Ngaba Wenza UYehova Abe Sisabelo Sakho?

“Qhubekani . . . nifuna kuqala ubukumkani nobulungisa bakhe, yaye zonke ezinye izinto ziya kongezelelwa kuni.”—MAT. 6:33.

1, 2. (a) Umela bani “uSirayeli kaThixo” okhankanywe kumaGalati 6:16? (b) Zimela bani, “izizwe ezilishumi elinesibini zakwaSirayeli” ekuthethwa ngazo kuMateyu 19:28?

XA USIVA ngegama elithi Sirayeli eBhayibhileni, yintoni ethi qatha kuwe? Ngaba ucinga ngonyana kaIsake uYakobi, owathiywa igama elithi Sirayeli? Okanye ngaba ucinga ngenzala yakhe, eluhlanga lwakwaSirayeli? Kuthekani ngoSirayeli wokomoya? Xa kuthethwa ngegama elithi Sirayeli ngendlela efuziselayo, ngokuqhelekileyo kubhekiselwa ‘kuSirayeli kaThixo,’ oli-144 000, othanjiswe ngomoya oyingcwele ukuba abe ngookumkani nababingeleli ezulwini. (Gal. 6:16; ISityhi. 7:4; 21:12) Kodwa phawula ukuba kuthethwa ngokukhethekileyo ngezizwe ezili-12 zakwaSirayeli kuMateyu 19:28.

² UYesu wathi: “Ekudalweni okutsha, xa uNyana womntu ehlala phantsi kwitrone yakhe ezukileyo, nina eniye nandilandela niya kuhlala kwiitrone ezilishumi elinesibini, nigweba izizwe ezilishumi elinesibini zakwaSirayeli.” Kule ndinyana, “izizwe ezilishumi elinesibini zakwaSirayeli” ngabo baya kugwetywa ngabafundi bakaYesu abathanjisiweyo, nabaza kufumana ubomi obungunaphakade kwiParadesi esemhlabeni. Baya kungenelwa kwinkonzo yababingeleli abali-144 000.

3, 4. Nguwuphi umzekelo omhle oye wamiselwa ngabathanjiswa abathembekileyo?

³ Kanye njengababingeleli nabaLevi bamandulo, namhlanje abathanjiswa bagqala inkonzo yabo njengelungelo. (Num. 18:20) Abathanjiswa abalindelanga ukuba basikelwe okanye banikwe indawo emhlabeni. Kodwa bakhangele phambili ekubeni ngookumkani nababingeleli ezulwini kunye noYesu Kristu. Baya kuqhubeka bekhonza uYehova kweso sabelo, njengoko kuboniswa koko sikufunda kwiSityhilelo 4:10, 11 ngokuphathelele abathanjiswa kwizigxina zabo zasezulwini.—Hez. 44:28.

⁴ Ngoxa besesemhlabeni, abathanjiswa baphila ngendlela engqina ukuba uYehova usisabelo sabo. Eyona nto ibaluleke kakhulu kubo lilungelo abanalo lokukhonza uThixo. Babonisa ukholo kwidini lentlawulelo likaKristu baze bamlandele ngokuqhubekayo, ngaloo ndlela ‘beqinisekisa ngobizo nokunyulwa kwabo.’ (2 Pet. 1:10) Baneemeko nobuchule obungafaniyo. Sekunjalo, abathi ngenxa yokusikelwa umda bangazibhokoxi kwinkonzo kaThixo. Ngokwahlukileyo, inkonzo kaThixo iza kuqala kubomi babo, yaye benza nantoni na abanokuyenza ukuze bayifeze. Yaye bamisela umzekelo omhle kwabo banethemba lokuphila emhlabeni.

5. Kunokwenzeka njani ukuba onke amaKristu enze uYehova abe sisabelo sawo, yaye kutheni kunokuba lucelomngeni oko?

⁵ Enoba sinethemba lokuphila ezulwini okanye emhlabeni, simele ‘sizincame, sithabathe isibonda sethu sentuthumbo size siqhubeke silandela uKristu.” (Mat. 16:24) Izigidi ezijonge phambili kubomi baseParadesi emhlabeni zinqula uThixo yaye zilandela uKristu ngaloo ndlela. Azaneliswa nje yinkonzo efana nokudlulisa usana kunina ngoxa zinako ukuzibhokoxa. Abantu abaninzi baye baziva benyanzelekile ukuba baphile ubomi obulula baza bangoovulindlela. Abanye bayakwazi ukuthatha inkonzo yobuvulindlela iinyanga ezithile nyaka ngamnye. Ukanti abanye bayazibhokoxa kubulungiseleli nangona bengakwazi ukuba ngoovulindlela. Bafana noMariya ozinikeleyo, owagalela ioli eqholiweyo kwintloko kaYesu. UYesu wathi: “Undenzele into entle. . . . Wenze oko abenako.” (Marko 14:6-8) Kusenokungabi lula ukwenza konke esinako, kuba siphila kwihlabathi eliphethwe nguSathana. Sekunjalo, sizibhokoxa ngamandla size sithembele ngoYehova. Makhe sihlole indlela esikwenza ngayo oko ngeendlela ezine ezingqalileyo.

Ukufuna Kuqala UBukumkani BukaThixo

6. (a) Abantu ngokubanzi babonisa njani ukuba isabelo sabo sikobu bomi kuphela? (b) Kutheni kuyeyona ndlela ibhetele ukujonga izinto njengoDavide?

⁶ UYesu wafundisa abalandeli bakhe ukuba bafune kuqala uBukumkani nobulungisa bukaThixo. Abantu behlabathi badla ngokusukela izinto abazithandayo ‘njengamadoda ale nkqubo yezinto, asabelo sawo sikobu bomi.’ (Funda iNdumiso 17:1, 13-15.) Abantu abaninzi abangamazi nokuba usisiciko sayiphi imbiza uMdali wabo balibala kukuzifunela ubomi obutofotofo, ukukhulisa iintsapho nokusebenzela ilifa labantwana babo. Isabelo sabo sikobu bomi kuphela. Kwelinye icala, uDavide, wayefuna ukuzenzela “igama” elihle noYehova, njengoko nonyana wakhe wakhuthaza bonke abantu ukuba benjenjalo. (INtshu. 7:1) Kanye njengoAsafu, uDavide wabona ukuba, ukuba noMhlobo onguYehova kwakuyeyona nto ibalulekileyo kunokubeka ezakhe izinto kuqala ebomini. Waba nemihlali ekuhambeni noThixo. Kwimihla yethu, amaKristu amaninzi aye abeka izinto zokomoya kuqala kunemisebenzi yawo yempangelo.

7. Ziziphi iintsikelelo ezafunyanwa ngomnye umzalwana ngenxa yokubeka kwakhe kuqala uBukumkani?

⁷ Khawucinge ngoJean-Claude, waseCentral African Republic. Ungumdala otshatileyo onabantwana abathathu. Kwelo lizwe, kunzima ukufumana umsebenzi, yaye abantu abaninzi banokwenza nantoni na ukuze baqhubeke bephangela. Ngenye imini umphathi wakhe wayalela uJean-Claude ukuba asebenze ebusuku—aqale nge-6:30 ngokuhlwa, kangangeentsuku ezisixhenxe ngeveki. UJean-Claude wamxelela ukuba, ngaphezu kokuxhasa intsapho yakhe ngezinto eziphathekayo, umele ayixhase nangokomoya. Wayitsho nento yokuba unembopheleleko yokunceda ibandla. Wathini umphathi? Wathi: “Xa unenyhweba yokuphangela, umele uzilibale zonke ezinye izinto, kuquka umfazi wakho, abantwana bakho neengxaki zakho. Umele uzinikele emsebenzini wakho—qha ke. Umele ukhethe, phakathi konqulo lwakho nomsebenzi wakho.” Ngewawutheni wena kuloo meko? UJean-Claude waqonda ukuba, ukuba wayenokulahlekelwa ngumsebenzi wakhe, uThixo wayeza kumnyamekela. Wayeza kuqhubeka enokuninzi kokwenza kwinkonzo kaThixo, yaye uYehova wayeza kuyinika intsapho yakhe izinto eziphathekayo eziyimfuneko. Ngenxa yoko, waya kwintlanganiso yaphakathi evekini. Emva koko, walungiselela ukuya emsebenzini, engaqinisekanga enoba uya kwamkelwa na emsebenzini. Kanye ngelo xesha, watsalelwa umnxeba. Loo mphathi wayegxothiwe, kodwa wabe yena umzalwana wethu esaphangela.

8, 9. Sinokubaxelisa ngayiphi ingqiqo ababingeleli nabaLevi ngokwenza uYehova abe sisabelo sethu?

⁸ Abanye ekukhe kwenzeka ukuba imisebenzi yabo yempangelo ibe sesichengeni basenokuba bazibuza oku, ‘Ndiza kuyifeza njani imbopheleleko endinayo yokunyamekela intsapho yam?’ (1 Tim. 5:8) Enoba ukhe wajamelana nolo celomngeni okanye akunjalo, kusenokwenzeka uqiniseke ngokusuka kumava akho ukuba, akusayi kuphoxeka ukuba uThixo usisabelo sakho, yaye ulixabisa gqitha ilungelo onalo lokumkhonza. Xa uYesu waxelela abafundi bakhe ukuba baqhubeke befuna kuqala ubukumkani, wabaqinisekisa ngelithi: “Zonke ezinye izinto”—njengokutya, into yokusela, okanye eyokunxiba—“ziya kongezelelwa kuni.”—Mat. 6:33.

⁹ Cinga nje ngabaLevi, abangazange balifumane ilifa elingumhlaba. Ekubeni eyona nto babeyixhalabele yayilunqulo olunyulu, babemele bathembele kuYehova ukuze abanike isixhaso, kuba wayethe kubo: “Ndim isabelo sakho.” (Num. 18:20) Nangona singakhonzi kwitempile yokoqobo njengababingeleli nabaLevi, sinokuxelisa umoya abawubonisayo sibe nentembelo yokuba uYehova uya kusinyamekela. Ukuthembela kwethu kumandla kaThixo okusinyamekela kuya kubaluleka ngakumbi njengoko singena nzulu kwimihla yokugqibela.—ISityhi. 13:17.

Ukufuna Kuqala Ubulungisa BukaThixo

10, 11. Abanye baye bakholosa njani ngoYehova ngokuphathelele umsebenzi wempangelo? Yenza umzekelo.

¹⁰ UYesu waphinda wabongoza abafundi bakhe ukuba ‘baqhubeke befuna kuqala ubulungisa bukaThixo.’ (Mat. 6:33) Oku kuthetha ukubeka imilinganiselo kaThixo yokulungileyo nokubi ngaphambi kwemilinganiselo yabantu. (Funda uIsaya 55:8, 9.) Kusenokwenzeka uyakhumbula ukuba ngaphambili, abantu aliqela babebandakanyeke ekulimeni icuba okanye ekuthengiseni iimveliso zalo, beqeqesha abanye emfazweni, okanye bevelisa baze bathengise izixhobo zemfazwe. Emva kokuba befunde inyaniso, abaninzi bakhetha ukuwutshintsha umsebenzi baza bakufanelekela ukubhaptizwa.—Isa. 2:4; 2 Kor. 7:1; Gal. 5:14.

¹¹ UAndrew ungumzekelo woko. Xa yena nomfazi wakhe bafunda ngoYehova, benza isigqibo sokumkhonza. UAndrew wayewuthanda gqitha umsebenzi wakhe kodwa wawushiya. Ngoba? Kungenxa yokuba wayesebenzela umbutho ongengondilele yaye wayezimisele ukububeka kwindawo yokuqala ubulungisa bukaThixo. Xa uAndrew wawushiya loo msebenzi, wayenabantwana ababini, engafumani mvuzo, yaye wayenemali eyanele iinyanga ezimbalwa kuphela. Ngokwembono yabantu, kwakunokubonakala ngathi ‘akanalifa.’ Wakhangela omnye umsebenzi, ethembele kuThixo. Xa bekhangela emva, yena nentsapho yakhe baqinisekile ukuba isandla sikaYehova asikho sifutshane. (Isa. 59:1) Ngenxa yokugcina ubomi babo bulula, uAndrew nomfazi wakhe baye bafumana nelungelo lokuba kwinkonzo yexesha elizeleyo. Uthi: “Kukhe kwakho amaxesha apho siye saxhalatyiswa yimeko yezoqoqosho, indlu, impilo nokukhula. Kodwa ngalo lonke ixesha uYehova uye wema ngakuthi. . . . Sitsho ngaphandle kwamathandabuzo ukuba, ukukhonza uYehova kuyeyona nto isengqiqweni nenomvuzo enokwenziwa ngabantu namhlanje.”a—INtshu. 12:13.

12. Luluphi uphawu olufunekayo ukuze sibeke imilinganiselo kaThixo kuqala? Yenza imizekelo yasekuhlaleni.

¹² UYesu wathi kubafundi bakhe: “Ukuba ninokholo olulingana nokhozo lwemostade, niya kuthi kule ntaba, ‘Suka apha uye phaya,’ isuke, kungabikho nto eninqabelayo.” (Mat. 17:20) Ngaba ubungakulungela ukubeka imilinganiselo kaThixo kwindawo yokuqala ukuba oko bekuya kukufaka ezingxakini? Ukuba akuqinisekanga, thetha namanye amalungu ebandla. Asinakuyithandabuza into yokuba, ukuva amava awo kunokukuhlaziya ngokomoya.

Ukuxabisa Amalungiselelo KaYehova Okomoya

13. Xa sizibhokoxa enkonzweni kaYehova, sinokulindela ntoni ngokuphathelele amalungiselelo okomoya?

¹³ Ukuba uyalixabisa ilungelo lakho lokukhonza uYehova, unokuqiniseka ukuba uya kukuxhasa ngokwenyama nangokomoya, kanye ngendlela awabaxhasa ngayo abaLevi. Cinga nje ngoDavide. Nangona wayesemqolombeni, wathembela ngoThixo ukuba amkhusele. Nathi sinokuthembela ngoYehova enoba kubonakala kumnyama ngaphambili. Khumbula ukuba xa uAsafu wafikelela “kwingcwele ezukileyo kaThixo,” wakuqonda oko kwakumkhathaza. (INdu. 73:17) Ngokufanayo, kufuneka sibhenele kuThixo njengoMthombo wokutya kwethu kokomoya. Ngaloo ndlela sibonisa uxabiso ngelungelo esinalo lokukhonza uThixo, enoba iimeko zethu zithini na. Ngaloo ndlela siya kuba senza uYehova abe sisabelo sethu.

14, 15. Sifanele sisabele njani xa kukho ukukhanya okungakumbi kwezibhalo ezithile yaye ngoba?

¹⁴ Usabela njani xa uYehova, uMthombo wokukhanya kokomoya, esityhilela ‘izinto ezinzulu zikaThixo’ ezifumaneka eBhayibhileni. (1 Kor. 2:10-13) Sinomzekelo omhle kakhulu kwindlela awasabela ngayo umpostile uPetros xa uYesu wathi kubaphulaphuli bakhe: “Ngaphandle kokuba nitya inyama yoNyana womntu nize nisele igazi lakhe, aninabo ubomi kuni.” Bewathatha ngolo hlobo la mazwi, abafundi bakaYesu abaninzi bathi: “Le ntetho iyothusa; ngubani na onako ukuyiphulaphula?” “Baphindela kwizinto ezisemva.” Kodwa uPetros wathi: “Nkosi, siya kumka siye kubani na? Nguwe onamazwi obomi obungunaphakade.”—Yoh. 6:53, 60, 66, 68.

¹⁵ UPetros wayengakuqondi ngokupheleleyo oko kwakuthethwa nguYesu ngokuphathelele ukutya inyama yakhe nokusela igazi lakhe. Kodwa lo mpostile wathembela kuThixo ukuze afumane ukukhanya kokomoya. Xa ukukhanya kokomoya kukhanya ngakumbi kweminye imiba, ngaba uye uzame ukuqonda izizathu ezisekelwe eZibhalweni zolo tshintsho? (IMize. 4:18) AmaBhereya enkulungwane yokuqala alamkela ilizwi ‘ngeyona ntumekelelo inkulu yengqondo, ezincina ngenyameko iZibhalo mihla le.’ (IZe. 17:11) Ukuwaxelisa kuya kulukhulisa uxabiso onalo ngelungelo lokukhonza uYehova, uze umenze abe sisabelo sakho.

Ukutshata Kuphela ENkosini

16. UThixo unokuba siso njani isabelo sethu ngokuphathelele umyalelo okweyoku-1 kwabaseKorinte 7:39?

¹⁶ Enye inkalo ekufuneka amaKristu ayikhumbule ngokuphathelele iinjongo zikaThixo kukulandela ulwalathiso lweBhayibhile lokutshata “kuphela eNkosini.” (1 Kor. 7:39) Abaninzi baye bakhetha ukuhlala bengatshatanga kunokuba bangalithobeli eli cebiso likaThixo. UThixo ubamkela ngobubele abantu abanjalo. Wenza ntoni uDavide xa waziva elilolo yaye kubonakala ngathi akukho mntu umncedayo? Wathi: “Ndakuphalazela [kuThixo] ukuxhalaba kwam. Ndaqhubeka ndikuxela kuye ukubandezeleka kwam, ekutyhafeni komoya wam ngaphakathi kwam.” (INdu. 142:1-3) Kusenokwenzeka ukuba nomprofeti uYeremiya, owakhonza uThixo ngokuthembeka kangangamashumi eminyaka engatshatanga wakha waneemvakalelo ezifanayo. Ungathanda ukufunda ngomzekelo wakhe njengoko uxutyushwa kwisahluko 8 sencwadi ethi Ilizwi LikaThixo Elidluliselwa Kuthi NgoYeremiya.

17. Omnye udade ongatshatanga uhlangabezana njani nokuba lilolo maxa wambi?

¹⁷ Omnye udade waseUnited States uthi: “Andizange ndizimisele ukuhlala ndingatshatanga. Ndingatshata ukuba ndinokudibana nomntu ofanelekileyo. Umama ongakholwayo wazama ukundeyisela ekubeni nditshate naye nabani na ovelayo. Ndabuza enoba ebengathanda na ukubekeka ityala ukuba umtshato wam unganeengxaki. Ekuhambeni kwexesha, waphawula ukuba ndinomsebenzi osisigxina, ndiyakwazi ukuzinyamekela yaye ndonwabile. Wayeka ukundinyanzela.” Lo dade ukhe abe lilolo. Uthi: “Xa kunjalo, ndiye ndizame ukuthembela ngoYehova. Akazange andilahle.” Yintoni eye yamnceda wathembela kuYehova? “Umthandazo undinceda ndiqonde ukuba uThixo ngumntu wokwenene yaye andindedwa. Oyena Uphakamileyo kwindalo yonke uyaphulaphula, ngoko ndingathini ukungaziva ndiwongiwe yaye ndonwabile?” Eqinisekile ukuba “kunoyolo ngakumbi ukupha kunokwamkela,” uthi: “Ndiye ndizame ukunceda abanye, ndingalindelanga kubuyiselwa nto. Xa ndicinga ukuba, ‘Ndingenza ntoni ukuze ndincede lo mntu?’ ndifumana uvuyo.” (IZe. 20:35) Ngokwenene, uYehova usisabelo sakhe yaye unandipha ilungelo lokumkhonza.

18. UYehova unokukwenza isabelo sakhe ngayiphi ingqiqo?

¹⁸ Enoba uzibona sele ukweyiphi imeko, unokwenza uThixo abe sisabelo sakho. Xa usenjenjalo, uya kuba phakathi kwabantu bakhe abonwabileyo. (2 Kor. 6:16, 17) Oko kunokuphumela ekubeni wena ube sisabelo sikaYehova, njengoko kuye kwanjalo kwabanye kwixesha elidluleyo. (Funda iDuteronomi 32:9, 10.) Kanye njengokuba uSirayeli waba sisabelo sikaThixo phakathi kwezinye iintlanga, unokukuphawula njengowakhe aze akunyamekele ngothando.—INdu. 17:8.

[Umbhalo osemazantsi]

Ubuya Kuphendula Uthini?

Unokumenza njani uYehova abe sisabelo sakho

• ngokufuna kuqala uBukumkani bukaThixo nobulungisa bakhe?

• ngokubonisa uxabiso ngokutya kokomoya?

• ngokuthobela umyalelo kaThixo wokutshata kuphela eNkosini?

[Amagama acatshulweyo akwiphepha 13]

UYehova uba sisabelo sethu xa inkonzo yakhe iyeyona nto iphambili kuthi

[Umfanekiso okwiphepha 15]

Umzekelo kaYeremiya uyasikhuthaza