Kholosa NgoYehova—UThixo ‘Wamaxesha Namathuba’

“Yena utshintsha amaxesha namathuba, amisele ookumkani.”—DAN. 2:21.

UBUYA KUPHENDULA UTHINI?

Indalo nokuzaliseka kweziprofeto zibonisa njani ukuba uYehova nguMgcini-xesha Ozukileyo?

Ukwazi ukuba uYehova unguThixo ‘wamaxesha namathuba’ kusikhuthaza ukuba senze ntoni?

Kutheni ubalo-maxesha lukaYehova lungalawulwa ziziganeko nazizinto ezicetywe ngabantu?

1, 2. Yintoni ebonisa ukuba uYehova uliqonda ngokupheleleyo ixesha?

UYEHOVA UTHIXO wenza ilungiselelo lokubala ixesha kwanangaphambi kokuba adale abantu. Ngosuku lwesine lokudala, uThixo wathi: “Makubekho izikhanyiso esibhakabhakeni samazulu ukuze zahlukanise imini nobusuku; yaye zimele zibe yimiqondiso yamaxesha nemihla neminyaka.” (Gen. 1:14, 19, 26) Eneneni, ngokuvumelana nokuthanda kukaYehova oko kwenzeka.

² Noko ke, nangoku, izazinzulu zisaxoxa ngendlela ixesha elisebenza ngayo. Enye intyilalwazi yathi: “Ixesha yenye yezona ntsumantsumane ehlabathini lonke. Akakho umntu onokukwazi ukulichaza kakuhle.” Sekunjalo, uYehova uliqonda ngokupheleleyo. Ngapha koko, ‘unguMdali wamazulu, . . . uMyili womhlaba noMenzi wawo, owuzinzise ngokuqinileyo.’ Kwakhona uYehova ‘nguLowo uxela ukuphela kwasekuqaleni, kwakudala izinto ebezingekenziwa.’ (Isa. 45:18; 46:10) Ngenjongo yokuqinisa ukholo lwethu kuThixo nakwiLizwi lakhe, iBhayibhile, makhe sihlolisise indlela indalo nokuzaliseka kweziprofeto okubonisa ngayo ukuba uYehova unguMgcini-xesha Ozukileyo.

INDALO ISIKHUTHAZA UKUBA SIBE NOKHOLO KUMGCINI-XESHA OZUKILEYO

3. Ukuchana kwexesha kuye kwabonwa njani ehlabathini?

³ Ehlabathini, ixesha elichanileyo linokubonwa kusetyenziswa imikroskopu. Iiathom zishukuma ngomlinganiselo ongatshintshiyo. Iiwotshi ezisebenzisa iathom ukubala ixesha, azize zilibhude enoba kungadlula iminyaka engama-80 ezigidi. Kwakhona umjikelo wezijikelezi-langa neenkwenkwezi usoloko uchanile. Umjikelo wazo esibhakabhakeni uye wanceda abantu bakwazi ukuqonda amaxesha onyaka nokufumana iindlela ezichanileyo zokukhenketha. UYehova—uMenzi wezi athom neenkwenkwezi—ngokuqinisekileyo ‘womelele ngamandla’ yaye sifanele simzukise.—Funda uIsaya 40:26.

4. Izidalwa eziphilayo ziye zabubonisa njani ubulumko bukaThixo?

⁴ Ukuchana kwexesha kunako ukubonwa nakwizinto eziphilayo. Kuyabonakala ukuba izityalo ezininzi kunye nezilwanyana zinewotshi ngaphakathi kuzo. Iintaka ezininzi ngenxa yethuku, ziyalazi ixesha ezimele ziluqalise ngalo uhambo lwazo. (Yer. 8:7) Nabantu ngokwabo balawulwa lixesha, ngokuqhelekileyo imizimba yabo yiyo ebaxelelayo ukuba kukusasa okanye kuhlwile ngoku. Ukuba sisebenzisa inqwelo-moya ukuya kwelinye ilizwe apho ixesha lahlukileyo kwelo siliqhelileyo, imizimba yethu isenokuthatha iintsuku ngaphambi kokuqhela ixesha elitsha. Enyanisweni, mininzi imizekelo yokuchana kwamaxesha kwindalo, ebonisa amandla nobulumko bukaThixo ‘wamaxesha namathuba.’ (Funda iNdumiso 104:24.) Eneneni, uMgcini-xesha Ozukileyo unobulumko ngokupheleleyo yaye unamandla angenakuthelekiswa nanto. Ngoko sinokuba nokholo lokuba unako ukuphumeza oko akuthandayo!

IZIPROFETO EZIZALISEKA NGEXESHA ELILILO ZOMELEZA UKHOLO

5. (a) Yiyiphi ekuphela kwendlela esinokulazi ngayo ikamva loluntu? (b) Kutheni uYehova ekwazi ukuzichaza kwangaphambili iziganeko namaxesha azo?

⁵ Incwadi yendalo isifundisa okuninzi ‘ngeempawu ezingabonakaliyo’ zikaYehova, kodwa isishiya sinemibuzo emininzi engaphendulekiyo enjengothi, lkamva liliqulathele ntoni uluntu? (Roma 1:20) Ukuze sifumane impendulo, simele sifunde oko uThixo akutyhilileyo kwiLizwi lakhe, iBhayibhile. Xa silihlolisisa, sifumana iziprofeto eziye zazaliseka kanye ngexesha elililo! UYehova uyakwazi ukuchaza oko kuseza kwenzeka kuba unako ukubona ikamva eliqinisekisiweyo. Ukongezelela, oko kwachazwa kwangaphambili ziZibhalo kwazaliseka kanye ngexesha elililo, kuba uYehova uThixo unako ukwenza iziganeko zenzeke ngokwenjongo yakhe nangexesha lakhe alimisileyo.

6. Yintoni ebonisa ukuba uYehova ufuna siyiqonde inzaliseko yeziprofeto zeBhayibhile?

⁶ UYehova ufuna abakhonzi bakhe baziqonde iziprofeto eziseZibhalweni baze bangenelwe kuzo. Nangona uThixo engasikelwanga mda yindlela esilibala ngayo ixesha, siyakwazi ukukuqonda oko akutshoyo xa echaza kwangaphambili ukuba isiganeko siza kwenzeka ngexesha elithile. (Funda iNdumiso 90:4.) Ngokomzekelo, incwadi yeSityhilelo ibhekisela ‘kwiingelosi ezine’ ‘eziye zalungiselelwa ilixa nemini nenyanga nonyaka’—amaxesha esiwaqondayo. (ISityhi. 9:14, 15) Ukubona indlela iziprofeto eziye zazaliseka ngayo kanye ngamaxesha amiselweyo kumele kusenze sibe nokholo kuThixo ‘wamaxesha namathuba’ nakwiLizwi lakhe. Makhe sihlolisise imizekelo embalwa.

7. Ukuzaliseka kwesiprofeto sikaYeremiya ngokuphathelele iYerusalem noYuda, kubonisa njani ukuba uYehova unguMgcini-xesha Ozukileyo?

⁷ Okokuqala, makhe sikhangele emva kwinkulungwane yesixhenxe Ngaphambi kweXesha Eliqhelekileyo. “Ngonyaka wesine kaYehoyakim unyana kaYosiya, ukumkani wakwaYuda,” ilizwi loMgcini-xesha Ozukileyo ‘lafika kuYeremiya ngokuphathelele bonke abantu bakwaYuda.’ (Yer. 25:1) UYehova waxela kwangaphambili ngokutshatyalaliswa kweYerusalem nangokuthinjelwa kwamaYuda eBhabhiloni. Apho ayeza ‘kukhonza ukumkani waseBhabhiloni iminyaka engamashumi asixhenxe.’ Ngowama-607 B.C.E., imikhosi yamaBhabhiloni yayitshabalalisa iYerusalem yaye ngokwenene amaYuda athinjwa eBhabhiloni. Kodwa kwakuza kwenzeka ntoni ekupheleni kweminyaka engama-70? UYeremiya waprofeta wathi: “Utsho uYehova wemikhosi ukuthi, ‘Ngokuvisisana nokuzaliseka kweminyaka engamashumi asixhenxe eBhabhiloni ndiya kuphethulela ingqalelo yam kuni, kwaye ndiya kulimisela kuni ilizwi lam elilungileyo ngokunibuyisela kule ndawo.’” (Yer. 25:11, 12; 29:10) Esi siprofeto sazaliseka kanye ngexesha elililo—ngowama-537 B.C.E. emva kokuba amaMedi namaPersi ekhulule amaYuda eBhabhiloni.

8, 9. Iziprofeto zikaDaniyeli ngokuphathelele ukuza kukaMesiya nokumiselwa koBukumkani emazulwini, zibonisa njani ukuba uYehova unguThixo ‘wamaxesha namathuba’?

⁸ Makhe sihlole esinye isiprofeto esibandakanya abantu bakaThixo bamandulo. Kwiminyaka emibini ngaphambi kokuba amaYuda emke eBhabhiloni, uThixo waxela kwangaphambili ngomprofeti uDaniyeli ukuba uMesiya wayeza kuvela kwiminyaka engama-483, emva kokuba umyalelo wokuphinda kwakhiwe iYerusalem ukhutshiwe. UKumkani wamaMedi namaPersi wawukhupha loo myalelo ngowama-455 B.C.E. Kwiminyaka engama-483 kamva—ngowe-29 C.E.—uYesu waseNazarete wathanjiswa ngomoya oyingcwele ngoxa wayebhaptizwa waza waba nguMesiya.a—Neh. 2:1, 5-8; Dan. 9:24, 25; Luka 3:1, 2, 21, 22.

⁹ Ngoku makhe siqwalasele oko iZibhalo zakuxela kwangaphambili mayela noBukumkani. Isiprofeto seBhayibhile sachaza ukuba uBukumkani obungoMesiya buya kumiselwa emazulwini ngowe-1914. Ngokuyinxenye, iBhayibhile yachaza “umqondiso” wobukho bukaYesu, isalatha kwixesha laxa uSathana egxothwa emazulwini, nto leyo eyayiza kuphumela kuyeha omkhulu kuwo umhlaba. (Mat. 24:3-14; ISityhi. 12:9, 12) Ngaphezu koko, isiprofeto seBhayibhile salichaza ngokuthe ngqo ixesha—lowe-1914—‘lokuzaliseka kwamaxesha amisiweyo’ nelokuqalisa kolawulo loBukumkani ezulwini.—Luka 21:24; Dan. 4:10-17b

10. Ziziphi iziganeko eziza kwenzeka ngokuqinisekileyo?

¹⁰ Kungekudala kuza “imbandezelo enkulu” eyachazwa kwangaphambili nguYesu. Iza kulandelwa lulawulo lwakhe Lweminyaka Eliwaka. Liqinisekile elokuba nazo ezi ziprofeto ziya kuzaliseka kanye ngexesha elililo. Xa uYesu wayesemhlabeni, uYehova wayesele ewukhethile ‘umhla nelixa’ eziya kuzaliseka ngawo.—Mat. 24:21, 36; ISityhi. 20:6

‘ZONGELE IXESHA’

11. Ukwazi ukuba siphila kwixesha lesiphelo kumele kusichaphazele njani?

¹¹ Kumele kusichaphazele njani ukwazi ukuba ulawulo loBukumkani sele luqalisile kwanokuba siphila ‘kwixesha lesiphelo’? (Dan. 12:4) Abantu abaninzi baye babona ukuba iingxaki ehlabathini ziya zisanda, kodwa abaqondi ukuba ezi zinto zizalisekisa isiprofeto seBhayibhile esiphathelele imihla yokugqibela. Abanye balindele ukuba le nkqubo yezinto iye isiba mbi kanti abanye bakholelwa kukuba luluntu oluya kuzisa ‘uxolo nonqabiseko.’ (1 Tes. 5:3) Kodwa kuthekani ngathi? Ukuba siyakholelwa ukuba siphila kwimihla yokugqibela yehlabathi likaSathana, ngaba oko akumele kusenze sisebenzise eli xesha liseleyo ukuba sikhonze uThixo ‘wamaxesha namathuba’ size sincede nabanye ukuba bamazi? (2 Tim. 3:1) Masenze izigqibo zobulumko ngendlela esifanele silisebenzise ngalo ixesha.—Funda eyabase-Efese 5:15-17.

12. Sifunda ntoni koko kwathethwa nguYesu ngokuphathelele imihla kaNowa?

¹² ‘Ukuzongela ixesha’ kweli hlabathi lizaliswe ziziphithiphithi akukho lula. UYesu walumkisa wathi: “Kanye njengokuba yayinjalo imihla kaNowa, buya kuba njalo ubukho boNyana womntu.” Yayinjani imihla kaNowa? Kwachazwa kwangaphambili ukuba ihlabathi laliza kufikelela esiphelweni. Ngelo xesha, abantu abangendawo babeza kutshatyalaliswa ngonogumbe. ‘Njengomshumayeli wobulungisa’ uNowa ngokunyaniseka wasivakalisa isigidimi sikaThixo kubantu bomhla wakhe. (Mat. 24:37; 2 Pet. 2:5) Kodwa ‘babesidla, besela, amadoda etshata namabhinqa etshatiswa, . . . kwaye abazange banikele ngqalelo de wafika umkhukula waza wabatshayela bonke.’ Ngoko uYesu wabalumkisa abalandeli bakhe wathi: “Hlalani nilungile, kuba uNyana womntu uza ngelixa eningacinganga ukuba lilo.” (Mat. 24:38, 39, 44) Simele sibe njengoNowa, singabi njengabantu bomhla wakhe. Yintoni enokusinceda sihlale silindile?

13, 14. Yintoni esifanele siyikhumbule ngoYehova neya kusinceda simkhonze ngokuthembeka ngoxa silinde ukuza koNyana womntu?

¹³ Nangona uNyana womntu esiza ngelixa esingacinganga ukuba lilo, sifanele sikhumbule ukuba uYehova unguMgcini-maxesha Ozukileyo. Ubalo-maxesha lwakhe alulawulwa ziziganeko nazizinto ezicetywe ngabantu. UYehova nguye ogqibayo ngexesha ezimele zenzeke ngalo izinto nangomphumo wazo. (Funda uDaniyeli 2:21.) IMizekeliso 21:1 isixelela oku: “Intliziyo yokumkani injengomsinga wamanzi esandleni sikaYehova. Uyisa apho athanda ukuyisa khona.”

¹⁴ UYehova uyakwazi ukulawula iziganeko ukuze kuzaliseke injongo yakhe ngexesha elililo. Ukutshintsha kwezinto ezininzi ehlabathini kuye kwazalisekisa iziprofeto, ngokungakumbi iziprofeto zokushunyayelwa kweendaba ezilungileyo zoBukumkani BukaThixo emhlabeni wonke. Khawucinge nje ngokuwa kweSoviet Union nemiphumo yoko. Bambalwa ababecinga ukuba kwakunokwenzeka utshintsho olukhawuleze kangako kwezopolitiko. Noko ke, ngenxa yolo tshintsho, ngoku iindaba ezilungileyo zishunyayelwa nakumazwe amaninzi apho umsebenzi wethu wawuvaliwe ngaphambili. Ngoko, ngako konke esinako, masizongele ixesha lokukhonza uThixo ‘wamaxesha namathuba’ ngokuthembeka.

BONISA UKHOLO KWINDLELA UYEHOVA ALIBALA NGAYO IXESHA

15. Sinokulubonisa njani ukholo ngokuphathelele utshintsho kwindlela intlangano ezenza ngayo izinto?

¹⁵ Ukuqhubeka nomsebenzi wokushumayela ngoBukumkani kula maxesha esiphelo kufuna ukholo kwindlela uYehova alibala ngayo ixesha. Ukutshintsha kweemeko zehlabathi kusenokufuna kwenziwe utshintsho kwindlela owenziwa ngayo umsebenzi wokwenza abafundi. Maxa wambi intlangano isenokwenza utshintsho olunokunceda thina bavakalisi boBukumkani siwenze lo msebenzi ngokuphumelelayo. Xa sisebenzisana ngokupheleleyo notshintsho, sibonisa ukholo kuThixo ‘wamaxesha namathuba’ njengoko sikhonza ngokuthembeka phantsi koNyana wakhe, ‘intloko yebandla.’—Efe. 5:23.

16. Kutheni sinokuba nokholo lokuba uYehova uya kusinceda ngexesha elifanelekileyo?

¹⁶ UYehova ufuna sithandaze kuye ngokukhululekileyo sinentembelo epheleleyo yokuba uya kusinika ‘uncedo ngexesha elifanelekileyo.’ (Heb. 4:16) Oku kubonisa indlela athanda ngayo ngamnye wethu. (Mat. 6:8; 10:29-31) Xa sithandaza rhoqo sicela uncedo kuYehova size senze ngokuvisisana nemithandazo yethu nolwalathiso lwakhe sibonisa ukholo kuye. Kwakhona, asilibali ukuthandazela abazalwana noodade wethu.

17, 18. (a) Liliphi inyathelo eliya kuthatyathwa nguYehova kungekudala nxamnye neentshaba zakhe? (b) Nguwuphi umgibe esimele siwulumkele?

¹⁷ Ngoku asiloxesha lokuba ‘sixengaxengiswe kukuswela ukholo’; lixesha lokuba nokholo olomeleleyo. (Roma 4:20) Iintshaba zikaThixo—uSathana kunye nabo baphantsi kwempembelelo yakhe—bazama ukuphelisa umsebenzi uYesu awawunika abalandeli bakhe, kuquka nathi. (Mat. 28:19, 20) Nakuba sihlaselwa nguMtyholi, siyazi ukuba uYehova ‘njengoThixo ophilayo, onguMsindisi wazo zonke iintlobo zabantu, ngokukodwa abo bathembekileyo, uyakwazi ukubahlangula esilingweni abantu abanozinikelo lobuthixo.’—1 Tim. 4:10; 2 Pet. 2:9.

¹⁸ Kungekudala, uYehova uza kuyiphelisa le nkqubo ingendawo yezinto. Ngoxa singanikwanga zonke iinkcukacha nexesha okuya kwenzeka ngalo oku, siyazi ukuba ngexesha elifanelekileyo, uKristu uya kuzitshabalalisa iintshaba zikaThixo, yaye ulongamo lukaYehova luya kube luthethelelwe. Noko ke, bekuya kuba yimpazamo enkulu ukungawaqondi ‘amaxesha namathuba’ esiphila kuwo namhlanje! Kwanga singangaze siwele kumgibe wokucinga ukuba “zonke izinto zisaqhubeka kanye njengasekuqaleni kwendalo.”—1 Tes. 5:1; 2 Pet. 3:3, 4.

“BONISA ISIMO SENGQONDO SOKULINDA”

19, 20. Kutheni simele sibonise isimo sengqondo sokulinda ngokuphathelele uYehova?

¹⁹ Injongo kaYehova uThixo yantlandlolo ngabantu yayiquka ixesha elingapheliyo lokuba bafunde ngaye nangendalo yakhe entle. INtshumayeli 3:11 ithi: “Yonk’ into [uYehova] uyenze yantle ngexesha layo. Kwanexesha elingenammiselo ulibeke ezintliziyweni zabo, ukuze uluntu lungaze luwufumane umsebenzi uThixo oyinyaniso awenzileyo ukususela ekuqaleni kuse ekupheleni.”

²⁰ Sivuya ngokwenene kuba uYehova engazange ayitshintshe injongo yakhe ngabantu. (Mal. 3:6) UThixo “akaguquguquki njengesithunzi.” (Yak. 1:17) Ubalo-maxesha lwakhe alulawulwa yindlela abantu ababala ngayo ixesha, njengokujikeleza komhlaba. UYehova ‘nguKumkani kanaphakade.’ (1 Tim. 1:17) Ngenxa yoko, ‘masibonise isimo sengqondo sokulindela kuThixo wosindiso [lwethu].’ (Mika 7:7) Ngokwenene, “yibani nesibindi, yaye ngamana iintliziyo zenu zingomelela, nonke nina balindela kuYehova.”—INdu. 31:24.

[Imibhalo esemazantsi]

[Umfanekiso okwiphepha 19]

UDaniyeli wayenokholo kwinzaliseko yesiprofeto esasivela kuThixo

[Umfanekiso okwiphepha 21]

Ngaba ixesha ulisebenzisa kakuhle ukuze wenze ukuthanda kukaYehova?