UAbraham—Indoda Yokholo

UAbraham umi phandle ngobusuku obuzolileyo. Njengoko ekhangele esibhakabhakeni kwiinkwenkwezi eziqaqambileyo, akakwazi kuzibamba ucinga ngesithembiso sikaThixo sokuba inzala yakhe iza kuba ninzi njengezo nkwenkwezi. (Genesis 15:5) KuAbraham iinkwenkwezi zisisikhumbuzo esibonakalayo sesithembiso esenziwe nguYehova. Zikwasisiqinisekiso. Ngapha koko, ukuba uYehova unamandla okukwazi ukudala yonke into, ngaba akanakukwazi ukubangela ukuba uAbraham noSara babe nomntwana? Lwalunjalo ke ukholo luka-Abraham.

YINTONI UKHOLO? Ngendlela elisetyenziswe ngayo eBhayibhileni, igama elithi “ukholo” libhekisela ekukholelweni ngokungagungqiyo kwinto engabonakaliyo. Olo kholo lusekelwe kubungqina obunesihlahla. Umntu onokholo kuThixo unikela ingqalelo ekuzalisekeni kwezithembiso zikaYehova, enentembelo yokuba ziza kuzaliseka.

WAKUBONISA NJANI UKUBA UNOKHOLO UABRAHAM? UAbraham wabonisa ukuba wayezikholelwa izithembiso zikaThixo. Ngokholo uAbraham walishiya ilizwe lokuzalwa kwakhe, eqinisekile ukuba uYehova uza kusigcina isithembiso Sakhe sokumbonisa elinye ilizwe. Ngokholo, uAbraham walitiyhutyha lonke ilizwe laseKanan, eqinisekile ukuba elo lizwe liza kuba lelenzala yakhe. Kwakhona, uAbraham ngokholo wamthobela uThixo wanikela ngonyana wakhe ukuze abe lidini, enentembelo yokuba, ukuba kuyimfuneko, uYehova uya kumvusa uIsake.—Hebhere 11:8, 9, 17-19.

UAbraham wakhangela phambili kungekhona ngasemva. Nangona uAbraham noSara kusenokuba babephila ubomi obutofotofo eUre kunaseKanan, ‘abazange bacinge ngelizwe abalishiya ngasemva.’ (Hebhere 11:15, iToday’s English Version) Kunoko, bacinga ngendlela uThixo awayeza kuba sikelela ngayo bona nenzala yabo kwixa elizayo.—Hebhere 11:16.

Ngaba ukholo luka-Abraham lwalunesiseko esiqinileyo? Ngaphandle kwamathandabuzo. UYehova wazigcina zonke izithembiso zakhe. Ekugqibeleni inzala ka-Abraham yanda yaba luhlanga olubizwa ngokuba nguSirayeli. Ekuhambeni kwexesha, amaSirayeli ahlala kwilizwe lakwaKanan elo uYehova wayemthembise lona uAbraham.—Yoshuwa 11:23.

SIFUNDA NTONI THINA? Sinokuba nentembelo yokuba uYehova uya kuzigcina izithembiso zakhe. Nokuba ezinye zibonakala zingenakwenzeka emehlweni abantu, sinentembelo yokuba “kuThixo izinto zonke zinako ukwenzeka.”—Mateyu 19:26.

Umzekelo ka-Abraham usifundisa ukuba singanikeli ingqalelo kwizinto zexesha elidlulileyo kodwa kwezexesha elizayo. Yiloo nto kanye aye wayifunda uJason. Unesifo esiye ngokuthe ngcembe samshiya engumlwelwe. UJason uthi: “Mandivume ukuba akho amaxesha endikhe ndicinge ngelixa elidlulileyo.” Wongeza athi: “Zizinto ezincinane endizikhumbula kakhulu, njengokwanga umfazi wam uAmanda.”

Nakuba kunjalo, uJason unokholo olungagungqiyo lokuba uYehova uza kuzizalisekisa izithembiso zakhe, kuquka isithembiso sokuba kungekudala umhlaba uza kuba yiparadesi nokuba abantu abathembekileyo baza kufumana ubomi nempilo efezekileyo.a (INdumiso 37:10, 11, 29; Isaya 35:5, 6; ISityhilelo 21:3, 4) UJason uthi:“Ndisoloko ndizikhumbuza ngamaxesha amyoli ezayo. Kungekudala, konke oku kuza kuphela—uxinezeleko, amaxhala, ukuziva ubuhlungu, ukuziva unetyala—konke kuza kuphela ngonaphakade.” Onjani ukuba mhle umzekelo wokholo olufana noluka-Abraham!

[Umbhalo osemazantsi]