Ngaba IBhayibhile Yincwadi Efana Nje Nezinye Iincwadi?

“Sonke iSibhalo siphefumlelwe nguThixo kwaye siyingenelo. . . , ukuze umntu kaThixo awufanelekele aze awuxhobele ngokupheleleyo wonke umsebenzi olungileyo”—2 Timoti 3:16, 17.

ABANYE abantu abavumelani nala mazwi acatshulwe ngasentla. Kuthekani ngawe? Yiyiphi kwezi ndlela zilandelayo eyichaza kakuhle imbono yakho ngeBhayibhile?

• Yincwadi enkqenkqeza phambili.

• Yenye yeencwadi ezingcwele ezibalulekileyo

• Yincwadi yamandulo enemilinganiselo yokuziphatha ephakamileyo

• IliLizwi likaThixo

Umbuzo obalulekileyo ngowokuba, Ngaba ibalulekile into yokuba yintoni oyikholelwayo? Khawuve ukuba ithini yona iBhayibhile: “Zonke izinto ezabhalwa kwixesha langaphambili zabhalelwa ukuyalela thina, ukuze ngonyamezelo lwethu nangentuthuzelo yeZibhalo sibe nethemba.” (Roma 15:4) Ngaloo ndlela iBhayibhile ithi yenzelwe ukusifundisa, ukusithuthuzela nokusinika ithemba.

Noko ke, ukuba iBhayibhile yincwadi nje yenkcubeko okanye enye yeencwadi ezingcwele, ngaba ibinokukwazi ukukufundisa nokukhokela intsapho yakho, ngokukodwa ukuba isigidimi sayo sahlukile koko ucinga ukuba kulungile? Ukuba iBhayibhile ibiyincwadi yeentsomi, ngaba ibinokukwazi ukukuthuthuzela uze ufumane ithemba kwizithembiso zayo?

Kwelinye icala, izigidi zabantu ezifunde iBhayibhile zeyisekile ukuba iliLizwi likaThixo. Ngoba? Yintoni eyahlula iBhayibhile kwezinye iincwadi? Siyakucela ukuba uhlole iinkalo ezintlanu ekuthethwa ngazo kula manqaku alandelayo ezenza iBhayibhile yahluke.