Sifanele Sikukhumbule Njani Ukufa KukaYesu?

Eli nqaku libuza imibuzo ekunokwenzeka ukuba ukhe wazibuza yona lize likubonise iimpendulo zalo eBhayibhileni. AmaNgqina kaYehova aya kukuvuyela ukuthetha nawe ngeempendulo zale mibuzo.

1. Kufanele kukhunjulwe njani ukufa kukaYesu?

UYesu waxelela abalandeli bakhe ukuba bakhumbule ukufa kwakhe ngesidlo sokomfuziselo, besebenzisa isonka newayini. Isonka simela umzimba kaYesu, yona iwayini imela igazi lakhe.—Funda uLuka 22:19, 20.

Isonka esasetyenziswa nguYesu sasingenagwele. EBhayibhileni igwele lidla ngokufuzisela isono. Isonka sasiwufuzisela kakuhle umzimba kaYesu ofezekileyo. Wanikela ngomzimba wakhe njengedini, elaphelisa amadini awayesenziwa ngezilwanyana ngaphantsi koMthetho kaMoses. (Hebhere 10:5, 9, 10) Iwayini yona yayifuzisela igazi likaYesu elaphalalayo njengedini lezono zethu.—Funda eyoku-1 kaPetros 1:19; 2:24; 3:18.

2. Sifanele sikukhumbule nini ukufa kukaYesu?

UYesu wafa ngePasika, ngoNisan 14. Usuku lwamaYuda luqala ekutshoneni kwelanga. Ngorhatya olwandulela ukufa kwakhe, uYesu wadla iPasika nabapostile bakhe. Waza emva koko, wasungula isidlo esitsha sokukhumbula ukufa kwakhe.—Funda uLuka 22:14, 15.

Namhlanje, abantu bakaThixo bakhumbula oko kwenziwa nguThixo ngoYesu ukuze akhulule lonke ihlabathi esonweni nasekufeni. (Eksodus 12:5-7, 13, 17) Kanye njengokuba iPasika yayisenziwa kanye ngonyaka, neSikhumbuzo sokufa kukaYesu senziwa kanye ngonyaka emva kokutshona kwelanga ngoNisan 14 ngokwekhalenda yeBhayibhile.—Funda uYohane 1:29.

3. Ngubani ofanele athabathe isonka newayini?

Emva kokuba uYesu enike abafundi bakhe iwayini, wathi: “Le ndebe ithetha umnqophiso omtsha.” (1 Korinte 11:25) Umnqophiso omtsha wathabathel’ indawo uMthetho kaMoses, kuwo uThixo wathembisa amaSirayeli ukuba, ukuba ayamthobela, ayeza kuba ngabantu bakhe. (Eksodus 19:5, 6) Noko ke, uSirayeli akazange alithobele ilizwi likaThixo. Ngoko ke, uYehova wenza umnqophiso omtsha.—Funda uYeremiya 31:31.

Ngalo mnqophiso mtsha, uYehova usikelela abantu abaninzi esebenzisa abantu abambalwa. Abo bakulo mnqophiso bambalwa, bali-144 000 nje kuphela. Ngabo, izigidi eziphuma kuzo zonke iintlanga ziya kusikelelwa ngobomi obungunaphakade kumhlaba oyiparadesi. Abanye kwabo bakumnqophiso omtsha bakhonza uYehova emhlabeni namhlanje. Ngabo kuphela abathabatha isonka newayini kuba le ndebe “ithetha umnqophiso omtsha.”—Funda uLuka 12:32; iSityhilelo 14:1, 3.

4. Singenelwa njani kwiSikhumbuzo?

ISikhumbuzo sokufa kukaYesu esiqhutywa minyaka le lusenza sibe noxabiso olunzulu ngothando lukaYehova olubalaseleyo. Wathumela uNyana wakhe ukuze afele izono zethu. Ngoko ke, xa sisiya eSikhumbuzweni, sifanele sicamngce ngoko kuthethwa kukufa kukaYesu. Sifanele sicinge ngendlela esinokubonisa ngayo uxabiso ngoko uYehova noYesu basenzele kona.—Funda uYohane 3:16; 2 Korinte 5:14, 15.

Ukuze ufumane inkcazelo engakumbi, funda iphepha 206-208 lencwadi ethi, Yintoni Ngokwenene Efundiswa YiBhayibhile?