Imibuzo Yabafundi . . .
Yintoni IArmagedon?
▪ Kubantu abaninzi, igama elithi “Armagedon” libenza bacinge ngokutshatyalaliswa kwabantu—imfazwe yenyukliya, iintlekele zemvelo okanye ukonakala kwendalo okubangelwa kukufudumala komhlaba. Igama elisetyenziswe eBhayibhileni alibhekiseli kuyo nanye yezi zinto. Yintoni iArmagedon ekuthethwa ngayo eBhayibhileni?
Ibinzana elithi “Armagedon” (“Har–Magedon,”) likwincwadi yeBhayibhile yeSityhilelo. Libhekisela kwimfazwe ekhethekileyo, “kwimfazwe yemini enkulu kaThixo uSomandla” apho ‘ookumkani bomhlaba omiweyo uphela’ bagayelwa kwimfazwe yokugqibela noThixo. Le mfazwe kuyathethwa ngayo nakwezinye izibhalo.—ISityhilelo 16:14-16; Hezekile 38:22, 23; Yoweli 3:12-14; Luka 21:34, 35; 2 Petros 3:11, 12.
Kwenzeka ntoni kule mfazwe? Ngendlela efuziselayo, incwadi yeSityhilelo isixelela ukuba: ‘Ookumkani bomhlaba nemikhosi yabo bahlanganisana ndawonye ukuba benze imfazwe nalowo uhleli ehasheni kunye nomkhosi wakhe.’ Lowo “uhleli ehasheni kunye nomkhosi wakhe” nguNyana kaThixo, uYesu Kristu, omiselwe nguThixo ukuba akhokele umkhosi wasezulwini weengelosi ekulweni neentshaba zikaThixo. (ISityhilelo 19:11-16, 19-21) UYeremiya 25:33 ubonisa indlela eza kuba nkulu ngayo le ntshabalalo yabantu abangamkhonziyo uThixo: “Abo babuleweyo nguYehova ngaloo mini ngokuqinisekileyo baya kususela kwesinye isiphelo somhlaba.”
Kutheni iyimfuneko iArmagedon? Iintlanga azifuni ukulugqala ulongamo lukaThixo kunoko zifuna ukuzimela geqe. (INdumiso 24:1) Imvukelo yazo ichazwa kwiNdumiso 2:2: “Ookumkani bomhlaba basuke bema namagosa aphakamileyo abuthene ndawonye njengamntu mnye nxamnye noYehova nomthanjiswa wakhe.”
Aba bavukeli banjengabangcuchalazi abanganeli nje ukuhlala kwindawo engeyoyabo kodwa bayayonakalisa. Namhlanje iintlanga ziyawonakalisa umhlaba. ILizwi likaThixo layixela kwangaphambili le meko lisithi: “Iintlanga zaqumba, nengqumbo [kaThixo] yeza.” Uya kwandula ke uThixo ‘onakalise abo bawonakalisayo umhlaba.’ (ISityhilelo 11:18) IArmagedon yindlela kaThixo yokuzinzisa imbambano yokuba ngubani onelungelo lokulawula abantu.—INdumiso 83:18.
Iya kuba nini iArmagedon? UNyana kaThixo wathi: “Akukho bani uwaziyo loo mhla nelo lixa, azazi neengelosi zamazulu engazi noNyana, kodwa nguBawo kuphela.” (Mateyu 24:36) Nakuba kunjalo, xa ethetha ngeArmagedon, uKumkani Ongumlwi uYesu Kristu wongeza esi silumkiso: “Khangela! Ndiza njengesela. Unoyolo lowo uhlala ephaphile.” (ISityhilelo 16:15) Le mfazwe kazwelonke inxulunyaniswa nobukho bukaKristu, iziprofeto zeBhayibhile zibonisa ukuba sele ekho.
IArmagedon iya kutshabalalisa kuphela abo bangendawo bangaguqukiyo yaye kuza kubakho “isihlwele esikhulu” sabo baya kusinda. (ISityhilelo 7:9-14) Baya kukubona ukuzaliseka kwala mazwi: “Kusele ithutyana, angabikho ongendawo; uya kuyikhangela indawo yakhe, abe engekho. Kodwa abalulamileyo baya kuwudla ilifa umhlaba, Baziyolise ngokugqibeleleyo ngobuninzi boxolo.”—INdumiso 37:10, 11.
[Amagama acatshulweyo akwiphepha 10]
“Abalulamileyo baya kuwudla ilifa umhlaba, Baziyolise ngokugqibeleleyo ngobuninzi boxolo”