Ngaba Imithandazo Iphulaphulwa Nangubani Na?

“Ndandidla ngokuthandabuza ukuba uThixo ukho. Sekunjalo, ngamanye amaxesha ndandiye ndithandaze. Ndandingaqinisekanga ukuba ukho umntu ondiphulaphuleyo, kodwa mandivume ukuba ndandisiba nalo ithemba lokuba ukho umntu ondiphulaphuleyo. Ndandingonwabanga yaye ubomi bam babungenanjongo. Ndandikoyika ukukholelwa kuThixo kuba ndandicinga ukuba ngabantu ababuthathaka kuphela abakholelwa kuThixo.”—UPATRICIA,a EIRELAND.

NGABA nawe uvakalelwa ngendlela efanayo nekaPatricia? Ngaba uyathandaza enoba unamathandabuzo ngobukho bukaThixo? Ukuba kunjalo, asinguwe wedwa okuloo meko. Khawuqwalasele oku kulandelayo.

◼ Uhlolisiso oluye lwenziwa kubantu baseBritani abangama-2 200 lutyhile ukuba ngabantu abangama-22 ekhulwini kuphela abakholelwa ukuba ukho uThixo owadala ihlabathi noyiphulaphulayo imithandazo. Nakuba kunjalo, abangama-55 ekhulwini bathandaza manqaphanqapha.

◼ Uhlolisiso lwabantu abali-10 000 kumazwekazi amane lubonise ukuba, abamalunga nama-30 ekhulwini nabangakholelwayo kubukho bukaThixo bayathandaza.

Kutheni Benamathandabuzo Nje?

Enye indoda eliNgesi enguAllan ithi: “Ndandidla ngokuthi andikholelwa kuThixo kuba ndandicinga ukuba unqulo luye lasekwa ngenjongo yokulawula abantu nokushishina. Kwakhona, ndaqiqa ngelithi, ukuba uThixo ukho, ngekungagqubi okungekho sikweni okungaka. Sekunjalo, ngamanye amaxesha ndandikhe ndithethe ‘kwinto endingayaziyo.’ Ndandikhe ndizibuze nokuba, ‘Ndabakho njani?’”

Mntu ngamnye onezo mvakalelo unezizathu zakhe zokungakholelwa ukuba iyaphendulwa imithandazo. Kwiimeko ezininzi, amathandabuzo abangelwa yimibuzo engaphendulekiyo, enjengale ilandelayo:

◼ Ngaba ukho uMdali?

◼ Kutheni unqulo lunempembelelo embi nje?

◼ Kutheni uThixo evumela ukubandezeleka?

Ukuba ubuzazi iimpendulo zale mibuzo, ngaba ubuya kuba nentembelo engakumbi ekuthandazeni?

[Umbhalo osemazantsi]