Kutheni amaNgqina kaYehova Eshumayela Kwindlu Ngendlu?

▪ EBhayibhileni, sifumana lo myalelo kaYesu uya kubafundi bakhe: “Hambani ke ngoko niye kubenza abafundi abantu beentlanga zonke, . . . Nibafundisa.” (Mateyu 28:19, 20) Ngaba lo myalelo usebenza kuwo onke amaKristu? Abafundi benkulungwane yokuqala bakaYesu babewuqonda ngaloo ndlela. Ngokomzekelo, umpostile uPetros wathi: “[UYesu] wasiyalela ukuba sishumayele ebantwini nokuba sinikele ubungqina obucokisekileyo.” (Izenzo 10:42) Umpostile uPawulos wabhala wathi: “Kuba oko kuyimfuneko. Yeha ke mna ukuba andizivakalisanga iindaba ezilungileyo!”—1 Korinte 9:16.

AsingoPawulos noPetros kuphela kodwa onke amaKristu enkulungwane yokuqala awuthobela lo myalelo kaYesu. Ukushumayela yayingowona msebenzi wawo uphambili. (IZenzo 5:28-32, 41, 42) Namhlanje amaNgqina kaYehova azama ukwenza loo nto. Ashumayela isigidimi esasishunyayelwa nguYesu, “Ubukumkani bamazulu.”—Mateyu 10:7.

Sifanele sishunyayelwe kubani isigidimi soBukumkani? UYesu wabonisa ukuba sifanele sishunyayelwe kubo bonke abantu naphi na. Waxelela abafundi bakhe ukuba: “Niya kuba ngamangqina am . . . nakwezona nxalenye zikude zomhlaba. (IZenzo 1:8) Wade wachaza nokuba ngaphambi kokupheliswa kwale nkqubo yezinto, “ezi ndaba zilungileyo zobukumkani ziya kushunyayelwa kuwo wonke umhlaba omiweyo.” (Mateyu 24:14) Ukuze aphumeze lo myalelo amaKristu enkulungwane yokuqala ayezama ukuthetha nabo bonke abantu, kungekhona abo baqhenele nabo kuphela okanye abangayihambiyo icawa. (Kolose 1:23; 1 Timoti 2:3, 4) Ngendlela efanayo namhlanje amaNgqina kaYehova azama ukushumayela kubo bonke abantu.a

Yiyiphi eyona ndlela iphumelelayo yokusasaza isigidimi soBukumkani? UYesu, owayeyazi indlela yokufikelela abona bantu baninzi, wathumela abafundi bakhe ezixekweni, ezidolophini nakumakhaya abantu. (Mateyu 10:7, 11, 12) Emva kokuba uYesu eswelekile waza wavuswa, abafundi bakhe baqhubeka beshumayela “kwizindlu ngezindlu.” (IZenzo 5:42) Njengokuba uYesu wenzayo, babeshumayela nangokungacwangciswanga nakwiindawo zikawonkewonke. (Yohane 4:7-26; 18:20; IZenzo 17:17) Namhlanje, amaNgqina kaYehova asebenzisa ezo ndlela ukuze ashumayele kubo bonke abantu.

UYesu wabonisa ukuba asinguye wonke umntu owayeza kuphulaphula. (Mateyu 10:14; 24:37-39) Ngaba loo nto imele iwatyhafise amaKristu kumsebenzi wokushumayela? Khawucinge ngale meko: Ukuba ubukwiphulo lokuhlangula abantu emva kwenyikima enkulu, ngaba ubuza kuyeka ukukhangela abantu kuba uye wafumana abantu abambalwa? Ubuza kuqhubeka lo gama kusekho ithemba lokuhlangula umntu omnye. UYesu wayalela abafundi bakhe ukuba bazingise lo gama kusekho ithemba lokufumana abanye abantu abaya kusabela kwiindaba ezilungileyo zoBukumkani bukaThixo. (Mateyu 10:23; 1 Timoti 4:16) Ngokubakhangela kwindlu ngendlu, amaNgqina kaYehova abonisa ukuba ayamthanda uThixo nommelwane, kuba ubomi babo buxhomekeke ekuveni isigidimi soBukumkani.—Mateyu 22:37-39; 2 Tesalonika 1:8.

Iphephancwadi olifundayo lidlulisela eso sigidimi seBhayibhile. Ukuze ufumane inkcazelo engakumbi, thetha namaNgqina kaYehova xa eze kutyelela kwixesha elizayo okanye ubhalele abapapashi beli phephancwadi.

[Umbhalo osemazantsi]