Ibali Lobomi
“Kwisandla Sakho Sasekunene Kukho Ubumnandi Ngonaphakade”
Kubalisa uLois Didur
Kukangaphi uthetha amazwi anjengala, ‘Akwaba bendingazenzanga ngolu hlobo izinto’? Kodwa ke, kule minyaka ingama-50 ndikwinkonzo yexesha elizeleyo, ayikho into embi endiyaziyo nengapheliyo endiye ndayifumana ngenxa yokuba ndikwisandla sasekunene sikaYehova. Makhe ndikuchazele isizathu sokuba ndithethe loo nto.
NDAZALELWA kwiilali zaseSaskatchewan eKhanada ngowe-1939, ndinoodadewethu abane kwakunye nomntakwethu. Kwakumnandi ukuphila ezifama. Ngenye imini, uTata watyelelwa ngamaNgqina kaYehova, yaye ndawabuza enoba uThixo unalo igama kusini na. Asityhilela iNdumiso 83:18 ethi igama lakhe nguYehova. Loo nto yandenza ndafuna ukwazi okungakumbi ngoThixo neLizwi lakhe.
Ngaloo minyaka, abantwana basezifama babefunda kwizikolo zasezilalini ezinegumbi elinye de bafike kwibanga lesithandathu. Babekhwela amahashe okanye bahambe imigama emide ngeenyawo. Utitshala wayenyanyekelwa ziintsapho ezikweso sithili. Ngomnye unyaka, yaba lithuba labazali bam ukunyamekela utitshala omtsha, uJohn Didur.
Ndingazi mna, kwathi kanti naye lo mfana unomdla kwiLizwi likaThixo. Ngaphambili ndandibuthanda ubukomanisi nobusoshiyali kuba noTata wayebuxhasa. Ngeliphantsi uJohn waphendula ngelithi: “Akakho umntu onelungelo lokulawula abanye abantu. NguThixo kuphela onelungelo lokwenjenjalo.” Loo nto yakhokelela kwiincoko ezininzi ezimnandi kunye naye.
Njengoko wayezelwe ngowe-1931, uJohn wayevile ngeenzingo zemfazwe. Xa kwaqhambuka iMfazwe yaseKorea ngowe-1950, wabuza abefundisi abaninzi becawa ngegalelo labo kule mfazwe. Ekuphela kwento awayixelelwayo kukuba yamkelekile into yokuba amaKristu abe nenxaxheba emfazweni. Kamva, wawabuza umbuzo ofanayo amaNgqina kaYehova. Ambonisa ukuma kwawo okuchazwe eZibhalweni nokwathathwa ngamaKristu enkulungwane yokuqala ngokuphathelele imfazwe. UJohn wabhaptizwa ngowe-1955. Nam ndabhaptizwa, kunyaka olandela lowo. Sobabini sasisazi ukuba sifuna ukukhonza uYehova ngamandla ethu ubomi bethu bonke. (INdu. 37:3, 4) NgoJulayi 1957, ndatshata noJohn.
Nyaka ngamnye owawuphela sitshatile, sasisiya endibanweni yesithili. Kwakuba mnandi gqitha ukuba phakathi kwamawakawaka abantu abawuhlonelayo umtshato. Indibano yokuqala yezizwe ngezizwe esaya kuyo yayingowe-1958. Sibahlanu sasuka ngemoto eSaskatchewan saya kutsho kwisiXeko saseNew York. Yaphela gungqu iveki, sihamba ngemoto emini size silale ententeni busuku ngabunye. Sothuka ngokwenene xa sadibana nomnye umzalwana eBethlehem, ePennsylvania waza wasimema ukuba siye kulala emzini wakhe ngobo busuku! Ukuba yimvuzemvuze kwakhe kwasinceda safika kwisiXeko saseNew York sicocekile sibahle. Loo ndibano inkulu ngendlela engathethekiyo yabethelela kuthi uyolo olungenambaliso lokukhonza uYehova! Nomdumisi wathi, “kwisandla sakho sasekunene kukho ubumnandi ngonaphakade.”—INdu. 16:11.
NGOXA SASINGOOVULINDLELA
Emva konyaka, ngowe-1959, sasingoovulindlela yaye sasihlala kwikharavani encinane, kwenye ilali ephezulu eSaskatchewan. Xa umi apho wawunokubona ukuya kutsho kumgama oziikhilomitha eziliqela yaye ezinye kwezi khilomitha zazikwintsimi yethu.
Ngenye imini, safumana ileta evuyisayo evela kwiofisi yesebe. Ndabaleka ndaya kwindawo uJohn awayesebenza kuyo ngetrekta. Kule leta sasinikwa isabelo sokuba ngoovulindlela abakhethekileyo eRed Lake, eOntario. Ekubeni sasingayazi le ndawo, sakhawuleza sayikhangela ezimephini.
Le ndawo yayahluke lee kwamanye amaphandle! Sasisele sikufutshane namahlathi ashinyeneyo needolophana ezingakwimigodi yegolide. Njengoko sasikhangela indawo yokuhlala, seviwa yenye intwazana ngoxa sasincokola nelinye ibhinqa elihlala kufutshane nakowayo. Yabaleka yaya kuxelela unina, owathi yena wasinika indawo yokulala ngobo busuku. Ibhedi yayikwigumbi elingaphantsi elakhiwe ngodaka. Ngemini elandelayo, safumana indawo kwindlu enamagumbi amabini neyakhiwe ngezinti engenayo imibhobho yamanzi, engenafanitshala, ekuphela kwento eyayilapho yimbawula. Sathenga izinto ezimbalwa kwivenkile ethengisa izinto ezisebenzileyo yaye sakhawuleza saneliseka yiloo ndawo.
Lalingekho ibandla elinganeno komgama oziikhilomitha ezingama-209. Abantu abaninzi ababesebenza kwimigodi yegolide babevela eYurophu, yaye basicela ukuba sibaphathele iiBhayibhile ngeelwimi zabo. Ngethutyana nje, sasisele siqhuba izifundo zeBhayibhile ezinomdla ezingama-30. Kwisithuba seenyanga ezintandathu, kwasekwa ibandla elincinane.
Umyeni wenye inkosikazi esasiyiqhubela isifundo wafowunela umfundisi wecawa yakhe ukuba aze kuchazela le nkosikazi isizathu sokuba le nto sasiyifundisa yona iphosakele. Lo mfundisi wathi, besifanele ukuba phakathi kwezinye izinto sifundisa uBathathu Emnye. Le nkosikazi yakhupha iBhayibhile yamaKatolika yaza yacela umfundisi ukuba axhase ezo zinto wayezithetha. Wayitshitshilizisa phezu kwetafile le Bhayibhile, esithi akuyomfuneko ukuba axhase nto. Njengoko wayehamba, ngesiUkraine wathi bamele basigxothe kwelo khaya bangaze baphinde basivumele singene. Wayengazi ukuba uJohn uyasiva isiUkraine!
Akuzange kube kudala emva koko, kwafuneka simke eRed Lake ngenxa yokuba uJohn wayeza kuqeqeshelwa umsebenzi wesiphaluka. Noko ke, malunga nonyaka emva koko, xa uJohn wayenikela intetho yobhaptizo kwindibano yesithili, umyeni walaa nkosikazi wayephakathi kwabo baza kubhaptizwa! Isiganeko esibandakanya umfundisi sabangela ukuba afune ukuziphandela ngokwakhe oko kuthethwa yiBhayibhile.
UKUXAKEKA KUMSEBENZI WOKUHAMBAHAMBA
Kumsebenzi wesiphaluka, saba nelungelo elingathethekiyo lokuhlala neentsapho ezininzi ezahlukahlukeneyo. Sakha ubuhlobo obusenyongweni nabo basivulela amakhaya neentliziyo zabo. Ngesinye isihlandlo sasihlala kwigumbi eliphezulu elalingenamlilo wokusifudumeza ebusika. Udade osele ekhulile wayevuka ekuseni sisalele aze ngaphandle kokusiphazamisa asilayitele isitovu esincinane. Kwakungabi kudala abuye nesitya esinamanzi ashushu ukuze sikwazi ukuhlamba silungele olo suku. Ukuzola kwakhe nokwenza izinto ngobunono kwandifundisa lukhulu.
Umsebenzi wokuhambahamba wandinceda ndasondela kuYehova. Kwakukho omnye udade owayehlala kwisiphaluka saseAlberta esinedolophu enemigodi nekuMntla Okude. Intlangano kaYehova yayimjonga njani loo dade uhlala kwanti? Rhoqo emva kweenyanga ezintandathu, sasikhwela inqwelo-moya siye kuchitha iveki yonke sisebenza naye entsimini size siqhube iintlanganiso kunye naye ngokungathi usebandleni elikhulu. Loo nto yayisisikhumbuzo esihle sokuba uYehova ubanyamekela ngothando bonke abo bafana namatakane ezimvu.
Saqhubeka sinxibelelana nabo babesinika indawo yokuhlala. Loo nto indikhumbuza esinye sezinto zokuqala endaziphiwa nguJohn—ibhokisi emibalabala ezele amaphepha okubhala. Sasikuthanda gqitha ukunxibelelana nabahlobo bethu ngokubabhalela iileta ngaloo maphepha. Ndisayithanda nangoku loo bhokisi.
Ngoxa sasikumsebenzi wesiphaluka eToronto, safowunelwa ngomnye umzalwana weBheteli yaseKhanada, ebuza enoba besingathanda kusini na ukuza kuhlala eBheteli. Wayefuna ukuphendulwa nini? “Ngengomso ukuba kwakunokwenzeka!” Samphendula ke ngemini elandelayo.
UKUKHONZA EBHETELI
Sihlandlo ngasinye sitshintsha isabelo siye sasibonisa iinkalo ezahlukahlukeneyo zobumnandi obusesandleni sikaYehova. Oko kwaqhubeka ukuya kwethu eBheteli ngowe-1977. Ukunxulumana nabathanjiswa kwasinika ithuba lokunganeli nje ukubona ubuntu babo obahlukahlukeneyo kodwa kwanendlela abalixabisa ngayo iLizwi likaThixo.
Ubomi obutsha baseBheteli babumnandi kakhulu. Ngokomzekelo iimpahla zethu zazihlala edroweni kunasesutkheysini, yaye sasikwibandla elinye. Ngaphandle kwesabelo sam, ndandisoloko ndikuthanda ukukhenkethisa amaqela abantu abatyeleleyo. Ndandichaza umsebenzi owenziwa eBheteli, ndiphulaphule amagqabaza abazalwana abatyeleleyo ndize ndiphendule imibuzo yabo.
Iminyaka yahamba ngokukhawuleza yaye ngowe-1997, uJohn wacelwa ukuba aye kwiSikolo Samalungu eKomiti Yesebe ePatterson, eNew York. Emva koko, sabuzwa enoba singathanda kusini na ukufudukela eUkraine. Sakhuthazwa ukuba siyicingisise loo nto size siyithandazele. Ngaloo ngokuhlwa, sasisele sizixelele ukuba siyasamkela eso sabelo.
SAPHINDA SATSHINTSHELA EUKRAINE
Sasiye kwindibano enkulu yezizwe ngezizwe eSt. Petersburg, eRashiya ngowe-1992, saza saya kwenye eyayiseKiev, eUkraine ngowe-1993. Ezo ndibano zasenza sabathanda abazalwana bethu baseMpuma Yurophu. ELviv, eUkraine, sasihlala kumgangatho wesibini wendlu endala. Iifestile zethu zazijonge ngakwenye iyadi enegadi encinane, umqhagi omkhulu obomvu nezikhukukazi eziliqela. Kwakungathi sikwifama yaseSaskatchewan. Kuloo ndlu sasihlala silishumi elinesibini. Ntsasa nganye kwakuye kufuneke sikhwele, sidlule esixekweni xa sisiya kusebenza eBheteli.
Sasiziva njani ngokuba seUkraine? Kwakusenza sizive sithobekile ukuhlala nabaninzi ababetyhubele iimvavanyo, babona ukuvalwa komsebenzi, baza abanye bavalelwa. Sekunjalo babenokholo olomeleleyo. Xa sibancoma, babedla ngokuthi, “Oko sakwenzela uYehova.” Abazange bazive ngathi bashiywe enyanyeni. Nangoku, ukuba ubulela umntu okwenzele ububele, uye aphendule athi, “Masibulele uYehova,” ebonisa ukugqala uMthombo wazo zonke izinto ezintle.
Abantu abaninzi eUkraine bahamba ngeenyawo ukuya ezintlanganisweni, ngoko banexesha lokuncokola nelokukhuthazana. Bayayithatha iyure nangaphezulu behamba ngeenyawo. Kukho amabandla angaphezu kwama-50 eLviv, angama-21 kuwo asebenzisa iiHolo zoBukumkani ezikwindawo enkulu. NgeeCawa, kuba kuhle kakhulu ukubukela imiqodi yabazalwana isiya ezintlanganisweni.
Sakhawuleza sonwaba phakathi kwabazalwana noodade, abanobulali nabakulungeleyo ukunyamekela abanye. Xa ndisokola ukuqonda ulwimi oluthile, ngxaki leyo endisenayo nangoku babendithantamisa kakhulu. Ububele babo buyadibana nezinto abazithethayo.
Ukuthembana phakathi kwabazalwana bethu kwabonakala ngowama-2003 kwindibano yezizwe ngezizwe eyayiseKiev. Sasisandul’ ukuhla kwisikhululo sikaloliwe esasinabantu abaninzi xa kweza kuthi intwazana yaza isebeza yathi, “Ndilahlekile. Andimboni umakhulu.” Le ntwazana yayibone iibheji zethu yaza yaqonda ukuba singamaNgqina. Yayingoyiki yaye ingalili. Inkosikazi yomveleli wesiphaluka eyayikunye nathi yayisa kwiSebe Lezilahlekileyo Nezifunyenweyo elalikwibala lendibano. Akuzange kube kudala wafunyanwa umakhulu wale ntwazana. Yandichukumisa gqitha indlela eyasithemba ngayo le ntwazana, nakuba sasingamawakawaka kuloo ndibano.
NgoMeyi 2001, abazalwana abasuka kumazwe ngamazwe beza eUkraine kunikezelo lwesebe lethu elitsha. Emva kwentetho ekhethekileyo eyayisebaleni kusasa ngeCawa, abazalwana abaninzi benyuka ngendlela beze kubona iBheteli entsha. Andinakuze ndiyilibale loo mini! Ndakuvuyela nokubona aba bazalwana behamba ngocwangco. Kwalenza nzulu uxabiso lwam ngobumnandi obufumaneka ngokukhonza uThixo.
UTSHINTSHO OLUKHAWULEZILEYO
Ngelishwa, ngowama-2004 uJohn waxelelwa ukuba unomhlaza. Saya eKhanada ukuze afumane unyango. Ukuqala kwakhe ukwenza ichemotherapy kwakunzima kakhulu ukumelana nayo kangangokuba wahlala kangangeeveki eziliqela ekwicandelo labantu abagula kakhulu. Okuvuyisayo kukuba wabuyela ezingqondweni. Nangona kwakunzima ukuthetha, wawubona emehlweni akhe ukuba uyakuxabisa ukuza kubonwa.
Kodwa akazange aphinde aphile, wasweleka ngelo kwindla. Kwakungathi ndihluthwe into enkulu. Mna noJohn siye sakuvuyela ukukhonza uYehova kunye. Ndandiza kuyithini le nto? Ndakhetha ukubuyela eUkraine. Ndinombulelo ongazenzisiyo ngothando lokwenene lwentsapho yaseBheteli nolwabazalwana bebandla endikulo.
Asizange nanini na sizisole ngezigqibo esazenzayo. Sibunandiphile ubomi njengoko besinxulumana nabona bahlobo bethu basenyongweni. Ndiyazi ukuba ziseninzi izinto endisamele ndizifunde ngokulunga kukaYehova, yaye ndinethemba lokuqhubeka ndikwinkonzo yakhe ngonaphakade kuba ngokwenene ndibufumene ‘ubumnandi kwisandla sikaYehova sasekunene.’
[Amagama acatshulweyo akwiphepha 6]
“Asizange nanini na sizisole ngezigqibo esazenzayo”
[Umfanekiso okwiphepha 3]
Ukutshata kwam noJohn
[Umfanekiso okwiphepha 4]
Xa ndandinguvulindlela okhethekileyo eRed Lake, eOntario
[Umfanekiso okwiphepha 5]
NdiseUkraine noJohn ngowama-2002