Abafundi Bayabuza . . .
Ngaba Umhlaba Uza Kuba Usekho Ngowama-2012?
▪ “Idolophana yaseFransi izaliswe ngabantu aboyika ukutshatyalaliswa komhlaba . . . Bakholelwa ukuba umhlaba uza kutshatyalaliswa ngomhla wama-21 kuDisemba 2012, ukuphela kweminyaka engama-5 125 ngokwekhalenda yamandulo yamaMaya.”—Iindaba zejelo losasazo l-BBC News.
Phezu kwalo nje uqikelelo lokutshatyalaliswa komhlaba lweenkokeli zonqulo, nabo bathi bazizazinzulu nabo nabaphi na abanye abantu abaqikelela ikamva lenkulungwane yama-21, umhlaba useza kubakho. Ewe, umhlaba uza kuba usekho ngowama-2012. Eneneni, uMhlaba uza kuqhubeka ukho kungekhona kulo nyaka uzayo kuphela kodwa nakuyo yonke eminye iminyaka eya kulandela emva koko.
IBhayibhile isixelela ukuba: “Kumka esinye isizukulwana, kulandele esinye isizukulwana; ke lona ihlabathi limi ngonaphakade.” (INtshumayeli 1:4 iBhayibhile yesiXhosa) Kwakhona, khawuhlalutye oko kuthethwa kuIsaya 45:18: “UYehova, . . . uMyili womhlaba noMenzi wawo, owuzinzise ngokuqinileyo, nongawudalelanga ilize, kodwa owawubumba ukuba umiwe, utsho ukuthi: “NdinguYehova, akakho omnye.’”
Ngaba utata onothando ochithe ixesha esenzela unyana wakhe okanye intombi yakhe izinto zokudlala zokubonwabisa, kanti uza kuphinda azophule emva kokuba ebenzele? Ibiya kuba yinkohlakalo leyo! Ngendlela efanayo, uThixo udale umhlaba ngokuyintloko ukuze abantu bonwabe. Kwisibini sokuqala, uAdam noEva, uThixo wathi: “Qhamani, nande, niwuzalise umhlaba nize niwoyise.” Emva koko, “uThixo wazibona zonke izinto awayezenzile, khangela! zilunge gqitha.” (Genesis 1:27, 28, 31) UThixo akayityeshelanga injongo yakhe ngomhlaba; ngoko ke akasoze awuvumele ukuba utshatyalaliswe ingafezekanga injongo yakhe. Ngokuphathelele konke oko aye wakuthembisa uYehova, ukuqinisekisa ngokuthi: “Aliyi kubuyela kum ngaphandle kwemiphumo, kodwa ngokuqinisekileyo liya kukwenza oko ndiyoliswa kuko, likuphumelelise ngokuqinisekileyo oko ndilithumele kona.”—Isaya 55:11.
Kakade ke, kukuthanda kukaThixo ‘ukonakalisa abo bawonakalisayo umhlaba.’ (ISityhilelo 11:18) Elizwini lakhe, uthembisa oku: “Abathe tye bona baya kuhlala emhlabeni, nabangenakusoleka baya kusala kuwo. Bona ke abangendawo, baya kunqunyulwa emhlabeni; ke wona amaqhophololo, aya kuncothulwa kuwo.”—IMizekeliso 2:21, 22.
Kuya kwenzeka nini oku? Akukho mntu waziyo. UYesu wathi: “Akukho bani uwaziyo loo mhla okanye elo lixa, azazi neengelosi ezisezulwini engazi noNyana, ngaphandle koBawo.” (Marko 13:32) AmaNgqina kaYehova awanamdla wokwazi ixesha aza kubatshabalalisa ngalo abangendawo uThixo. Nangona ewuphaphele “umqondiso” wesiphelo yaye ekholelwa ukuba uluntu luphila kwixesha elibizwa ngokuba ‘yimihla yokugqibela’ eBhayibhileni, awazi ukuba siza kuba nini kanye kanye “isiphelo.” (Marko 13:4-8, 33; 2 Timoti 3:1) Ezo zinto aziyekela kuYise wawo wasezulwini noNyana wakhe.
Kodwa okwangoku, amaNgqina kaYehova azixakekise ngokushumayela iindaba ezilungileyo zoBukumkani bukaThixo, urhulumente wasezulwini oya kulawula uze uguqule uMhlaba ube yiparadesi enoxolo, leyo ‘amalungisa aya kuhlala kuyo ngonaphakade.’—INdumiso 37:29.
[Inkcazelo Ngomfanekiso okwiphepha 10]
Image Science and Analysis Laboratory, NASA-Johnson Space Center