ngoxa zisentolongweni. Sekunjalo, amaphephandaba athetha ngeemfazwe zeziyobisi, amashishini oonongogo, nokuthengiswa kwabantu, asikhumbuza indlela ezi nkokeli ezinempembelelo ngayo nemiphumo eyoyikisayo ebangelwa bubukho bazo. Ngenxa yempembelelo ezinayo ebantwini, siyazi ukuba izaphuli mthetho zikho.

ILizwi likaThixo iBhayibhile, lichaza uSathana njengomntu wokwenene, ofana neenkokeli ezinamandla zolwaphulo mthetho, oqinisekisayo ukuba ukuthanda kwakhe kuyenziwa esebenzisa ‘imiqondiso yobuxoki nenkohliso engeyoyabulungisa.’ IBhayibhile ide ithi “uzimilisa okwengelosi yokukhanya.” (2 Tesalonika 2:9, 10; 2 Korinte 11:14) Ukubakho kukaMtyholi sinokukubona ngezinto azenzayo. Sekunjalo, abantu abaninzi bakufumanisa kunzima ukukholelwa kubukho bomntu wokomoya ongendawo. Ngaphambi kokuba sihlolisise oko kuthethwa yiBhayibhile ngoMtyholi, makhe sihlole iinkolelo zabantu eziphosakeleyo ezibangela ukuba bangayamkeli into yokuba uMtyholi ungumntu wokwenene.

◼ “UThixo onothando ebenokumdala njani uMtyholi?” Ekubeni iBhayibhile isithi uThixo ulungile yaye ufezekile, kubonakala kungekho ngqiqweni ukucinga ukuba wayenokudala isidalwa esikhohlakeleyo, esinolunya nesingendawo. Inyaniso yeyokuba iBhayibhile ayithi uThixo wadala umntu onjalo. Ngokwahlukileyo koko, ithi uThixo “nguLiwa, ugqibelele umsebenzi wakhe, ngokuba zonke iindlela zakhe zisesikweni. NguThixo wentembeko, tu ubugqwetha; lilungisa yaye uthe tye yena.”—Duteronomi 32:4; INdumiso 5:4.

Ingongoma emasiyihlolisise yeyokuba umntu ofezekileyo odalwe nguThixo unokuyenza kusini na into engalunganga. UThixo akazange adale iirobhothi, kunoko wanika izidalwa zakhe inkululeko yokuzikhethela. Ngoko, isidalwa esifezekileyo nesikrelekrele sinokukhetha ukwenza okulungileyo okanye okubi. Enyanisweni, sisidalwa esikrelekrele nesinenkululeko yokuzikhethela kuphela ebesinokugwetywa ngezinto esizenzayo, enoba singumntu okanye singumntu wokomoya.

Iyaqondakala ke ngoko, into yokuba uThixo engenakunika izidalwa zakhe inkululeko yokuzikhethela aze kwangaxeshanye azithintele ekuyisebenziseni ngendlela ezifuna ukuyisebenzisa ngayo. UYesu wabhekisela ekusebenziseni kakubi kukaMtyholi inkululeko yokuzikhethela xa wathi: “Akemi enyanisweni.” (Yohane 8:44) Loo mazwi abonisa ngokucacileyo ukuba isidalwa esaba nguMtyholi sasikade sifezekile, ngaxa lithile ‘sasimi enyanisweni.’a UYehova uThixo wanika izidalwa zakhe inkululeko yokuzikhethela kuba uyazithanda yaye uyazithemba.—Funda ibhokisi ethi “Ngaba Isidalwa Esifezekileyo Sinokuyeka Ukufezeka?” kwiphepha 6.

◼ “UMtyholi ngumkhonzi kaThixo” IBhayibhile isenokuvakala ngathi iyayixhasa le mbono kwincwadi kaYobhi. Ngokutsho kwenye imbekiselo yeBhayibhile, ibinzana elithi uMtyholi ‘wayebhadula emhlabeni’ libhekisela kwindima yeentlola zamaPersi zamandulo, ezazidla ngokuhambahamba zize zise ingxelo kukumkani wazo. (Yobhi 1:7) Noko ke, ukuba uMtyholi ebeyintlola kaThixo, kwakutheni ukuze kufuneke ukuba achazele uThixo ukuba uvela “ekubhaduleni emhlabeni”? Kunokuba ichaze uMtyholi njengehlakani likaThixo, ingxelo kaYobhi imbiza ngegama elinguSathana, elithetha “Umchasi,” nto leyo ebonisa ukuba uluTshaba olukhulu lukaThixo. (Yobhi 1:6) Ivela phi ingcamango yokuba uMtyholi ngumkhonzi kaThixo?

Kwangenkulungwane yokuqala yeXesha Eliqhelekileyo, iincwadi zeentsomi, ezinjengethi “Book of Jubilees” nethi “Common Rule” zehlelo lamaQumran, zazibonisa uMtyholi ethethathethana noThixo kodwa esenza ukuthanda Kwakhe. Kwincwadi yakhe ethi Mephistopheles, umbhali mbali uJ. B. Russell, uthi uMhlaziyi wobuProtestanti uMartin Luther wayegqala uMtyholi njengesixhobo sikaThixo, “njengesitshetshe sokuthena imithi okanye igaba ahlakula igadi yakhe ngalo.” URussell wolek’ umsundulo esithi, ngokwembono kaLuther, “igaba liyathanda ukugeca ukhula,” kodwa lilawulwa nguThixo, ngaloo ndlela lenza ukuthanda kukaThixo. Imfundiso kaLuther kamva yamkelwa ngumfundi wezakwalizwi ongumFrentshi uJohn Calvin yaza yashiya amakholwa amaninzi edidekile. UThixo onothando wayenokuyenza njani into yokuba angapheleli nje ekuvumeleni ububi kodwa bube kukuthanda kwakhe? (Yakobi 1:13) Le mfundiso, kunye neziphendu zenkulungwane yama-20, ibangele abantu abaninzi abakholelwa kuThixo nakuMtyholi.

◼ “UMtyholi libinzana nje elimela ububi” Ukuthi uMtyholi libinzana nje elimela ububi bekuya kwenza kube nzima ukuqonda iivesi ezininzi zeBhayibhile. Ngokomzekelo, kuYobhi 2:3-6, wayethetha nabani uThixo? Ngaba wayethetha nobubi obabuphakathi kuYobhi, okanye ngaba wayethetha yedwa? Ngaphezu koko, ngaba uThixo wayenokuncoma iimpawu ezintle zikaYobhi aze kwangaxeshanye amlinge ngobubi? Ukutyhola uThixo ngezo zinto bekuya kumenza ibhedengu, kungekhona umntu “ekungekho ntswela-bulungisa kuye.” (INdumiso 92:15) Kunokuba kube njalo, uThixo akazange afune ‘ukolula isandla sakhe’ enzakalise uYobhi. Kucacile ukuba, uMtyholi akalobinzana nje elimela ububi okanye icala elibi lobuntu bukaThixo, kodwa ngumntu ongumoya owazenza Utshaba lukaThixo.

Ngubani Ngokwenene Olawula Ihlabathi?

Namhlanje, abantu abaninzi bavakalelwa kukuba abantu abakholelwa kuMtyholi bashiywe lixesha. Noko ke, ayikho enye indlela evakalayo yokucacisa ububi obukhoyo ngaphandle kobukho bukaMtyholi. Enyanisweni, ukuyikhaba ngawo omane into yokuba uMtyholi ukho kuye kwabangela ukuba abantu abaninzi bamgatye uThixo nemilinganiselo yakhe yokuziphatha.

Imbongi yenkulungwane ye-19 uCharles-Pierre Baudelaire yabhala yathi: “UMtyholi usikhohlisa ngokuseyisela ekubeni sikholelwe ukuba akakho.” Ukuzifihla kukaMtyholi kuye kwenza abantu babuthandabuza ubukho bukaThixo. Ukuba uMtyholi akakho, ngaba loo nto ibingayi kuthetha ukuba uThixo ngunobangela wabo bonke ububi? Ngaba leyo asiyonto uMtyholi afuna abantu bayikholelwe?

Kanye njengenkokeli yezikrelemnqa, uMtyholi uyazifihla ukuze aphumeze injongo yakhe. Iyintoni loo njongo? IBhayibhile iphendula isithi: “UThixo wale nkqubo yezinto aye wamfamekisa iingqondo zabangakholwayo, ukuze ukhanyiso lweendaba ezilungileyo ezizukileyo ezingoKristu, ongumfanekiso kaThixo, lungakhanyi.”—2 Korinte 4:4.

Kuphakama omnye umbuzo obalulekileyo. Yintoni uThixo aza kuyenza ngalo menzi wobubi nako konke ukubandezeleka? Oku kuza kuthethwa ngako kwinqaku elilandelayo.

[Umbhalo osemazantsi]

[Amagama acatshulweyo akwiphepha 5]

Ngaba uMtyholi ngumkhonzi okanye ngumchasi kaThixo?

[Ibhokisi/Umfanekiso okwiphepha 6]

Ngaba Isidalwa Esifezekileyo Sinokuyeka Ukufezeka?

Ukufezeka uThixo akunika izidalwa zakhe ezikrelekrele kusikelwe umda. Nangona wayefezekile ekudalweni kwakhe, kwafuneka uAdam ayithobele imithetho ayibekelwe nguMdali wakhe. Ngokomzekelo, wayengenakutya izinto ezingcolileyo, umhlaba okanye iinkuni aze angenzakali. Ukuba wayengenakuwusa so umthetho womxhuzulane atsibe eliweni, wayeza kufa okanye enzakale.

Ngokufanayo, akukho sidalwa sifezekileyo—esingumntu okanye esiyingelosi—esinokugatya imimiselo kaThixo size singafumani imiphumo yoko. Xa isidalwa esikrelekrele siyisebenzisa kakubi inkululeko yaso yokuzikhethela, siya kuwela lula esonweni.—Genesis 1:29; Mateyu 4:4.