Xelisa Umzekelo KaYesu Wokuhlala Ephaphile
“Hlalani nilindile yaye nithandaze.”—MAT. 26:41.
UBUYA KUPHENDULA UTHINI?
Imithandazo yethu iya kubonisa njani ukuba sihlala siphaphile?
Ziziphi iindlela esinokubonisa ngazo ukuba sihlala sibuphaphele ubulungiseleli bethu?
Kutheni kubalulekile ukuba sihlale siphaphile xa sivavanywa yaye sinokukwenza njani oku?
1, 2. (a) Yiyiphi imibuzo esenokuphakama ngokuphathelele umzekelo kaYesu wokuba ngophaphileyo? (b) Ngaba umzekelo kaYesu ofezekileyo unokubanceda abantu abanesono? Zekelisa.
USENOKUZIBUZA: ‘Ngaba sinokukwazi ukuxelisa umzekelo kaYesu wokuhlala elindile? Ngapha koko, uYesu wayefezekile! Ngaphezulu, uYesu maxa wambi wayekwazi ukulibona kakuhle ikamva—kwanakumawakawaka eminyaka emva kwexesha awayephila ngalo emhlabeni! Ngaba ngokwenene kwakuyimfuneko ukuba ahlale ephaphile?’ (Mat. 24:37-39; Heb. 4:15) Makhe siqwalasele loo mibuzo kuqala ukuze sibone indlela ekubaluleke nekungxamiseke ngayo ukuba nathi senjenjalo.
2 Ngaba umzekelo womntu ofezekileyo unokubanceda abantu abanesono? Unako ukubanceda kuba banokukwazi ukufunda kumfundisi olungileyo nakumzekelo wakhe. Ngokomzekelo, khawube nomfanekiso-ngqondweni wendoda eqalayo ukufunda ukutola. Ayinakukwazi ukujolisa utolo kwindawo edubula kuyo, kodwa iyaqhubeka ifunda yaye izama. Ukuze iphucule, ifanele ifunde ngenyameko kumfundisi wayo oyinkcani ekutoleni. Lo mfundi uqwalasela indlela lo titshala wakhe ema ngayo, iindlela azimisa ngayo iingalo zakhe nendlela asibamba ngayo isaphetha. Ngokuthe ngcembe, lo mfundi ufunda indlela amele awusebenzise ngayo umtya; ujonga icala oza kulo umoya aze aqhubeke ezama. Ngokulinganisa oko akubona kumfundisi wakhe, ekugqibeleni ujolisa utolo lwakhe ngenjongo yokuba lubethe kanye apho lujoliswe khona. Ngokufanayo, siqhubeka sisenza konke okusemandleni ethu ukuze siphucule njengamaKristu ngokulandela imiyalelo kaYesu nangokuxelisa umzekelo wakhe ogqibeleleyo.
3. (a) UYesu wabonisa njani ukuba wayelufuna uphawu lokuhlala ephaphile? (b) Siza kuqwalasela ntoni kweli nqaku?
3 Ngoko ke, kuthekani ngokuhlala ephaphile? Ngaba enyanisweni kwakufuneka ukuba uYesu abe nolu phawu? Enyanisweni kwakufuneka abe nalo. Ngokomzekelo, ngobusuku bokugqibela ephila emhlabeni uYesu wababongoza wathi abapostile bakhe abathembekileyo: “Hlalani . . . nilindile kunye nam.” Walek’ umsundulo esithi: “Hlalani nilindile yaye nithandaze ngokuqhubekayo, ukuze ningangeni ekuhendweni.” (Mat. 26:38, 41) Nangona waqhubeka ephaphile, ngeeyure zoxinezeleko uYesu wayefuna ngakumbi ukuhlala ephaphile yaye esondele kuYise wasezulwini kangangoko kwakunokwenzeka. Wayesazi ukuba abalandeli bakhe kufuneka baphaphe ngendlela efanayo—kungekuphela nje ngelo xesha kodwa kwanakwixesha elizayo. Ngoko makhe sihlolisise isizathu sokuba uYesu afune ukuba sihlale siphaphile. Emva koko, siza kuqwalasela iindlela ezintathu esinokukuxelisa ngazo ukuhlala kukaYesu ephaphile kubomi bethu bemihla ngemihla.
ISIZATHU SOKUBA UYESU AFUNE UKUBA SIHLALE SIPHAPHILE
4. Kukuphi ukunxibelelana okukhoyo phakathi koko singakwaziyo ngekamva nemfuneko yokuba sihlale siphaphile?
4 Ngamafutshane, uYesu ufuna sihlale siphaphile ngenxa yoko singakwaziyo kwanangenxa yoko sikwaziyo. Xa uYesu wayesemhlabeni, ngaba wayekwazi konke oko kwakuza kwenzeka kwikamva? Akunjalo, kuba ngokuthobeka wavuma esithi: “Akukho bani uwaziyo loo mhla nelo lixa, azazi neengelosi zamazulu engazi noNyana, kodwa nguBawo kuphela.” (Mat. 24:36) Ngelo xesha uYesu, ‘uNyana,’ wayengazi ukuba kuza kufika nini ukupheliswa kwale nkqubo yezinto. Kuthekani ngathi namhlanje? Ngaba sazi yonke into ngokuphathelele ikamva? Akunjalo! Asilazi ixesha uYehova aza kuthumela ngalo uNyana wakhe ukuze atshabalalise le nkqubo yezinto ingendawo. Ukuba besilazi, ngaba ibiza kubakho imfuneko yokuba sihlale siphaphile? Njengokuba uYesu watshoyo, isiphelo siya kufika ngequbuliso, singalindelanga; ngoko simele sihlale siphaphile kunanini na ngaphambili.—Funda uMateyu 24:43.
5, 6. (a) Ukwazi ngoko kuza kwenzeka kwixesha elizayo nangokwazi ngeenjongo zikaThixo kuyichaphazela njani imfuneko yokuhlala siphaphile? (b) Kutheni ukwazi kwethu uSathana kufanele kusenze sizimisele ngakumbi ukuhlala siphaphile?
5 Kwelinye icala, uYesu wayezazi izinto ezininzi ezimangalisayo eziza kwenzeka kwixesha elizayo—inyaniso eyayingaziwa kwaphela ngabantu abaninzi ababemngqongile. Ulwazi esinalo aluthathi nto kolo lukaYesu, kodwa ngenxa yakhe ininzi into esiyaziyo ngoBukumkani bukaThixo noko buya kukuphumeza kwixesha elizayo. Xa sijonga abantu esiphila phakathi kwabo, enoba kusesikolweni, emsebenzini okanye kwintsimi esinikela kuyo ubungqina, ngaba siyayiphawula into yokuba abantu abaninzi basebumnyameni ngokuphathelele le nyaniso ibalulekileyo? Ngoko le nto isibonisa esinye isizathu sokuhlala siphaphile. Kanye njengoYesu, kufuneka sihlale siphaphile, sikhangela nawaphi na amathuba esinawo okuxelela abantu oko sikwaziyo ngoBukumkani bukaThixo. Thuba ngalinye elinjalo lixabisekile yaye asifuni kudlala ngalo. Ubomi babantu busengozini!—1 Tim. 4:16.
6 UYesu wayesazi enye into eyayimnceda ahlale ephaphile. Wayesazi ukuba uSathana wayezimisele ukumlinga, ukumtshutshisa nokwaphula ingqibelelo yakhe. Olu tshaba lukhohlakeleyo lwalusoloko lukhangela ‘elinye ixesha elililungeleyo’ ukuze lilinge uYesu. (Luka 4:13) UYesu wayesoloko ethe qwa. Wayefuna ukulungela naluphi na uvavanyo, isilingo, inkcaso okanye ukutshutshiswa. Ngaba kungathethwa okufanayo nangathi? Siyayazi ukuba uSathana ‘usenjengengonyama egqumayo, efuna ubani engamqwengayo.’ Yiloo nto iLizwi likaThixo libongoza onke amaKristu lisithi: “Hlalani nithe qwa, nilindile.” (1 Pet. 5:8) Noko ke, singakwenza njani oku?
INDLELA YOKUHLALA SIPHAPHILE NGOKUTHANDAZA
7, 8. Sisiphi isiluleko uYesu awasinikelayo ngokuphathelele umthandazo, ibe wamisela wuphi umzekelo?
7 IBhayibhile ithi kukho ukunxibelelana phakathi kokuthandaza nokuhlala sithe qwa ngokomoya, okanye siphaphile. (Kol. 4:2; 1 Pet. 4:7) Kungethuba lide emva kokucela abalandeli bakhe ukuba bahlale bephaphile kunye naye, uYesu wathi: “Hlalani nilindile yaye nithandaze ngokuqhubekayo, ukuze ningangeni ekuhendweni.” (Mat. 26:41) Ngaba eso siluleko wasiphelelisela kwimeko enzima ababejamelene nayo ngelo xesha? Akunjalo, kodwa isiluleko sakhe singumgaqo esimele siphile ngawo mihla le.
8 UYesu wasimisela umzekelo obalaseleyo wokuthandaza. Usenokukhumbula ukuba wakha wachitha ubusuku bonke ethandaza kuYise. Makhe sibe nomfanekiso ngqondweni wale meko. (Funda uLuka 6:12, 13.) Kusentwasahlobo mhlawumbi kufutshane nedolophu yaseKapernahum ekulotywa kuyo nekwalikhaya likaYesu. Ngorhatya lwemivundla, unyuka enye yeentaba ezimelene noLwandle lwaseGalili. Njengoko ebukele ubumnyama busithi rhwelele, mhlawumbi wamkelwa ngulozi-lozi wezibane zamafutha eziseKapernahum nakwezinye iilali ezikufutshane. Noko ke, xa uYesu ethetha noYehova unikela ingqalelo ngokupheleleyo kumthandazo wakhe. Kudlula imizuzu de ibe ziiyure. Ayimkhathazi nakancinane into yokucima kwezibane emizini okanye eyokuhamba kwenyanga kwaneyokudakasa kwezilwanyana ezingalaliyo ebusuku. Kusenokwenzeka ukuba emthandazweni wakhe ugxininisa kwisigqibo esikhulu ekufuneka esenzile—eso sokukhetha abapostile abali-12. Sinokuyicinga indlela uYesu awayenikela ingqalelo ngayo ekuxeleleni uYise indlela acinga ngayo noko kumxhalabisayo ngomfundi ngamnye njengoko ecela ulwalathiso nobulumko.
9. Sinokufunda ntoni kumzekelo kaYesu wokuthandaza ubusuku bonke?
9 Sinokufunda ntoni kumzekelo kaYesu? Ngaba sifunda ukuba simele sithandaze kangangeeyure eziliqela? Akunjalo, kuba ngenxa yolwazelelelo wathetha oku ngabafundi bakhe: “Umoya unentumekelelo, kodwa inyama ibuthathaka.” (Mat. 26:41) Sekunjalo, sinokumxelisa uYesu. Ngokomzekelo, ngaba siyathandaza kuBawo wethu osezulwini ngaphambi kokwenza nasiphi na isigqibo esinokuchaphazela thina, intsapho yethu okanye amanye amaKristu ngokomoya? Ngaba imithandazo yethu iquka ukuxhalabela abazalwana noodadewethu esikhonza kunye nabo? Ngaba sithandaza ngokusuka entliziyweni kunokuphindaphinda amabinzana afanayo? Ngoko, phawula ukuba uYesu wayekuxabisa ukuthetha ngasese nangokusuka entliziyweni noYise. Kweli hlabathi lixakekileyo kulula gqitha ukuphithizeliswa zizinto zobomi kangangokude sizilibale ezona zinto zibalulekileyo. Ukuba sizinika ixesha elaneleyo lokuthandaza ngasese nangokusuka entliziyweni, siya kuphapha ngakumbi ngokomoya. (Mat. 6:6, 7) Siya kusondela ngakumbi kuYehova, sizimisele ukomeleza ulwalamano lwethu kunye naye size siphephe nantoni na enokulwenza buthathaka.—INdu. 25:14.
INDLELA YOKUHLALA SIPHAPHILE KUMSEBENZI WOKUSHUMAYELA
10. Nguwuphi umzekelo osibonisa indlela uYesu awahlala ewaphaphele ngayo amathuba okunikela ubungqina?
10 UYesu wayewuphaphele umsebenzi awawabelwa nguYehova. Kusenokubakho imisebenzi enokubangela ukuba ingqondo yalowo uyenzayo ibhadule kodwa loo nto ingabi namiphumo iyintlekele. Noko ke, imisebenzi emininzi ifuna sinikele ingqalelo size siphaphe yaye ubulungiseleli bamaKristu bufuna loo nto kanye. UYesu wayesoloko ewuphaphele umsebenzi wakhe, ekhangela namathuba okwabelana nabanye ngeendaba ezilungileyo. Ngokomzekelo, xa yena nabafundi bakhe bafika kwidolophu yaseSikare emva kokuhamba intsasa yonke, abafundi bakhe baya kuthenga ukutya. UYesu waphumla kufutshane nequla elikuloo dolophu kodwa wahlala ephaphile waza wabona ithuba lokunikela ubungqina. Kwafika ibhinqa elingumSamariya lize kukha amanzi. UYesu ngewayekhethe ukulala. Ngewayecinge ngezizathu zokuphepha ukuncokola nalo. Kunoko, wakhetha ukuthetha nalo waza wanikela ubungqina obunamandla obachaphazela abantu abaninzi kuloo dolophu. (Yoh. 4:4-26, 39-42) Ngaba sinokuwuxelisa ngokusondeleyo umzekelo kaYesu wokuhlala ephaphile, mhlawumbi sizama ukuwaphaphela ngakumbi amathuba okwabelana ngeendaba ezilungileyo nabantu esidibana nabo mihla le?
11, 12. (a) UYesu wasabela njani kwabo babephazamisana nomsebenzi wakhe? (b) UYesu walungelelana njani ngokuphathelele umsebenzi wakhe?
11 Maxa wambi, abantu abaneenjongo ezintle bazama ukumphazamisa uYesu ekwenzeni umsebenzi wakhe. EKapernahum, izihlwele zachukunyiswa yimimangaliso yokuphilisa eyenziwa nguYesu kangangokuba bafuna ahlale nabo. Siyaqondakala isizathu saloo nto. Noko ke, uYesu wayethunywe ukuba ashumayele kuzo zonke ‘izimvu ezilahlekileyo zendlu kaSirayeli’ kungekuphela nje kwezo zesixeko esinye. (Mat. 15:24) Ngenxa yoko, wathi kwaba bantu: “Ndimele ndizivakalise iindaba ezilungileyo zobukumkani bukaThixo nakwezinye izixeko, ngenxa yokuba ndithunywe oko.” (Luka 4:40-44) Kucacile ukuba, uYesu wayephilela ukubufeza ubulungiseleli bakhe. Wayengavumeli nantoni na imphazamise.
12 Ngaba uYesu wanikela ingqalelo kumsebenzi wakhe kangangokude abe nenzondelelo yempambano okanye azibandeze ulonwabo? Ngaba wayezibhokoxa kubulungiseleli bakhe ade angazihoyi iimfuno zeentsapho? Akunjalo, kuba uYesu wasibonisa umzekelo ogqibeleleyo wokulungelelana kule nkalo. Wabunandipha ubomi, eyoliswa ngamathuba amahle kunye nabahlobo bakhe. Wayezixabisa iintsapho, evelana ngokusuk’ entliziyweni nezo zineemfuno neengxaki yaye wayebathanda gqitha abantwana.—Funda uMarko 10:13-16.
13. Sinokuwuxelisa njani umzekelo kaYesu wokuba ngabaphaphileyo nabalungeleleneyo ngokuphathelele umsebenzi wethu wokushumayela ngoBukumkani?
13 Njengoko sixelisa umzekelo kaYesu wokuba ngabaphaphileyo, sinokuzama njani ukuba ngabalungeleleneyo njengaye? Asimele sivumele eli hlabathi ukuba lisiphazamise kumsebenzi wethu. Nkqu abahlobo nezalamane zethu zinokusibongoza ukuba sihlise isantya kubulungiseleli bethu okanye siphile ubomi ezithi bubomi obuqhelekileyo. Noko ke, ukuba sixelisa uYesu siya kubugqala ubulungiseleli bethu bubaluleke kanye njengokutya. (Yoh. 4:34) Ubulungiseleli bethu buyabomeleza ubumoya bethu yaye busenza sonwabe. Sekunjalo, asifuni kuzibaxa izinto, sizenze amalungisa agqithiseleyo okanye sizibandeze ulonwabo. NjengoYesu, sifuna ukonwaba, sibe ngabakhonzi abalungeleleneyo ‘boThixo onoyolo.’—1 Tim. 1:11.
INDLELA YOKUHLALA SIPHAPHILE XA SIVAVANYWA
14. Xa sivavanywa, yintoni esidla ngokuyenza ekufuneka siyiphephe yaye ngoba?
14 Njengoko sesiphawulile, ezinye izibongozo zikaYesu ezingxamisekileyo zokuhlala siphaphile wazichaza xa wayephantsi kovavanyo oluqatha. (Funda uMarko 14:37.) Xa sijamelene nobunzima, sikufuna ngamandla ukuxelisa umzekelo wakhe. Xa sivavanywa, uninzi lwethu ludla ngokulibala le nyaniso ibalulekileyo ichazwa kabini kwincwadi yeMizekeliso: “Kukho indlela ethe tye phambi komntu, kodwa emva koko ziindlela zokufa.” (IMize. 14:12; 16:25) Ukuba sisoloko sithembela ngendlela yethu yokucinga, ingakumbi xa sijamelene neengxaki ezinzulu, sinokubeka thina engozini kwanabo sibathandayo.
15. Intloko-ntsapho inokulingelwa entwenini xa imeko yezoqoqosho imaxongo?
15 Ngokomzekelo, intloko-ntsapho isenokujamelana nobunzima bokunyamekela ‘abo bangabayo.’ (1 Tim. 5:8) Inokulingelwa ekubeni yenze umsebenzi oza kuyenza ingabikho kwiintlanganiso zamaKristu, ingakwazi ukuqhuba unqulo lwentsapho okanye ibe nenxaxheba kubulungiseleli. Ukuba ijonga izinto ngeliso lenyama, inokulibona lifanelekile elo khondo. Noko ke, loo nto inokuyigulisa okanye iyibulale ngokomoya. Bekuya kuba bubulumko ngokwenene ukuthobela isiluleko esikwiMizekeliso 3:5, 6! USolomon wathi: “Kholosa ngoYehova ngayo yonke intliziyo yakho, ungayami ngokwakho ukuqonda. Uze umgqale yena ezindleleni zakho zonke, kwaye uya kuwenza uthi tye umendo wakho.”
16. (a) UYesu wasimisela njani umzekelo wokuthembela ngobulumko bukaYehova kunokuthembela ngobakhe? (b) Iintloko-ntsapho ezininzi ziwuxelisa njani umzekelo kaYesu wokuthembela ngoYehova ngamaxesha obunzima?
16 Xa wayelingwa, uYesu wema eqinile yaye akazange avume ukwayama ngokwakhe ukuqonda. Khawufan’ ucinge! Eyona ndoda isisilumko yakha yaphila kulo mhlaba yakhetha ukungathembeli ngobayo ubulumko ukuze ifumane isicombululo. Ngokomzekelo, xa uSathana wayemhenda, ngokuphindaphindiweyo uYesu waphendula ngamazwi athi: “Kubhaliwe kwathiwa.” (Mat. 4:4, 7, 10) Wathembela kubulumko bukaYise ukuze aphephe izilingo ebonisa ukuthobeka, phawu olo angalufuniyo uSathana nangenalo kwaphela. Ngaba senza okufanayo? Intloko-ntsapho ehlala iphaphile njengoYesu ivumela iLizwi likaThixo liyikhokele ingakumbi xa ivavanywa. Ehlabathini lonke, amawakawaka eentloko-ntsapho enza kanye loo nto. Ngokuzimisela iintloko-ntsapho zibeka uBukumkani bukaThixo nonqulo olunyulu kuqala ebomini bazo kwanangaphambi kweemfuno zezinto eziphathekayo. Ngenxa yoko, zinyamekela iintsapho zazo ngendlela esemagqabini. UYehova uyayisikelela imigudu yazo yokwanelisa iimfuno zezinto eziphathekayo kanye njengokuba lithembisa iLizwi lakhe.—Mat. 6:33.
17. Yintoni ekushukumisela ekubeni uxelise umzekelo kaYesu wokuhlala ephaphile?
17 Ngaphandle kwamathandabuzo, uYesu wasimisela umzekelo ongenakuthelekiswa nanto wokuhlala ephaphile. Umzekelo wakhe uyasinceda yaye unokusindisa ubomi. Khumbula, uSathana uzimisele ukusozelisa ngokomoya, asenze sibe nokholo olubuthathaka, sidlulis’ usana kunina kunqulo lwethu size silahle ingqibelelo yethu. (1 Tes. 5:6) Musa ukumvumela ukuba akoyise! Hlala uphaphile kanye njengoYesu—uhlale ukuphaphele ukuthandaza, ubuphaphele ubulungiseleli bakho uze uphaphe naxa ujamelene neemvavanyo. Ngokulandela elo khondo uya kuphila ubomi obumnandi nobanelisayo kwanangezi ntsuku zokugqibela zale nkqubo yezinto. Ukuhlala uphaphile kuya kuqinisekisa ukuba xa iNkosi yakho isiza kuphelisa le nkqubo, iya kukufumana uphaphile usenza umsebenzi kaYise. UYehova uya kukuvuyela ngokwenene ukukunika umvuzo ngenxa yokuthembeka kwakho!—ISityhi. 16:15.
[Umfanekiso okwiphepha 6]
UYesu washumayela kwibhinqa elalingasequleni. Ngawaphi amathuba wena owasebenzisayo ukuze ushumayele imihla ngemihla?
[Umfanekiso okwiphepha 7]
Ukunyamekela intsapho yakho ngokomoya kubonisa ukuba uhlala uphaphile