Kutheni AmaKristu Ebhaptizwa?

Eli nqaku libuza imibuzo ekunokwenzeka ukuba ukhe wazibuza yona lize likubonise iimpendulo zalo eBhayibhileni. AmaNgqina kaYehova aya kukuvuyela ukuthetha nawe ngeempendulo zale mibuzo.

1. Kuthetha ntoni ukubhaptizwa komKristu?

UBhaptizo sisicelo sokuba nolwalamano oluhle noThixo. Ngenxa yoko, umKristu umele abhaptizwe, kungekhona xa elusana, kodwa xa sele emdala ngokwaneleyo ukuba angakwazi ukufunda ngoThixo aze abe ngumfundi kaYesu. (IZenzo 8:12; 1 Petros 3:21) Siba ngabafundi bakaYesu xa sifunda size senze izinto asiyalela zona.—Funda uMateyu 28:19, 20.

Ngemihla yabapostile bakaYesu, abantu abaninzi abazange balibazise bafunda ngoThixo noYesu. Ngokomzekelo, xa enye indoda yafunda ngokuba ukufa kukaYesu kwavula ithuba lokusindiswa, yaba ngumfundi ngoko nangoko. Namhlanje abantu abaninzi baye bakhetha ukuba ngabalandeli bakaYesu.—Funda iZenzo 8:26-31, 35-38.

2. Kwakutheni ukuze abhaptizwe uYesu?

UYesu wayemalunga neminyaka engama-30 ubudala xa uYohane umBhaptizi wamntywilisela emanzini kuMlambo iYordan. Ukubhaptizwa kukaYesu kwakubonisa ukuba uyavuma ukwenza ukuthanda kukaThixo. (Hebhere 10:7) Oku kwakuza kuquka ukunikela ngobomi bakhe njengedini lezono zabantu. Kwanangaphambi kokuba ehle ezulwini aze kuphila emhlabeni, uYesu wayesoloko emthanda yaye emthobela uYise, uYehova.—Funda uMarko 1:9-11; Yohane 8:29; 17:5.

3. Kutheni umKristu efanele abhaptizwe?

Imeko yethu yahlukile kwekaYesu—sizalwa singaboni. Nakuba kunjalo, ukufa kukaYesu okulidini kwenza sibe nolwalamano oluhle noThixo. (Roma 5:10, 12; 12:1, 2) Siyakwazi ukuba ngamalungu entsapho yakhe. (2 Korinte 6:18) Silifumana njani elo lungelo? Senza umthandazo ngasese sizinikela kuYehova, size senze isifungo sokuba siza kwenza ukuthanda kukaThixo ubomi bethu bonke. Emva kokuzinikela, siyabhaptizwa.—Funda uMateyu 16:24; 1 Petros 4:2.

4. Ungakulungiselela njani ukubhaptizwa?

AmaNgqina kaYehova afunda iBhayibhile naye nabani na ofuna ukusondela kuThixo. Ukufunda iBhayibhile nokuya kwiintlanganiso zamaKristu kuya kulomeleza uthando lwakho ngoThixo nokholo lwakho kuye. Kwakhona kuya kukunceda uhlakulele isimo sengqondo esihle nemikhwa emihle. Ukwakha uthando, ukholo nezinye iimpawu zobuthixo kuya kukunceda uphile ngokuvisisana nesifungo sakho sokukhonza uYehova ngonaphakade.—Funda uYohane 17:3; Hebhere 10:24, 25.

Ukuze ufumane inkcazelo engakumbi, funda isahluko 18 sencwadi ethi, Yintoni Ngokwenene Efundiswa YiBhayibhile?, epapashwe ngamaNgqina kaYehova.