UNatan—Ummeli Othembekileyo Wonqulo Olunyulu
Kunzima ukuxelela indoda enamandla ukuba iindlela zayo zingendawo yaye kufuneka izitshintshe. Ngaba wawunokukwazi ukumelana naloo mntu, ingakumbi ukuba ubusazi ukuba ebesandul’ ukubulala enye indoda ngenjongo yokufihla isono sakhe?
UKumkani uDavide woSirayeli wamandulo wakrexeza noBhatshebha, yaye lo mfazi wakhulelwa. Ukuze afihle isono sabo, uDavide wabulalisa umyeni wakhe waza wamtshata uBhatshebha. Kwadlula iinyanga uDavide ephila ubomi obumbaxa, ngokuqinisekileyo wayeqhubeka esenza imisebenzi yakhe yasebukhosini. Kodwa uYehova akazange avumele ukuba izono zalo kumkani zihlale zifihlakele. Wathumela umprofeti wakhe uNatan ukuba aye kuthetha noDavide.
Yayingumsebenzi onzima lo. Khawuzibeke ezihlangwini zikaNatan. Ngokungathandabuzekiyo, ukuthembeka kuYehova nokubambelela ngokuqinileyo kwimilinganiselo kaThixo kwakhuthaza uNatan ukuba aye kukhumbuza uDavide ngezono zakhe. Lo mprofeti wayeza kuyiqala ngaphi into yokubonisa uKumkani uDavide ukuba kufuneka aguquke?
UMFUNDISI ONOBUCHULE
Khawukhe uthabathe nje imizuzwana uze ufunde eyesi-2 kaSamuweli 12:1-25. Khawuzibone umi kwindawo awayemi kuyo uNatan njengoko wayebalisela uDavide eli bali: “Kwakukho amadoda amabini awayekwisixeko esinye, enye isisityebi yaye enye iswele. Le ndoda isisityebi yayineegusha neenkomo ezininzi kakhulu; kodwa indoda esweleyo yayingenanto ngaphandle nje kwethokazi lemvu, elincinane, eyayilithengile. Yaligcina liphila, yaye lalikhula nayo kunye noonyana bayo, xa bebonke. Lalisidla eqhekezeni layo, kwaye lalisela endebeni yayo, lalilala esifubeni sayo, laba njengentombi kuyo. Ethubeni kwafika undwendwe kule ndoda isisityebi, kodwa yayeka ukuthabatha kwezayo izimvu nezayo iinkomo ukuze ilungiselele umhambi lowo wayefike kuyo. Ngoko yathabatha ithokazi lemvu lendoda esweleyo yaza yalilungiselela indoda eyayifikele kuyo.”—2 Sam. 12:1-4.
Ngokuqinisekileyo uDavide—owayekhe wangumalusi—wayeqonda ukuba inokwenzeka into enje. Omnye umgqabazi uthi: “Mhlawumbi uNatan wayeqhelile ukuza kungxengxezela abantu abenzakeleyo ababengenayo enye indlela yokubuyekezwa yaye uDavide wakugqala oku njengethuba lokwenza umsebenzi wakhe.” Kwanokuba kwakunjalo, kwakufuna ukuthembeka kuThixo nokuba nenkalipho ukuze uNatan athethe nokumkani ngendlela awenza ngayo. Ibali likaNatan lamcaphukisa uDavide. Wathi: “Ephila nje uYehova, indoda eyenza oku ifanelwe kukufa. UNatan wathetha la mazwi atsho kabuhlungu: “Wena ngokwakho uyiloo ndoda!”—2 Sam. 12:5-7.
Khawuhlolisise isizathu sokuba uNatan ayilungise ngolo hlobo le ngxaki. Kunzima ngomntu owakhe ulwalamano olusenyongweni nomnye ukujonga imeko yakhe ngendlela eyiyo. Sonke sityekele ekuzithetheleleni xa izinto esizenzayo zithandabuzeka. Kodwa umzekeliso kaNatan wabangela ukuba uDavide ngokuzenzekelayo agxeke izono zakhe. Lo kumkani wazibonela ngokucacileyo ukuba ihambo eyayichazwa nguNatan yayimbi gqitha. Noko ke, kwaba semva kokuba uDavide sele eyicekisile awathi uNatan wachaza ukuba lo mzekeliso wawubhekisela kukumkani. Emva koko, uDavide wabubona ubukhulu besono sakhe. Oku kwamnceda waba nesimo sengqondo esihle sokwamkela isohlwayo. Wavuma ukuba ngokwenene ‘wamdelela’ uYehova ngento awayenza noBhatshebha yaye wasamkela isohlwayo esasimfanele.—2 Sam. 12:9-14; INdu. 51, umbhalo osemantla.
Sinokufunda ntoni koku? Injongo yomntu ofundisa abanye iBhayibhile kukunceda abo bamphulaphuleyo ukuba bafikelele kwisigqibo esifanelekileyo. UNatan wamhlonela uDavide yaye wathetha naye ngobuchule. UNatan wayesazi ukuba uDavide ubuthand’ egazini ubulungisa nokusesikweni. Umzekelo walo mprofeti wafikelela ezi mpawu zintle. Nathi sinokubanceda abantu abanyanisekileyo ukuba bayiqonde imbono kaYehova. Sinokukwenza njani oko? Ngokufikelela imilinganiselo esezintliziyweni zabo yoko kulungileyo, ngaphandle kokuba sizenze oongcwelengcwele. YiBhayibhile, kungekhona iimbono zethu esichazela ngoko kulungileyo nokubi.
Ngaphezu kwayo nantoni na, kukuthembeka kuThixo okwabangela ukuba uNatan ohlwaye lo kumkani unamandla. (2 Sam. 12:1) Ngokufanayo kukuthembeka okuya kusinika inkalipho yokuyimela ngokuqinileyo imigaqo kaYehova yobulungisa.
WAKHUTHAZA UNQULO OLUNYULU
Kuyabonakala ukuba uDavide noNatan babengabahlobo abasenyongweni kuba uDavide wathiya unyana wakhe ngokuba nguNatan. (1 Kron. 3:1, 5) Ukuqala kwethu ukuva ngoNatan kwingxelo yeBhayibhile, wayekunye noDavide. Bobabini babemthanda uYehova. Ngokuqinisekileyo lo kumkani wayeyithemba indlela uNatan azibona ngayo izinto, kuba wawudiza kulo mprofeti umnqweno wakhe wokwakha itempile kaYehova. UDavide wathi: “‘Yabona, ke, ndihlala endlwini yemisedare ngoxa ityeya kaThixo oyinyaniso ihlala phakathi kwamalaphu entente.’ Kuloo nto ke uNatan wathi kukumkani: ‘Yonk’ into esentliziyweni yakho—hamba, uyenze, ngenxa yokuba uYehova unawe.’”—2 Sam. 7:2, 3.
Njengomnquli othembekileyo kaYehova, uNatan wayixhasa ngokuzimisela iplani kaDavide yokwakha isazulu sokuqala esisisigxina sonqulo olunyulu emhlabeni. Noko ke, kuyabonakala ukuba ngeso sihlandlo uNatan wayechaza indlela yena avakalelwa ngayo kunokuba abe wayethetha egameni likaYehova. Ngobo busuku, uThixo wayalela umprofeti wakhe ukuba ase isigidimi esahlukileyo kukumkani: uDavide wayengazi kumakhela itempile uThixo. Loo msebenzi wawuza kwenziwa ngomnye unyana kaDavide. Kodwa uNatan wavakalisa ukuba uThixo wayesenza umnqophiso noDavide owawuqinisekisa ukuba itrone yakhe iya “kumiselwa ngokuqinileyo ukusa kwixesha elingenammiselo.”—2 Sam. 7:4-16.
Ukuthanda kukaThixo kwakungavumelani nendlela uNatan awayezibona ngayo izinto ngokuphathelele ukwakhiwa kwetempile. Noko ke, ngaphandle kokumbombozela lo mprofeti uthobekileyo wenza ngokuvumelana nenjongo kaYehova. Ngumzekelo obalasele ngokwenene esimele siwuxelise xa uThixo esilungisa ngandlela ithile! Imisebenzi awayenzayo uNatan emva koko njengomprofeti ibonisa ukuba akazange aphulukane nenkoliseko kaThixo. Enyanisweni, kuyabonakala ukuba uYehova waphefumlela uNatan kunye noGadi imboni ukuba balathise uDavide ekugayeni iimvumi ezingama-4 000 ukuze zenze inkonzo yasetempileni.—1 Kron. 23:1-5; 2 Kron. 29:25.
WAKHUSELA UBUKUMKANI
UNatan wayesazi ukuba nguSolomon oza kungena ezihlangwini zikaDavide osele ekhulile abe ngukumkani. Ngoko uNatan wenza ngenkalipho xa uAdoniya wazama ukubhukuqa ulawulo lukaDavide, xa wayesele aluphele. Nalapha uNatan wenza ngendlela ebonisa ubuchule nokuthembeka. Waqala ngokubongoza uBhatshebha ukuba akhumbuze uDavide ngesifungo awasenzayo sokubeka unyana wabo uSolomon abe ngukumkani. Emva koko, uNatan waya kukumkani, waza wabuza enoba kwakugunyazwe nguye kusini na ukuphatha kuka-Adoniya. Ebuqonda ubunzulu bale meko, lo kumkani walupheleyo wayalela uNatan nabanye abakhonzi abathembekileyo ukuba baqinisekise ukuba uSolomon uyathanjiswa aze avakaliswe engukumkani. Ubhukuqo luka-Adoniya lwaphanza.—1 Kum. 1:5-53.
WAYENGUMBHALI-MBALI ONGAZIPHAKAMISANGA
Kudla ngokuthiwa nguNatan noGadi ababhala eyoku-1 kaSamuweli isahluko 25 ukuya kutsho kwesama-31 kwakunye nayo yonke eyesi-2 kaSamuweli. Ngokuphathelele imbali ephefumlelweyo ekwezo ncwadi, kuthiwa: “Ke yona imicimbi kaDavide ukumkani, eyokuqala neyokugqibela, ibhaliwe ngamazwi kaSamuweli imboni nangamazwi kaNatan umprofeti emazwini kaGadi imboni.” (1 Kron. 29:29) Kanti igama likaNatan liyavela ekuqulunqweni kwengxelo ephathelele “imicimbi kaSolomon.” “Ke eminye imicimbi kaSolomon, eyokuqala neyokugqibela, ayibhalwanga na phakathi kwamazwi kaNatan umprofeti naseziprofetweni zika-Ahiya umShilo nakwingxelo yemibono kaIdo imboni ngokuphathelele uYerobhoham unyana kaNebhati?” (2 Kron. 9:29) Kusenokwenzeka ukuba, oku kuthetha ukuba uNatan waqhubeka enegalelo kwimicimbi yakomkhulu nasemva kokufa kukaDavide.
Kusenokwenzeka ukuba uninzi lwezinto esizaziyo ngoNatan zabhalwa ngulo mprofeti ngokwakhe. Sekunjalo ukungathethi kwakhe ngezinto ezithile kusixelela lukhulu ngaye. Kuyabonakala ukuba uNatan wayengumbhali-mbali ongaziphakamisanga. Wayengenamabhongo yaye engafuni kuzenzela igama. Esinye isichazi-magama seBhayibhile sathi, uyavela kwingxelo ephefumlelweyo “engenayo ingabula-zigcawu kungachazwa nemvelaphi yakhe.” Akukho nto siyaziyo ngomlibo wakhe wokuzalwa okanye ubomi awayebuphila.
WAYEKHUTHAZWA KUKUTHEMBEKA KUYEHOVA
Kula magqabantshintshi angobomi bukaNatan eZibhalweni, kucacile ukuba wayethobekile kodwa ewamela ngenzondelelo amalungiselelo kaThixo. UYehova uThixo wamnika iimbopheleleko ezinzima. Camngca ngeempawu zikaNatan, ezifana nokuthembeka kuThixo noxabiso olunzulu ngamalungiselelo kaThixo. Zama ukuzixelisa ezo mpawu.
Kusenokungabi yomfuneko ukuba wohlwaye ookumkani abakrexezayo okanye uthintele ubhukuqo. Noko ke, uThixo unokukunceda ukuba uthembeke kuye uze umele imilinganiselo yakhe yobulungisa. Kanti unokuba ngumfundisi wenyaniso onenkalipho kodwa onobuchule uze ukhuthaze unqulo olunyulu.
[Umfanekiso okwiphepha 25]
Njengomkhuseli wobukumkani, uNatan wathetha ngobuchule noBhatshebha